རྨ་ཆུ་ཧ་ཅང་མཛེས་ལ། མ་འོངས་པར་དེ་བས་ཀྱང་མཛེས་ངེས།

རྩོམ་སྒྲིག དོན་འགྲུབ་མཚོ། ཡོང་ཁུངས། འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས། བཤེར་འབེབས། རིན་ཆེན་ཚེ་རིང་།

རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་བརྟན་པོར་བཏང་ནས་སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་མཐའ་འཁྱོངས་བྱས་ཏེ།  སེམས་ཤུགས་གཅིག་སྒྲིལ་གྱིས་དུས་རབས་གསར་བའི“རྨ་ཆུའི་མཉམ་གཞས་ཆེན་མོ”ལེགས་པོར་ལེན་དགོས།　　 

རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ཀྱི་འཐབ་ཇུས་ལག་བསྟར་བྱས་ཚུན།  རྨ་ཆུའི་འབབ་རྒྱུད་ཀྱི་སྐྱེ་ཁམས་ཁོར་ཡུག་སྤུས་ཚད་བརྟན་པོའི་ངང་མཐོ་རུ་བཏང་ནས་ཆུའི་སྤུས་ཚད་སྔར་ལས་ཇེ་ལེགས་སུ་ཕྱིན་ཡོད་དེ།  2023ལོར་རྨ་ཆུའི་གཞུང་ཆུ་ཧྲིལ་བོ་ལོ་གཉིས་ལ་བསྟུད་མརⅡརིགས་ཀྱི་ཆུའི་སྤུས་ཚད་ལོན་ཡོད།  འགྲམ་ངོགས་གཉིས་སྔར་ལས་སྔོ་ལྗང་དུ་གྱུར་པ་དང་འབབ་རྒྱུད་ཀྱི་སྐྱེ་ཁམས་སྤུས་ཚད་སྤྱི་ཡོངས་ནས་ཇེ་ལེགས་སུ་ཕྱིན་ཏེ་རྨ་ཆུ་སྔར་བས་མཛེས་སྡུག་ལྡན་པར་གྱུར་ཡོད།　

རྨ་ཆུའི་མགོ་ཁུངས་ནི་མདོ་དབུས་མཐོ་སྒང་གི་བ་ཡན་ཧ་རིའི་བྱང་ངོས་ཀྱི་རི་འདབས་ན་ཡོད་པ་དང་།  རྒྱ་ཡིག་གི་ཡིག་འབྲུ“几”དབྱིབས་ཀྱིས་ཞིང་ཆེན་དང་རང་སྐྱོང་ལྗོངས9བརྒྱུད་ནས་བཞུར་ཡོད་ལ།  སྤྱིའི་རིང་ཚད་ལ་སྤྱི་ལེ5464ཡོད་ཅིང་།  རང་རྒྱལ་གྱི་ཆུ་བོ་ཆེན་པོ་ཨང་གཉིས་པ་ཡིན།  རྨ་ཆུའི་འབབ་རྒྱུད་ཀྱིས་མདོ་དབུས་མཐོ་སྒང་དང་ནང་སོག་མཐོ་སྒང་།  ས་སེར་མཐོ་སྒང་།  ཧྭ་བྱང་བདེ་ཐང་སོགས་ས་ངོས་ཆགས་ཚུལ་ཚན་པ་ཆེན་པོ་བཞི་དང་རང་རྒྱལ་གྱི་ས་བབ་སྐས་རིམ་ཆེན་པོ་གསུམ་འཕྲེད་ཀྱིས་བཅད་ཡོད་ལ།  རྨ་ཆུའི་རང་བྱུང་སྐྱེ་ཁམས་ཁྱམས་རིང་དང་གཙང་གསུམ་འབྱུང་ཡུལ།  མདོ་ལ་རིང་མོ།  མཛོད་དགེ་སོགས་སྐྱེ་ཁམས་ནུས་ལྡན་ས་ཁོངས་མང་པོ་ཡོད་པས།  དེ་ནི་རང་རྒྱལ་གྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་ཞིག་ཡིན།  མི་འབོར་འགུལ་སྐྱོད་དང་དཔལ་འབྱོར་གོང་དུ་འཕེལ་བའི་ས་ཁོངས་གལ་ཆེན་ཞིག་ཀྱང་ཡིན་པས།  རྒྱལ་ཁབ་འཕེལ་རྒྱས་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་ཁྱོན་ཡོངས་ཀྱི་ཁྲོད་དུ་འཐབ་ཇུས་གོ་གནས་གལ་ཆེན་བཟུང་ཡོད།　　 

རྨ་ཆུ་ནི་ཀྲུང་ཧྭ་མི་རིགས་ཀྱི་མ་ཡུམ་ཆུ་བོ་ཡིན་ཏེ།  རྨ་ཆུར་སྲུང་སྐྱོབ་བྱ་རྒྱུ་ནི་ཀྲུང་ཧྭ་མི་རིགས་རླབས་ཆེན་བསྐྱར་དར་དང་འབྲེལ་བའི་ལོ་ངོ་སྟོང་གི་ཇུས་ཆེན་ཞིག་ཡིན།  འོན་ཀྱང་།  རྨ་ཆུའི་འབབ་རྒྱུད་དུ་སྐྱེ་ཁམས་རྨང་གཞི་ཞན་པ་དང་ཆུའི་ཐོན་ཁུངས་དཀོན་པ།  ཐོན་ཁུངས་ཁོར་ཡུག་གི་ཐེག་ནུས་ཞན་པ་བཅས་ཀྱི་གནད་དོན་ཡོད།  ལོ་ལྔའི་རིང་འབད་བརྩོན་བྱས་པ་བརྒྱུད།  རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་དེ་མགོ་ཚུགས་ས་སྔར་བས་མཐོན་པོ་ཞིག་ཏུ་སླེབས་ཡོད་ལ།  དུས་མཚུངས་སུ་དཀའ་གནད་མི་ཉུང་བ་ཞིག་ཀྱང་སྔར་བཞིན་ཐག་གཅོད་བྱ་དགོས།  རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་ཆེན་པོ་དང་མཐུན་སྦྱོར་ཆེན་པོའི་གནས་སྟངས་ངེས་པར་དུ་རྒྱུན་མཐུད་ངང་འཐུས་ཚང་དུ་གཏོང་བ་དང་།  རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་བརྟན་པོར་བསྐྲུན་དགོས།　　 

སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས།  སྲུང་སྐྱོབ་ཆེན་པོ་ནི་འཕེལ་རྒྱས་ཆེན་པོའི་སྔོན་འགྲོ་ཡིན་ལ།  རྨ་ཆུའི་འབབ་རྒྱུད་ཀྱི་སྐྱེ་ཁམས་ཉམས་ཞན་ཁུལ་གྱི་ཁྱབ་རྒྱ་ཆེ་ཞིང་རིགས་སྣ་མང་བ་སྟེ།  ས་མཐོའི་འཁྱགས་ཀླུང་དང་རྩྭ་ཐང་།  སྤང་ལྗོངས།  ས་སེར་མཐོ་སྒང་སོགས་ཚང་མ་ཉམས་ཞན་དུ་འགྱུར་སླ་ཞིང་།  སླར་གསོ་བྱེད་དཀའ་བ།  སླར་སོས་བརྒྱུད་རིམ་ཧ་ཅང་དལ་བ་ཡིན།  རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་བརྟན་པོར་གཏོང་བ་ལག་ལེན་དུ་བསྟར་ནས།  རང་བྱུང་ལ་བསྟུན་པ་དང་ཆོས་ཉིད་ལ་བརྩི་སྲུང་བྱས་ཏེ།  རང་བྱུང་སླར་གསོ་དང་སོར་ཆུད་སྐྱེ་འཕེལ་གྱི་ལས་དོན་སྤེལ་བ།  རྒྱལ་ཁོངས་བར་སྟོང་གསར་སྤེལ་གྱི་རྣམ་པ་ཇེ་ལེགས་སུ་གཏོང་བ།  སྐྱེ་ཁམས་ནུས་ཁུལ་གཙོ་གནད་དུ་བཟུང་ནས་སྐྱེ་ཁམས་ཁོར་ཡུག་སྲུང་སྐྱོབ་ལེགས་པོ་བཅས་བྱ་དགོས།  དེ་དང་ཆབས་ཅིག་ས་ཁོངས་ཐོན་ལས་ཀྱི་བཀོད་པ་ལེགས་སྒྲིག་བྱས་ཏེ་བློ་བརྟན་འགྱུར་མེད་ངང་ལྗང་མདོག་དང་རྒྱུན་མཐུད་ཀྱི་སྤུས་ཚད་མཐོ་བའི་འཕེལ་རྒྱས་ལམ་བུའི་ཐོག་བསྐྱོད་དགོས།   

རྒྱུན་འཁྱོངས་ལྷོད་མེད་དང་རྒྱུན་མཐུད་སྐུལ་འདེད།  རྨ་ཆུའི་འབབ་རྒྱུད་ཀྱི་ཁེབས་རྒྱ་ཆེ་བ་དང་སྐྱེ་ཁམས་ཀྱི་རིགས་སྣ་མང་བས།  སྟོད་རྒྱུད་ཀྱི“ཀྲུང་ཧྭའི་ཆུ་ལྕོག”གི་ཆུ་ཁུངས་གསོ་འཁྱོངས་ནུས་པ་དང་།  བར་རྒྱུད་ཀྱི་ས་ཆུ་སྲུང་འཛིན་ཆུ་ཚད།  སྨད་རྒྱུད་ཀྱི་རླན་ས་སོགས་སྐྱེ་ཁམས་མ་ལག་གི་བརྟན་བརླིང་རང་བཞིན་ཕྱོགས་བསྡུས་ཀྱིས་མཐོར་འདེགས་བཏང་སྟེ།  སྲ་བརྟན་གཏན་འཇགས་དང་འདེགས་སྐྱོར་ནུས་ལྡན་ཡིན་པའི་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་མགྱོགས་པོར་འཛུགས་དགོས།  ཏན་ཏན་ཏིག་ཏིག་གིས་ལོ་རེ་བཞིན་ཁྱབ་སྤེལ་གཏོང་བ་དང་ལོ་རེ་བཞིན་དོན་འཁྱོལ་དམ་འཛིན་བྱས་ན།  ད་གཟོད་གཞི་ནས་རྒྱུན་ཆད་མེད་པར་ཕན་འབྲས་ཐོན་ཐུབ།　　 

གཅིག་གྱུར་འཆར་འགོད་དང་ཚན་རིག་དང་མཐུན་པའི་སྙོམ་སྒྲིག  འབབ་རྒྱུད་ཡོངས་དང་སྐྱེ་ཁམས་མ་ལག་གི་སྤྱི་ཡོངས་རང་བཞིན་ལ་གཞི་ཚུགས་ཏེ་ཐུན་མོང་ཐོག་སྲུང་སྐྱོབ་ཆེན་པོ་དམ་འཛིན་བྱ་རྒྱུ་ངེས་པར་དུ་མཐའ་འཁྱོངས་དང་།  བཅོས་སྐྱོང་ཆེན་པོར་མཐུན་སྦྱོར་སྐུལ་འདེད་གཏོང་དགོས།  རྨ་ཆུ་བཅོས་སྐྱོང་གི་མ་ལག་རང་བཞིན་དང་སྤྱི་ཡོངས་རང་བཞིན།  མཐུན་སྦྱོར་རང་བཞིན་བཅས་སྔར་བས་འབུར་དུ་ཐོན་པར་བྱས་ཏེ།  གོང་འོག་སྦྲེལ་བའི་གཞི་གཅིག་གི་སྐྱེ་ཁམས་ཁོར་ཡུག་བཅོས་སྐྱོང་མ་ལག་འཛུགས་པར་སྐུལ་འདེད་གཏོང་བ་དང་།  སྐྱེ་ཁམས་མ་ལག་གལ་ཆེན་སྲུང་སྐྱོབ་དང་སླར་གསོའི་ལས་གྲྭ་གལ་ཆེན་ལག་བསྟར་གཏིང་ཟབ་བྱས་ནས་འབབ་རྒྱུད་ཀྱི་སྐྱེ་ཁམས་མ་ལག་གི་བརྟན་བརླིང་རང་བཞིན་མཐོར་འདེགས་གཏོང་དགོས།  དུས་མཚུངས་སུ་རྨ་ཆུའི་འབབ་རྒྱུད་སྟོད་སྨད་བར་གསུམ་གྱི་ས་ཁུལ་མི་འདྲ་བའི་སྐྱེ་ཁམས་འཛུགས་སྐྲུན་གྱི་གཙོ་གནད་ཀྱང་མི་འདྲ་བས།  ངེས་པར་དུ་རིགས་དབྱེ་ནས་སྲུང་སྐྱོབ་དང་བཅོས་སྐྱོང་བྱ་དགོས།  མཐུན་སྦྱོར་མཉམ་འགུལ་དང་གཅིག་གྱུར་རིགས་དབྱེ།  གོང་འོག་ཆིག་སྒྲིལ་བཅས་བྱས་ཚེ།  རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་སྔར་བས་སྐུལ་འདེད་གཏོང་ཐུབ། 

《རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ཀྱི་འཆར་འགོད་རྩ་གནད》དང་།  རྨ་ཆུ་སྲུང་སྐྱོབ་བཅའ་ཁྲིམས།  《རྨ་ཆུའི་འབབ་རྒྱུད་ཀྱི་སྐྱེ་ཁམས་ཁོར་ཡུག་སྲུང་སྐྱོབ་འཆར་འགོད》སོགས་པར་འགྲེམས་ལག་བསྟར་བྱེད་པ་དང་།  གཙང་པོ་དང་མཚེའུའི་སྐྱེ་ཁམས་སྲུང་སྐྱོབ་དང་བཅོས་སྐྱོང་།  གྲོང་ཁྱེར་དང་གྲོང་རྡལ་གྱི་ཁོར་ཡུག་བཅོས་སྐྱོང་སྒྲིག་བཀོད་ཀྱི་ཞན་ཆ་ཁ་གསབ་བྱེད་པ་སོགས་ཀྱི་བྱ་སྤྱོད་རབ་དང་རིམ་པ་སྤེལ་བ།  རི་ཆུ་ནགས་ཞིང་མཚེའུ་རྩྭ་ཐང་བྱེ་ཐང་བཅས་གཞི་གཅིག་ཅན་གྱི་སྲུང་སྐྱོབ་དང་ཉམས་གསོའི་ལས་གྲྭ་མང་པོ་ལག་ལེན་བསྟར་བ།  རྨ་ཆུའི་འབབ་རྒྱུད་ཀྱི་འཕྲེད་ཕྱོགས་སྐྱེ་ཁམས་སྲུང་སྐྱོབ་ཁ་གསབ་ལམ་སྲོལ་འཛུགས་པ་དང་འཐུས་ཚང་དུ་གཏོང་བ་སོགས་རྨ་ཆུའི་སྟོད་སྨད་ཀྱིས་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་མཛེས་སྡུག་ལྡན་པའི་རྣམ་པ་ནུས་ཤུགས་ཡོད་རྒུས་འཆར་འགོད་བྱེད་བཞིན་ཡོད་པ་དང་སྤུས་ཚད་མཐོ་བའི་སྐྱེ་ཁམས་ཁོར་ཡུག་གིས་འབབ་རྒྱུད་ཀྱི་ས་གནས་ཁག་གི་སྤུས་ཚད་མཐོ་བའི་འཕེལ་རྒྱས་ལ་རིམ་བཞིན་འདེགས་སྐྱོར་བྱེད་བཞིན་ཡོད།

འཐབ་ལམ་གསར་བར་རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་འདུ་ཤེས་བརྟན་པོར་གཏོང་བ་དང་།  སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་མཐའ་འཁྱོངས་བྱེད་པ།  སེམས་ཤུགས་གཅིག་སྒྲིལ་གྱིས་དུས་རབས་གསར་བའི“རྨ་ཆུའི་མཉམ་གཞས་ཆེན་མོ”ལེགས་པོར་ལེན་པ་བཅས་བྱས་ཚེ།  རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་གསར་བ་གཏོད་ཐུབ་ལ།  སླད་ཕྱིན་རྨ་ཆུ་དེ་བས་ཇེ་མཛེས་སུ་ཕྱིན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་ཆེད་དུ་ཞུམ་མེད་མདུན་སྐྱོད་ཀྱི་སྟོབས་ཤུགས་ཆེན་པོ་གཅིག་སྒྲིལ་ཐུབ་པ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་ཐུབ་ངེས།