དུས་རབས་གསར་བའི་བོད་འབྲེལ་གཞི་རིམ་ཆོས་ལུགས་བཅོས་སྐྱོང་གླེང་སྟེགས་སྐབས་གསུམ་པ་དང་བཅོས་སྐྱོང་ལས་ཀའི་ཡུལ་དངོས་སྐུལ་འདེད་གྲོས་ཚོགས་རེབ་གོང་གྲོང་ཁྱེར་དུ་བསྡུས།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ། བཤེར་འབེབས། རིན་ཆེན་ཚེ་རིང་།

ཟླ10ཚེས29ཉིན།  ཀྲུང་གོའི་བོད་རིག་པ་ཞིབ་འཇུག་ལྟེ་གནས་དང་། མཚོ་སྔོན་ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུ། མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་བཅས་ཀྱིས་གཙོ་སྒྲུབ་གནང་བའི་དུས་རབས་གསར་པའི་བོད་འབྲེལ་གཞི་རིམ་ཆོས་ལུགས་བཅོས་སྐྱོང་གླེང་སྟེགས་སྐབས་གསུམ་པ་དང་བཅོས་སྐྱོང་བྱ་བའི་ཡུལ་དངོས་སྐུལ་འདེད་ཚོགས་འདུ་རྨ་ལྷོ་བོད་རིགས་རང་སྐྱོང་ཁུལ་རེབ་གོང་གྲོང་ཁྱེར་དུ་བསྡུས། ཞིང་ཆེན་ཏང་ཨུའི་རྒྱུན་ཨུ།  འཐབ་ཕྱོགས་གཅིག་གྱུར་པུའི་པུ་ཀྲང་པད་ཁོ་ཚོགས་འདུར་ཞུགས་པ་མ་ཟད་གཏམ་བཤད།

ཐེངས་དེའི་གྲོས་ཚོགས་ཉིན2ལ་འཚོགས་ཤིང་།  བརྗོད་དོན་གཏམ་བཤད་དང་། དཔྱད་གླེང་བརྗེ་སྤེལ།  ཡུལ་དངོས་ལྟ་སྦྱོང་བཅས་ཟུང་དུ་འབྲེལ་ནས་འཚོགས་ཡོད།   བོད་འབྲེལ་གྱི་ཞིང་ཆེན་དང་ལྗོངས་ལྔ་དང་འབྲེལ་ཡོད་གྲོང་ཁྱེར་དང་ཁུལ་གྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་དོན་སྡེ་ཚན་གྱི་འགན་འཁུར་བློ་མཐུན་ཚོགས་འདུར་ཞུགས།  ཞིང་ཆེན་ཐད་གཏོགས་ཀྱི་འབྲེལ་ཡོད་སྡེ་ཚན་དང་།   གྲོང་ཁྱེར་དང་ཁུལ8ཀྱི་འཐབ་ཕྱོགས་གཅིག་གྱུར་དང་མི་རིགས་ཆོས་ལུགས་ལས་དོན་སྡེ་ཚན་གྱིས་ཉམས་མྱོང་གི་ཕྱོགས་ནས་བརྗེ་སྤེལ་གནང་།  ཀྲུང་གོའི་བོད་རིག་པ་ཞིབ་འཇུག་ལྟེ་གནས་དང་།  ཀྲུང་གོའི་སྤྱི་ཚོགས་ཚན་རིག་གླིང་། ཞིང་ཆེན་སྤྱི་ཚོགས་ཚན་རིག་གླིང་སོགས་ཞིང་ཆེན་ཕྱི་ནང་གི་བོད་འབྲེལ་ཞིབ་འཇུག་ལས་ཁུངས30ལྷག་གི་ཆེད་མཁས་པ་དང་རིག་པ་བ་དཔྱད་གླེང་བརྗེ་སྤེལ་གྲོས་ཚོགས་སུ་ཞུགས་ཏེ།   རིག་གཞུང་དཔྱད་རྩོམ་དང་ཞིབ་འཇུག་སྙན་ཞུ22དང་།   ལས་ཀའི་ཉམས་མྱོང་བརྗེ་རེས་ཀྱི་རྒྱུ་ཆ16ཙམ་སྤེལ།

གྲོས་ཚོགས་སྟེང་།  ཆོས་ལུགས་བཅོས་སྐྱོང་ནི་རྒྱལ་ཁབ་བཅོས་སྐྱོང་གི་ཕྱོགས་གལ་ཆེན་ཞིག་ཡིན་ལ།   ཆོས་ལུགས་ཁྱབ་ཁོངས་ཀྱི་གནད་དོན་ཐག་གཅོད་དང་།  ཉེན་འགོག་ཉེན་སེལ།  རྒྱལ་ཁབ་ཀྱི་བདེ་འཇགས་ལ་སྲུང་སྐྱོབ་བཅས་བྱེད་པའི་དགོས་ངེས་ཀྱི་བླང་བྱ་ཡང་རེད།   དེ་བས་བསམ་བློའི་དྲིལ་སྒྲོག་གི་སྣེ་ཁྲིད་ཇེ་དྲག་ཏུ་བཏང་སྟེ།   བོད་བརྒྱུད་ནང་བསྟན་དང་སྤྱི་ཚོགས་རིང་ལུགས་སྤྱི་ཚོགས་གཉིས་ཕན་ཚུན་འཆམ་མཐུན་ཡོང་བར་སྣེ་ཁྲིད་ཧུར་ཐག་བྱ་དགོས།   གནས་བབ་ལ་སྟངས་འཛིན་ཡང་དག་བྱས་ཏེ།   གཞི་རིམ་ཆོས་ལུགས་བཅོས་སྐྱོང་གི་གལ་ཆེ་རང་བཞིན་དང་དགོས་ངེས་རང་བཞིན་ལ་ངོས་ཤེས་ཟབ་མོ་བླངས་ནས་དོ་དམ་ནན་མོ་དང་།  ཚད་ལྡན་ཡོང་བར་སྐུལ་འདེད་གཏང་དགོས།   ལག་ལེན་དང་གསར་གཏོད་ལ་དང་དོད་ཆེན་པོ་བྱས་ཏེ།  རྣམ་པ་ཀུན་ཏུ་ལོ་རྒྱུས་ལ་བརྩི་འཇོག་དང་གནད་དོན་ལ་མཐོང་ཆེན་བྱས་ནས་གཞི་རིམ་ཆོས་ལུགས་ལས་དོན་དོ་དམ་གནད་ལ་འཁེལ་ཞིང་ཁྲིམས་སྐྱོང་ཅན་དུ་བསྒྱུར་བར་ནུས་ཤུགས་ཡོད་རྒུས་སྐུལ་འདེད་གཏང་དགོས།   “སྙིང་བོ་གཅིག་དང་སྣ་མང་མཉམ་བཅོས”ཀྱི་བཅོས་སྐྱོང་བྱེད་སྟངས་སྔར་ལས་འཐུས་ཚང་དུ་བཏང་སྟེ།   གཞི་རིམ་ཆོས་ལུགས་བཅོས་སྐྱོང་ལམ་ལུགས་ཅན་དང་ཚན་ལྡན་ཅན་དུ་འགྱུར་བར་སྒོ་ཀུན་ནས་སྐུལ་འདེད་གཏང་དགོས་པ་ནན་གྱིས་བསྟན།

ཚོགས་འདུ་ཚོགས་རིང་དུ།  ཚོགས་ཞུགས་མི་སྣ་དག་རེབ་གོང་གྲོང་ཁྱེར་རོང་བོ་གྲོང་རྡལ་གྱི་ཆོས་ལྔའི་ཁྲོམ་གཅིག་ལམ་དང་ཐོ་རྒྱ་གྲོང་རྡལ་སེང་གེ་གཞོང་གི་གསེར་ཁང་།  གཅན་ཚ་རྫོང་ཁམས་ར་གྲོང་རྡལ་གྱི་ཡུལ་ལྷའི་ལྷ་ཁང་སོགས་དམངས་ཁྲོད་ཀྱི་ཆོས་ལུགས་དད་མོས་བྱ་ཡུལ་དུ་བསྐྱོད་དེ་ལྟ་སྦྱོང་བྱས།