མཚོ་བྱང་དང་ཟི་ལིང་མཚོ་ཤར་ས་ཁུལ་གསུམ་གྱིས་ཙོང་ཆུའི་ཆུ་མགོ་སྲུང་སྐྱོབ་ཀྱི་དྲིལ་སྒྲོག་བྱེད་སྒོ་མཉམ་འབྲེལ་ཐོག་སྤེལ་བ།

སྒྲིག་སྒྱུར། དམ་ཆོས་བསམ་འགྲུབ། ཡོང་ཁུངས། མཚོ་བྱང་སྨྱན་གསར། བཤེར་འབེབས། རིན་ཆེན་ཚེ་རིང་། 

ཟླ6ཚེས5ཉིན། འཛམ་གླིང་ཁོར་ཡུག་ཉིན་མོར། མཚོ་བྱང་དང་ཟི་ལིང་། མཚོ་ཤར་བཅས་ས་ཁུལ་གསུམ་གྱིས2023ལོའི་དྲུག་ལྔའི་འཛམ་གླིང་ཁོར་ཡུག་ཉིན་མོའི“མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན་འཛུགས་སྐྲུན་བྱེད་པ་སྟེ། ཙོང་ཆུའི་ཆུ་མགོ་སྲུང་སྐྱོབ་བྱེད་པར་ང་ཚོས་འགུལ་སྐྱོད་བྱེད།” ཅེས་པའི་དྲིལ་སྒྲོག་བྱེད་སྒོ་དངོས་སུ་སྤེལ་མགོ་བརྩམས། མཚོ་བྱང་ཁུལ་གྱི་ཁུལ་དཔོན་གཞོན་པ་ཧ་ཝུན་ཞུག་མགོ་རྩོམ་མཛད་སྒོར་ཕེབས་པ་དང་འབྲེལ་ཤིས་ཚིག་ཀྱང་ཕུལ། མཚོ་བྱང་ཁུལ་ལས་རིགས་ལག་རྩལ་སློབ་གྲྭའི་དགེ་རྒན་ལས་བཟོ་བ་དང་ཁུལ་ཐད་གཏོགས་འབྲེལ་ཡོད་ལས་ཁུངས་ཀྱི་ལས་བྱེད་པ་དང་ལས་བཟོ་བ270ལྷག་མགོ་རྩོམ་མཛད་སྒོར་ཞུགས། 

རྒྱུས་ལོན་བྱས་པ་ལྟར་ན། ཙོང་ཆུ་ནི་རྨ་ཆུའི་ཆུ་རྒྱུད་ཀྱི་རིམ་པ་དང་པོའི་ཆུ་ལག་ཡིན་པ་དང་རྨ་ཆུའི་ཆུ་མགོ་གཙོ་བོའི་གྲས་ཤིག་ཡིན། ཆུ་དྭངས་གཙང་གི་ཆུ་མགོ་འདི་ཤར་ཕྱོགས་སུ་རྒྱུག་ཆེད། མཚོ་བྱང་དང་ཟི་ལིང་། མཚོ་ཤར་བཅས་ས་ཁུལ་གསུམ་གྱིས་ཆབ་སྲིད་ཀྱི་ལངས་གནས་མཐོ་རུ་བཏང་ནས། རྒྱལ་ཁབ་ཀྱི་སྤྱི་ཡོངས་ལ་དམིགས་ཏེ་ཞིང་ཆེན་ཡོངས་ཀྱི་སྐྱེ་ཁམས་ཀྱི“མཐོ་ས”དང་ཐོན་ལས་ཀྱི“ས་ཁུལ་བཞི”འཛུགས་སྐྲུན་ནང་ཧུར་ཐག་ཞུགས་པ་དང་ཞབས་འདེགས་ཧུར་ཐག་བྱས་ཏེ། སྐྱེ་ཁམས་ཁོར་ཡུག་ལེགས་སུ་གཏོང་བ་ལས་སྡུག་ཏུ་མི་འགྲོ་བའི་”མཐའ་ཚད་བརྟན་པོར་སྲུང་ནས་སྐྱེ་ཁམས་ཤེས་དཔལ་འཛུགས་སྐྱོང་ལ་སྐུལ་འདེད་གཏིང་ཟབ་གཏོང་བ་དང་། སྦགས་བཙོག་འགོག་བཅོས་འགག་སྒྲོལ་ལ་རྒྱུན་མཐུད་སྐུལ་འདེད་བཏང་སྟེ་ཆུའི་ཁོར་ཡུག་སླར་གསོ་དང་ཆུའི་སྐྱེ་ཁམས་བཅོས་སྐྱོང་ལ་ཐུན་མོང་ཐོག་སྐུལ་འདེད་བཏང་། ད་ཐེངས་ཀྱི་མཉམ་འབྲེལ་བྱེད་སྒོ་ནི་སྤུན་ཟླའི་གྲོང་ཁྱེར་དང་ཁུལ་གྱི་ཕྱོགས་ཡོངས་ཀྱི་འཐབ་ཇུས་མཉམ་ལས་ཀྱི་མགོ་ཡག་པོ་ཞིག་ཡིན་ལ། ས་ཁུལ་གསུམ་གྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་དོན་འཁྱོལ་བྱས་ནས“དེང་རབས་ཅན་གྱི་མཚོ་སྔོན་གསར་པ་མགྱོགས་མྱུར་སྐྲུན་རྒྱུའི”འབད་འཐབ་དམིགས་ཚད་དྲུག་དོན་འཁྱོལ་བྱ་རྒྱུར་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་ཀྱང་ཡིན། ཕྱོགས་གསུམ་པོས་མཉམ་ལས་ཀྱི་གོ་སྐབས་དམ་འཛིན་ཡག་པོ་བྱས་ཏེ། “རང་ངོས་ཀྱི་ལེགས་ཆ་འདོན་སྤེལ་དང་། གཉིས་ཁེ་གཉིས་ཕན། མཉམ་ལས་གཉིས་ཕན”བཅས་ཀྱི་རྩ་དོན་གཞིར་བཟུང་། ལག་གདང་སྦྲེལ་ནས“རྒྱལ་ཁབ་ཀྱི་དོན་ཆེན་པའི”ཆབ་སྲིད་འགན་འཁྲི་ཡག་པོ་བསྒྲུབས་ཏེ་ཙོང་ཆུའི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་གྲུབ་འབྲས་གསར་པ་མཉམ་དུ་འདོན་རྒྱུ་ཡིན་པ་རེད། 

མཛད་སྒོའི་ཐོག་མཚོ་བྱང་ཁུལ་དང་ཟི་ལིང་གྲོང་ཁྱེར། མཚོ་ཤར་གྲོང་ཁྱེར་སྐྱེ་ཁམས་ཁོར་ཡུག་ཅུ་བཅས་ཀྱིས་ཙོང་ཆུ་མཉམ་བཅོས་མཉམ་སྐྲུན་མཉམ་སྲུང་གི་མཉམ་ལས་ཐབས་ཇུས་ཀྱི་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པ་དང་། ཁོར་ཡུག་སྲུང་སྐྱོབ་དང་བླངས་པའི་འཐུས་མིས་སྤྱི་ཚོགས་ལས་རིགས་ཁག་ལ་གྲོས་གཞི་བཏོན། མཛད་སྒོ་མཇུག་སྒྲིལ་རྗེས། མཚོ་བྱང་ཁུལ་སྐྱེ་ཁམས་ཁོར་ཡུག་ཅུ་ཡི་ལས་བྱེད་པ་དང་ལས་བཟོ་བ་ཚོས་དེ་གར་ཡོད་པའི་རྒྱ་ཆེའི་མང་ཚོགས་ལ་ཁོར་ཡུག་སྲུང་སྐྱོབ་ཀྱི་དྲིལ་སྒྲོག་དངོས་རྫས་སྤྲད་དེ་ཁོར་ཡུག་སྲུང་སྐྱོབ་ཀྱི་འབྲེལ་ཡོད་ཤེས་བྱ་དྲིལ་སྒྲོག་དང་ཁྱབ་གདལ་བཏང་བ་དང་། ས་ཁུལ་གསུམ་གྱི་སྐྱེ་ཁམས་ཁོར་ཡུག་མ་ལག་གི་ལས་བྱེད་པ་དང་ལས་བཟོ་བ་མཉམ་དུ་མཚོ་སྔོན་པོ་སྐྱེ་ཁམས་རྟེན་མཛོད་་ཁང་དུ་ལྟ་སྐོར་དུ་ཕྱིན་པ་དང་འབྲེལ་ཙོང་ཆུའི་ཆུ་མགོ་མདའ་བཞི་རྫོང་ཤ་ཐང་ཐུའུ་རུ་སོང་སྟེ“ཙོང་ཆུའི་ཆུ་མགོ་འཚོལ་བའི”བྱེད་སྒོ་སྤེལ།