བོད་ཀྱི་ནས་ལ་འཛམ་གླིང་གི་བྱ་དགའ་ཨང་དང་པོ་ཐོབ་འདུག

རྩོམ་སྒྲིག སངས་རྒྱས་སྐྱིད། ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན། བཤེར་འབེབས། རིན་ཆེན་ཚེ་རིང་།

 འཇར་མན་གྱི་ས་གནས་དེ་གའི་དུས་ཚོད2023ལོའི་ཟླ10འི་ཚེས24ཉིན་གྱི་ཆུ་ཚོད17དང་སྐར་མ30ཡི་ཐོག ཀྲུང་གོའི་འཐུས་ཚབ་རུ་ཁག་ལIBAའཛམ་གླིང་བག་ལེབ་ཀྱི་རྒྱལ་ཕམ་རྟིང་རྩོད་འགྲན་བསྡུར་ཁྲོད་སྤྱིའི་ཨང་དང་པོ་ཐོབ་པ་མ་ཟད། རྣམ་གྲངས་རྐྱང་པ་གཉིས་ཀྱི་ཨང་དང་པོ་ཐོབ་སྟེ། ཧྥ་རན་སི་དང་། ལྗར་པན། འཇར་མན་སོགས་བག་ལེབ་བསྲེགས་མའི་སྟོབས་ལྡན་རྒྱལ་ཁབ་ལས་རྣམ་པར་རྒྱལ་བས། ལོ་རྒྱུས་ཀྱི་ཟིན་ཐོ་གསར་པ་བསྐྲུན་ཏེ་ཨང་དང་པོ་ཐོབ།

ཐེངས་འདིའི་འཛམ་གླིང་བག་ལེབ་ཀྱི་རྒྱལ་ཕམ་རྟིང་རྩོད་འགྲན་བསྡུར་དེ་མུའུ་ཉི་ཧེའི་བག་ལེབ་བསྲེགས་མའི་འགྲེམས་སྟོན་ལྟེ་གནས་སུ་སྤེལ་འདུག མུའུ་ཉི་ཧེའི་བག་ལེབ་བསྲེགས་མའི་འགྲེམས་སྟོན་ནི1949ལོར་སྤེལ་མགོ་ཚུགས་པ་དང་། འཛམ་གླིང་ཡོངས་ཀྱི་སྔོན་ཐོན་གྱི་བག་ལེབ་བསྲེགས་མའི་ལས་རིགས་འགྲེམས་ཚོགས་ཤིག་རེད། IBAའཛམ་གླིང་བག་ལེབ་རྒྱལ་ཕམ་རྟིང་རྩོད་འགྲན་བསྡུར་ནི་འཇར་མན་གྱི་བག་ལེབ་བསྲེགས་མ་མཉམ་འབྲེལ་ལྷན་ཚོགས་དང་རྒྱལ་སྤྱིའི་བག་ལེབ་བསྲེགས་མཁན་དང་སྤྲི་གོར་བཟོ་མཁན་མནའ་འབྲེལ(UIBC)གཉིས་ནས་མཉམ་འབྲེལ་ཐོག་གཙོ་གཉེར་བྱས་པའི་འཛམ་གླིང་གི་བག་ལེབ་འགྲན་བསྡུར་ཆེན་མོ་གསུམ་གྱི་གྲས་ཤིག་ཡིན་ཞིང་། རྒྱལ་སྤྱིའི་རྩེར་སོན་གྱི་བག་ལེབ་བསྲེགས་མཁན་དག་འཛོམས་ཀྱི་ཡོད་པ་རེད།

2023ལོའི་ལོ་འཁོར་གྱི་འགྲན་བསྡུར་ལ་གྲ་སྒྲིག་བྱེད་པའི་བརྒྱུད་རིམ་ནང་། ཀྲུང་གོའི་བག་ལེབ་རྒྱལ་ཁབ་རུ་ཁག་གི་རྩལ་ཁྲིད་པ་གཙོ་བོ་སྐུ་ཞབས་ཝང་ཙི་ཡིས་ཀྲུང་གོའི་སྲོལ་རྒྱུན་རིག་གནས་དང་འཛམ་གླིང་གི་དར་སྲོལ་གཉིས་ཟུང་འབྲེལ་བྱེད་པའི་འགྲན་བསྡུར་གྱི་ཁ་ཕྱོགས་གཏན་འཁེལ་བྱས་པ་རེད། དེར་བརྟེན་ཁོང་གིས་ཐོག་མཐའ་བར་གསུམ་དུ་ཀྲུང་གོ་རང་ས་ནས་མ་བཅོས་རྒྱུ་ཆ་ལེགས་ཤོས་འཚོལ་བ་དང་། ལོ་གཅིག་རིང་རྒྱལ་ཡོངས་ས་གནས་ཁག་ཏུ་རྟོག་ཞིབ་བྱས་པ་བརྒྱུད། མཐར་ཧྲང་ཧའེ་བོད་སྐྱོར་གྱི་ཤུགས་ཆེའི་རོགས་རམ་འོག་བོད་ལྗོངས་ཀྱི་ནས་དེ་ཀྲུང་གོའི་བག་ལེབ་རྒྱལ་ཁབ་རུ་ཁག་གི་གདམ་བྱར་གྱུར་པ་རེད།

 ཐེངས་འདིའི་འགྲན་བསྡུར་ཁྲོད་ཀྲུང་གོའི་འཐུས་མི་རུ་ཁག་གི་འཚོ་བཅུད་དང་བདེ་ཐང་ཡིན་པའི་བག་ལེབ་གྱི་རྒྱུ་ཆ་ནི་དེ་ཧྲང་ཧའེ་བོད་སྐྱོར་གྱིས་རྒྱབ་སྐྱོར་ཤུགས་ཆེན་བྱས་པའི་གཞིས་རྩེ་བཟའ་བཅའ་ཚད་ཡོད་ཚད་སྤྱི་གཉེར་གྱིས་མཉམ་འབྲེལ་ཐོག་གསར་སྤེལ་བྱས་ཏེ་མཁོ་འདོན་བྱས་པའི་གཞིས་རྩེའི་ནས་ཀྱི་བསྙལ་སོན་དང་ནས་ཀྱི་གྲོ་ཞིབ་སྤྱད་ཡོད་ཅིང་།  ནས་ཀྱིས་བཟོས་ཤིང་ནས་ཀྱི་བསྙལ་སོན་སྤྱད་ནས་ཀྲུང་གོའི་སྲོལ་རྒྱུན་རིག་གནས་ཀྱི་ཁྱད་ཆོས་བག་ལེབ་སྟེང་འཛོམ་པར་བྱས་ཏེ། འཛམ་གླིང་ལ་ཀྲུང་གོའི་བག་ལེབ་ཀྱི་ཐུན་མོང་མ་ཡིན་པའི་ཁྱད་ཆོས་མངོན་ཡོད།

 འགྲན་བསྡུར་མ་བྱས་གོང་། ཀྲུང་གོའི་བག་ལེབ་བསྲེགས་མཁན་རྒྱལ་ཁབ་རུ་ཁག་གི་རྩལ་ཁྲིད་པ་གཙོ་བོ་སྐུ་ཞབས་ཝང་ཙི་ཆེད་དུ་བོད་ལྗོངས་སུ་ནས་ཀྱི་ཐོན་ཡུལ་ལ་རྟོག་ཞིབ་གནང་བར་ཕེབས་པ་དང་། གཞིས་རྩེ་གྲོང་ཁྱེར་རྒྱལ་རྩེ་རྫོང་བོད་ཀྱི་བཟའ་བཅའ་ཚད་ཡོད་སྤྱི་གཉེར་དུ་ཕེབས་ཏེ་ནས་ཀྱི་གྲོ་ཞིབ་ཐོན་སྐྱེད་བཟོ་རྩལ་ལ་རྟོག་ཞིབ་གནང་།  རྟོག་ཞིབ་མཇུག་གྲིལ་རྗེས། སྐུ་ཞབས་ཝང་ཙི་ཡིས་བོད་ལྗོངས་ཀྱི་ནས་ཀྱི་གྲོ་ཞིབ་དེ་རྩེར་སོན་བག་ལེབ་ཀྱི་རྒྱུ་ཆ་གཙོ་བོར་བྱེད་ཆོག་ཅེས་གསུངས་པ་དང་། ནས་ཀྱི་གྲོ་ཞིབ་ཀྱི་ཁྱད་ཆོས་ལ་དམིགས་ནས་བག་ལེབ་སྡེབ་སྦྱོར་གསར་སྤེལ་གྱི་ཚོད་ལྟ་ཐེངས་མང་བྱས་རྗེས། ཐེངས་འདིའི་ཀྲུང་གོའི་རུ་ཁག་གིས་མཐར་བོད་ལྗོངས་ཀྱི་ནས་ཀྱི་གྲོ་ཞིབ་དེ་ད་ཐེངས་ཀྱི་འགྲན་བསྡུར་ནང་གི་བདེ་ཐང་བག་ལེབ་ཀྱི་རྒྱུ་ཆ་གཙོ་བོ་བྱ་རྒྱུ་ཐག་བཅད་པ་རེད།

ཤེས་རྟོགས་བྱུང་བ་ལྟར་ན། འཛམ་གླིང་གི་བག་ལེབ་བསྲེགས་མའི་ལས་རིགས་ཀྱིས་སྲོལ་རྒྱུན་དུ་སྤྱོད་པའི་བག་ལེབ་བསྲེགས་མའི་གྲོ་ཞིབ་མང་ཆེ་བ་ནུབ་ཕྱོགས་དར་རྒྱས་ཆེ་བའི་རྒྱལ་ཁབ་ནས་ཡིན་པ་དང་། ད་ཐེངས་བོད་ལྗོངས་ཀྱི་ནས་ཀྱི་གྲོ་ཞིབ་འཛམ་གླིང་འགྲན་བསྡུར་ཆེན་མོའི་ཐོག་ཐོན་པ་མ་ཟད། མཐར་ཀྲུང་གོའི་རུ་ཁག་ལ་འགྲན་བསྡུར་གྱི་སྤྱིའི་ཨང་དང་པོ་ཐོབ་རྒྱུར་རམ་འདེགས་ཐུབ་ཡོད། དེའི་ཐོག་ནས། ནས་ཞེས་པའི་མཐོ་སྒང་གི་བདེ་ཐང་ལོ་ཏོག་དེར་འཛམ་གླིང་གི་བག་ལེབ་བསྲེགས་མའི་ལས་རིགས་ཀྱིས་ཁས་ལེན་ཐོབ་པ་མ་ཟད། རྩེར་སོན་གྱི་བག་ལེབ་བསྲེགས་མའི་གྲོ་ཞིབ་ལ་གདམ་ག་གསར་པ་ཞིག་ཀྱང་མཁོ་འདོན་བྱས་པ་མཚོན་ཡོད།