ཆིན་ན་ཀང་གིས་སོ་སོར་ཨུ་རུ་སུའི་ཕྱི་འབྲེལ་པུའུ་ཀྲང་ལ་ཧྥུའུ་ལུའོ་ཧྥུའུ་དང་ཕ་ཁི་སི་ཐན་གྱི་ཕྱི་འབྲེལ་པུའུ་ཀྲང་པི་ལ་ཝ་ཨར། ཧན་གོའི་ཕྱི་འབྲེལ་པུའུ་ཀྲང་ཕུའུ་ཀྲེན་བཅས་ལ་ཁ་པར་བཏང་པ།

རྩོམ་སྒྲིག   སངས་དོན།  ཡོང་ཁུངས། ཞིན་ཧྭ་གསར་འགྱུར་དྲ་བ།  ལོ་ཙཱ།  མཁའ་འགྲོ་ཚེ་བརྟན།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ1པོའི་ཚེས9ཉིན། ཕྱི་འབྲེལ་པུའུ་ཡི་པུའུ་ཀྲང་ཆིན་ཀང་གིས་སོ་སོར་ཨུ་རུ་སུའི་ཕྱི་འབྲེལ་པུའུ་ཀྲང་ལ་ཧྥུའུ་ལུའོ་ཧྥུའུ་དང་ཕ་ཁི་སི་ཐན་གྱི་ཕྱི་འབྲེལ་པུའུ་ཀྲང་པི་ལ་ཝ་ཨར། ཧན་གོའི་ཕྱི་འབྲེལ་པུའུ་ཀྲང་ཕུའུ་ཀྲེན་བཅས་ལ་ཁ་པར་བཏང་། 

ཆིན་ཀང་གིས། ཀྲུང་གོ་དང་ཨུ་རུ་སུ་བར་གྱི་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་དེ་ཆུ་ཚད་མཐོ་བའི་འཕེལ་རྒྱས་ཕྱོགས་སུ་འགྲོ་བ་རྒྱུན་འཁྱོངས་དང་། ཁྱབ་ཁོངས་ཁག་གི་སྤེལ་རེས་མཉམ་ལས་ལ་སྐུལ་འདེད་གཏིང་ཇེ་ཟབ་ཏུ་གཏོང་བ། མཛའ་གྲོགས་ཀྱི་དམངས་འདོད་རྨང་གཞི་རྒྱུན་མཐུད་ངང་ཇེ་བརྟན་དུ་གཏོང་བ་བཅས་བྱེད་དགོས། ཀྲུང་ཨུའི་འབྲེལ་བ་དེ་མནའ་འབྲེལ་དུ་མི་ཞུགས་པ་དང་ཁ་གཏད་དུ་མི་ལངས་པ། ཕྱོགས་གསུམ་པར་མི་དམིགས་པ་བཅས་ཀྱི་རྨང་གཞི་ཐོག་བཙུགས་པ་ཡིན་པས་ང་ཚོས་ཨུ་རུ་སུ་ཕྱོགས་དང་མཉམ་དུ་ལག་གདང་སྦྲེལ་ནས་རྒྱལ་ཁབ་གཉིས་ཀྱི་གཙོ་བདག་གི་ཐུན་མོང་ངོས་འཛིན་གལ་ཆེན་ཁག་ལ་དོན་འཁྱོལ་ཡག་པོ་བྱས་ཏེ་ཀྲུང་ཨུའི་འབྲེལ་བ་རྒྱུན་ཆད་མེད་པར་མདུན་ཕྱོགས་སུ་བསྐྱོད་པར་སྐུལ་འདེད་གཏོང་འདོད་ཡོད་ཅེས་གསུངས་པ་རེད། 

ཆིན་ཀང་གིས། ཀྲུང་གོ་དང་ཕ་ཁི་སི་ཐན་བར་དམིགས་བསལ་གྱི་མཛའ་གྲོགས་དང་ཚད་མཐོའི་ཡིད་ཆེས་ཡོད་པ་ཡིན། རྒྱལ་ཁབ་གཉིས་ཀྱི་མཐོ་རིམ་མི་སྣ་བར་གྱི་སྤེལ་རེས་ཟབ་མོ་ལ་མཐའ་འཁྱོངས་བྱས་པ་དེ་ཕྱོགས་གཉིས་ཀྱི་འབྲེལ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད། ཀྲུང་གོ་ཕྱོགས་ཀྱིས་ཕ་ཁི་སི་ཐན་ཕྱོགས་དང་མཉམ་དུ་རྒྱལ་ཁབ་གཉིས་ཀྱི་མགོ་ཁྲིད་པའི་ཐུན་མོང་ངོས་འཛིན་གལ་ཆེན་རྣམས་ཁྲིད་སྟོན་དུ་བྱས་ཏེ་ཀྲུང་ཕའི་སྲོལ་རྒྱུན་མཛའ་བརྩེ་རྒྱུན་ཆད་མེད་པར་གཏིང་ཇེ་ཟབ་ཏུ་བཏང་ཞིང་། སྔར་ལས་དམ་ཟབ་ཡིན་པའི་དུས་རབས་གསར་པའི་ཀྲུང་ཕའི་ལས་དབང་གཅིག་མཐུན་འདུས་གྲུབ་མཉམ་སྐྲུན་བྱེད་དགོས། ཀྲུང་གོའི་ལུགས་རྙིང་གི་དཔྱིད་གསར་དུས་ཆེན་ཐོན་ལ་ཉེ་སྐབས་ཀྲུང་གོ་ཕྱོགས་ཀྱིས་ཕ་ཁི་སི་ཐན་དུ་ཡོད་པའི་ཀྲུང་གོའི་སྤྱི་དམངས་ཀྱི་བདེ་འཇགས་ལ་ཚད་མཐོའི་དོ་ཁུར་བྱེད་ཀྱིན་ཡོད་པས་ཕ་ཁི་སི་ཐན་ཕྱོགས་ཀྱིས་མུ་མཐུད་དུ་ནུས་ལྡན་གྱི་བདེ་སྲུང་བྱེད་ཐབས་སྤྱོད་རྒྱུའི་རེ་བ་ཡོད་ཅེས་གསུངས། 

ཆིན་ཀང་གིས། ཀྲུང་གོ་དང་ཧན་གོ་གཉིས་ནི་ཞིག་ཐབས་བྲལ་བའི་ཁྱིམ་མཚེས་རྒྱལ་ཁབ་དང་ཁ་བྲལ་ཐབས་མེད་པའི་རོགས་ཟླ་ཡིན་པ་རེད། ཀྲུང་གོ་དང་ཧན་གོ་བར་གྱི་འབྲེལ་བ་སྐྱོན་བྲལ་དང་བརྟན་བརླིང་ངང་འཕེལ་རྒྱས་འགྲོ་རྒྱུ་དེ་ཕྱོགས་གཉིས་ཀྱི་ཐུན་མོང་གི་ཁེ་ཕན་དང་འཚམས་ཤིང་ཕྱོགས་གཉིས་ཀྱིས་མུ་མཐུད་དུ་འབད་བརྩོན་བྱེད་པའི་ཁ་ཕྱོགས་ཆེན་པོ་ཞིག་ཀྱང་རེད། ངེད་ཀྱིས་ཕྱི་འབྲེལ་པུའུ་ཀྲང་དང་མཉམ་དུ་ལས་དོན་གྱི་འབྲེལ་བ་ཡག་པོ་བཙུགས་ནས་ཐུན་མོང་ཐོག་རྒྱལ་ཁབ་གཉིས་ཀྱི་གཙོ་བདག་གི་ཐུན་མོང་ངོས་འཛིན་གལ་ཆེན་རྣམས་དོན་འཁྱོལ་ཡག་པོ་བྱས་ཏེ་དེང་སྐབས་ལ་གཞི་འཛུགས་པ་དང་ཕུགས་ལ་དམིགས་པ། མཛའ་གྲོགས་ཀྱི་འབྲེལ་བར་དམ་འཛིན་བྱེད་པ། མཉམ་ལས་ཀྱི་སྟོབས་ཤུགས་གཅིག་ཏུ་སྒྲིལ་བ་བཅས་བྱས་ནས་ཀྲུང་ཧན་བར་གྱི་འབྲེལ་བ་བརྟན་བརླིང་ངང་འཕེལ་རྒྱས་སུ་འགྲོ་བར་སྐུལ་འདེད་གཏོང་འདོད་ཡོད། ཆིན་ཀང་གིས་ཉེ་ཆར་ཧན་གོ་ཕྱོགས་ཀྱིས་ཀྲུང་གོ་ནས་སོང་བའི་མི་སྣ་ལ་གནས་སྐབས་ཚོད་འཛིན་གྱི་བྱེད་ཐབས་སྤྱད་པར་དོ་ཁུར་བྱེད་ཀྱིན་ཡོད་ལ། ཧན་གོ་ཕྱོགས་ཀྱིས་ཚན་རིག་དང་མཐུན་པའི་རྣམ་འགྱུར་འཛིན་པར་རེ་བ་ཡོད་ཅེས་གསུངས། 

རྒྱལ་ཁབ་གསུམ་གྱི་ཕྱི་འབྲེལ་པུའུ་ཀྲང་གིས་ཆིན་ཀང་ལ་ཀྲུང་གོའི་ཕྱི་འབྲེལ་པུའུ་ཀྲང་གི་འགན་བཞེས་པར་བཀྲ་ཤིས་རྟེན་འབྲེལ་ཞུས་པ་མ་ཟད། ཀྲུང་གོ་མི་དམངས་ལ་དཔྱིད་གསར་དུས་ཆེན་གྱི་སྨོན་འདུན་ཞུས། ཁོང་ཚོས་མཐོ་རིམ་གྱི་ཐུན་མོང་གི་ངོས་འཛིན་གལ་ཆེན་རྣམས་དོན་འཁྱོལ་བྱས་ཏེ་ཕྱོགས་གཉིས་ཀྱི་འབྲེལ་བ་རྒྱུན་ཆད་མེད་པར་གྲུབ་འབྲས་གསར་པ་ཐོབ་པར་སྐུལ་འདེད་གཏོང་འདོད་ཡོད་ཅེས་བསྟན། པི་ལ་ཝ་ཨར་གྱིས། ཕ་ཁི་སི་ཐན་ཕྱོགས་ཀྱིས་ཕ་ཁི་སི་ཐན་དུ་ཡོད་པའི་ཀྲུང་གོའི་མི་སྣ་དང་སྒྲིག་གཞི། རྣམ་གྲངས་བཅས་ཀྱི་བདེ་འཇགས་ལ་ནུས་ཤུགས་ཡོད་རྒུས་སྲུང་སྐྱོབ་བྱ་རྒྱུ་ཡིན་ཞེས་དང་། ཕུའུ་ཀྲེན་གྱིས་ཧན་གོ་དང་ཀྲུང་གོ་བར་གྱི་མི་ཆོས་རིག་གནས་དང་མི་སྣ་འགྲོ་འོང་ལ་ཤུགས་སྣོན་བརྒྱག་འདོད་ཡོད་ཅེས་གསུངས། །