རྒྱལ་ཁབ་རིམ་པའི་སྒྲུང་པ་འཆི་མེད་རབ་བརྟན་གྱི་མཚམས་སྦྱོར།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། གེ་སར་རིག་གནས་རྒྱུད་འཛིན་འཛིན་གྲྭ། བཤེར་འབེབས། རིན་ཆེན་ཚེ་རིང་།

བབས་སྒྲུང་པ་འཆི་མེད་རབ་བརྟན་གྱི་མཚམས་སྦྱོར་མདོར་བསྡུས་བཞུགས་སོ།།

ན་གཞོན་བབས་སྒྲུང་པ་གྲགས་ཅན་འཆི་མེད་རབ་བརྟན་ལགས་ནི། སྤྱི་ལོ1988ལོར་མཚོ་སྔོན་ཞིང་ཆེན་ཡུལ་ཤུལ་ཁུལ་འབྲི་སྟོད་རྫོང་སྟོད་ཚེ་ཡུལ་ཚོ་ཉ་ཆགས་སྡེ་བ་ནས་སྐུ་འཁྲུངས་ཤིང་། ཁོང་ཆུང་དུས་ནས་གེ་སར་སྒྲུང་ལ་ཉན་རྒྱུར་དགའ་ཞིང་དད་སེམས་ཆེ་བ།  རྩེད་མོ་རྩེ་ན་ཡང་གླིང་དཀར་དཔའ་ཐུལ་རྣམས་ཀྱི་དགྲ་འཐབ་གཡུལ་འགྱེད་ཀྱི་རྣམ་པ་རྩེ་བ་རེད། ཁོང་ཆུང་དུས་ནས་གླིང་སྒྲུང་དང་གླུ་དབྱངས་ལ་ཧ་ཅང་དགའ་ཞེན་ཆེ་མཁན་ཞིག་ཡིན།ཁོང་རང་ལོ་བརྒྱད་དང་དགུ་ཡི་སྟེང་། ཁོང་གིས་མ་ཡུམ་གྱི་དྲུང་ནས་བོད་ཡིག་བསླབས་ཏེ། རྫི་བོར་འགྲོ་ཞོར་དུ་སྒྲུང་ཡིག་ཀློག་པ་དང་གླིང་སྒྲུང་གི་སྒྲ་ཐག་ལ་ཉན་རྒྱུ་ནི་གོམས་གཤིས་སུ་གྱུར། ཁོང་ཆུང་དུས་ནས་བློ་རིག་བཀྲ་ལ་ཡིད་འཛིན་ཆེ་བའི་བྱིས་པ་ཡ་རབས་ཞིག་ཡིན་པ་མ་ཟད། དགུང་ལོ་བཅུ་གསུམ་སྟེང་ནས། དབྱར་ཟླ་དང་པོའི་ཚེས་ཆེན་བཅོ་ལྔའི་ཉིན། རི་མགོ་ནས་ཕྱུགས་འཚོ་བའི་སྐབས་སུ་ཅུང་ཙམ་གཉིད་ལ་ཤོར་ཚེ། རྨི་ལམ་དུ་ཤར་གྱི་རྨ་རྒྱལ་སྦོམ་ར་ཡིན་ཟེར་བའི། མི་དཀར་རྟ་དཀར་ཅན་ཞིག་ཁོང་གི་འགྲམ་དུ་བྱོན་སྟེ། ཁྱོད་ནི་གླིང་གི་དུས་སུ་སྒ་སྐྱ་ལོ་སྟོན་པ་རྒྱལ་མཚན་གྱི་བློན་ཆུང་ཟླ་བ་ལྷུན་གྲུབ་ཀྱི་སྐྱེ་བ་ཡིན་པས། ཕྱི་རབས་བོད་ཡུལ་དུ་གེ་སར་གྱི་བཀའ་དོན་བསྒྲུབ་པའི་སྨོན་ལམ་ཐེབས་ཡོད་པས།  དེ་རིང་ནས་བཟུང་སྟེ། ཁྱོད་ཀྱིས་གླིང་གེ་སར་རྣམ་ཐར་འདི། མཐོ་དམན་མེད་པར་བཤད་དགོས་ཞེས་གསུངས་ཏེ། གླིང་སྒྲུང་གི་པོ་ཏི་མང་པོ་ཞིག་གནང་བ་མ་ཟད། སྒ་སྐྱ་ལོ་ཚང་གི་གནས་རི། འདམ་ལྗོངས་རྫ་བཀྲ་ཕྱུག་མོའི་སྲས་མོ་ཡིན་ཟེར་བའི། ཆང་ཕོར་དར་གྱིས་རྒྱན་པ་ཕྱག་ན་འཛིན་པའི་ན་ཆུང་མ་ཞིག་གིས་ཀྱང་། བསུ་མ་གནང་བ་སོགས་ངོ་མཚར་བའི་རྨི་ལམ་མང་པོ་རྨིས་ཤིང་། གཉིད་སད་དུས་སུ་ཉི་མ་ཡང་ཕྱི་དྲོ་ལ་སླེབས་ཚར་སོང་། དེ་ནས་ཁོང་ལ་སྔར་དང་མི་འདྲ་བའི་ཚོར་སྣང་གསར་བ་ཞིག་སྐྱེས་སྟེ། ཁ་ནས་གོ་མ་མྱོང་བའི་གཏམ་བཤད་སྣ་ཚོགས་དབང་མེད་དུ་གྱེར། རེས་འགར་འགྲོ་མ་མྱོང་བའི་ས་ཆ་དང་། རི་མཐོན་པོའི་མགོ་ལ་འགྲོ་དགོས་པའི་སྣང་བ་འཆར། ཡུལ་མི་ལ་ལས་སྨྱོན་པ་ཞིག་དུ་གྱུར་འདུག་ཅེས་ཀྱང་ལབ་མྱོང་། སྐབས་དེར་རག་ཤུལ་སྟོད་ཀྱི་འབྲུག་པ་དགོན་པའི་བླ་མ་བསྟན་དགའ་དང་། དཔལ་བསམ་རྣམས་གཉིས་ཀྱིས་ཁྲུས་གསོལ་དང་བྱིན་རླབས་གནང་བར་བརྟེན། གེ་སར་རྣམ་ཐར་དེ་དག་བྱང་ཆུབ་ནས་ཐོགས་པ་མེད་པའི་སྒོ་ནས་བཤད་ཐུབ་པར་གྱུར།   སྡེ་བའི་ལོ་གསར་དང་གཉེན་སྟོན། གར་སྟེགས་སོགས་ཀྱི་སྟེང་ནས་ཡང་སྒྲུང་སྣ་གང་མང་བཤད་པས། མང་ཚོགས་ཀྱིས་དགའ་བསུ་ཆེན་པོ་ཐོབ།  སྤྱི་ལོ2010ལོར། ཞིང་ཆེན་རིམ་པའི་ཁམས་པའི་ལ་དབྱངས་རྒྱུད་འཛིན་པའི་ཐོབ་ཐང་གནང་བ་དང་། ད་དུང་། ཡུལ་ཤུལ་ཁུལ་གེ་སར་ཞིབ་འཇུག་མཐུན་ཚོགས་ཀྱི་ཚོགས་གྲལ་དུ་ཚུད། སྤྱི་ལོ 2012 ལོར་རྒྱལ་ཡོངས་གེ་སར་བྱ་བའི་འགོ་ཁྲིད་ཚན་ཆུང་གཞུང་ལས་ཁང་གི་རྒྱལ་ཁབ་རིམ་པའི་རྟོགས་པར་ཉམས་ཤར་སྒྲུང་པའི་ངོས་འཛིན་དཔང་ཡིག་ཀྱང་གནང་། སྤྱི་ལོ 2012ལོར་ འབྲི་སྟོད་རྫོང་རིག་གནས་ཡུལ་སྐོར་ཅུས་དང་། སྒ་སྐྱ་ལོའི་རིག་གནས་ལས་སྒྲུབ་ཁང་གི་མི་སྣའི་གྲལ་དུ་ཚུད། སྤྱི་ལོ 2014ལོར་ མི་ཆུང་རྟགས་མའི་ཀྲུང་གོའི་ལ་གླུ་འགྲན་ཚོགས་ཁྲོད། བྱ་དགའ་ཨང་གསུམ་པ་ཐོབ་པ་དང་། ཡུལ་ཤུལ་ཁུལ་གངས་ལྗོངས་གེ་སར་རིག་གནས་མཐིལ་གྱི་སྒྲུང་པའི་མི་སྣའི་གྲལ་དུ་ཚུད།   སྤྱི་ལོ 2016 ལོར་ཡུལ་ཤུལ་ཁུལ་གེ་སར་ལས་སྒྲུབ་ཁང་ནས། གླིང་སྒྲུང་པར་སྐྲུན་ཆེད་དུ། འབུམ་ཕྲུག་ཆང་རྫོང་། ཙ་རི་སྨན་རྫོང་། མེ་གླིང་གསེར་རྫོང་། བྱེ་རུ་བྱུར་རྫོང་། ཁམས་གསུམ་བདེ་བཀོད་བཅས་སྒྲུང་སྣ་ལྔ་སྒྲ་ཕབ་བྱས། སྤྱི་ལོ 1020ལོར་ཁོང་ལ་མཚོ་སྔོན་ཞིང་ཆེན། གེ་སར་སྒྲུང་ཞིབ་འཇུག་གྲུབ་འབྲས་ཀྱི་བྱ་དགའ་ཨང་དང་པོ་ཐོབ། ད་དུང་རྫོང་རིག་གནས་ཅུས་དང་། རྫོང་རིག་གནས་ཁང་། མི་རིགས་སྐད་ཡིག་བྱ་བའི་གཞུང་ལས་ཁང་སོགས་ནས། སྔོན་ཐོན་གྱི་བྱ་དགའ་གྲངས་མང་ཐོབ་མྱོང་ལ། ཁོང་གིས་ཉེ་བའི་ལོ་འགའི་རིང་ལ། འབྲི་སྟོད་རྫོང་རིག་གནས་ཅུས་ནས། གེ་སར་སྒྲུང་ལས། འབྲུག་མོའི་རྣམ་ཐར། ལི་ཁྲི་གཙོད་རྫོང་། ཨ་ཆེན་འབྲོང་རྫོང་། སྐྱ་ལོའི་གནས་བཤད། གྭ་བའི་དར་རྫོང་། མི་ཆུང་གཏམ་རྫོང་། རྟ་རྣའི་ཆོས་ཚོགས། རི་ཆུ་བཤད་པ།  གླུ་འབུམ་པོ་ཏི་བཅུ་གཉིས་བཅས་པར་སྐྲུན་བྱས་ཡོད་པར་མ་ཟད། མི་སྒེར་གྱི་གླིང་སྒྲུང་སྣ་ཁ་བརྒྱ་ལྷག་དང་། གླུ་ཤགས་འདྲ་མིན་སྣ་ཁ་བཅུ་ལྷག་བཅས་མཐེབ་སྡེར་དང་འོད་སྡེར་སོགས་སྒྲིག་བཟོ་བྱས་ཡོད། དེ་མིན་ལྷ་ས་དང་ནག་ཆུ་སོགས་ཀྱི་སྒྲུང་ཁང་ནང་ནས་སྒྲུང་བཤད་པ་དང་། པེ་ཅིན་དང་དར་མདོ། ཡུལ་ཤུལ་དང་ཟི་ལིང་སོགས་ས་ཁུལ་སོ་སོར་སྒྲུང་བཤད་དུ་ཕེབས་བཞིན་ཡོད་ཅིང། རྒྱ་ཆེའི་ལྟད་མོ་བ་རྣམ་པས་དགའ་བསུ་གྲངས་མང་ཐོབ་མྱོང་། བྱང་ཨ་ཆེན་གངས་རྒྱབ་ནས་ཀྱང་གཅན་གཟན་རི་དྭགས་ཀྱི་རྫོང་ཕབ་སའི་སྐོར་ནས། སྒྲུང་སྣ་མང་ཙམ་བཤད་བཞིན་ཕེབས་མྱོང་ལ། མགོ་ལོག་དགའ་བདེ་རྫོང་གི་བླ་མ་གཙང་སྤྲུལ་ཚུལ་ཁྲིམས་རྣམ་རྒྱལ་དང་། རྫ་སྟོད་རྫོང་གི་བླ་མ་རྒྱལ་བླ། ནང་ཆེན་རྫོང་གི་བླ་མ་ཀརྨ་ཆོས་ཀྱི་རྒྱལ་མཚན་སོགས། བླ་སྤྲུལ་མང་པོའི་བཀའ་ལུང་དབང་གསུམ་ཐོབ་མྱོང་། ད་ལྟ་ཁོང་གི་འབྲི་སྟོད་རྫོང་རིག་གནས་ཡུལ་སྐོར་ཀུན་ཁྱབ་བརྙན་འཕྲིན་ཅུ་དང་། རྫོང་རིག་གནས་ཁང་། འབྲི་ཀླུང་བླ་སྲོག་རིག་གནས་ཐོན་ལས་ཚད་ཡོད་སྤྱི་གཉེར་ཁང་། རྫོང་གེ་སར་སྒྲུང་བཤད་ལྟེ་གནས་སོགས་ནས། གླིང་སྒྲུང་འཁྲབ་བཤད་ཀྱི་བྱ་བ་སྒྲུབ་བཞིན་ཡོད་པར་མ་ཟད། འབྲི་སྟོད་རྫོང་མངོན་མིན་ཤུལ་བཞག་རིག་གནས་ཀྱི་ཕུལ་བྱུང་རྒྱུད་འཛིན་པའི་མཚན་སྙན་ཐོབ། མི་སྒེར་གྱི་གེ་སར་རིག་གནས་རྒྱུད་འཛིན་འཛིན་གྲྭ་ཞེས་པའི་འཛིན་གྲྭ་ཞིག་ཀྱང་བཙུགས་ཏེ་ཁོང་གི་འཛིན་བདག་དགེ་རྒན་གྱི་འགན་བཞེས་ནས། ན་ཆུང་བྱིས་པ་རྣམས་ལ་གེ་སར་སྒྲུང་གི་རིག་གནས་སྐོར་གྱི་སློབ་ཁྲིད་གང་མང་གནང་བཞིན་ཡོད། སྤྱི་ལོ 2018ལོར་མགོ་བརྩམ་ནས་ཁོང་གི་གླིང་སྒྲུང་ཆ་ཚང་སྒྲ་ཕབ་ནས་སྒྲུང་སྣ་བརྒྱ་ལྷག་རྫོང་རིག་གནས་ཁང་ལ་ཉར་ཚགས་བྱས་ཡོད། འབྲི་སྟོད་རྫོང་གེ་སར་སྒྲུང་བཤད་ལྟེ་གནས་ཚང་གི་གླིང་སྒྲུང་འཁྲབ་གཙོ་དང་འཁྲབ་ཁྲིད་པ། ཁམས་པའི་ལ་དབྱངས་འཕྲིན་མཛོད་ཁང་གི་ལ་དབྱངས་དགེ་རྒན། གེ་སར་སྒྲུང་པའི་ཁྱིམ་གཞིས་ཀྱི་བྱ་བའི་ཡིག་ཚགས་འབྲི་མཁན་སོགས་ཀྱི་འགན་བཞེས་ཡོད། ཁོང་ནི་གླིང་སྒྲུང་སྣ་ཁ་མི་འདྲ་བ་སུམ་བརྒྱ་དྲུག་ཅུ་ལྷག་བཤད་ཐུབ་པའི་བབས་སྒྲུང་པ་གྲགས་ཅན་སོག་རུའི་འཆི་མེད་རབ་བརྟན་ལགས་རེད།