དཔའ་རིས་གཉེན་སྟོན་དང་དམངས་གླུའི་སྐོར་གྱི་དེབ་གསར་གཉིས་དཔར་སྐྲུན་བྱས་འདུག

རྩོམ་སྒྲིག    སངས་དོན།    ཡོང་ཁུངས།  སི་ཁྲོན་མི་རིགས་དཔེ་སྐྲུན་ཁང་གི་སྐད་འཕྲིན་སྤྱི་སྟེགས།     བཤེར་འབེབས།    རིན་ཆེན་ཚེ་རིང་།

ཉེ་ཆར། དཔའ་རིས་རྫོང་བོད་སྐད་ཡིག་ཁྲིད་སྟོན་ལྟེ་བས་བསྒྲིགས་པའི《དཔའ་རིས་གཉེན་སྟོན་བཀྲ་ཤིས་ཀུན་འཛོམས》དང་《དཔའ་རིས་དམངས་གླུའི་སྙན་ཚིག་གཅེས་བསྡུས》ཞེས་པའི་དཔེ་དེབ་གཉིས་སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་བྱས་འདུག

《དཔའ་རིས་གཉེན་སྟོན་བཀྲ་ཤིས་ཀུན་འཛོམས》ནི་དཔའ་རིས་དམངས་སྲོལ་རིག་གནས་དཔེ་ཚོགས་ཀྱི་བྱེ་བྲག་ཅིག་ཡིན། ཐེངས་འདིར་དཔེ་སྐྲུན་བགྱིས་ནས་རྒྱ་ཆེ་ཀློག་པ་པོའི་མིག་ལམ་དུ་ཕུལ་བའང་རིག་གནས་ཉིང་བཅུད་འདི་ཉིད་སྲུང་སྐྱོབ་དང་རྒྱུད་འཛིན་གྱི་དམིགས་ཡུལ་འབའ་ཞིག་བཅངས་པ་དེ་ཡིན། དེབ་འདིར་རྒྱ་བོད་ཤན་སྦྱར་དང་ཡིག་རིས་ཟུང་འབྲེལ་གྱི་སྒོ་ནས་དཔའ་རིས་གཉེན་སྟོན་གྱི་རྟེན་འབྲེལ་སྐྱོང་ལུགས་ཆ་ཚང་འཁོད་ཡོད་དོ།། 

《དཔའ་རིས་དམངས་གླུའི་སྙན་ཚིག་གཅེས་བསྡུས》ཞེས་པ་འདིའི་ནང་དོན་ནི་དཔའ་རིས་དམངས་ཁྲོད་རྩོམ་རིག་དམངས་གླུའི་ཁོངས་གཏོགས་ཤིག་ཡིན་ལ། དེ་ནི་ལོ་ངོ་སྟོང་ཕྲག་གི་རིང་ལ་དཔའ་རིས་དམངས་ཚོགས་ཀྱིས་ཐོན་སྐྱེད་འཚོ་བའི་ཁྲོད་ནས་ནང་བསམ་པའི་ཀུན་སློང་མཚོན་པ་དང་། རང་བྱུང་ཁམས་དང་རྩྭ་ཐང་། རི་ཆུ་ནགས་གསུམ་ལ་བརྟེན་ནས་དངོས་ཡོད་འཚོ་བ་བརྗོད་ཅིང་། རང་བྱུང་ཁམས་ཆེན་མོ་ལ་བསྟོད་ཅིང་བསྔགས་པ་དང་། མ་འོངས་པའི་བདེ་སྐྱིད་ཀྱི་འཚོ་བ་གསར་བར་རེ་སྨོན་སོགས་བྲིས་ཡོད། རྗོད་བྱེད་ཀྱི་ཚིག་ནི་དཔའ་རིས་པའི་ཁ་སྐད་ཀྱི་སྒྲ་གདངས་སམ་ཟེར་སྒྲོས་དང་མཐུན་པ་དང་། ས་གནས་ཀྱི་ཁྱད་ཆོས་ལྡན་པའི་དབྱངས་རྟ་རྣལ་མའམ། དཔའ་རིས་ཡུལ་སྐད་ལས་གྲུབ་པའི་གནའ་གླུ་དག་གང་ཐུབ་ཅི་ཐུབ་ཀྱིས་བསྡུས་ཏེ་བསྒྲིགས་ཤིང་དམངས་ཁྲོད་རྩོམ་རིག་གི་ཁྱད་ཆོས་མ་ཉམས་སོར་བཞག་དང་དེའི་ཁྱད་ཆོས་འབུར་དུ་ཐོན་ཡོད་དོ།།