མཚོ་བྱང་ཁུལ་གྱིས2026ལོའི་རྒྱ་ལོ་བཅོ་ལྔའི་རིག་གནས་འཁྲབ་སྟོན་གྱི་བྱེད་སྒོ་སྤེལ།

རྩོམ་སྒྲིག   སངས་དོན།       ཡོང་ཁུངས།   མཚོ་བྱང་མདོ་ལ་བོད་ཡིག་ཚགས་པར།     བཤེར་འབེབས།    རིན་ཆེན་ཚེ་རིང་།

ཟླ3པའི་ཚེས3ཉིན་ཏེ། ལུགས་རྙིང་གི་ཟླ་དང་པོའི་ཚེས་བཅོ་ལྔའམ་རྒྱ་ལོ་བཅོ་ལྔའི་དུས་ཆེན་ཉིན། མདའ་བཞི་རྫོང་མི་དམངས་སྲིད་གཞུང་དང་མཚོ་བྱང་ཁུལ་རིག་གནས་ལུས་རྩལ་གནས་སྐོར་རྒྱང་སྒྲོག་བརྙན་འཕྲིན་ཅུ་ཡིས་གཙོ་སྒྲུབ་བྱས་པའི་མཚོ་བྱང་ཁུལ་གྱི2026ལོའི“རྒྱ་ལོ་བཅོ་ལྔའི་དུས་ཆེན”གྱི་རིག་གནས་འཁྲབ་སྟོན་བྱེད་སྒོ་ནུབ་མཚོ་གྲོང་རྡལ་གྱི221འདུ་ར་ནས་འཚོགས། ཁུལ་ཨུའི་ཧྲུའུ་ཅི་ཀྲང་ཧྥེང་དང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན། ཁུལ་ཨུའི་ཧྲུའུ་ཅི་གཞོན་པའམ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཀྲང་ཨའེ་ཧུང་། ཁུལ་ཨུའི་ཧྲུའུ་ཅི་གཞོན་པའམ་རྩ་འཛུགས་པུའུ་ཡི་པུའུ་ཀྲང་སི་ཅི་ཧྲིན། དེ་བཞིན་ཁུལ་དུ་བསྡད་ཡོད་པའི་ཁུལ་རིམ་པའི་མགོ་ཁྲིད་བྱེད་སྒོར་ཞུགས་ལ། ཁུལ་དཔོན་གཞོན་པའམ་མདའ་བཞི་རྫོང་ཨུའི་ཧྲུའུ་ཅི་སྟག་ལྷས་བྱེད་སྒོ་མགོ་བརྩམས་པ་ཁྱབ་བསྒྲགས་བྱས།

འཁྲབ་སྟོན་མ་བྱས་གོང་དུ།  ཁུལ་གྱི་ཚན་ཁག་ཆེན་མོ་བཞིའི་མགོ་ཁྲིད་ཀྱིས“རྒན་པ་གསུམ”གྱི་མི་སྣའི་འཐུས་མིར་འཚམས་འདྲི་བྱས་ཏེ་ཏང་དང་སྲིད་གཞུང་གིས་རྒན་པའི་ཚོགས་པར་བཅངས་པའི་བརྩེ་སེམས་ཟབ་མོ་མཚོན་པར་བྱས།

རྒྱུས་ལོན་བྱུང་བ་ལྟར་ན། ཐེངས་འདིའི་བྱེད་སྒོ་ནི“འདོ་རིགས་རྟ་ཕོའི་བང་གིས་གནམ་ལོ་གསར་བར་དབུ་ཁྱུད་འབྲི། དག་སྣང་མཚོ་བྱང་ཡུལ་དུ་རྒྱ་ལོ་བཅོ་ལྔ་དགའ་བས་རོལ”ཞེས་པ་བརྗོད་དོན་བྱས་ཏེ་མཚོ་བྱང་ཁུལ་གྱི་རྩེད་ཆས་འཁྲབ་སྟོན་རུ་ཁག་དང་མདའ་བཞི་རྫོང་གསེར་ཐང་ཡུལ་ཚོའི་རྒྱ་འཆམ་འཁྲབ་སྟོན་རུ་ཁག ཡུལ་ཚོ་དང་གྲོང་རྡལ་སོ་སོའི་འཁྲབ་སྟོན་རུ་ཁག་ནས་ཡོང་བའི་འཁྲབ་སྟོན་པ་མི900ལྷག་ཙམ་གྱིས་དགའ་སྤྲོའི་ངང་རྒྱ་འཆམ་འཁྲབ་སྟོན་དང་ཐུན་མོང་མ་ཡིན་པའི་སྲོལ་རྒྱུན་མི་རིགས་གྱོན་ཆས་བཤམས་སྟོན་བྱས་པ་བརྒྱུད་ཁུལ་ཡོངས་ཀྱི་མི་དམངས་ལ་ལོ་གསར་གྱི་འཚམས་འདྲི་ཞུས་ཏེ་མེ་ཕོ་རྟ་ལོའི་ལོ་གསར་དུས་ཆེན་ལ་རྟེན་འབྲེལ་དང་རྒྱ་ལོ་བཅོ་ལྔའི་དུས་ཆེན་སྤྲོ་བས་བསུས།

འཁྲབ་སྟོན་བྱེད་སྐབས། ལྡེམ་མྱུར་གྱིས་ཕྱུག་པའི་ལུས་ཀྱི་སྟངས་སྟབས་ལ་གསལ་ཞིང་དག་པའི་རྔ་སྒྲའི་གཞོགས་འདེགས་བྱས་ཏེ་སྟོབས་ཤུགས་ཀྱིས་ཁེངས་པའི་འབྲུག་དང་སེང་གེའི་ཞབས་བྲོ་དང་། རྟགས་དང་རྟེན་འབྲེལ་གྱིས་ཕྱུག་པའི་རྒྱ་འཆམ། དགའ་སྤྲོའི་རྩེད་ཆས་ཀྱི་འཁྲབ་སྟོན་སྣ་ཚོགས། དེ་བཞིན་མི་རིགས་ཀྱི་ཁྱད་ཆོས་ལྡན་པའི་སྲོལ་རྒྱུན་ཤོམ་འགྲོ་སོགས་འཁྲབ་སྟོན་བྱས་པ་ལས་མཚོ་བྱང་མི་རིགས་རིག་གནས་ཀྱི་ཐུན་མོང་མ་ཡིན་པའི་མཛེས་པ་མངོན་ཡོད། དེའི་རིང་འཁྲབ་སྟོན་པས་ལུས་ལ་མཛེས་སྡུག་ལྡན་པའི་དུས་ཆེན་གྱི་གཟབ་མཆོར་ལེགས་པོར་སྤྲས་ཏེ། དགའ་སྟོན་རྟེན་འབྲེལ་གྱི་རྔ་དང་གོམ་ཞེང་ཆེན་པོས་གར་སྟེགས་ཐོག་གཟབ་རྒྱས་ངང་བསྐྱོད། འབྲུག་དང་སེང་གེའི་ཞབས་བྲོ། ཡང་གར་ཞབས་བྲོ། ཤིང་རྐང་། ཆར་ཆུ་དུས་འབབ་ཀྱི་གྲུ། མི་རིགས་ཀྱི་གླུ་གར་བཅས་རེས་མོས་ཀྱིས་འཁྲབ་སྟོན་བྱས་པ་དང་། རྒྱ་འཆམ་རུ་མི་རེ་རེར་སྙིང་སྟོབས་ཆེར་སྐྱེད་དང་དགའ་སྤྲོའི་རྣམ་པས་ཁེངས་ཤིང་། གསེར་འབྲུག་རེ་རེ་བཞིན་འཕུར་ལྡིང་འཁྱུག་གསུམ་གྱིས་འཁྲབ་སྟོན་བྱས་ཤིང་དེར་བརྗིད་ཉམས་ཀྱིས་ཕྱུག་ཡོད། སེང་གེ་རེ་རེ་ཡིས་སྙིང་སྟོབས་ཀྱི་གཡུ་རལ་རྒྱས་ཤིང་རྔམ་བརྗིད་ལྡན། རུ་ཁག་རེ་རེའི་ཡང་གར་ཞབས་བྲོ་སྙན་ཞིང་འཇེབས་ལ་དགའ་སྤྲོ་རྟེན་འབྲེལ་གྱི་མཚོན་དོན་ལྡན། ཡུལ་དངོས་སུ་ཐལ་མོའི་རྡེབ་སྒྲ་དང་དགའ་སྤྲོའི་དགོད་སྒྲ་རྒྱུན་ཆད་མེད་པར་གྲགས་ནས། ཚང་མར་བར་ཐག་ཉེ་ས་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་ཐུན་མོང་མ་ཡིན་པའི་མཛེས་པ་ཉམས་སུ་མྱོང་དུ་བཅུག་པ་དང་། དགའ་སྤྲོའི་དགོད་སྒྲ་དང་མཉམ་དུ་བཀྲ་ཤིས་པའི་ལོ་གསར་ལ་རོལ།

ཁུལ་ཨུའི་སྡེ་ཁག་སོ་སོ་དང་། ཁུལ་ཐད་གཏོགས་ལས་ཁུངས་སོ་སོ། མང་ཚོགས་ཚོགས་པ་སོ་སོ། ཁུལ་དུ་བཅའ་སྡོད་བྱས་པའི་ཞིང་ཆེན་གྱི་ལས་ཁུངས་སོ་སོའི་ལས་བྱེད་ལས་བཟོ་བ་ཡོངས། དེ་བཞིན་ནུབ་མཚོ་གྲོང་རྡལ་ས་ཁུལ་གྱི་མང་ཚོགས་བཅས་ཀྱིས་མཉམ་དུ་འཁྲབ་སྟོན་ལ་བལྟས།