མཚོ་བྱང་ཁུལ་ཨུའི་རྒྱུན་ལས་ཨུ་ལྷན་གྱིས་ཚོགས་འདུ་འཚོགས།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། རིན་ཆེན་ཚེ་རིང་།

ཟླ8པའི་ཚེས28ཉིན། ཁུལ་ཨུའི་ཧྲུའུ་ཅི་ཤ་བོ་སྐྱབས་ཀྱིས་ཁུལ་ཨུའི་སྐབས་བཅུ་གསུམ་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས100པ་གཙོ་སྐྱོང་གནང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་གལ་ཆེན་གྱི་དགོངས་དོན་དང་། ཞིང་ཆེན་ཏང་ཨུའི་འབྲེལ་ཡོད་ཚོགས་འདུའི་དགོངས་དོན་བརྒྱུད་སྒྲོག་དང་སློབ་སྦྱོང་བྱས་ཏེ་འབྲེལ་ཡོད་བྱ་བའི་སྙན་ཞུར་ཉན་པ་དང་འབྲེལ་ཡོད་ཡིག་ཆར་གྲོས་ཞིབ་བྱས་ནས་བྱ་བ་དོན་འཁྱོལ་བྱེད་པར་བཀོད་སྒྲིག་གནང་།

ཚོགས་འདུའི་སྟེང་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་བོད་རང་སྐྱོང་ལྗོངས་བཙུགས་ནས་ལོ་འཁོར60ལོན་པའི་རྟེན་འབྲེལ་བྱེད་སྒོར་ཞུགས་པ་དང་འབྲེལ་གསུང་བཤད་གལ་ཆེན་གནང་བ་དེ་ནི་དུས་རབས་གསར་པའི་ཏང་གི་བོད་སྐྱོང་ཐབས་ཇུས་སྔར་བས་ཕུན་སུམ་ཇེ་ཚོགས་དང་སླར་ཡང་འཕེལ་རྒྱས་སུ་ཕྱིན་པ་ཞིག་ཡིན་པས་ཏང་ཀྲུང་དབྱང་གིས་མཐོ་སྒང་ས་ཁུལ་གྱི་འཕེལ་རྒྱས་ཆོས་ཉིད་ལ་གསལ་རྟོགས་གཏིང་ཟབ་དང་འཐབ་ཇུས་ཁོང་དུ་ཆུད་པ་གང་ལེགས་མཚོན་ཡོད། མཚོ་བྱང་ནི་མཚོ་སྔོན་པོ་དང་མདོ་ལ་རི་བོ་རྒྱལ་ཁབ་སྤྱི་གླིང（འདེམས་སྒུག་ཁུལ）གི་ལྟེ་བའི་གྲུབ་ཆ་ཞིག་ཡིན་པའི་ངོས་ནས་རྒྱལ་ཁབ་ཀྱི་སྐྱེ་ཁམས་བདེ་འཇགས་ཀྱི་སྲུང་ཡོལ་གལ་ཆེན་དང་འགག་རྩའི་ཆུ་ཁུངས་ཡིན་པས“ཀྲུང་ཧྭའི་ཆུ་གཏེར”སྲུང་སྐྱོང་དང་མཚོ་བོད་མཐོ་སྒང་སྐྱེ་ཁམས་དོ་མཉམ་སྲུང་སྐྱོང་བྱེད་པའི་ཆབ་སྲིད་ཀྱི་འགན་འཁྲི་དང་ལས་འགན་གལ་ཆེན་ཕྲག་ཏུ་ཁུར་ཡོད། ཆབ་སྲིད་ཀྱི་འགན་འཁྲི་བློ་བརྟན་འགྱུར་མེད་ངང་འཁུར་བ་དང་རི་ཆུ་ནགས་ཞིང་མཚེའུ་མ་ལག་བཅོས་སྐྱོང་དང་གཞི་གཅིག་ཅན་སྲུང་སྐྱོབ་གཅིག་གྱུར་གྱིས་སྐུལ་འདེད་གཏོང་བ། རྒྱལ་ཁབ་སྤྱི་གླིང་གཉིས་འཛུགས་སྐྲུན་བྱེད་ཚད་ཇེ་མགྱོགས་སུ་གཏོང་བ་དང་སྐྱེ་ཁམས་ཐོན་ལས་འཕེལ་རྒྱས་གཏོང་པ།“རི་གཉིས”ཀྱི་རིགས་པའི་གཞུང་ལུགས་བསྒྱུར་བའི་ཐབས་ལམ་རྒྱ་སྐྱེད་བྱེད་ཤུགས་ཆེ་རུ་གཏོང་དགོས།“ཞིང་ཆེན་ཡོངས་ཀྱི་མདུན་གྲལ་དུ་སླེབས་པ་གསུམ”དམིགས་འབེན་ལ་བཟུང་ནས“243”འཕེལ་རྒྱས་བཀོད་པ་དང་དམ་འཛིན་བྱས་ཏེ“མདོ་ལ་རི་འདབས་ཀྱི་ཕྱུགས་ར་བཟང་པོའི”ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ས་ཁོངས་སྤྱི་སྤྱོད་ཆས་རྟགས་བསྐྲུན་གང་ཐུབ་བྱས་ནས་སྐྱེ་ཁམས་ཡུལ་སྐོར་གྱི་ཁྱད་ལྡན་ཐོན་ལས་ཞིབ་ཚགས་དང་ལེགས་སྒྱུར་བྱས་ཏེ་ནུས་རྒྱུ་གཙང་མའི་ཐོན་ལས་འཕེལ་རྒྱས་དང་སྟོབས་ཆེར་བཏང་ནས་སྐྱེ་ཁམས་ལེགས་ཆ་འཕེལ་རྒྱས་ཀྱི་ལེགས་ཆར་བསྒྱུར་བར་སྐུལ་འདེད་གཏོང་དགོས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་རྐང་དུ་བྱས་ཏེ་མི་རིགས་སོ་སོའི་དབར་བརྗེ་རེས་དང་འགྲོ་འོང་མཉམ་འདྲེས་ཀྱི་འགུལ་སྐྱོད་ཁག་བཅུ་ལ་སྐུལ་འདེད་ཏན་ཏིག་གཏོང་བ་དང་། གནའ་མཁར་རྗེས་ཤུལ134དང་རྟེན་མཛོད་ཁང68། དེ་བཞིན་འགྲེམས་སྟོན་ཁང་བཅས་ཀྱི་རྒྱབ་ཏུ་འདུས་པའི་མི་རིགས་མཐུན་སྒྲིལ་གྱི་གཏམ་རྒྱུད་སྔོག་འདོན་གཏིང་ཟབ་བྱས་ནས་མི་རིགས་སོ་སོས་རིག་གནས་ཉམས་ལེན་དང་སྐྱེ་ཁམས་སྲུང་སྐྱོབ་ཀྱི་ལག་ལེན་ཁྲོད་བརྩེ་སེམས་དང་ངོས་འཛིན་གཅིག་མཐུན་ཟབ་ཏུ་གཏོང་རྒྱུར་སྐུལ་འདེད་གཏོང་དགོས། ཐོག་མཐའ་བར་གསུམ་དུ"ཏན་ཏན་ཏིག་ཏིག་དང་དམ་པ་དོན་གཉེར། དངོས་ཕན་དོན་གཉེར"བཅས་ཀྱི་དངོས་སྒྲུབ་བྱེད་ཐབས་བརྟན་སྲུང་དང་། ཉམས་སད་ཐེག་ཐུབ་པའི་སྤྱོད་ཚུལ་ལ་བརྟེན་ནས་མདུན་སྐྱོད་ཀྱི་སྟོབས་ཤུགས་གཅིག་ཏུ་སྒྲིལ་བ། རིགས་སོ་སོའི་ལས་བྱེད་པ་དང་མང་ཚོགས་ལ་ཏང་གི་བཀའ་དྲིན་ཚོར་བ་དང་ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ་བཅས་ཀྱི་ཁྲིད་སྟོན་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བརྗིད་རྔམ་ལྡན་པའི་སྟོབས་ཤུགས་མཉམ་དུ་གཅིག་བསྡུད་བྱེད་དགོས་ཟེར།

ཚོགས་འདུའི་སྟེང་ནན་གྱིས་བསྟན་དོན། ཀྲུང་དབྱང་ཏང་གི་འཛུགས་སྐྲུན་བྱ་བའི་མགོ་ཁྲིད་ཚན་ཆུང་གི་ཚོགས་འདུའི་དགོངས་དོན་ལག་བསྟར་ནན་ཏན་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“སྔར་ལས་གནས་སོན་ལྔའི”བླང་བྱ་གལ་ཆེན་ལག་བསྟར་བྱས་ཏེ་རང་ཉིད་གསར་བརྗེའི་སྙིང་སྟོབས་མཐར་ཕྱིན་པའི་སྤྱོད་ཚུལ་འཛུགས་སྐྲུན་གཏིང་ཟབ་ཏུ་གཏོང་བ་དང་བྱ་བའི་འཕེལ་རིམ་ཕྱོགས་ཡོངས་ནས་ལེགས་སྒྲིག་བྱེད་པ། ལམ་ལུགས་ལམ་སྲོལ་འཛུགས་སྐྲུན་འཐུས་ཚང་དུ་གཏོང་བ་བརྒྱུད་ཕྱོགས་བསྡོམས་དཔྱད་དཔོག་གནད་ལ་འཁེལ་བའི་སྒོ་ནས་ལེགས་པར་བྱས་ཏེ་དག་ཐེར་བཅོས་སྒྲིག་སོགས་རྗེས་མཐུད་བྱ་བ་རྒྱུན་ལྡན་ཅན་དུ་དམ་འཛིན་བྱས་ནས་སློབ་སྦྱོང་སློབ་གསོའི་ཕན་འབྲས་མུ་མཐུད་སྲ་བརྟན་དང་རྒྱ་སྐྱེད་གཏོང་དགོས་ཟེར།

ཚོགས་འདུའི་སྟེང་བླང་བྱ་བཏོན་དོན། 《ཀྲུང་གོ་གུང་ཁྲན་ཏང་གི་ཏང་གི་སློབ་གྲྭའི（སྲིད་འཛིན་སློབ་གླིང་།）བྱ་བའི་སྲོལ་ཡིག》སློབ་སྦྱོང་ནན་ཏན་བྱས་ཏེ། 《སྲོལ་ཡིག》བཟོ་བཅོས་བརྒྱབ་པའི་ཆབ་སྲིད་དོན་སྙིང་གལ་ཆེན་དང་ལག་ལེན་བླང་བྱར་གོ་བ་གཏིང་ཟབ་བླངས་ནས་ལམ་ལུགས་ཀྱི་ལེགས་ཆ་སློབ་གྲྭ་གཉེར་སྐྱོང་གི་བྱ་བའི་ཕན་ནུས་སུ་བསྒྱུར་ཏེ་ཏང་གི་སློབ་གྲྭའི（སྲིད་འཛིན་སློབ་གླིང་།）བྱ་བའི་སྤུས་ཚད་དང་ཕན་འབྲས་ཆེ་རུ་གཏོང་རྒྱུར་སྐུལ་འདེད་གཏོང་དགོས། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད་གཙོ་བོའི་འབྲེལ་ཡོད་མཛུབ་སྟོན་གྱི་དགོངས་དོན་ལ་གནད་ལ་འཁེལ་བའི་སྒོ་ནས་གོ་བ་ལེན་དགོས་པ་དང་རྒྱལ་ཁོངས་རྒྱུ་ནོར་ཉར་ཚད་གསོན་སྒྱུར་གྱི་འགན་འཁྲི་གཙོ་བོ་རང་འགུལ་ངང་འཁུར་དགོས་པ། གསོན་སྒྱུར་གྱི་ཐབས་ལམ་དང་རྣམ་པ་འཚོལ་ཞིབ་དང་གསར་སྐྲུན་བྱས་ཏེ་རྒྱུ་ནོར་གཉེར་སྐྱོང་གི་ལས་ཕྱོད་དང་ཕན་འབྲས་རྒྱུན་མཐུད་ངང་ཆེ་རུ་བཏང་ནས་རྒྱལ་ཁོངས་རྒྱུ་ནོར་གྱི་རིན་ཐང་སྲུང་སྐྱོབ་དང་འཕར་སྣོན་མངོན་འགྱུར་བྱེད་དགོས། ཡུལ་སྐོར་བའི་དགོས་མཁོ་ཁྲིད་སྟོན་དུ་བྱས་ཏེ་ལྗོངས་ཁུལ་གྱི་ཁོར་ཡུག་སྤུས་ཚད་ཕྱོགས་ཡོངས་ནས་མཐོ་རུ་གཏོང་རྒྱུ་དང་ཡུལ་སྐོར་ཞབས་ཞུའི་བརྒྱུད་རིམ་ཇེ་ལེགས་སུ་གཏོང་རྒྱུ། དོ་དམ་གཉེར་སྐྱོང་ཆུ་ཚད་མཐོ་རུ་གཏོང་རྒྱུ་བཅས་བྱས་ཏེ་སྟོན་དགུན་དུས་ཀྱི་ཁྱད་ཆོས་ལྡན་པའི་ཡུལ་སྐོར་བྱེད་སྒོ་འཆར་འགོད་ཡག་པོ་བྱས་ནས་ས་ཁོངས་ཧྲིལ་བོའི་དབྱར་དགུན་སྟོན་དཔྱིད་ཀྱི་ཡུལ་སྐོར་འཕེལ་རྒྱས་ཀྱི་རྣམ་པ་གསར་པ་འཛུགས་དགོས་ཟེར།

ཚོགས་འདུའི་ཐོག་ཞིང་ཆེན་གྱི“ལྔ་བཅོ་ལྔའི”འཆར་འགོད་ཆེད་མཁས་པའི་སྲིད་དོན་ཇུས་འབུལ་སྐོར་གྱི་ཆེད་དོན་ཚོགས་འདུ་དང་ལས་གཞི་གལ་ཆེན་འཆར་འགོད་སྐོར་གྱི་ཆེད་དོན་ཚོགས་འདུའི་དགོངས་དོན་ལ་སློབ་སྦྱོང་བྱས་པར་མ་ཟད་ཁུལ་ཡོངས་གྱི“ལྔ་བཅོ་ལྔའི”དུས་སྐབས་ཀྱི་ལས་གཞི་གལ་ཆེན་འཆར་འགོད་བྱས་ཚུལ་སྐོར་གྱི་སྙན་ཞུར་ཉན་ནས་མིག་སྔའི་ལས་གཞི་གྲབས་གསོག་དང་ཐོན་ལས་བཀོད་སྒྲིག་སྐུལ་འདེད་གཏོང་བའི་དཀའ་གནད་བཅས་ལ་ཕྱོགས་ཡོངས་ནས་ཁོང་དུ་ཆུད་པར་བྱས་ཏེ་ནན་གྱིས་བསྟན་དོན། ཆེད་མཁས་པའི་བློ་གྲོས་དང་ཞིང་ཆེན་ཡོངས་ཀྱི་བཀོད་སྒྲིག་དེ་མཚོ་བྱང་གི་ལག་ལེན་ནང་གནད་ལ་འཁེལ་བའི་སྒོ་ནས་མཉམ་འདྲེས་བྱས་ནས་སྐྱེ་ཁམས་སྲུང་སྐྱོབ་དང་ལྗང་མདོག་ཐོན་ལས། དམངས་འཚོའི་བདེ་སྐྱིད་སོགས་ལྟེ་བའི་ཁྱབ་ཁོངས་ལ་དམིགས་ཏེ་རྒྱལ་ཁབ་དང་ཞིང་ཆེན་རིམ་པའི་སྲིད་ཇུས་དང་འབྲེལ་མཐུད་བྱེད་ཤུགས་ཆེ་རུ་གཏོང་བ་དང“ལྔ་བཅོ་ལྔའི”ལས་གཞིའི་གསོག་ཉར་སྔར་བས་ཕུན་སུམ་ཇེ་ཚོགས་སུ་གཏོང་དགོས། འགན་འཁྲི་དམ་ཟབ་དང་ལས་ཡུན་ལྡོག་རྩིས་བྱས་ཏེ་གཙོ་གནད་ལས་གཞིའི་སྔོན་གྱི་བྱ་བར་སྐུལ་འདེད་བྱེད་ཤུགས་ཇེ་མགྱོགས་སུ་གཏོང་བ་དང་སྤུས་ལེགས་ལས་གཞིར་བརྟེན་ནས“ལྔ་བཅོ་ལྔའི”དུས་སྐབས་ཀྱི་མཚོ་བྱང་སྐྱེ་ཁམས་བདེ་འཇགས་སྲུང་ཡོལ་སྲ་བརྟན་དུ་གཏོང་པ། ལྗང་མདོག་འཕེལ་རྒྱས་ཀྱི་སྒུལ་ཤུགས་ལ་སྐུལ་སློང་བྱས་ཏེ་འཆར་འགོད་དམིགས་འབེན་དོན་འཁྱོལ་བྱས་ནས་ཕན་འབྲས་དངོས་མཐོང་བར་བྱེད་དགོས་ཟེར།

ཚོགས་འདུའི་ཐོག་ད་དུང་དོན་དག་གཞན་དག་ལའང་ཞིབ་འཇུག་བྱས།