ལུའོ་ཏུང་ཁྲོན་གྱིས་སྒྲིག་འཛུགས་དང་བཀོད་སྒྲིག་ཞིབ་ཚགས་ཀྱིས་བརྒྱུད་རིམ་ཧྲིལ་པོ་དང་སྦྲེལ་ཐག་ཧྲིལ་པོ་སོགས་ཕྱོགས་ཡོངས་ནས་མཐོ་རྒྱུགས་ལས་དོན་བདེ་བླག་ཡོང་བར་འགན་ལེན་བྱེད་དགོས་པ་ནན་བཤད་གནང་།

སྒྲིག་སྒྱུར། མཁའ་འགྲོ་མཚོ། ཡོང་ཁུངས། མཚོ་བྱང་མདོ་ལ་ཚགས་པར། བཤེར་འབེབས། རིན་ཆེན་ཚེ་རིང་།

ཟླ6པའི་ཚེས3ཉིན། ཞིང་ཨུའི་ཧྲུའུ་ཅི་གཞོན་པ་དང་། ཧྲེང་ཀྲང་ལུའོ་ཏུང་ཁྲོན་གྱིས་ཞིང་ཆེན་ཡོངས་ཀྱི་མཐོ་རྒྱུགས་གྲ་སྒྲིག་གནས་ཚུལ་ལ་ཞིབ་བཤེར་བྱེད་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཐོ་རྒྱུགས་ལས་དོན་སྐོར་གྱི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་མཐའ་འཁྱོངས་དང་། སློབ་གསོ་པུ་དང་ཞིང་ཨུའི་ལས་ཀའི་བླང་བྱ་དོན་འཁྱོལ་བྱས་ནས་སྒྲིག་འཛུགས་དང་བཀོད་སྒྲིག་ཞིབ་ཚགས་ཀྱིས་བརྒྱུད་རིམ་ཧྲིལ་པོ་དང་། སྦྲེལ་ཐག་ཧྲིལ་པོ་སོགས་ཕྱོགས་ཡོངས་ནས་མཐོ་རྒྱུགས་ལས་དོན་བདེ་བླག་ཡོང་བར་འགན་ལེན་བྱེད་དགོས་པ་ནན་བཤད་གནང་།

མཚོ་སྔོན་ཞིང་ཆེན་སློབ་གསོ་སློབ་བསྡུའི་རྒྱུགས་སྤྲོད་ཁང་དུ་ཕྱིན་སྐབས་ལུའོ་ཏུང་ཁྲོན་གྱིས་ཞིང་ཆེན་ཡོངས་ཀྱི་མཐོ་རྒྱུགས་གྲ་སྒྲིག་གནས་ཚུལ་གྱི་སྙན་ཞུ་ཉན་པ་དང་། ཡུལ་དངོས་ནས་གྲོང་ཁྱེར་དང་ཁུལ་ཁག་གཅིག་གི་རྒྱུགས་སྤྲོད་བཀོད་འདོམས་ལྟེ་གནས་དང་འབྲེལ་བ་བྱས་ནས་ས་གནས་ཁག་གི་མཐོ་རྒྱུགས་གྲ་སྒྲིག་གནས་ཚུལ་ལ་བཀོད་སྒྲིག་དང་སྐོར་ཞིབ་བྱས་པ་རེད། ཁོང་གིས་ད་ལོ་ནི་རང་ཞིང་གི་མཐོ་རྒྱུགས་ཕྱོགས་བསྡུས་སྒྱུར་བཅོས་དོན་འཁྱོལ་བྱས་རྗེས་ཀྱི་རྒྱུགས་ལེན་པའི་ལོ་དང་པོ་ཡིན་པས་ས་གནས་ཁག་དང་འབྲེལ་ཡོད་སྡེ་ཚན་ཁག་གིས་ཆབ་སྲིད་ཀྱི་ལངས་གནས་མཐོ་རུ་གཏོང་བ་དང་། རྩ་འཛུགས་ཀྱི་འགན་ལེན་ལས་དོན་བརྟན་པོ་དང་ཞིབ་ཚགས་ངང་བསྒྲུབས་ནས་མཐོ་རྒྱུགས་གོ་རིམ་ལྡན་པའི་ངང་ལེགས་འགྲུབ་ཡོང་བར་འགན་ལེན་བྱེད་དགོས་པ་དང་། རིམ་པ་བཞིན་འགན་འཁྲི་ནན་དུ་གཏོང་བ་དང་། གཙོ་གནད་ལྷུ་ཚིགས་ལ་དམ་པོར་དམིགས་ནས་དོ་དམ་ཚོད་འཛིན་ལ་ཤུགས་སྣོན་རྒྱག་པ། འཕྲལ་སྡོམ་སྔོན་ཇུས་འཐུས་ཚང་དུ་གཏོང་བ་བཅས་བྱས་ཏེ་རྒྱུགས་སྤྲོད་ལས་དོན་གྱི་རྩ་འཛུགས་ཆུ་ཚད་མཐོ་རུ་ཤུགས་ཆེན་གཏོང་དགོས་ལ། ལས་ཀའི་ཞིབ་ཕྲའི་གནས་ཚུལ་དམ་འཛིན་བྱ་རྒྱུར་དོ་སྣང་བྱེད་པ་དང་། བདེ་འཇགས་གསང་སྲུང་ལམ་ལུགས་ཞིབ་ཚགས་དོན་འཁྱོལ་བྱས་ཏེ་ཚད་གཞི་མཐོ་ཤོས་དང་བྱེད་ཐབས་ནན་ཤོས་ལ་བརྟེན་ནས་ལས་དོན་ཁག་ནུས་ཤུགས་ཡོད་རྒུས་དམ་འཛིན་ཡག་པོ་བྱེད་དགོས། རྒྱུགས་སྤྲོད་སློབ་མ་རྩ་བར་འཛིན་པ་མཐའ་འཁྱོངས་བྱས་ཏེ་དྲིལ་བསྒྲགས་གསོ་སྦྱོང་དང་།  གླེང་ཚུལ་རྟོག་འཇལ་ལ་ཤུགས་སྣོན་དགོས་པ་དང་། ཞབས་ཞུ་འགན་ལེན་ལས་དོན་ཞིབ་ཚགས་ངང་བསྒྲུབས་ནས་རྒྱ་ཆེའི་རྒྱུགས་སྤྲོད་སློབ་མར་བློ་བདེ་བག་ཕེབས་ཀྱི་རྒྱུགས་སྤྲོད་ཁོར་ཡུག་ཅིག་གཏོད་དགོས་ཟེར།

ཞིང་ཆེན་སློབ་གསོ་ཐིང་དུ་ལུའོ་ཏུང་ཁྲོན་རྨང་གཞིའི་སློབ་གསོ་དང་། མཐོ་རིམ་སློབ་གསོ། ལས་རིགས་དང་དར་མའི་སློབ་གསོ། མི་རིགས་སློབ་གསོ། ཏང་འཛུགས་སྐྱོང་གི་བསམ་བློ་ཆབ་སྲིད་ཀུན་སྤྱོད་སོགས་ཀྱི་ལས་དོན་ཁྲུའུ་དང་། “སློབ་གྲྭའི་ཟས་རིགས”ཀྱི་མངོན་གསལ་གནད་དོན་ཆེད་དོན་བཅོས་སྒྲིག་གི་བྱ་བའི་ཆེད་དོན་ཁང་སོགས་སུ་ཕྱིན་ཏེ་ལས་དོན་མི་སྣ་དང་སྤེལ་རེས་དཔྱིས་ཕྱིན་པ་བྱས་ནས་ནན་གྱིས་བསྟན་དོན། རྒྱལ་ཡོངས་སློབ་གསོའི་ཚོགས་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་དགོས་པ་དང་། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་རྩ་བའི་ལས་འགན་དམ་པོར་དམིགས་ནས་དུས་རབས་གསར་པའི་སློབ་གསོའི་སྟོབས་ལྡན་ཞིང་ཆེན་འཛུགས་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་དགོས་ལ། ས་ཁོངས་ཀྱི་སློབ་གསོའི་ཐོན་ཁུངས་སྒྲིག་བཀོད་རྒྱུན་མཐུད་ལེགས་སུ་བཏང་ནས་མི་དམངས་མང་ཚོགས་ཀྱི་སྤུས་ཚད་དེ་བས་མཐོ་བ་དང་དེ་བས་སྣ་མང་གི་སློབ་གསོའི་དགོས་མཁོ་སྔར་བས་ལེགས་པའི་སྒོ་ནས་སྐོང་དགོས། ཤེས་ལྡན་མི་སྣའི་སྣ་མང་ཅན་གྱི་དགོས་མཁོ་དང་བསྟུན་ནས་རིག་ཚན་ཆེད་ལས་འགུལ་རྣམ་ལེགས་སྒྲིག་བྱས་ཏེ། “རྩེ་གྲ་གཉིས”འཛུགས་སྐྲུན་དང་ཚན་ཞིབ་གྲུབ་འབྲས་གལ་ཆེན་སོགས་ཀྱི་ཐད་མཚོན་རྟགས་རང་བཞིན་གྱི་གྲུབ་འབྲས་ཁག་ཅིག་ཆགས་པར་བྱ་དགོས། རང་ཞིང་གི་འཕེལ་རྒྱས་ཀྱི་དགོས་མཁོ་དང་ཁྱད་ལྡན་ཐོན་ལས་ལ་རང་འགུལ་ངང་སྦྲེལ་མཐུད་བྱས་ཏེ། ལས་དཀྱུས་མཉམ་སྦྲེལ་དང་ཐོན་སློབ་མཉམ་འདྲེས་ཀྱི་ལས་རིགས་སློབ་གསོའི་མ་ལག་མགྱོགས་མྱུར་བསྐྲུན་དགོས། “སློབ་གྲྭའི་ཟས་རིགས”ཀྱི་བཟའ་བཅའི་བདེ་འཇགས་དོ་དམ་ལ་ཤུགས་སྣོན་བརྒྱབ་ནས་ཕྲུ་གུར་བཅུད་ལྡན་ཟས་རིགས་མཁོ་འདོན་དང་། ཁྱིམ་བདག་གི་བློ་བདེ་བ། སྤྱི་ཚོགས་ཀྱི་བློ་ཡིད་ཚིམ་པ་བཅས་ཡོང་བ་བྱེད་དགོས་ཟེར།

ལིའུ་ཐའོ་ཞིབ་བཤེར་བྱེད་སྒོར་ཞུགས།