ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག【ཁག14པ།】

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། མཚོ་སྔོན་བོད་སྐད་རླུང་འཕྲིན།  བཤེར་འབེབས། རིན་ཆེན་ཚེ་རིང་།

དོན་ཚན་རེ་གཅིག་པ། འབྲེལ་ཡོད་གཏན་འབེབས་ལྟར་རྩ་འཛུགས་ལ་དགོངས་སྐོར་མི་ཞུ་བ་དང་དོན་དག་གལ་ཆེན་སྙན་སེང་མ་ཞུས་ན། ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་གྱི་ཉེས་ཚབས་ཅུང་ཆེ་བ་ཡིན་ན་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ།

དོན་ཚན་རེ་གཉིས་པ།  སྐོར་གཟིགས་སྐོར་ཞིབ་བྱ་བར་བར་ཆད་བཟོ་བའམ་སྐོར་གཟིགས་སྐོར་ཞིབ་ཀྱི་དག་ཐེར་ཡོ་བསྲང་བླང་བྱ་དོན་འཁྱོལ་མི་བྱེད་ན། ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་གྱི་ཉེས་ཚབས་ཅུང་ཆུང་བ་ཡིན་ན། ཐ་ཚིག་སྒྲོག་པའམ་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཅུང་ཆེ་བ་ཡིན་ན། ཏང་ནང་གི་གོ་གནས་མེད་པར་བཟོ་བའམ་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་བ་ཡིན་ན་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དོན་ཚན་རེ་གསུམ་པ། རྩ་འཛུགས་ཀྱི་ཞིབ་བཤེར་ལ་འགྲན་རྒོལ་བྱེད་པའི་གཤམ་གསལ་བྱ་སྤྱོད་གང་རུང་ཞིག་ཡོད་ན། ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཅུང་ཆེ་བ་ཡིན་ན་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ་སྟེ།

(གཅིག) ཁ་མཐུན་ངོས་ལེན་བྱེད་པའམ་ཡང་ན་དཔང་རྟགས་རྫུན་བཟོ་དང་། མེད་པར་བཟོ་བ། གནས་སྤོ། སྦས་སྐུང་བཅས་བྱེད་པ།

(གཉིས) མི་གཞན་གྱིས་ཉེས་ཞུ་ཐེར་འདོན་དང་དཔང་རྟགས་དཔྱད་ཡིག་འདོན་སྤྲོད་བྱེད་པར་བཀག་འགོག་བྱེད་པ།

(གསུམ) གྱོད་འབྲེལ་ངན་རོགས་འགེབས་སྲུང་བྱེད་པ།

(བཞི) རྩ་འཛུགས་ལ་གནས་ཚུལ་རྫུན་ཞུ་བྱས་ཏེ་དོན་དངོས་སྦས་གསང་བྱེད་པ།

(ལྔ།) རྩ་འཛུགས་ཀྱི་ཞིབ་བཤེར་ལ་འགྲན་རྒོལ་བྱེད་པའི་བྱ་སྤྱོད་གཞན་དག

དོན་ཚན་རེ་བཞི་པ། ཏང་གི་གཞི་རྩའི་རིགས་པའི་གཞུང་ལུགས་དང་། གཞི་རྩའི་ལམ་ཕྱོགས། གཞི་རྩའི་ཇུས་གཞིའམ་ཡང་ན་བྱེད་ཕྱོགས་དང་སྲིད་ཇུས་གལ་ཆེན་བཅས་ལ་ངོ་རྒོལ་བྱེད་པའི་འདུ་འཛོམས་དང་། ཁྲོམ་སྐོར། རྔམ་སྟོན་སོགས་ཀྱི་བྱེད་སྒོ་སྒྲིག་འཛུགས་བྱེད་པ་དང་། དེའི་ནང་ཞུགས་པ། ཡང་ན་འཆད་ཁྲིད་དང་། གླེང་སྟེགས། སྙན་ཞུའི་ཚོགས་འདུ། བཞུགས་མོལ་ཚོགས་འདུ་སོགས་སྒྲིག་འཛུགས་བྱེད་ཐབས་ལ་བརྟེན་ནས་ཏང་གི་གཞི་རྩའི་རིགས་པའི་གཞུང་ལུགས་དང་། གཞི་རྩའི་ལམ་ཕྱོགས། གཞི་རྩའི་ཇུས་གཞིའམ་ཡང་ན་བྱེད་ཕྱོགས་དང་སྲིད་ཇུས་གལ་ཆེན་བཅས་ལ་ངོ་རྒོལ་བྱས་ནས་ཤུགས་རྐྱེན་ངན་པ་ཚབས་ཆེན་བཟོས་པ་ཡིན་ན། དེའི་ཇུས་འགོད་པ་དང་། སྒྲིག་འཛུགས་པ། རྐང་འཛིན་པ་བཅས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དེའི་ནང་ཞུགས་མཁན་མི་གཞན་པའམ་ཡང་ན་ཆ་འཕྲིན་དང་། དཔྱད་ཡིག རྒྱུ་དངོས། ལས་ཡུལ་སོགས་འདོན་སྤྲོད་བྱེད་པའི་ཐོག་ནས་གོང་གསལ་བྱེད་སྒོ་སྤེལ་མཁན་ལ་རྒྱབ་སྐྱོར་བྱས་པ་ཡིན་ན། ཉེས་ཚབས་ཅུང་ཆུང་བ་ཡིན་ན་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཅུང་ཆེ་བ་ཡིན་ན་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

གནས་ཚུལ་གསལ་པོ་མ་ཤེས་པར་རང་དབང་མེད་པར་འཛུལ་ཞུགས་བྱེད་དུ་བཅུག་རིགས་ལ་སྐྱོན་བརྗོད་དང་སློབ་གསོ་བཏང་བ་བརྒྱུད་སྔ་འགྱོད་ཕྱི་འདོམས་བྱེད་སེམས་དངོས་འབྲེལ་ཡོད་ན། ཆད་པ་གཅོད་མི་དགོས་པའམ་ཡང་ན་ཆད་པ་མ་བཅད་ན་འགྲིག

རྩ་འཛུགས་ཀྱི་ཆོག་མཆན་མ་ཐོབ་པར་འདུ་ཚོགས་དང་། ཁྲོམ་སྐོར། རྔམ་སྟོན་སོགས་ཀྱི་བྱེད་སྒོ་གཞན་དག་ནང་ཞུགས་པ་ཡིན་ན། ཉེས་ཚབས་ཅུང་ཆུང་བ་ཡིན་ན་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཅུང་ཆེ་བ་ཡིན་ན་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དོན་ཚན་རེ་ལྔ་པ། ཏང་གི་མགོ་ཁྲིད་ལ་ངོ་རྒོལ་དང་སྤྱི་ཚོགས་རིང་ལུགས་ཀྱི་ལམ་ལུགས་ལ་ངོ་རྒོལ་བྱེད་པའམ་ཡང་ན་སྲིད་གཞུང་དགྲར་འཛིན་པ་བཅས་དམིགས་ཡུལ་དུ་འཛིན་པ་སོགས་ཀྱི་རྩ་འཛུགས་སྒྲིག་འཛུགས་བྱེད་པ་དང་དེའི་ནང་ཞུགས་པ་ཡིན་ན། དེའི་ཇུས་འགོད་པ་དང་། སྒྲིག་འཛུགས་པ། རྐང་འཛིན་པ་བཅས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དེའི་ནང་ཞུགས་མཁན་མི་གཞན་དག་ཉེས་ཚབས་ཅུང་ཆུང་བ་ཡིན་ན་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཅུང་ཆེ་བ་ཡིན་ན་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།