གད་མོ་བགད་ན་མིག་ནད་སྐམ་ཚག་དྲག་སྐྱེད་འབྱུང་བར་ཕན།

རྩོམ་སྒྲིག  དོན་འགྲུབ་མཚོ།  ཡོང་ཁུངས།  འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས།  བཤེར་འབེབས།  རིན་ཆེན་ཚེ་རིང་།

མིག་ནད་སྐམ་ཚག་ནི་རྒྱུན་མཐོང་གི་མིག་ནད་ཅིག་ཡིན་ལ།  ནད་དེ་འབྱུང་ཚད་ལོ་རེ་བཞིན་ཇེ་མང་དུ་འགྲོ་བཞིན་ཡོད།  དེའི་ནད་རྟགས་ལ་མིག་དམར་པོར་འགྱུར་བ་དང་།  ཟ་འཕྲུག་ལངས་པ།  གཉན་ཚད་རྒྱས་པ་སོགས་ཡོད་ལ།  མིག་སྔར་མིག་ནད་སྐམ་ཚག་གི་གསོ་བཅོས་བྱེད་ཐབས་གཙོ་བོ་ནི་མིག་སྨན་གཏུག་པ་དེ་ཡིན། 

ཉེ་ལམ།  ཀྲུང་ཧྲན་སློབ་ཆེན་ཀྲུང་ཧྲན་མིག་ནད་ལྟེ་གནས་ཀྱི་དགེ་རྒན་ཆེན་མོ་ལིའང་ལིང་དབྱི་དང་ལིའུ་དབྱི་ཀྲི།  ཞ་མོན་སློབ་ཆེན་མིག་ནད་ཞིབ་འཇུག་སུའོ་ཡི་དགེ་རྒན་ཆེན་མོ་ལིའུ་ཙུའུ་ཀུའོ་སོགས་ཀྱིས་གྲུབ་པའི་ཞིབ་འཇུག་ཚོགས་པ་ཞིག་གིས་ཞིབ་འཇུག་ལས་ཤེས་རྟོགས་བྱུང་བ་ལྟར་ན།  ཉིན་རེར་འཛུམ་མདངས་སྦྱོང་བརྡར་བརྙན་རིས་ལ་བལྟས་ཏེ་སྦྱོང་བརྡར་ཐེངས4རེ་དང་།  ཐེངས་རེ་ལ་རེས་སྐོར30རེ་བྱས་ཚེ།  གཟའ་འཁོར8ཀྱི་རྗེས་ནས་ཚབས་ཆུང་བ་དང་འབྲིང་གྲས་ཀྱི་མིག་ནད་སྐམ་ཚག་ནད་པར་དྲག་སྐྱེད་ནུས་ལྡན་ཐོན་ཐུབ་པ་དང་།  དེའི་གསོ་བཅོས་ཕན་འབྲས་མིག་སྨན་གཏུག་པ་ལས་མི་དམན་པ་རེད།

དེ་སྔོན་གྱི་འཚོལ་ཞིབ་ཁྲོད་དུ།  ཀྲུང་ཧྲན་སློབ་ཆེན་མིག་ནད་ལྟེ་གནས་ཀྱི་ཞིབ་འཇུག་ཚོགས་པས་གད་མོ་བགད་ན་མིག་ཆུའི་སྐྱི་མོའི་བརྟན་འཇགས་རང་བཞིན་དང་དེའི་ཚིལ་རྒྱུ་རིམ་པའི་མཐུག་ཚད་ལེགས་བཅོས་བྱེད་ཐུབ་པ་ཐོག་མར་ཤེས་པ་རེད། 

འོ་ན།  འཛུམ་མདངས་སྦྱོང་བརྡར་ལ་བརྟེན་ནས་མིག་ནད་སྐམ་ཚག་གསོ་བཅོས་ཐུབ་མིན་དང་།  གལ་ཏེ་ཕན་ནུས་ཡོད་ན་དེ་དང་མིག་སྨན་གཏུག་པ་གཉིས་ལ་ཁྱད་པར་ཅི་འདྲ་ཡོད་དམ་ཞེ་ན། 

དྲི་བ་འདི་དག་ལ་ལན་འདེབས་ཕྱིར།  ལིའང་ལིང་དབྱི་ཡིས2020ལོ་ནས་བཟུང་ཞིབ་འཇུག་ཚོགས་པའི་སྣེ་ཁྲིད་དེ་ཞིབ་འཇུག་བྱས་པ་དང་།  ཞིབ་འཇུག་ཁྲོད་ཚབས་ཆུང་འབྲིང་གི་མིག་ནད་སྐམ་ཚག་ནད་པ299སྐབས་བསྟུན་ངང་ཚན་ཆུང་གཉིས་སུ་བགོས་ཏེ།  སོ་སོར་གཟའ་འཁོར8ཀྱི་རིང་ལ་མིག་སྨན་གཏུག་པ་དང་འཛུམ་མདངས་སྦྱོང་བརྡར་བྱེད་དུ་བཅུག  འཛུམ་མདངས་སྦྱོང་བརྡར་ཚོད་ལྟའི་ཚན་ཆུང་གི་ནད་པ་ཚོས་བརྙན་ལམ་གྱི་མཛུབ་སྟོན་ལྟར་ཉིན་རེར་སྦྱོར་བརྡར་ཐེངས4ལ་བྱས། 

གཟའ་འཁོར8ཀྱི་རྗེས་ནས།  ཚན་ཆུང་གཉིས་ཀའི་ནད་པ་རྣམས་ཀྱི་ནད་རྟགས་ལ་ལེགས་བཅོས་ཐུབ་ཡོད་པ་དང་།  འཛུམ་མདངས་སྦྱོར་བརྡར་ཚོད་ལྟའི་ཚན་ཆུང་གི་གསོ་བཅོས་ཕན་འབྲས་ནི་མིག་སྨན་གཏུག་པའི་ཚོད་ལྟའི་ཚན་ཆུང་ལས་མི་དམན་ཞིང་།  མིག་ཧྲིལ་བོར་ལེགས་བཅོས་ཐུབ་ཚད་ཀྱི་ཐད་ནས་མིག་སྨན་གཏུག་པ་ལས་ལེགས་པར་མ་ཟད།  སྦྱོང་བརྡར་མཚམས་བཞག་རྗེས་ཀྱི་གཟའ་འཁོར4ཡི་རྗེས་ནས་འཛུམ་མདངས་སྦྱོང་བརྡར་ལ་ཞུགས་པའི་ནད་པ་རྣམས་ཀྱི་མིག་ནད་སྐམ་ཚག་མུ་མཐུད་དུ་ཇེ་ལེགས་ལ་འགྲོ་བཞིན་ཡོད་པ་རེད།  ཞིབ་འཇུག་འདིས་མིག་ནད་སྐམ་ཚག་གསོ་བཅོས་བྱེད་པར་ཐབས་ཇུས་གསར་བ་ཞིག་འདོན་སྤྲོད་བྱས་ཤིང་།  མིག་ནད་སྐམ་ཚག་གི་ནད་རྐྱེན་ལ་ཞིབ་འཇུག་གཏིང་ཟབ་བྱེད་པར་རིག་ལམ་གསར་བ་བཏོད་ཡོད།