མདོ་དབུས་མཐོ་སྒང་སྟེ། སའི་གོ་ལའི་ཐོག་གི་མཚོ་འཕགས་ཆེས་མཐོ་བ་དང་ལོ་ན་ཆེས་གཞོན་པའི་མཐོ་སྒང་།

རྩོམ་སྒྲིག  དོན་འགྲུབ་མཚོ།  ཡོང་ཁུངས།  འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས།  བཤེར་འབེབས།  རིན་ཆེན་ཚེ་རིང་།

མདོ་དབུས་མཐོ་སྒང་ནི་སའི་གོ་ལའི་ཐོག་གི་མཚོ་འཕགས་ཆེས་མཐོ་བའི་མཐོ་སྒང་དང་ལོ་ན་ཆེས་གཞོན་པའི་མཐོ་སྒང་ཡིན་ལ།  དེ་ཡིས་ཀྲུང་གོའི་མཚོ་སྔོན་དང་བོད་ལྗོངས། ཞིན་ཅང་།  ཀན་སུའུ་སོགས་ཞིང་ལྗོངས་ཁག་འཕྲེད་ཀྱིས་བཅད་ཡོད་ཅིང་།  བརྗིད་ཆགས་ཡིད་འོང་གི་རང་བྱུང་མཛེས་རིས་ཤིག་དང་འདྲ།  མཐོ་སྒང་འདི་ནི་འཛམ་གླིང་གི་སྒལ་ཚིགས་དང་སའི་གོ་ལའི་གླིང་སྣེ་གསུམ་པ་ཡིན་པར་མ་ཟད། རང་བྱུང་གི་ལྟད་མོ་ངོ་མཚར་ཅན་དང་ས་གཤིས་གནས་ཚུལ་ངོ་མཚར་ཅན་མང་པོ་གཅིག་ཏུ་འདུ་སའང་ཡིན། ཡངས་ཤིང་རྒྱ་ཆེ་བའི་མཐོ་སྒང་འདི་རུ། བགྲང་གིས་མི་ལངས་པའི"རྩེ་གྲ"མང་པོ་ཡོད་དེ།  བརྗིད་ཆགས་པའི་ཇོ་མོ་གླང་མ་ནས་གཏིང་ཟབ་པའི་ཡར་ཀླུང་གཙང་པོའི་གྲོག་རོང་བར་དང་།  མུ་མཐའ་བྲལ་བའི་རོང་ཕུ་འཁྱགས་ཀླུང་ནས་ཡིད་དུ་འོང་བའི་གནམ་མཚོའི་བར་དུ།  ལྗོངས་རྣམ་རེ་རེ་ཡིས་ས་གཤིས་འགྱུར་ལྡོག་དང་རང་བྱུང་རིམ་འགྱུར་གྱི་གཏམ་རྒྱུད་རྗོད་བཞིན་ཡོད། 

མདོ་དབུས་མཐོ་སྒང་ནི་འཛམ་གླིང་གི་མཚོ་འཕགས་ཆེས་མཐོ་བའི་མཐོ་སྒང་ཡིན་ལ།  ཡ་ཡོབ་སྐམ་ས་ཆེན་མོའི་ཤར་ལྷོའི་རྒྱུད་དུ་ཡོད།  དེའི་མཐའ་མཚམས་ནི་ཤར་ཕྱོགས་སུ་འཕྲེད་རྒྱུག་རི་རྒྱུད་དང་ལྷོ་ཕྱོགས་དང་ནུབ་ཕྱོགས་སུ་ཧི་མ་ལ་ཡ་རི་རྒྱུད།  བྱང་ཕྱོགས་སུ་ཁུ་ནུ་རི་རྒྱུད་བཅས་ལ་ཐུག་ཡོད་པ་དང་།  རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི250ལྷག་ཡོད་པ་དེ་ཀྲུང་གོའི་སྐམ་སའི་རྒྱ་ཁྱོན་གྱི1/4དང་འདྲ།  མཐོ་སྒང་འདིས་མཚོ་སྔོན་དང་བོད་ལྗོངས།  ཞིན་ཅང་།  ཀན་སུའུ་སོགས་ཞིང་ལྗོངས་ཁག་འཕྲེད་ཀྱིས་བཅད་ཡོད་ཅིང་།  ཆ་སྙོམས་ཀྱི་མཚོ་འཕགས་སྨི4000ལས་བརྒལ་བ་དང་།  འཛམ་གླིང་ན་མིང་དུ་གྲགས་པའི་རི་བོ་ཇོ་མོ་གླང་མ་ཡོད་པ།  སའི་གོ་ལའི་འཕྲེད་ཐིག་གཅིག་པའི་ས་རྒྱུད་ལས་མཚོ་འཕགས་ཆེས་མཐོ་བ་དང་ནམ་ཟླ་ཆེས་གྲང་ངར་ཆེ་བ་སོགས་ཀྱི་དབང་གིས།  འདི་ལ“འཛམ་གླིང་གི་སྒལ་ཚིགས”དང“སའི་གོ་ལའི་ཡང་རྩེ” སའི་གོ་ལའི“གླིང་སྣེ་གསུམ་པ”སོགས་ཀྱི་མཚན་སྙན་ཐོབ་ཡོད། 

མདོ་དབུས་མཐོ་སྒང་ལ་ལོ་ན་ཆེས་གཞོན་པའི་མཐོ་སྒང་ཞེས་ཀྱང་འབོད་དེ།  རྒྱུ་མཚན་ནི་དེ་ཉིད་ས་གཤིས་གྲུབ་ཚད་ཆེས་འཕྱི་བའི་མཐོ་སྒང་གི་གྲས་ཡིན་པས་རེད།  མདོ་དབུས་མཐོ་སྒང་གྲུབ་པའི་གོ་རིམ་ནི་ཧིན་རྡུ་དུམ་ལེབ་དང་ཡ་ཡོབ་དུམ་ལེབ་གཉིས་ཀྱི་གདོང་གཏུག་དང་འབྲེལ་བ་དམ་ཟབ་ཡོད་ལ།  གདོང་གཏུག་འདི་ཕལ་ཆེར་ལོ་ངོ་ཁྲི་སྟོང་ལྔའི་ཡར་སྔོན་དུ་བྱུང་ཞིང་།  འདས་པའི་ལོ་ངོ་ཁྲི་བརྒྱ་ཕྲག་ལྷག་གི་ཚུན་དུ་ད་དུང་རྒྱུན་མཐུད་ཡོད།  གདོང་གཏུག་འདིའི་བྱེད་ནུས་འོག  མདོ་དབུས་མཐོ་སྒང་གི་ས་ཤུན་བསྟུད་མར་ཡར་འཕགས་ནས།  དེང་གི་འཛམ་གླིང་སྟེང་ཆེས་མཐོ་ཞིང་ཆ་སྙོམས་ཀྱི་མཚོ་འཕགས་སྨི4500ལས་བརྒལ་བའི་མཐོ་སྒང་འདི་གྲུབ་པ་རེད།  ས་གཤིས་རིག་པའི་ངོས་ནས་བརྗོད་ན།  མདོ་དབུས་མཐོ་སྒང་གི་ལོ་ན་གཞོན་པ་ནི་གཤམ་གྱི་ཕྱོགས་འདི་དག་ནས་མངོན་ཡོད་དེ།

དང་པོ།  མུ་མཐུད་དུ་ཡར་འཕག་བཞིན་ཡོད་པ།  མདོ་དབུས་མཐོ་སྒང་ནི་ད་དུང་ལོ་རེར་ཧའོ་སྨི་འགའ་རེ་ཡི་འགྲོས་ཚད་ལྟར་མུ་མཐུད་དུ་ཡར་འཕག་བཞིན་ཡོད་ལ།  དེའི་ས་ཤུན་འགུལ་སྐྱོད་སྔར་བཞིན་འཁྲུག་ཆ་དོད་པོ་ཡོད།

གཉིས་པ། ས་གཤིས་འགུལ་སྐྱོད་བྱེད་ཐེངས་མང་བ།  མདོ་དབུས་མཐོ་སྒང་ས་ཁོངས་སུ་ས་ཡོམ་འབྱུང་ཐེངས་མང་ལ།  མེ་རིའི་འགུལ་སྐྱོད་དང་ས་རིམ་འགུལ་སྐྱོད་མངོན་གསལ་ཡིན་པས།  དེ་ནི་འཁྲུག་ཆ་དོད་པའི་ས་གཤིས་ས་ཁོངས་ཤིག་ཡིན། 

གསུམ་པ།  དིམ་བསགས་དངོས་པོའི་ལོ་ན་གཞོན་པ།  མདོ་དབུས་མཐོ་སྒང་གི་དིམ་བསགས་དངོས་པོ་དང་བྲག་རྡོ་ནི་གནའ་བོའི་མཐོ་སྒང་དག་དང་བསྡུར་ཚེ་ལོ་ན་གཞོན་ལ།  དིམ་བསགས་དངོས་པོ་མང་ཆེ་བར་ལོ་ངོ་ཁྲི་བརྒྱ་ཕྲག་གི་ལོ་རྒྱུས་མ་གཏོགས་མེད།  རྒྱུ་རྐྱེན་འདི་དག་གི་དབང་གིས།  མདོ་དབུས་མཐོ་སྒང་དེ་ས་གཤིས་རིག་པའི་ངོས་ནས་ལོ་ན་ཆེས་གཞོན་པའི་མཐོ་སྒང་དུ་ངོས་བཟུང་ཡོད། 

མདོ་དབུས་མཐོ་སྒང་ནི་རྔམ་བརྗིད་ལྡན་པའི་ན་གཞོན་ཞིག་དང་འདྲ་བར་སྐྱེ་གཟུགས་དྲང་ལ་གཞོན་ཤ་དོད་པ་དང་།  འཛད་མཐའ་མེད་པའི་བརྗིད་ཉམས་ཀྱིས་ཁེངས་ཏེ།  ང་ཚོར་རྣམ་པ་དང་ཁ་དོག་སྣ་ཚོགས་ཀྱི་ས་གཤིས་ཁྱད་རྟགས་མངོན་བཞིན་ཡོད།  མདོ་དབུས་མཐོ་སྒང་གི་ས་ཆ་རེ་རེ་ཡིས་ལོ་ངོ་ཁྲི་དུང་ཕྱུར་རིང་གི་ས་གཤིས་རིམ་འགྱུར་གྱི་གཏམ་རྒྱུད་རྗོད་བཞིན་ཡོད་ལ།  དེས་ང་ཚོར་གུས་ཞེད་ཀྱི་བསམ་པ་ཞིག་བཟུང་སྟེ།  མུ་མཐུད་དུ་ངོ་མཚར་བའི་ས་ཆ་འདིའི་འཛད་མཐའ་བྲལ་བའི་འགུག་ཤུགས་འཚོལ་རྟོག་བྱེད་དུ་བཅུག་ཡོད།