བོད་རིགས་བུ་མོ་ཚེ་རིང་མཚོ་མོས་སྐད་གྲགས་བཞག་འདུག

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། སེམས་ཀྱི་ཞིང་ཁམས། བཤེར་འབེབས། རིན་ཆེན་ཚེ་རིང་།

ཚེས22ཉིན་གསར་འགོད་པས་བོད་ལྗོངས་ལུས་རྩལ་ཅུ་ནས་ཤེས་རྟོགས་བྱུང་བ་ལྟར་ན། 2024ལོའི་རྒྱལ་ཡོངས་མ་ལ་སུང་ལེགས་སྐྱེས་འགྲན་སྡུར༼ས་ཚིགས་གཉིས་པ༽ཧོ་པེ་ཞིང་ཆེན་ཧིང་ཧྲུས་གྲོང་ཁྱེར་དུ་འཚོགས་ཤིང་། བོད་རང་སྐྱོང་ལྗོངས་ཀྱི་འབྲིང་རྒྱུག་དང་རྒྱང་རྒྱུག་ལུས་རྩལ་པ8འགྲན་སྡུར་ནང་ཞུགས་པ་རེད། 

ཚ་ཚ་འུར་འུར་ངང་འགྲན་བསྡུར་བྱས་པ་བརྒྱུད། བོད་རང་སྐྱོང་ལྗོངས་ཀྱི་འགྲན་ཞུགས་པ་ཚེ་རིང་མཚོ་མོས་ཆུ་ཚོད2དང་སྐར་མ26སྐར་ཆ47ཐོག་ཨང་དང་པོ་བླངས་པར་མ་ཟད་མི་སྒེར་གྱི་གྲུབ་འབྲས་བཟང་ཤོས་ཀྱི་ཟིན་ཐོ་གསར་པ་བཏོད་ཡོད།  དེ་བཞིན་ཁོ་མོའི་གྲུབ་འབྲས་དེས་འགྲན་ལམ་དེའི་ནང་རྒྱལ་ནང་གི་བུད་མེད་རུ་ཁག་འགྲན་བསྡུར་གྱི་ཟིན་ཐོ་གསར་པ་བཏོད་ཅིང་། བོད་ལྗོངས་ཀྱི་བུད་མེད་མ་ལ་སུང་གི་ཟིན་ཐོ་གསར་པ་བཏོད་པ་རེད།