མཚོ་སྔོན་ཞིང་ཆེན་གྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་པེ་ཅིང་དུ་འབྱོར་བ།

སྒྲིག་སྒྱུར།    སངས་དོན།      ཡོང་ཁུངས།   མཚོ་སྔོན་ཉིན་རེའི་ཚགས་པར།     བཤེར་འབེབས།    རིན་ཆེན་ཚེ་རིང་།

མཚོ་སྔོན་གསར་འགྱུར་དྲ་བ·ཅང་ཡོན་གསར་འགྱུར་མགྲོན་སྣེའི་ཐོག་གནས་ཚུལ་འབྱོར་བ་ལྟར་ན། ཟླ3པའི་ཚེས3ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་བཞི་པར་ཞུགས་མཁན་མཚོ་སྔོན་གྱི་འཐུས་མི་ཚོགས་པ་བདེ་བླག་ངང་པེ་ཅིང་དུ་འབྱོར་ནས་ཚོགས་ཆེན་ལ་འབྱོར་ཐོ་བཀོད་པ་རེད།

པེ་ཅིང་དུ་ལས་འགན་སྒྲུབ་པར་མ་བསྐྱོད་གོང་མཚོ་སྔོན་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མིས་གྲོང་རྡལ་དང་གྲོང་གསེབ། ཐོན་ལས་ཀྱི་འཐབ་ས་དང་པོར་བརྟག་ཞིབ་དང་འཚམས་འདྲི་བྱེད་པར་ཕྱིན་ནས་མང་ཚོགས་ཀྱི་བསམ་འདུན་ནན་ཏན་ངང་ཉན་པ་དང་། སྤྱི་ཚོགས་ཀྱི་གནས་ཚུལ་དང་དམངས་ཀྱི་བསམ་འདུན་ཞིབ་ཚགས་ངང་ཤོད་པ། ཕྱོགས་ཁག་གི་བསམ་འཆར་རྒྱ་ཁྱབ་ངང་བསྡུ་ལེན་བྱེད་པ། བསམ་འཆར་དང་གྲོས་མགོ་ཞིབ་ཚགས་ངང་འདོན་པ་བཅས་བྱས་ནས་ཚོགས་ཆེན་ཐོག་སྐད་ཆ་དྲང་པོ་ཤོད་པ་དང་ཇུས་བཟང་འདོན་པར་གྲ་སྒྲིག་གང་ལེགས་བྱས་ཡོད། འཐུས་མི་ཚོས་ཞིང་ཆེན་ཡོངས་ཀྱི་མི་རིགས་ཁག་གི་མང་ཚོགས་ཀྱི་མངགས་བཅོལ་ཟབ་མོ་བློ་ལ་བརྟན་པོར་ངེས་ནས་ཕ་ཡུལ་མི་དམངས་ཀྱི་རེ་བ་སྟོང་ཟད་དུ་མི་གཏོང་བར་མཚོ་སྔོན་མི་དམངས་ཀྱི་བསམ་འདུན་ཇི་མ་ཇི་བཞིན་ཚོགས་ཆེན་གཉིས་ཀྱི་ཚོགས་རར་འདོན་རྒྱུ་ཡིན་ཞེས་མགྲིན་གཅིག་ཏུ་གསུངས་པ་རེད།

འཐུས་མི་ཅང་ཀྲི་ཀང་གིས་ད་ཐེངས་ཀྱི་ཚོགས་འདུར་མ་ཞུགས་གོང་ངས་མཚོ་བོད་ས་མཐོའི་སྐྱེ་ཁམས་སྲུང་སྐྱོང་གི་གཙོ་གནད་ཁྱབ་ཁོངས་ལ་དམིགས་ནས་མཚོ་སྔོན་ཞིང་ཆེན་གྱི་སྐྱེ་ཁམས་ཁོར་ཡུག་གི་ད་ལྟའི་གནས་ཚུལ་དང་། སྐྱེ་ཁམས་བཅོས་སྐྱོང་གི་ཕན་འབྲས། འཕྲད་པའི་དངོས་ཡོད་འགྲན་སློང་བཅས་ལ་བརྟག་ཞིབ་གཏིང་ཟབ་བྱས་ཏེ་ཚོགས་ཆེན་ཐོག་ཐབས་འདོན་ཇུས་འདོན་བྱས་པ་བརྒྱུད་མཚོ་སྔོན་གྱི་སྐྱེ་ཁམས་སྲུང་སྐྱོང་ལས་དོན་ལ་སྲིད་ཇུས་དང་། མ་དངུལ། ལག་རྩལ་བཅས་ཀྱི་རྒྱབ་སྐྱོར་དེ་བས་མང་བ་ཐོབ་རྒྱུའི་རེ་བ་ཡོད་ཅེས་གསུངས་པ་རེད།

འཐུས་མི་ལིའུ་ཞའོ་རུང་གིས་ཉེ་དུས་ཁོང་གྲོང་ཁྱེར་དང་གྲོང་གསེབ་ཀྱི་སློབ་གྲྭ་དང་གཞི་རིམ་སྨན་བཅོས་སྒྲིག་གཞིར་འཚམས་འདྲི་དང་བརྟག་ཞིབ་བྱེད་པར་ཕྱིན་ནས་སློབ་གསོའི་ཐོན་ཁུངས་བཀོད་སྒྲིག་ལེགས་སུ་གཏོང་བ་དང་། གཞི་རིམ་གྱི་སྨན་བཅོས་ཞབས་ཞུའི་ཆུ་ཚད་མཐོ་རུ་གཏོང་བ། མི་རིགས་ཁག་གི་མང་ཚོགས་ཀྱི་དམངས་འཚོའི་བདེ་སྐྱིད་ཆེ་རུ་གཏོང་བ་བཅས་སྐོར་གྱི་བསམ་འཆར་དང་གྲོས་མགོ་མང་པོ་བསྡུ་རུབ་བྱས་ཡོད། ཐེངས་འདིའི་ཚོགས་ཆེན་ལ་ཞུགས་པ་བརྒྱུད། དམངས་ཚིས་རྒྱུན་མཐུད་ངང་ལེགས་བཅོས་དང་འཕེལ་རྒྱས་ཀྱི་གྲུབ་འབྲས་དེ་འདྲ་མཉམ་སྒོས་རིགས་སོ་སོའི་མང་ཚོགས་ཀྱིས་ལོངས་སྤྱོད་ཐུབ་པར་སྟོབས་ཤུགས་འབུལ་རྒྱུ་ཡིན་ཟེར། 

དཔྱིད་ཀྱི་དཔལ་མོར་སྡོངས་ནས་ལམ་ལ་ཆས། འགན་ནུས་ལེགས་པར་སྒྲུབ་ནས་འབྱུང་འགྱུར་སྐྲུན། ཞིང་ཆེན་ཡོངས་ཀྱི་མི་དམངས་ཀྱི་རེ་བ་ཟབ་མོ་ཕྲག་ཏུ་འཁུར་ནས་མཚོ་སྔོན་འཐུས་མི་ཚོགས་པའི་འཐུས་མི་ཡོངས་ཀྱིས་དཔའ་ངར་ཆེར་བསྐྱེད་ཀྱི་རྣམ་འགྱུར་དང་བདེན་འཚོལ་དངོས་སྒྲུབ་ཀྱི་སྤྱོད་ཚུལ་ཐོག་ནས་འགན་སྒྲུབ་ཇུས་འདོན་ནན་ཏན་དང་མཚོ་སྔོན་གྱི་སྐད་སྒྲ་བརྒྱུད་སྤྲོད་དང་མཚོ་སྔོན་གྱི་གཟུགས་བརྙན་མངོན་པར་བྱས་ཏེ་ཚོགས་ཆེན་གྱི་ལས་འགན་ཁག་ནུས་ཤུགས་ཡོད་རྒུས་ལེགས་སྒྲུབ་བྱ་རྒྱུ་རེད།