མཚོ་བྱང་ཁུལ་མི་དམངས་སྲིད་གཞུང་དང་མཚོ་སྔོན་ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུ་ཡིས་འཐབ་ཇུས་མཉམ་ལས་ཀྱི་གན་རྒྱ་བཞག་པ་དང་། “གསར་བརྗེ་སློབ་གསོའི་རྟེན་གཞིའི”སྒོ་བྱང་འགེལ་བའི་མཛད་སྒོ་འཚོགས།

 སྒྲིག་སྒྱུར། སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་ཚགས་པར། བཤེར་འབེབས། རིན་ཆེན་ཚེ་རིང་།

ཟླ10པའི་ཚེས25ཉིན། མཚོ་བྱང་ཁུལ་མི་དམངས་སྲིད་གཞུང་དང་མཚོ་སྔོན་ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུ་ཡིས་མཚོ་སྔོན་རྡུལ་ཕྲན་མཁར་དྲན་གསོ་ཁང་དུ《འཐབ་ཇུས་མཉམ་ལས་གྲོས་མཐུན》ལ་མིང་རྟགས་བཀོད་ཅིང་། “གསར་བརྗེ་སློབ་གསོའི་རྟེན་གཞིའི”སྒོ་བྱང་འགེལ་བའི་མཛད་སྒོ་འཚོགས། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུའི་ཏང་ཙུའི་ཧྲུའུ་ཅིའམ་ཅུ་ཀྲང་ཀྲུང་ཐའོ་གན་རྒྱ་འཇོག་པའི་མཛད་སྒོར་ཞུགས་ཤིང་ཤིས་ཚིག་ཕུལ། ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རེན་དབྱང་ཧའེ་ལུང་དང་། ཁུལ་ཨུའི་རྒྱུན་ཨུའམ་ཁུལ་དཔོན་གཞོན་པ་ཨ་ཁྱུང་། ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུའི་ཅུ་ཀྲང་གཞོན་པ་ཡུས་དབྱིང་ཀུང་བཅས་མཛད་སྒོར་ཞུགས། ཁུལ་ཨུའི་རྒྱུན་ཨུ་དང་དྲུང་ཆེ། གཞུང་ལས་ཁང་གི་ཀྲུའུ་རེན་བཅས་ཡིན་པའི་ཝང་ཡུང་ཁྲང་གིས་མཛད་སྒོ་མགོ་འཛིན་གནང་།

ཤ་བོ་སྐྱབས་ཀྱིས་ཁུལ་ཨུ་དང་ཁུལ་སྲིད་གཞུང་གི་ཚབ་བྱས་ཏེ། ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུ་ཡིས་མཚོ་བྱང་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས། ཁོང་གིས་བསྟན་དོན། ཉེ་བའི་ལོ་ཤས་རིང་། ཁུལ་ཡོངས་ཀྱི་སྲིད་དོན་ཞབས་ཞུའི་ལྟ་སྐུལ་དོ་དམ་མ་ལག་གིས་ཞིང་ཆེན་ལྟ་སྐུལ་དོ་དམ་ཅུའི་བླ་ན་མེད་པའི་རྒྱབ་སྐྱོར་འོག་སྲིད་དོན་ཞབས་ཞུ་དང་སྤྱི་པའི་ཐོན་ཁུངས་ཉོ་འཚོང་ལས་དོན་ལ་ནུས་ཤུགས་ཡོད་རྒུས་སྐུལ་འདེད་བཏང་བ་དང་། རྒྱལ་སྲིད་སྤྱི་ཁྱབ་ཁང་ནས་ཞང་གྲོང་བར་གྱི་རིམ་པ་ལྔའི་སྲིད་དོན་ཞབས་ཞུའི་མ་ལག་ཕྱོགས་ཡོངས་ནས་བསྐྲུན། ཁུལ་རིམ་པའི་སྲིད་འཛིན་ཆོག་འཐུས་དོན་ཚན186དང་། སྤྱི་པའི་ཞབས་ཞུའི་དོན་ཚན299ཚང་མ་ལྟེ་གནས་སུ་བཅུག་ནས་གཅིག་གྱུར་ཐོག་བསྒྲུབས་ཏེ། ཕྱོགས་གང་ཐད་ཀྱི་བྱ་བ་ལ་གྲུབ་འབྲས་མངོན་གསལ་ཐོབ། དེ་རིང་འཐབ་ཇུས་གྲོས་མཐུན་ལ་མིང་རྟགས་བཀོད་པ་ནི་ཅུ་དང་ས་གནས་ཕྱོགས་གཉིས་པོས་ཐུན་མོང་ཐོག་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བར་སྐུལ་འདེད་གཏོང་བ་དང་དམངས་ལ་ཞབས་འདེགས་བྱེད་པ་ཟུང་འབྲེལ་དམ་ཟབ་བྱེད་པའི་གསར་གཏོད་ལག་ལེན་ཞིག་རེད། ཕྱོགས་གཉིས་པོས་མཉམ་ལས་གཉིས་ཕན་དང་ལེགས་ཆ་གསབ་རེས་ཀྱི་རྩ་དོན་གཞིར་བཟུང་སྟེ། དུས་བཀག་འབྲེལ་གཏུག་དང་རྒྱུན་རྣམ་ཅན་གྱི་འབྲེལ་གཏུག་ལམ་སྲོལ་བཙུགས་ཏེ་འཐབ་ཇུས་མཉམ་ལས་དེ་ཞིབ་ཕྲའི་ལས་དོན་ཁྲོད་དོན་འཁྱོལ་བྱེད་པ་དང་། ཞིང་ཆེན་ཡོངས་ཀྱི་སྲིད་དོན་ཞབས་ཞུའི་མ་ལག་གི་གསར་བརྗེ་སློབ་གསོའི་རྟེན་གཞི་འཛུགས་པ་དང་། སྲིད་དོན་ཞབས་ཞུ་ཚད་ལྡན་ཅན་དང་སྟབས་བདེ་ཅན་གྱི་དཔེ་སྟོན་ས་ཚིགས་འཛུགས་པ་སོགས་ཀྱི་ཐད་ཀྱི་མཉམ་ལས་མུ་མཐུད་དུ་གཏིང་ཟབ་ཏུ་བཏང་སྟེ། མཉམ་ལས་གཉིས་ཕན་གྱི་ལེའུ་གསར་པ་ཐུན་མོང་ཐོག་གཏོད་རྒྱུའི་རེ་བ་ཡོད། ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུ་ཡིས་མཚོ་བྱང་གི་ཐུན་མོང་མ་ཡིན་པའི་གསར་བརྗེའི་ཐོན་ཁུངས་བེད་སྤྱོད་བྱས་ཏེ། ཁོངས་གཏོགས་ཀྱི་ལས་བྱེད་ལས་བཟོ་མཚོ་བྱང་དུ་མངགས་ཏེ་ཏང་གཤིས་སློབ་གསོ་མྱང་བ་དང་། ལས་བྱེད་པ་གསོ་སྦྱོང་བྱེད་པར་མངགས་པའི་རེ་བ་ཡོད་ཅེས་བསྟན།

ཀྲུང་ཐའོ་ཡིས་བསྟན་དོན། འཐབ་ཇུས་མཉམ་ལས་གྲོས་མཐུན་ལ་མིང་རྟགས་བཀོད་པ་དེ་ནི་ཕྱོགས་གཉིས་པོས་ལྷག་བསམ་ཟོལ་མེད་ངང་མཉམ་ལས་དང་ཐུན་མོང་ཐོག་འབད་བརྩོན་བྱས་པའི་འབྲས་བུ་ཞིག་ཡིན། དེ་ཡིས་མཚོ་བྱང་ཁུལ་གྱི་སྲིད་དོན་ཞབས་ཞུ་ཚད་ལྡན་ཅན་དང་སྟབས་བདེ་ཅན་གྱི་འཛུགས་སྐྲུན་དེ་གོམ་གང་མདུན་དུ་སྤོས་པ་མཚོན།  ད་ཐེངས་ཀྱི་གན་རྒྱ་འཇོག་པའི་མཛད་སྒོ་གོ་སྐབས་སུ་བྱས་ཏེ། ཞིང་ཆེན་དང་ཁུལ་གྱི་གོང་འོག་མཐུན་སྦྱོར་མཉམ་འགུལ་ལ་རྒྱུན་ཆད་མེད་པར་ཤུགས་བསྣན་ཏེ། ཞིང་ཆེན་གྱི་གཞི་གཅིག་ཅན་གྱི་སྲིད་དོན་ཞབས་ཞུའི་ལས་སྟེགས་ཀྱི་ནུས་པ་རྒྱུན་མཐུད་ངང་ཆེ་རུ་བཏང་ནས་སྲིད་དོན་ཞབས་ཞུའི་ཁོར་ཡུག་བཟང་པོ་ཞིག་གཏོད་དགོས། མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་སྲིད་དོན་ཞབས་ཞུ་དང་སྤྱི་པའི་ཐོན་ཁུངས་ཀྱི་ཉོ་འཚོང་ལས་དོན་ལ་མགོ་ཁྲིད་བྱ་རྒྱུར་མུ་མཐུད་ཤུགས་བསྣན་ཏེ། སྲིད་དོན་ཞབས་ཞུ་དང་སྤྱི་པའི་ཐོན་ཁུངས་ཉོ་འཚོང་དོ་དམ་ལས་དོན་ལ་གྲུབ་འབྲས་གསར་པ་ཐོབ་རྒྱུར་སྐུལ་འདེད་གཏོང་དགོས་པ་དང་། སྲིད་དོན་ཞབས་ཞུའི་ཁོར་ཡུག་བཟང་པོར་བརྟེན་ནས་ཚོང་གཉེར་ཁོར་ཡུག་ཇེ་ལེགས་སུ་གཏོང་རྒྱུར་སྐུལ་འདེད་གཏོང་བཏང་སྟེ། མཚོ་བྱང་གི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་རྒྱུར་རམ་འདེགས་བྱ་རྒྱུའི་རེ་བ་ཡོད་ཅེས་གསུངས་པ་རེད།

ཤ་བོ་སྐྱབས་དང་ཀྲུང་ཐའོ་གཉིས་ཀྱིས་མཉམ་དུ“གསར་བརྗེ་སློབ་གསོའི་རྟེན་གཞིའི”སྒོ་བྱང་གི་ཡོལ་བ་ཕྱེས་པ་དང་། ཀྲུང་ཐའོ་དང་ཨ་ཁྱུང་གིས་ཕྱོགས་གཉིས་པོའི་ཚབ་བྱས་ཏེ། 《འཐབ་ཇུས་མཉམ་ལས་གྲོས་མཐུན》ལ་མིང་རྟགས་བཀོད།

ཁུལ་སྲིད་གཞུང་གི་སྡེ་ཚན་ཁག་གི་འགན་འཁུར་བློ་མཐུན་གཙོ་བོ་དང་། ཞིང་ཆེན་སྲིད་དོན་ཞབས་ཞུ་ལྟ་སྐུལ་དོ་དམ་ཅུའི་འབྲེལ་ཡོད་འགན་འཁུར་བློ་མཐུན་བཅས་མཛད་སྒོར་ཞུགས།