དཀར་བརྗིད་སྟོང་དཔོན་གྱི་གཞིས་ར།

རྩོམ་སྒྲིག   དོན་འགྲུབ་མཚོ།   ཡོང་ཁུངས།   མཚོ་སྔོན་པོ་དྲ་བ།   བཤེར་འབེབས།   རིན་ཆེན་ཚེ་རིང་།

གཞིས་ར་འདི་ནི་དཀར་བརྗིད་ཡུལ་ཚོའི་ཨ་མ་མཚོ་འཁྱིལ་དང་ཨ་མྱེས་གདོང་རིའི་དབུས་སུ་ཡོད་པའི་ཨ་མྱེས་སྒོ་རྩེ་འདབས་རོལ་དུ་དཔལ་ཁ་ཅོག་ལ་མཚལ་རྩེའམ་སྟོབས་ལྡན་སྒང་ལ་གཏད་དེ་བཞེངས་སྐྲུན་བྱས་འདུག་ལ།  ལོ་རྒྱུས་ཡིག་ཚང་ལྟར་ན་གཞིས་ར་འདིར་སྤྱི་ལོ(1788-2024)ལོའི་བར་གྱི་ལོ་ངོ་ཉིས་བརྒྱ་ལྷག་གི་ལོ་རྒྱུས་ཡོད་པ་དང་།  དཔོན་རབས་བཅུ་ཡོད་དེ།  དཔོན་རབས་དང་པོ་པདྨ་ཆོས་འཕེལ་སྤྱི་ལོ(1788-1826)ལོའི་བར་དང་།  དཔོན་རབས་གཉིས་པ་ཀུན་ནེ་སྤྱི་ལོ(1826-1854)ལོའི་བར།  དཔོན་རབས་གསུམ་པ་རྒྱ་མཚོ་སྤྱི་ལོ(1854-1883)ལོའི་བར།  དཔོན་རབས་བཞི་བ་འཇིགས་མེད་རྡོ་རྗེ་སྤྱི་ལོ(1883-1911)ལོའི་བར།  དེའི་སྐུ་རིང་ལ་སྒོ་མེ་ཚོ་དགུ་གནམ་ཐང་ཨ་རིག་ཆུ་སྔོན་མན་ཆད།  ཞིན་ཧེ་རྫོང་ཡོངས་དང་བཏུལ་ཐང་གསུམ་རྣམས་སྒོ་མེ་གོང་མ་ཡིན་པ་དང་།  གུང་ཧོ་རྫོང་ཡོངས་དང་མཚོ་ནུབ་ཁུལ་དུར་ལམ་རྫོང་སྒོ་མེ་ཞང་ཁ།  ཁྲི་ཀ་རྫོང་ལྷ་ཁང་ཐང་གུང་ཧྲེ་ཡོངས་སྒོ་མེ་བར་མ་ཡིན།  ཧོང་ཡོན་རྫོང་འབུམ་ཁང་སྡེ་བའི་ཤར་ཕྱོགས་ནས་གཡུ་ཚ་གུང་ཧྲེ།  ལྕང་རའི་ཤིང་སྒོ་ཡན་ཆད་སྒོ་མེ་ཞོལ་མ་ཡིན།  དཔོན་རབས་ལྔ་བ་བྱམས་པ་སྤྱི་ལོ(1911-1920)ལོའི་བར།  དཔོན་རབས་དྲུག་པ་དཔོན་པོ་ལྷ་འབྲུག(ཨ་ག་ཆེ་ཡང་ཟེར)སྤྱི་ལོ(1920-1943)ལོའི་བར།  དཔོན་རབས་བདུན་པ་ནོར་བུ་སྤྱི་ལོ(1943-1945)ལོའི་བར།  དཔོན་རབ་བརྒྱད་པ་སྟོབས་ལྡན་སྤྱི་ལོ(1945-1948)ལོའི་བར།  དཔོན་རབས་དགུ་པ་པདྨ་མ་དབང་ཕྱུག་སྤྱི་ལོ(1948-1949)ལོའི་བར།  དཔོན་རབས་བཅུ་བ་ནོར་བུ་སྤྱི་ལོ(1949-1951)ལོའི་བར་བཅས་ཡིན་ནོ། །

དཀར་བརྗིད་དཔོན་ཚང་གི་གཞིས་རའི་སྒོ་ཆེན།

གཞིས་ར་འདིའི་རྒྱ་ཁྱོན་ལ་མུའུ་གྲུ་བཞི་མ1470ལྷག་ཡོད་ལ།  འདིའི་བཀོད་པ་ནི་གཞིས་རའི་གཡས་གཡོན་དང་མདུན་ཕྱོགས་ཡོངས་སུ་མཛེས་ཉམས་དོད་པོ་འཆར་པའི་རྒྱ་ཕིབས་དང་མདའ་ཡབ།  ལན་ཀན་བཅས་ཡོད་པའི་ཉིས་ཐོག་ཅན་གྱི་ཤིང་ཁང་མང་པོ་བཟོ་སྐྲུན་བྱས་འདུག་ལ།  རྒྱབ་ཕྱོགས་ཡོངས་སུ་བརྗིད་ཉམས་ལྡན་ཞིང་མཆོད་རྟེན་གྱི་བང་རིམ་ལྟར་བཀོད་པ་མཛེས་པའི་རྒྱ་ཕིབས་དང་མདའ་ཡབ།  ལན་ཀན་བཅས་ཡོད་པའི་བཞི་ཐོག་ཅན་གྱི་ཤིང་ཁང་མང་པོ་བཟོ་སྐྲུན་བྱས་འདུག་པ་དང་།  བཞི་ཐོག་གི་གྱན་ལྔ་ཅན་གྱི་མཆོད་ཁང་གི་གཡས་གཡོན་གཉིས་སུ་གྱན་གཉིས་ཅན་གྱི་མཚམས་ཁང་རེ་ཡོད་ལ།  དེའི་མདུན་ཕྱོགས་ཀྱི་ལྷས་རའི་མར་རྒྱུད་ན་ཁ་བྱང་ལྟ་བྱས་པའི་ཁང་མིག་གྱན་གསུམ་ཡོད་ལ།  དེ་ཡི་ཡང་གཡོན་ཕྱོགས་སུ་མི་བགྲོད་སའི་བར་ཁྱམས་ཆུང་ངུ་ཞིག་ཡོད།

དཀར་བརྗིད་དཔོན་ཚང་གི་གཞིས་ར།

སྡོམ་པས་ཁང་མིག38ཡོད།  ད་དུང་གཅིག་ཐོག་གི་གཡས་གཡོན་དབུས་སུ་ཉིས་ཐོག་ཏུ་འགྲོ་སའི་རྡོ་སྐས་གཅིག་དང་།  ཉིས་ཐོག་གི་གཡས་གཡོན་དབུས་སུ་གསུམ་ཐོག་ཏུ་འགྲོ་སའི་རྡོ་སྐས་གཅིག གསུམ་ཐོག་གི་གཡས་གཡོན་དབུས་སུ་བཞི་ཐོག་ཏུ་འགྲོ་སའི་རྡོ་སྐས་ཆེ་བ་གཅིག་དང་།  གཡས་གཡོན་གཉིས་སུ་རྡོ་སྐས་ཆུང་བ་རེ་བཅས་རྡོ་སྐས་ཆེ་ཆུང་ལྔ་མཚར་དུ་དངར་བའི་ངང་བཟོ་སྐྲུན་བྱས་འདུག མདུན་ཕྱོགས་ཀྱི་ཕྱི་རའི་དབུས་སུ་ཀླད་ཟླ་གམ་གྱི་དབྱིབས་སུ་ཡོད་པའི་སྒོ་ཆེན་ཞིག་ཟླ་བའི་ཁང་བཟང་བཞིན་བཞེངས་སྐྲུན་བྱས་འདུག  སྤྱི་ལོ1988ལོར་དཀར་བརྗིད་སྟོང་དཔོན་གཞིས་ར་ཞིང་ཆེན་རིམ་པའི་རིག་རྫས་སྲུང་སྐྱོང་ལས་ཁུངས་ཀྱི་གྲས་སུ་བཞག  གཞིས་ར་འདི2011ལོར་སྲིད་གཞུང་གིས་མ་དངུལ་འབོར་ཆེན་བཏང་སྟེ་ཞིག་གསོ་ཐེངས་གཅིག་མཛད་པ་དང་།  སྤྱི་ཚོགས་ལས་རིགས་ཁག་གི་མི་སྣ་འགས་ཀྱང2020ལོར་མ་དངུལ་འབོར་ཆེན་བཏང་སྟེ་ཕྱི་ར་ཞིག་གསོ་མཛད།  གཞན་ད་དུང་འདིའི་ནང་དུ་ལོ་མང་འགོར་བའི་གནའ་རྫས་ཀྱང་མང་པོ་ཡོད་ཅེས་སྐད།

རྩོམ་པ་པོ།  པདྨ་ཚེ་རིང་།