འཛད་སྤྱོད་རོགས་སྐྱོར་ལ་བརྟེན་ནས་འཕེལ་རྒྱས་སྐུལ་འདེད་དང་དམངས་འཚོ་ཇེ་ལེགས་སུ་བཏང་བ།

རྩོམ་སྒྲིག ཀླུ་མོ་མཚོ།   ཡོང་ཁུངས། མདའ་བཞི་རྫོང་མི་རིགས་སྐད་ཡིག་ལས་དོན་ལྟེ་གནས།    བཤེར་འབེབས། རིན་ཆེན་ཚེ་རིང་། 

མདའ་བཞི་རྫོང་ཞ་ཧྭ་ཤའི་ཟས་རིགས་ཚད་ཡོད་སྤྱི་གཉེར་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་དུ་གནས་ཤིང་། ས་འདིའི་ཐུན་མོང་མ་ཡིན་པའི་རང་བྱུང་ཁོར་ཡུག་ཕུན་སུམ་ཚོགས་པས་གསོ་སྤེལ་ལས་རིགས་འཕེལ་རྒྱས་འགྲོ་བར་ཆ་རྐྱེན་གང་ལེགས་བསྐྲུན་ཡོད། དུས་ཡུན་རིང་བོར་མཉམ་ལས་ཁང་འདིས་ཐོག་མཐའ་བར་གསུམ་དུ་གསར་གཏོད་ཀྱི་འཕེལ་རྒྱས་དཔེ་ཚུལ་འཚོལ་ཞིབ་བྱས་ནས་རང་ངོས་སྟོབས་ཆེར་གཏོང་བ་དང་མཐའ་འཁོར་གྱི་གྲོང་གསེབ་ཐུན་མོང་ཐོག་དར་རྒྱས་ཡོང་བར་གཞོལ་གྱི་ཡོད།

སྤྱི་གཉེར་འདིས་ཤ་རིགས་ལས་སྣོན་དང་ཕྱིར་འཚོང་ཁྱབ་ཁོངས་ཀྱི་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ནས་ས་གནས་ཀྱི་གསོ་སྤེལ་དུད་ཚང་དང་མཉམ་ལས་དམ་ཟབ་བྱས་ཡོད། གསོ་སྤེལ་དུད་ཚང་གི་ཕྱིར་འཚོང་ཐབས་ལམ་བརྟན་པོ་ཡོང་བར་ཡུན་རིང་ཉོ་སྒྲུབ་ཀྱི་གན་རྒྱ་བཞག་ནས་གསོ་སྤེལ་དུད་ཚང་གི་འཕྱིར་ཚོང་དཀའ་བའི་གནད་དོན་ཐག་གཅོད་བྱས་ཏེ། གསོ་སྤེལ་དུད་ཚང་གི་ཐོན་ལས་འཕེལ་རྒྱས་ལ་སྐུལ་འདེད་བཏང་ནས་ཡོང་སྒོ་མང་དུ་བཏང་ཡོད།

ཐོན་རྫས་ཀྱི་སྤུས་ཚད་དང་བདེ་འཇགས་ལ་འགན་ལེན་བྱ་ཆེད། ཞ་ཧྭ་ཤའི་ཟས་རིགས་ཚད་ཡོད་སྤྱི་གཉེར་གྱིས་སྤུས་ཚད་རྟོག་དམ་མ་ལག་བཙུགས་ཡོད། འབྱུང་རྩ་ནས་དམ་འཛིན་བྱས་ཏེ་ཤ་རིགས་ཉོ་སྒྲུབ་ལ་ཞིབ་བཤེར་ནན་མོ་བྱས་ནས་ཚད་གཞི་མཐོ་བའི་ཤ་རིགས་མཁོ་འདོན་བྱེད་པར་འགན་ལེན་བྱས། དེ་དང་ཆབས་ཅིག་ལས་སྣོན་བྱེད་པའི་གོ་རིམ་ཁྲོད། སྔོན་ཐོན་གྱི་ལག་རྩལ་སྤྱད་དེ་ཤ་རིགས་ཀྱི་གསར་ཚད་དང་འཚོ་བཅུད་རིན་ཐང་རྒྱུན་འཁྱོངས་བྱས་པས་འཛད་སྤྱོད་པའི་ཡིད་ཆེས་ཐོབ་པ་མ་ཟད། སྤྱི་གཉེར་ལ་མཚན་སྙན་བཟང་བོ་ཐོབ་ཡོད། འཛད་སྤྱོད་རོགས་སྐྱོར་བྱེད་པའི་བརྒྱུད་རིམ་ནང་ཞ་ཧྭ་ཤའི་ཟས་རིགས་ཚད་ཡོད་སྤྱི་གཉེར་གྱིས་ད་དུང་ཚོང་གཉེར་བྱེད་སྟངས་གསར་གཏོད་བྱ་རྒྱུར་མཐོང་ཆེན་བྱས། ཁོ་ཚོས་ཕྱིར་འཚོང་གི་ཐབས་ལམ་རྒྱ་ཆེར་བཏང་ནས་ས་གནས་ཀྱི་ཁྲོམ་ར་བརྟན་པོ་བཙུགས་པ་མ་ཟད། ད་དུང་ཐོན་རྫས་སྔར་ལས་རྒྱ་ཆེར་དང་ཁྱབ་གདལ་དུ་བཏང་ཡོད། དྲ་ཕྱི་དང་དྲ་ལམ་ཟུང་འབྲེལ་གྱི་བྱ་ཐབས་བརྒྱུད་མི་མང་བོ་ཞིག་གིས་མདའ་བཞིའི་སྤུས་ལེགས་ཤའི་ཐོན་རྫས་ལ་བྲོ་བ་མྱོང་ཐུབ་པར་གྱུར་ཡོད། 

འཛད་སྤྱོད་རོགས་སྐྱོར་གྱི་ཕན་འབྲས་མངོན་གསལ་ཡིན། གསོ་སྤེལ་དུད་ཚང་གི་ངོས་ནས་བརྗོད་ན། ཁོ་ཚོས་ཐོན་རྫས་ཕྱིར་འཚོང་ལ་སེམས་ཁྲལ་བྱེད་མི་དགོས་པ་དང་། ཡོང་འབབ་འཕར་བ་དང་འཚོ་བའི་ཆུ་ཚད་མངོན་གསལ་གྱི་ལེགས་སུ་ཕྱིན་ཡོད། གསོ་སྤེལ་དུད་ཚང་མང་པོ་ཞིག་གིས་མཉམ་ལས་ཁང་གི་འཛད་སྤྱོད་རོགས་སྐྱོར་ལ་བརྟེན་ནས་ཁོ་ཚོའི་འཚོ་བའི་རེ་བ་དང་འབྱུང་འགྱུར་གྱི་ཁ་ཕྱོགས་མཐོང་བྱུང་ཞེས་གཅིག་རྗེས་གཉིས་མཐུད་ཀྱིས་བཤད། མཉམ་ལས་ཁང་གི་ངོས་ནས་བརྗོད་ན། འཛད་སྤྱོད་རོགས་སྐྱོར་བྱས་པ་བརྒྱུད་ཁྲོམ་རའི་ཐོབ་སྐར་ཆེ་རུ་ཕྱིན་པ་དང་སྤུས་རྟགས་ཀྱི་སྐད་གྲགས་ཆོད་ཚད་མཐོ་རུ་ཕྱིན་པ་མ་ཟད། ད་དུང་གསོ་སྤེལ་དུད་ཚང་དང་མཉམ་ལས་ཀྱི་འབྲེལ་བ་སྔར་ལས་དམ་ཟབ་བྱུང་ནས་མཉམ་ལས་ཁང་རྒྱུན་མཐུད་ངང་འཕེལ་རྒྱས་འགྲོ་རྒྱུར་རྨང་གཞི་བརྟན་པོ་བཏིང་ཡོད། གྲོང་གསེབ་ས་ཁུལ་གྱི་ངོས་ནས་བརྗོད་ན། འཛད་སྤྱོད་རོགས་སྐྱོར་གྱིས་དཔལ་འབྱོར་འཕེལ་རྒྱས་དང་སྤྱི་ཚོགས་བརྟན་ལྷིང་སྐུལ་འདེད་བཏང་བ་མ་ཟད། གྲོང་གསེབ་དར་སྤེལ་གཏོང་བའི་འཐབ་ཇུས་ལག་བསྟར་བྱེད་པའི་སྒུལ་ཤུགས་གསར་བ་རུ་གྱུར་ཡོད།

འབྱུང་འགྱུར་མདའ་བཞི་རྫོང་ཞ་ཧྭ་ཤའི་ཟས་རིགས་ཚད་ཡོད་སྤྱི་གཉེར་གྱིས་སྤྱི་ཚོགས་ལ་ཞབས་འདེགས་ཞུ་བའི་གཉེར་སྐྱོང་འདུ་ཤེས་མུ་མཐུད་དུ་རྒྱུན་འཛིན་བྱས་ཏེ་འཛད་སྤྱོད་རོགས་སྐྱོར་བྱ་གཞག་ཐད་ལ་སྔར་ལས་ནུས་པ་འདོན་རྒྱུ་དང་། དེ་དང་ཆབས་ཅིག་ཁེ་ལས་དང་སྤྱི་ཚོགས་ཀྱི་སྟོབས་ཤུགས་མང་བོ་ཞིག་འཛད་སྤྱོད་རོགས་སྐྱོར་འགུལ་སྤྱོད་ནང་ཞུགས་ནས་གྲོང་གསེབ་དར་སྤེལ་གཏོང་བའི་འཐབ་ཇུས་ལག་བསྟར་བྱ་རྒྱུར་ཐུན་མོང་གིས་སྐུལ་འདེད་བཏང་ནས་འབྱོར་འབྲིང་སྤྱི་ཚོགས་ཁྱོན་ཡོངས་ནས་འཛུགས་སྐྲུན་བྱེད་པར་ནུས་ཤུགས་འདོན་རྒྱུ་རེད།