ཤ་བོ་སྐྱབས་ཀྱིས་ཆུ་ཚན་ཁམས་གསོའི་ཐོན་ལས་འཕེལ་རྒྱས་གནས་ཚུལ་ལ་བརྟག་ཞིབ་གནང་སྐབས་མཚོ་བྱང་གི་ཁྱད་ལྡན་ཆུ་ཚན་ཁམས་གསོའི་ཐོན་ལས་ལ་བརྟེན་ནས་མཚོ་སྔོན་གྱི“ཆུ་ཚན་གྲོང་ཁྱེར”བསྐྲུན་དགོས་པ་ནན་གྱིས་བསྟན།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། རིན་ཆེན་ཚེ་རིང་།

ཟླ9པའི་ཚེས11ཉིན། ཁུལ་ཨུའི་ཧྲུའུ་ཅི་ཤ་བོ་སྐྱབས་ཙོང་ཆུའི་མགོ་ཁུངས་ཤྭ་ལུང་ཆུ་ཚན་སོགས་སུ་སོང་སྟེ་ཆུ་ཚན་སྐོར་ལ་བརྟག་ཞིབ་གནང་སྐབས། ཡུལ་བབ་དང་བསྟུན་ནས་མཚོ་བྱང་གི་ཕུན་སུམ་ཚོགས་པའི་ས་ཚན་ཐོན་ཁུངས་བདེ་སྤྱོད་ཡག་པོ་བྱས་ཏེ། སྲུང་སྐྱོབ་དང་གསར་སྤེལ་ཟུང་འབྲེལ་རྒྱུན་འཁྱོངས་ཀྱིས་ཆུ་ཚན་ལས་རིགས་ལེགས་པར་གཉེར་ནས་མཚོ་སྔོན་གྱི“ཆུ་ཚན་གྲོང་ཁྱེར”གྱི་ཆས་རྟགས་བསྐྲུན་དགོས་པ་ནན་གྱིས་བསྟན།

ཤྭ་ལུང་ཆུ་ཚན་དུ་ཤ་བོ་སྐྱབས་ཀྱིས་ཆུ་ཚན་གྱི་སྨན་ལུམས་ལ་བསྡད་ཡོད་པའི་མང་ཚོགས་དང་བརྗེ་རེས་གཏིང་ཟབ་བྱས་ནས་འབྲེལ་ཡོད་བསམ་འཆར་དང་གྲོས་མགོར་ཉན་པར་མ་ཟད། རྨང་གཞིའི་སྒྲིག་བཀོད་ཆ་ཚང་དང་བགྲོད་ལམ་འགྲིམ་འགྲུལ་བདེ་འཇགས། གནས་སྐོར་བའི་ཞབས་ཞུ་སོགས་ཀྱི་བྱ་བའི་ཐད་ཡུལ་དངོས་ནས་གཞུང་དོན་སྤེལ་ཏེ་བསྟན་དོན། ཤྭ་ལུང་ཆུ་ཚན་ལ"ཙོང་ཆུའི་མགོ་ཁུངས་ཀྱི་ཆུ་མིག་དང་པོ"ཞེས་པའི་མཚན་སྙན་ཡོད་པ་དང་ཆུའི་དྲོད་ཚད62℃ཡས་མས་སུ་སླེབས་ཡོད་ལ། དེའི་ནང་མུ་ཟི་སེར་པོ་དང་གྲང་ཆུའི་རྡོ་སོགས་གཏེར་རྒྱུ་འདུས་པས་ཐུན་མོང་མ་ཡིན་པའི་ཁྱད་ཆོས་ཡོད་པས་སྨན་བཅོས་ཀྱི་རིན་ཐང་ཆེན་པོ་ལྡན། མཐའ་འཁོར་གྱི་ནགས་ཚལ་དང་གངས་རི། རྩྭ་ཐང་སོགས་རང་བྱུང་མཛེས་ལྗོངས་ལྟ་ན་སྡུག་ཅིང་། རི་མཐོའི་ལྕང་མ་དང་སྤེན་མའི་མེ་ཏོག གངས་ལྷ་མེ་ཏོག གནའ་བ་དང་གསའ། གོང་མོ་སོགས་རི་སྐྱེས་སྲོག་ཆགས་དང་རྩི་ཤིང་གི་རིགས་མང་པོ་ཡོད། ན་ནིང་ནས་བཟུང་མདའ་བཞི་རྫོང་གིས་ཤྭ་ལུང་ཆུ་ཚན་གསར་སྤེལ་དང་བེད་སྤྱོད་བྱ་རྒྱུ་འཚོལ་ཞིབ་ཧུར་ཐག་བྱས་པ་བརྒྱུད་གངས་རིའི་ཆུ་ཚན་འདི་མགྱོགས་མྱུར་ངང་མཚན་སྙན་རྒྱས་ནས་མང་ཚོགས་མང་པོ་ཞིག་འདི་གར་ཡོང་ནས་ཉམས་ལེན་བྱས་པས་ཞིང་ཆེན་ཡོངས་ཀྱི་ཆུ་ཚན་གནས་སྐོར་བྱེད་སའི་གནས་མཆོག་ཅིག་ཏུ་གྱུར་ཡོད་ཟེར།

ཤ་བོ་སྐྱབས་ཀྱིས་ནན་གྱིས་བསྟན་དོན། གཅིག་ནས་ས་ཚན་ཐོན་ཁུངས་ལ་བརྟག་དཔྱད་མཐིལ་རྟོགས་བྱེད་དགོས་པ་དང་། ཁུལ་དང་རྫོང་གི་རང་བྱུང་ཐོན་ཁུངས་སྡེ་ཁག་གིས་ཆུ་ཚན་གྱི་ས་ཚན་ཐོན་ཁུངས་ལ་བརྟག་དཔྱད་གདེང་འཇོག་གཏིང་ཟབ་སྤེལ་ཏེ། ཐོན་ཁུངས་ཁྱབ་ཚུལ་དང་གསོག་ཚད། དེ་བཞིན་གསར་སྤེལ་གྱི་མངོན་མེད་སྟོབས་ཤུགས་གསལ་རྟོགས་ཐུབ་པ་བྱས་ནས་ད་ཡོད་ཀྱི་ས་ཚན་ཐོན་ཁུངས་ཀྱི་ཆུའི་དྲོད་ཚད་དང་སྤུས་ཀ མང་ཉུང་སོགས་ཀྱི་ཞིབ་ཕྲའི་གནས་ཚུལ་ལ་རྒྱུས་ལོན་གཏིང་ཟབ་བྱེད་དགོས། ལྷག་པར་དུ་མདོ་ལའི་ཅཱ་པོ་ཆུ་ཚན་དང་རྐང་ཚའི་བ་ལུ་མ་ཆུ་ཚན། མདའ་བཞིའི་མདའ་བཞི་ཆུ་ཚན་སོགས་ས་ཚན་ཐོན་ཁུངས་གསར་སྤེལ་དང་བེད་སྤྱོད་ཡག་པོ་བྱེད་དགོས་ལ། མདོ་ལ་ཆུའི་འཇིག་རྟེན་ཆུ་ཚན་ཆུ་རྐྱལ་ཁང་གཉེར་སྐྱོང་ཡག་པོ་བྱས་ནས་མཚོ་སྔོན་གྱི"ཆུ་ཚན་གྲོང་ཁྱེར"བསྐྲུན་པར་རོགས་རམ་བྱེད་དགོས། གཉིས་ནས་མང་ཚོགས་དང་གནས་སྐོར་བའི་དགོས་མཁོ་གཞིར་བཟུང་བྱེད་ནུས་བཀོད་སྒྲིག་སྔར་ལས་ཇེ་ལེགས་སུ་གཏོང་བ་དང་། གཞུང་ལམ་འཛུགས་སྐྲུན་དང་འཕྲིན་གཏོང་བརྡ་རྟགས་སོགས་སྒྲིག་བཀོད་ཚང་བའི་ཞབས་ཞུ་རྒྱུན་ཆད་མེད་པར་འཐུས་ཚང་དུ་གཏོང་དགོས། གྱོན་ཆས་བརྗེ་བའི་ངལ་གསོ་ཁུལ་དང་གསང་སྤྱོད་ཁང་། བགྲོད་ལམ། ལམ་རྟགས་སོགས་མགྱོགས་མྱུར་སྒོས་འཛུགས་སྐྲུན་བྱེད་པ་དང་ཆུ་ཚན་རྫིང་བུ་གཙང་བཀྲུ་སོགས་ཁོར་ཡུག་ཇེ་ལེགས་སུ་གཏོང་བའི་བྱ་བ་ཡག་པོར་སྒྲུབ་ནས་ཁྱོན་ཡོངས་ཀྱི་སྣེ་ལེན་ནུས་པ་དང་ཞབས་ཞུའི་ཆུ་ཚད་མཐོ་རུ་གཏོང་དགོས། གསུམ་ནས་དྲིལ་སྒྲོག་དང་ངོ་སྤྲོད་བྱེད་ཤུགས་ཆེ་རུ་བཏང་སྟེ་ཆུ་ཚན་བདེ་ཐང་གསོ་སྐྱོང་རིག་གནས་ཀྱི་ནང་དོན་སྔོག་འདོན་གཏིང་ཟབ་བྱས་ནས་སྟོན་དུས་དང་དགུན་དུས་ཀྱི་གནས་སྐོར་དུས་ཚིགས་ལ་བརྟེན་ཏེ་རྐང་བགྲོད་དང་རི་འཛེག ལྔ་པའི་བ་བཞིའི་གསོལ་ཁྲུས་དུས་ཆེན་སོགས་རིག་གནས་ལུས་རྩལ་བྱེད་སྒོ་སྣ་ཚོགས་མུ་མཐུད་དུ་གཉེར་བ་དང་གནས་སྐོར་བ་འདྲེན་ཤུགས་ཆེ་རུ་གཏོང་དགོས། དྲ་རྒྱའི་དྲིལ་སྒྲོག་སྟེགས་བུ་སྤྱད་དེ་དྲིལ་སྒྲོག་གྲབས་གཤོམ་བྱ་བ་མུ་མཐུད་སྒྲུབ་སྟེ་གངས་རི་དང་ཆུ་ཚན་གྱིས་འགྲུལ་བ་འགུག་པ་དང་སྙན་པ་རྒྱས་པར་ནུས་ཤུགས་ཡོད་རྒུས་སྐུལ་འདེད་གཏོང་དགོས། བཞི་ནས་མཚོ་བྱང་གི་གངས་རི་དང་མཚེའུ། ཆུ་ཚན། རྩྭ་ཐང་། བྱེ་ཐང་སོགས་ཀྱི་གཞི་རྒྱུ་སྤྱད་དེ་གནས་སྐོར་ལམ་ཐིག་སྤུས་ལེགས་ཇུས་འགོད་བྱས་ནས“ཞོགས་པ་དང་དགོང་མོར་སྨོན་ལམ་མཐོན་པོ་ནས་ཉི་ཤར་ཉི་ནུབ་དང་མཚོ་སྔོན་པོར་ལྟ་བ། ཉིན་གུང་ཤྭ་ལུང་ཆུ་ཚན་ནས་གངས་རིའི་ཆུ་ཁོལ་ལ་འདུག་པ”སོགས་ཉིན་གཅིག་གནས་སྐོར་དྲིལ་སྒྲོག་སྦྱར་ཡིག་ཇུས་འགོད་བྱས་ཏེ། གངས་རིའི་ཆུ་ཚན་ལ་བརྟེན་ནས་མཚོ་བྱང་གི་དགུན་དུས་གནས་སྐོར་བྱེད་སྒོའི་ནང་དོན་ཕུན་སུམ་ཇེ་ཚོགས་སུ་བཏང་སྟེ་ཁུལ་ཡོངས་ཀྱི་རིག་གནས་གནས་སྐོར་ཁྲོམ་རར་རྒྱུན་མཐུད་ངང་ཚ་རླབས་འཕྱུར་བའི་རྣམ་པ་བཟང་པོ་རྒྱུན་མཐུད་བྱེད་དགོས། ལྔ་ནས“རང་བྱུང་ཁམས་གསོའི”རྩ་དོན་གཞིར་བཟུང་ནས་ཆུ་ཚན་ཐོན་ལས་འཕེལ་རྒྱས་ཇེ་མགྱོགས་སུ་བཏང་སྟེ་ཆུ་ཚན་ཐོན་ཁུངས་དང་མཚོ་སྔོན་པོ། སྨོན་ལམ་མཐོན་པོ། གསེར་དངུལ་ཐང་། རྡུལ་ཕྲན་མཁར་སོགས་ཁྱད་ཆོས་ལྡན་པའི་གནས་སྐོར་ཐོན་ཁུངས་དང་དེ་བཞིན་སྐྲུན་གྲབས་ཡོད་པའི་ཤྭ་ལུང་ཆུ་མཛོད་སྡེབ་སྒྲིག་བེད་སྤྱོད་དང་མཉམ་འདྲེས་གཏིང་ཟབ། རྒྱུན་གཅིག་སྦྲེལ་མཐུད་བཅས་བྱས་ཏེ་རིག་གནས་གནས་སྐོར་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་ཕུན་སུམ་ཇེ་ཚོགས་སུ་གཏོང་དགོས་ཟེར།

དེའི་རིང་། ཤ་བོ་སྐྱབས་ནུབ་མཚོ་པུར་འཇུག་ཁང་དུ་སོང་སྟེ་པུར་འཇུག་བཅོས་སྒྱུར་བྱ་བར་བརྟག་ཞིབ་གནང་ཞིང་དུས་མགོར་སྒྲུབ་རྒྱུར་སྤྲད་པའི་བྱ་བ་དོན་འཁྱོལ་བྱས་ཚུལ་ལ་ལྟ་སྐུལ་མཛུབ་སྟོན་གནང་ནས་ནན་གྱིས་བསྟན་དོན། པུར་འཇུག་བྱ་གཞག་དེ་ཁྱིམ་ཚང་ཁྲི་སྟོང་མང་བོ་དང་འབྲེལ་བ་ཡོད་ཅིང་། དམངས་འཚོའི་བདེ་སྐྱིད་དང་འབྲེལ་བ་ཡོད་པས་གཞི་རྩའི་པུར་འཇུག་ཞབས་ཞུའི་ཆག་ཡང་དང་རིན་མེད་གཏོང་བའི་སྲིད་ཇུས་དོན་འཁྱོལ་ནན་ཏན་བྱེད་པ་དང་ཞབས་ཞུའི་བརྒྱུད་རིམ་ཇེ་ལེགས་སུ་གཏོང་དགོས་ཤིང་། འདྲ་བཟོས་མེ་ཏོག་སོགས་དངོས་རྫས་ཀྱིས་མྱ་ངན་ཚོམས་ཆེན་རྒྱན་སྤྲས་བཅས་བྱས་ཏེ་དྲོ་སྐྱིད་ལྡན་པའི་ཁོར་ཡུག་སྐྲུན་ནས་མི་ཆོས་ལྡན་པའི་སེམས་ཁུར་ལ་ཤུགས་བསྣན་ཏེ་མང་ཚོགས་ཀྱི་སྣ་མང་ཅན་གྱི་པུར་འཇུག་དགོས་མཁོ་སྐོང་གང་ཐུབ་བྱེད་དགོས་ཟེར།

ཁུལ་གྱི་མགོ་ཁྲིད་ཚོ་ཅི་ཆང་དང་། ལི་ཞུ་ཀྲིན། ཁྲང་ལིན་བཅས་དང་། ཁུལ་ཐད་གཏོགས་འབྲེལ་ཡོད་སྡེ་ཁག་དང་མདའ་བཞི་རྫོང་གི་འགན་འཁུར་བློ་མཐུན་གྱིས་ཕེབས་རོགས་བྱས།