དམུ་དང་། རྨུ། སྨུ། མུ། དེ་མུ་སོགས་ཀྱི་འབྲེལ་བར་དཔྱད་པ།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། ཞང་བོད་རྩོམ་རིག་སྤྱི་སྟེགས། བཤེར་འབེབས། རིན་ཆེན་ཚེ་རིང་།

དཔལ་མོ་རྒྱལ། འབུམ་རམས་པ་དང་། མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་གི་དགེ་རྒན་ཆེ་གཞོན་ཡིན་ལ། ཞིབ་འཇུག་གི་ཁ་ཕྱོགས་གཙོ་བོ་ནི་སྐད་བརྡ་རིག་པ་ཡིན།

ནང་དོན་གནད་བསྡུས། བོད་ཀྱི་ལོ་རྒྱུས་སུ་གཉའ་ཁྲི་བཙན་པོ་དམུ་ཐག་ལ་འཇུས་ནས་མི་ཡུལ་དུ་བབས་ཞེས་དམུ་ཐག་ནི་ལྷ་ཡུལ་གྱི་ཐག་པ་ཞིག་དང་། དེ་ཡི་བྱུང་བ་སྐབས་འདིར་ངོས་བཟུང་ནའང་། ཡིག་ཆ་ཁག་ལ་གཞི་བཅོལ་ན་རུས་དམུ་ཅན་གྱི་གདུང་རྒྱུད་དེའི་ཡར་སོན་ནས་བྱུང་ཡོད་པ་མ་ཟད། དམུ་ནི་མི་མ་ཡིན་པའི་ལྷ་ཡི་གདུང་རྒྱུད་ཅིག་ལ་ངོས་བཟུང་ཡོད། ད་ལྟ་སྟོད་ཀྱི་མངའ་རིས་ནས་བར་གྱི་དབུས་གཙང་དུ་དམུ་སྐས་དང་། སྨད་ཀྱི་ཨ་མདོ་རུ་དམུ་ཐག་གི་རིག་གནས་མ་ཉམས་པར་གནས་ཡོད་པ་འདི་དོན་གྱིས་ངོ་བོ་གཅིག་ལ་རྣམ་པ་མི་འདྲ་བའི་སྣང་ཚུལ་ཞིག་ཡིན་ལ། དམུ་ཐག་ཅེས་པ་ནི་གཡང་དཀར་ལུག་གི་ཐོག་མ་ལྷ་ཡུལ་ནས་བབས་པའི་ངག་རྒྱུན་ལ་གཞི་བཅོལ་ནས། དེ་ལ་ཆེད་བསྔགས་ཀྱིས་དེའི་བལ་ལའང་བསྟོད་པ་ཆེས་ཆེར་བྱས་པ་ཡིན་ཞིང་། དེ་ཡང་རུས་ཆེན་བཞིའི་ཡ་གྱལ་དམུ་ཞེས་པའི་འབྲི་ཚུལ་ལ་རྨུ་དང་དམུ་གཉིས་རེས་མོས་ཀྱིས་སྤྱོད་བཞིན་ཡོད་པ་དང་། དེ་དང་བསྟུན་ནས་དམུ་ཐག་དང་དམུ་སྐས། དམུ་རྡོ་སོགས་ཀྱི་མིང་བརྡ་བྱུང་བ་དག་ནི་དོན་གྱིས་རྒྱལ་རོང་དང་། གནའ་བོའི་ཞང་ཞུང་གི་སྐད་དུ་ནམ་མཁའི་མིང་ལ་མུ་ཟེར་ཞིང་། དེ་ལ་མིང་གི་ཡ་མཐའ་དེ་སྒྲ་སྦྱོར་སྲོལ་ཡོད་པའི་ལུང་དང་དཔེ་དྲངས་ནས་དམུ་དང་རྨུ། སྨུ། མུ་སོགས་ནི་སྒྲ་ཉེ་བའི་འབྲི་ཚུལ་མི་འདྲ་བ་ཁག་ཅིག་ཡིན་པ་དང་། དོན་ནི་ནམ་མཁའམ་ལྷ་ཡུལ་སྟོན་པ་སྟེ། ལྷ་ཡུལ་གྱི་སྐས། ལྷ་ཡུལ་གྱི་ཐག་པ། ལྷ་རྡོ། ལྷ་རི་སོགས་ལ་འཇུག་པའི་དཔྱད་པ་བཏང་ཡོད།གནད་ཚིག དམུ། རྨུ། མུ། སྨུ། དེ་མུ།