ཀྲུང་གོ་གུང་ཁྲན་ཏང་གི་སྒྲིག་ཡིག(མུ་འགོད)

རྩོམ་སྒྲིག  སངས་དོན།   ཡོང་ཁུངས།  ལྷ་ས་གྲོང་ཁྱེར་བོད་སྐད་ཡིག་ལས་དོན་ཨུའི་འཕྲིན་སྟེགས།   བཤེར་འབེབས།  རིན་ཆེན་ཚེ་རིང་། 

(ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་ཉི་ཤུ་པའི་ཐོག་ཆ་ཤས་ལ་བཟོ་བཅོས་བརྒྱབ་ནས་2022ལོའི་ཟླ་ 10 ཚེས་ 22ཉིན་གྲོས་འཆམ་བྱུང་བ) 

(སྤེལ་ཐེངས་ཁག་དང་པོར་མཐུད)དང་པོ། ཏང་གི་གཞི་རྩའི་ལམ་ཕྱོགས་མཐའ་འཁྱོངས་བྱེད་དགོས། ཏང་ཡོངས་ཀྱིས་ཏེང་ཞའོ་ཕིང་གི་རིགས་པའི་གཞུང་ལུགས་དང་། "མཚོན་བྱེད་གསུམ"གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ། ཏང་གི་གཞི་རྩའི་ལམ་ཕྱོགས་བཅས་ལ་བརྟེན་ནས་བསམ་བློ་གཅིག་གྱུར་དང་བྱ་སྤྱོད་གཅིག་གྱུར་ཡོང་བ་བྱེད་དགོས་པ་མ་ཟད། གཡོ་འགུལ་སྤུ་ཙམ་མེད་པའི་སྒོ་ནས་ཡུན་རིང་མཐའ་འཁྱོངས་ཀྱང་བྱེད་དགོས། སྒྱུར་བཅོས་སྒོ་འབྱེད་དང་གཞི་རྩའི་རྩ་དོན་བཞི་གཅིག་གྱུར་ཡོང་བ་བྱེད་དགོས་པ་དང་། ཏང་གི་གཞི་རྩའི་ལམ་ཕྱོགས་སྒོ་ཀུན་ནས་དོན་འཁྱོལ་བྱེད་པ། "གཡོན"དང་གཡས་ཀྱི་ཕྱོགས་ལྷུང་ནོར་འཁྲུལ་ཅན་ཚང་མར་ངོ་རྒོལ་དང་གཡས་ལྷུང་ལ་དོགས་ཟོན་བྱ་དགོས་མོད། འོན་ཀྱང་གཙོ་བོ"གཡོན"ལྷུང་སྔོན་འགོག་བྱེད་དགོས། ངེས་པར་དུ་ཆབ་སྲིད་ཀྱི་བརྡར་ཆ་གཅོད་ནུས་དང་གོ་རྟོགས་སད་ནུས།  ལག་བསྟར་བྱེད་ནུས་བཅས་མཐོ་རུ་བཏང་ནས། ཏང་གི་རིགས་གཞུང་དང་ལམ་ཕྱོགས་སྲིད་ཇུས་ལག་བསྟར་བྱེད་པའི་རང་རྟོགས་རང་བཞིན་དང་འགྱུར་མེད་རང་བཞིན་མཐོ་རུ་གཏོང་དགོས།   

གཉིས་པ། བསམ་བློ་བཅིངས་འགྲོལ་དང་། དངོས་ཐོག་བདེན་འཚོལ། དུས་བསྟུན་འཕེལ་རྒྱས། བདེན་འཚོལ་དོན་གཉེར་བཅས་མཐའ་འཁྱོངས་བྱེད་དགོས། ཏང་གི་བསམ་བློའི་ལམ་ཕྱོགས་ནི་བྱ་བ་གང་བྱེད་དོན་དངོས་གཞིར་འཛིན་པ་དང་། རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པ། དངོས་ཐོག་བདེན་འཚོལ། ལག་ལེན་དངོས་ཀྱི་ཁྲོད་དུ་བདེན་དོན་ཞིབ་བཤེར་དང་བདེན་དོན་འཕེལ་རྒྱས་གཏོང་བ་བཅས་ཡིན། ཏང་ཡོངས་ཀྱིས་ངེས་པར་དུ་བསམ་བློའི་ལམ་ཕྱོགས་འདི་མཐའ་འཁྱོངས་བྱས་ཏེ་འཚོལ་ཞིབ་ཧུར་ཐག་དང་། བློ་ཁོག་ཆེན་པོས་ཚོད་ལྟ། གསར་འབྱེད་གསར་གཏོད། གསར་སྐྲུན་གྱི་རང་བཞིན་ལྡན་པའི་སྒོ་ནས་ལས་དོན་སྒྲུབ་པ་བཅས་བྱས་ཐོག གནས་ཚུལ་གསར་པར་མུ་མཐུད་ཞིབ་འཇུག་དང་། ཉམས་མྱོང་གསར་པ་ཕྱོགས་བསྡོམས། གནད་དོན་གསར་པ་ཐག་གཅོད་བཅས་བྱས་ཏེ་ལག་ལེན་བྱེད་རིང་དུ་མར་ཁེ་སི་རིང་ལུགས་ཕུན་སུམ་ཇེ་ཚོགས་དང་གོང་འཕེལ་བཏང་ནས་མར་ཁེ་སི་རིང་ལུགས་ཀྲུང་གོ་ཅན་དང་དུས་རབས་ཅན་ལ་འགྱུར་རྒྱུར་སྐུལ་སྤེལ་གཏོང་དགོས། 

གསུམ་པ། དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་མཐའ་འཁྱོངས་བྱེད་དགོས།  ཕྱོགས་ཡོངས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་བསྟར་དང་། རྩ་འཛུགས་མ་ལག་འཛུགས་སྐྱོང་བྱ་རྒྱུ་དེ་གཙོ་གནད་དུ་བཟུང་ནས།  ལྷག་བསམ་དང་སྲིད་གཙང། ཁུར་སེམས་བཅས་ལྡན་པའི་བྱང་ཚད་མཐོ་བའི་ལས་བྱེད་པ་གསོ་སྐྱོང་ལ་ཤུགས་རྒྱག་པ་དང་།  རྒྱལ་གཅེས་དང་ལེགས་སྐྱེས་འབུལ་མཁན་གྱི་ཕྱོགས་ཁག་གི་ཕུལ་བྱུང་ཤེས་ལྡན་པ་མཉམ་འདུས་བྱ་རྒྱུར་ཤུགས་རྒྱག་དགོས།  སྤྱོད་ཡོན་གཉིས་ལྡན་དང་ཀུན་སྤྱོད་སྔོན་འགྲོ སྤྱོད་ཡོན་གཉིས་ལྡན་གྱི་མི་སྣ་བསྐོ་གཞག་བཅས་རྒྱུན་འཁྱོངས་བྱས་ཏེ།  ཏང་གི་ཕྱོགས་ཡོངས་ལ་འགོ་ཁྲིད་བྱེད་པ་མཐའ་འཁྱོངས་དང་ཤུགས་སྣོན།  ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་མཐའ་འཁྱོངས་དང་འཕེལ་རྒྱས་བཅས་ཡོང་ཕྱིར་སྲ་ཞིང་བརྟན་པའི་རྩ་འཛུགས་འགན་ལེན་བྱེད་དགོས།  ཏང་ཡོངས་ཀྱིས་ངེས་པར་དུ་ཏང་རྩ་འཛུགས་ཀྱི་ཆབ་སྲིད་ཀྱི་ནུས་པ་དང་རྩ་འཛུགས་ཀྱི་ནུས་པར་ཤུགས་སྣོན་བརྒྱབ་ཐོག ཏང་དང་མི་དམངས་ལ་མཁོ་བའི་ལས་བྱེད་པ་ཡག་པོ་གསོ་སྐྱོང་དང་འོས་འདེམས་བྱེད་དགོས་པ། དུས་རབས་ཀྱི་ལས་འགན་ལྕི་པོ་ཕྲག་ཏུ་འཁུར་ཐུབ་མཁན་གྱི་སྤྱི་ཚོགས་རིང་ལུགས་བྱ་གཞག་གི་ཤུལ་འཛིན་པ་འབོར་ཆེན་གསོ་སྐྱོང་དང་སྐྱེད་སྲིང་བྱེད་དགོས། གནམ་འོག་གི་མཁས་པ་བཀུག་ནས་ལས་སུ་སྤྱོད་དགོས།  རྩ་འཛུགས་ཀྱི་ཐོག་ནས་ཏང་གི་གཞི་རྩའི་རིགས་གཞུང་དང་གཞི་རྩའི་ལམ་ཕྱོགས།  གཞི་རྩའི་ཐབས་ཇུས་བཅས་ལག་བསྟར་དོན་འཁྱོལ་བྱེད་དགོས།  

བཞི་པ། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱེད་དགོས། ཏང་ལ་བཟོ་པའི་གྲལ་རིམ་དང་ཆེས་རྒྱ་ཆེ་བའི་མི་དམངས་མང་ཚོགས་ཀྱི་ཁེ་ཕན་མ་གཏོགས་རང་ཉིད་ཀྱི་དམིགས་བསལ་གྱི་ཁེ་ཕན་མེད། ཏང་གིས་དུས་དང་རྣམ་པ་ཀུན་ཏུ་མང་ཚོགས་ཀྱི་ཁེ་ཕན་ཨང་དང་པོར་བཞག་ནས་མང་ཚོགས་དང་བདེ་སྡུག་མཉམ་མྱོང་དང་། མང་ཚོགས་དང་འབྲེལ་འདྲིས་དམ་ཤོས་རྒྱུན་འཁྱོངས་བྱེད་དགོས་པ་དང་། དམངས་ཀྱི་དོན་དུ་དབང་ཆ་སྤྱོད་པ་དང་། མི་དམངས་ལ་དུང་སེམས་འཆང་བ། དམངས་ཀྱི་དོན་དུ་ཁེ་ཕན་སྐྲུན་པ་བཅས་རྒྱུན་འཁྱོངས་བྱེད་དགོས་པ་ལས། ཏང་ཡོན་སུ་ཞིག་ཡིན་རུང་མང་ཚོགས་དང་ཁ་བྲལ་བ་དང་མང་ཚོགས་ཀྱི་མགོ་ཐོག་ཏུ་བསྡད་མི་ཆོག རང་རེའི་ཏང་གི་ཆབ་སྲིད་ཀྱི་ཁྱད་ཡོན་ཆེ་ཤོས་ནི་མང་ཚོགས་དང་འབྲེལ་འདྲིས་དམ་པོ་བྱེད་པ་དེ་ཡིན་ཞིང་། ཏང་གིས་སྲིད་འཛིན་བྱས་རྗེས་ཀྱི་ཉེན་ཁ་ཆེ་ཤོས་ནི་མང་ཚོགས་དང་ཁ་བྲལ་བ་དེ་རེད། ཏང་སྲོལ་གྱི་གནད་དོན་དང་ཏང་དང་མི་དམངས་མང་ཚོགས་དབར་གྱི་འབྲེལ་བའི་གནད་དོན་ནི་ཏང་འདི་ཉིད་ཤི་གསོན་ཆགས་འཇིག་ཇི་ཡོང་ལ་ཐུག་པའི་གནད་དོན་ཡིན། ཏང་གིས་རང་ཉིད་ཀྱི་ལས་དོན་སྒྲུབ་རིང་མང་ཚོགས་ལམ་ཕྱོགས་ལག་ལེན་བསྟར་ནས་བྱ་བ་ཐམས་ཅད་མང་ཚོགས་ཀྱི་ཆེད་དུ་སྒྲུབ་པ་དང་། བྱ་བ་ཐམས་ཅད་མང་ཚོགས་ལ་བརྟེན་ནས་སྒྲུབ་ཅིང་། མང་ཚོགས་ཀྱི་ཁྲོད་ནས་བླངས་ཏེ་མང་ཚོགས་ཀྱི་ཁྲོད་དུ་སྤེལ་བ། ཏང་གི་འདོད་ཚུལ་ཡང་དག་པ་རྣམས་མང་ཚོགས་ཀྱི་རང་རྟོགས་བྱ་སྤྱོད་དུ་འགྱུར་བར་བྱེད་དགོས།

ལྔ་པ། དམངས་གཙོ་གཅིག་སྡུད་ལམ་ལུགས་མཐའ་འཁྱོངས་བྱེད་དགོས། དམངས་གཙོ་གཅིག་སྡུད་ལམ་ལུགས་ནི་དམངས་གཙོའི་རྨང་གཞིའི་ཐོག་གི་གཅིག་སྡུད་དང་གཅིག་སྡུད་ཀྱིས་སློབ་སྟོན་བྱེད་པའི་འོག་གི་དམངས་གཙོ་ཟུང་དུ་སྦྲེལ་བ་ཞིག་ཡིན། དེ་ཉིད་ཏང་གི་རྩ་བར་གྱུར་པའི་རྩ་འཛུགས་ཀྱི་རྩ་དོན་ཡིན་ལ། ཏང་གི་འཚོ་བའི་ཁྲོད་དུ་མང་ཚོགས་ཀྱི་ལམ་ཕྱོགས་དངོས་སུ་བེད་སྤྱོད་པའང་ཡིན། ཏང་ནང་དུ་དམངས་གཙོ་དར་སྤེལ་གང་ལེགས་གཏོང་དགོས་པ་དང་། ཏང་ཡོན་གྱི་བྱེད་པོའི་གནས་བབ་ལ་བརྩི་འཇོག ཏང་ཡོན་གྱི་དམངས་གཙོའི་ཁེ་དབང་འགན་སྲུང་བཅས་བྱས་ནས་ཏང་གི་རྩ་འཛུགས་རིམ་པ་ཁག་དང་རྒྱ་ཆེའི་ཏང་ཡོན་གྱི་ཧུར་བརྩོན་བྱེད་སེམས་དང་གསར་སྐྲུན་བྱེད་སེམས་འདོན་སྤེལ་བྱེད་དགོས། གཅིག་སྡུད་ཡང་དག་པ་ལག་བསྟར་བྱེད་དགོས་པ་དང་། ཆབ་སྲིད་ཀྱི་འདུ་ཤེས་དང་། སྤྱི་ཡོངས་ཀྱི་འདུ་ཤེས། སྲོག་ཤིང་གི་འདུ་ཤེས། མིག་ལྟོས་ཀྱི་འདུ་ཤེས་བཅས་བརྟན་པོར་བཅངས་ཏེ་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་འགོ་ཁྲིད་སྲུང་སྐྱོང་མཐའ་གཅིག་ཏུ་བྱས་ནས་ཏང་ཡོངས་ཀྱི་མཐུན་སྒྲིལ་གཅིག་གྱུར་དང་བྱ་སྤྱོད་གཅིག་གྱུར་ཡོང་བར་འགན་ལེན་དང་། ཏང་གི་ཆོད་དོན་མྱུར་ཞིང་ཕན་ནུས་ལྡན་པའི་སྒོ་ནས་ལག་ལེན་མཐར་ཕྱིན་བསྟར་ཐུབ་པར་འགན་ལེན་བྱེད་དགོས། ཏང་ནང་ཁུལ་གྱི་ཆབ་སྲིད་འཚོ་བ་ཚད་ལྡན་དུ་གཏོང་བ་དང་དེར་ཤུགས་སྣོན་རྒྱག་པ་དང་། ཏང་ནང་ཁུལ་གྱི་ཆབ་སྲིད་འཚོ་བར་ལྡན་པའི་ཆབ་སྲིད་རང་བཞིན་དང་། དུས་རབས་རང་བཞིན། རྩ་དོན་རང་བཞིན། འཐབ་འཛིང་རང་བཞིན་བཅས་ཇེ་ཆེར་གཏོང་བ། དགེ་མཚན་ལྡན་ཞིང་སྐྱོན་དང་བྲལ་བའི་ཏང་ནང་ཁུལ་གྱི་ཆབ་སྲིད་རིག་གནས་འཕེལ་རྒྱས་གཏོང་བ་བཅས་བྱས་ནས་སྤྱོད་སྲོལ་གཉིས་བཟང་ཡོང་བའི་ཆབ་སྲིད་ཁོར་ཡུག་ལེགས་པོ་ཞིག་སྐྲུན་དགོས། ཏང་གིས་རང་ཉིད་ཀྱི་ཆབ་སྲིད་འཚོ་བའི་ནང་སྐྱོན་བརྗོད་དང་རང་སྐྱོན་རང་བརྗོད་ཡང་དག་པ་སྤེལ་དགོས་པ་དང་། རྩ་དོན་གྱི་གནད་དོན་ཐད་ལ་བསམ་བློའི་འཐབ་རྩོད་བྱེད་དགོས་པ། བདེན་དོན་མཐའ་འཁྱོངས་དང་། ནོར་འཁྲུལ་ཡོ་བསྲང་བྱེད་དགོས། གཅིག་སྡུད་ཡོད་ལ་དམངས་གཙོའང་ཡོད་པ་དང་། སྒྲིག་ཁྲིམས་ཡོད་ལ་རང་དབང་ཡང་ཡོད་པ། གཅིག་གྱུར་གྱི་འདོད་བློ་ཡོད་ལ་རང་བློ་བག་ཕེབས་དང་སྐྱེ་སྟོབས་ཀྱི་དཔལ་འབར་བ་ཞིག་ཀྱང་ཡོད་པའི་ཆབ་སྲིད་ཀྱི་རྣམ་པ་ཆགས་པར་འབད་བརྩོན་བྱེད་དགོས།

དྲུག་པ། ཏང་དོ་དམ་དང་ལེགས་སྐྱོང་ནན་པོ་བྱ་རྒྱུ་མཐའ་འཁྱོངས་བྱེད་དགོས། ཕྱོགས་ཡོངས་ནས་ཏང་ནན་པོ་སྐྱོང་བའི་ལས་ཀ་དེ་ནམ་ཡང་སྒྲུབ་བཞིན་པའི་ལམ་ན་ཡོད། ཏང་གི་རང་ངོས་གསར་བརྗེ་ནི་བྱེད་བཞིན་པའི་ལམ་ལ་ཡོད་པ། གནས་བབ་གསར་པའི་འོག ཏང་གི་མདུན་དུ་ལྷག་པའི་སྲིད་འཛིན་གྱི་ཉམས་སད་དང་། སྒྱུར་བཅོས་སྒོ་འབྱེད་ཀྱི་ཉམས་སད། ཚོང་རའི་དཔལ་འབྱོར་གྱི་ཉམས་སད། ཕྱི་ཕྱོགས་ཁོར་ཡུག་གི་ཉམས་སད་བཅས་ནི་ཡུན་རིང་གནས་རྒྱུ་དང་། རྙོག་འཛིང་ཆེ་ཞིང་ཛ་དྲག་ལྡན་པ་ཞིག་ཡིན་པ་དང་། བསམ་བློ་ལྷོད་གཡེང་གཏོང་བའི་ཉེན་ཁ་དང་། ནུས་པ་མི་འདང་བའི་ཉེན་ཁ། མང་ཚོགས་དང་ཁ་བྲལ་བའི་ཉེན་ཁ། སྒྱིད་ལུག་དང་རུལ་སུངས་སུ་འགྱུར་བའི་ཉེན་ཁ་བཅས་སྔར་ལས་རྣོ་ངར་ཆེ་བའི་ཐོག་ནས་ཏང་ཡོངས་ཀྱི་མདུན་དུ་ལྷས་ཡོད། ཚད་གཞི་ནན་པོ་དང་བྱེད་ཐབས་ནན་པོ་དག་ཏང་དོ་དམ་ལེགས་སྐྱོང་བྱ་རྒྱུའི་གོ་རིམ་ཡོངས་དང་ཕྱོགས་སོ་སོར་ཁྱབ་ཐུབ་པར་བྱེད་དགོས། ཁྲིམས་སྲོལ་ལྟར་ཏང་སྐྱོང་དང་རྩ་ལག་མཉམ་བཅོས་བྱ་རྒྱུ་མཐའ་འཁྱོངས་དང་། ཏང་ནང་གི་ཁྲིམས་ལུགས་མ་ལག་ཟམ་མི་ཆད་པར་འཐུས་ཚང་གཏོང་བ། སྒྲིག་ཁྲིམས་སྔོན་དུ་འཇོག་རྒྱུ་མཐའ་འཁྱོངས། རྩ་འཛུགས་ཀྱི་རང་བཞིན་དང་སྒྲིག་ཁྲིམས་ཀྱི་རང་བཞིན་ལ་ཤུགས་སྣོན་བཅས་བྱས་ཏེ་ཏང་གི་སྒྲིག་ཁྲིམས་ཀྱི་མདུན་དུ་ཚང་མ་འདྲ་མཉམ་ཡོང་བ་བྱེད་དགོས། ཁྱོན་ཡོངས་ནས་ཏང་ནན་པོས་སྐྱོང་བའི་བྱེད་པོའི་འགན་འཁྲི་དང་ལྟ་སྐུལ་འགན་འཁྲི་ཇེ་ཆེར་གཏོང་བ་དང་། ཏང་གི་འགོ་ཁྲིད་ལས་ཁུངས་དང་ཏང་ཡོན་འགོ་ཁྲིད་ལས་བྱེད་པ་སྤྱི་དང་། ཁྱད་པར་དུ་འགོ་ཁྲིད་ལས་བྱེད་པ་གཙོ་བོ་རྣམས་ལ་ལྟ་སྐུལ་བྱེད་ཤུགས་ཆེ་རུ་བཏང་ནས་ཏང་ནང་གི་ལྟ་སྐུལ་མ་ལག་འཐུས་སྒོ་ཇེ་ཚང་དུ་གཏོང་དགོས། ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་སུ་འགྱུར་བར་ངོ་རྒོལ་བྱེད་པའི་འཐབ་རྩོད་གཏིང་ཟབ་ཏུ་བཏང་སྟེ་བཟོད་སྒོམ་གཏན་ནས་མི་རུང་བའི་རྣམ་འགྱུར་ཐོག་ནས་རུལ་སུངས་སུ་འགྱུར་རིགས་ལ་ཉེས་ཆད་བཅད་ནས། རུལ་སུངས་བྱེད་མི་ཕོད་པ་དང་། རུལ་སུངས་བྱེད་མི་རུང་བ། རུལ་སུངས་བྱེད་མི་འདོད་པ་བཅས་གཞི་གཅིག་ཏུ་སྐུལ་འདེད་གཏོང་དགོས།

ཀྲུང་གོ་གུང་ཁྲན་ཏང་གི་འགོ་ཁྲིད་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆེས་རྩ་བར་གྱུར་པའི་ཁྱད་ཆོས་ཡིན་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་དགེ་མཚན་ཆེ་ཤོས་ཡིན།ཆེས་མཐོ་བའི་ཆབ་སྲིད་ཀྱི་འགོ་ཁྲིད་སྟོབས་ཤུགས་ཡིན།  ཏང་ནི་ཏང་སྲིད་དམག་དམངས་སློབ་དང་ཕྱོགས་བཞི་མཚམས་བརྒྱད་ལ་འགོ་ཁྲིད་བྱེད་མཁན་ཡིན། ཏང་གིས་སྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་གྱི་བླང་བྱ་དང་བསྟུན་ཏེ་ཚན་རིག་དང་མཐུན་པར་སྲིད་འཛིན་དང་། དམངས་གཙོའི་སྲིད་འཛིན། ཁྲིམས་ལྟར་སྲིད་འཛིན་བཅས་མཐའ་འཁྱོངས་བྱས་ནས་ཏང་གི་འགོ་ཁྲིད་ལ་ཤུགས་སྣོན་རྒྱག་པ་དང་ལེགས་བཅོས་བྱེད་དགོས། ཏང་གིས་ངེས་པར་དུ་ཁྱོན་ཡོངས་ཀྱི་གནས་ཚུལ་གཅིག་འདོམས་དང་ཕྱོགས་གང་ཅིའི་ཐད་མཐུན་སྦྱོར་ཡོང་བ་བྱེད་པའི་རྩ་དོན་གཞིར་བཟུང་སྟེ་རིམ་པ་གཅིག་མཚུངས་ཀྱི་རྩ་འཛུགས་སྣ་ཚོགས་ཁྲོད་དུ་འགོ་ཁྲིད་ཀྱི་སྲོག་ཤིང་ནུས་པ་འདོན་སྤེལ་བྱེད་དགོས། ཏང་གིས་ངེས་པར་དུ་བློ་རྩེ་གཅིག་སྒྲིམ་གྱིས་དཔལ་འབྱོར་འཛུགས་སྐྲུན་བྱེད་པའི་འགོ་ཁྲིད་དེ་ཕྱོགས་གང་ཅིའི་ཐད་ཀྱི་སྟོབས་ཤུགས་སྒྲིག་འཛུགས་དང་མཐུན་སྦྱོར་བྱས་ནས་སེམས་ཤུགས་གཅིག་སྒྲིལ་གྱིས་དཔལ་འབྱོར་འཛུགས་སྐྲུན་ལ་དམིགས་ནས་ལས་དོན་སྒྲུབ་པ་དང་། དཔལ་འབྱོར་དང་སྤྱི་ཚོགས་སྒོ་ཀུན་ནས་འཕེལ་རྒྱས་ཡོང་བར་སྐུལ་སྤེལ་གཏོང་དགོས། ཏང་གིས་ངེས་པར་དུ་དམངས་གཙོ་ལྡན་ལ་ཚན་རིག་དང་ཡང་མཐུན་པའི་ཐབས་ཇུས་ལག་ལེན་བསྟར་བ་དང་། ཡང་དག་པའི་ལམ་ཕྱོགས་དང་། བྱེད་ཕྱོགས། སྲིད་ཇུས་བཅས་གཏན་འབེབས་དང་ལག་བསྟར་བྱས་ནས་ཏང་གི་རྩ་འཛུགས་ལས་ཀ་དང་དྲིལ་བསྒྲགས་སློབ་གསོའི་ལས་ཀ་ལེགས་པར་བྱེད་དགོས་པ་དང་། ཏང་ཡོན་ཡོངས་ཀྱི་གདོང་ལེན་དང་དཔེ་བཟང་གི་ནུས་པ་འདོན་སྤེལ་བྱེད་དགོས། ཏང་གིས་ངེས་པར་དུ་རྩ་ཁྲིམས་དང་བཅའ་ཁྲིམས་ཀྱི་ཁྱབ་ཁོངས་སུ་བྱེད་སྒོ་སྤེལ་དགོས། ཏང་གིས་ངེས་པར་དུ་རྒྱལ་ཁབ་ཀྱི་ཁྲིམས་འཛུགས་ལས་ཁུངས་དང་། ཁྲིམས་འཛིན་་ལས་ཁུངས། སྲིད་འཛིན་ལས་ཁུངས། ལྟ་ཞིབ་ལས་ཁུངས་བཅས་དང་། དཔལ་འབྱོར་དང་རིག་གནས་རྩ་འཛུགས། མི་དམངས་ཚོགས་པ་བཅས་ཀྱིས་ཧུར་བརྩོན་རང་འགུལ་དང་། རང་ཚུགས་འགན་འཁུར། མཐུན་སྦྱོར་གཅིག་གྱུར་བཅས་ཀྱི་ཐོག་ནས་ལས་ཀ་བྱེད་ཐུབ་པའི་འགན་ལེན་བྱེད་དགོས། ཏང་གིས་ངེས་པར་དུ་བཟོ་ཚོགས་དང་། གུང་ཁྲན་རིང་ལུགས་ཀྱི་གཞོན་ནུ་ཚོགས་པ། བུད་མེད་མཉམ་འབྲེལ་ལྷན་ཚོགས་སོགས་མང་ཚོགས་ཚོགས་པའི་རྩ་འཛུགས་ལ་འགོ་ཁྲིད་བྱེད་ཤུགས་ཆེ་རུ་བཏང་ནས་དེ་ཚོས་ཆབ་སྲིད་ཀྱི་རང་བཞིན་དང་། སྔོན་ཐོན་གྱི་རང་བཞིན། མང་ཚོགས་ཀྱི་རང་བཞིན་བཅས་རྒྱུན་འཁྱོངས་དང་རྒྱུན་འཁྱོངས་བྱེད་ཤུགས་ཆེ་རུ་བཏང་ནས་ནུས་པ་འདོན་སྤེལ་གང་ལེགས་བྱེད་དགོས། ཏང་གིས་ངེས་པར་དུ་དུས་བབ་གོང་དུ་འཕེལ་ཚུལ་དང་གནས་ཚུལ་འགྱུར་ལྡོག་བྱུང་ཚུལ་དང་བསྟུན་ནས་འགོ་ཁྲིད་སྒྲིག་སྲོལ་འཐུས་ཚང་དུ་གཏོང་བ་དང་། འགོ་ཁྲིད་བྱེད་སྟངས་ལེགས་བཅོས། སྲིད་འཛིན་བྱེད་ནུས་ཆེ་རུ་གཏོང་བ་བཅས་བྱེད་དགོས། གུང་ཁྲན་ཏང་ཡོན་གྱིས་ངེས་པར་དུ་ཏང་ཕྱིའི་མང་ཚོགས་དང་མཉམ་ལས་དམ་ཟབ་བྱས་ནས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འཛུགས་སྐྲུན་བྱེད་ཆེད་ཐུན་མོང་ཐོག་འབད་བརྩོན་བྱེད་དགོས།

ལེའུ་དང་པོ། ཏང་ཡོན།

དོན་ཚན་དང་པོ། ལོ་འཁོར་མོ་བཅོ་བརྒྱད་ལོན་པའི་ཀྲུང་གོའི་བཟོ་པ་དང་། ཞིང་པ། དམག་མི། ཤེས་ཡོན་ཅན། སྤྱི་ཚོགས་ཀྱི་རིམ་གྲས་གཞན་དག་ཁྲོད་ཀྱི་སྔོན་ཐོན་པ་བཅས་ཀྱིས་ཏང་གི་རྩ་འཛིན་དང་སྒྲིག་ཡིག་ཁས་ལེན་ཞིང་། ཏང་གི་རྩ་འཛུགས་ཤིག་གི་ནང་ལ་ཞུགས་པ་དང་འབྲེལ་དེའི་ནང་དུ་ཧུར་བརྩོན་གྱིས་ལས་ཀ་བྱེད་པ་དང་། ཏང་གི་གྲོས་ཆོད་ལག་ལེན་བྱེད་པ། ཏང་དངུལ་དུས་ཐོག་ཏུ་འབུལ་བ་བཅས་བྱེད་འདོད་ཡོད་མཁན་ཞིག་ཡིན་ཕྱིན། ཀྲུང་གོའི་གུང་ཁྲན་ཏང་གི་ནང་ཞུགས་རྒྱུའི་རེ་འདུན་ཞུ་ཡིག་ཕུལ་ཆོག

དོན་ཚན་གཉིས་པ། ཀྲུང་གོའི་གུང་ཁྲན་ཏང་གི་ཏང་ཡོན་ནི་གུང་ཁྲན་རིང་ལུགས་ཀྱི་གོ་རྟོགས་ལྡན་པའི་ཀྲུང་གོའི་བཟོ་པའི་གྲལ་རིམ་གྱི་གདོང་ལེན་འཐབ་འཛིང་པ་ཡིན།

ཀྲུང་གོའི་གུང་ཁྲན་ཏང་གི་ཏང་ཡོན་གྱིས་ངེས་པར་དུ་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བ་དང་། རང་ཉིད་ཀྱི་ཡོད་དགུ་ཕངས་སེམས་མེད་པར་བློས་བཏང་ནས་གུང་ཁྲན་རིང་ལུགས་མངོན་འགྱུར་ཡོང་བའི་ཆེད་དུ་ཚེ་གང་འབད་བརྩོན་བྱེད་དགོས།

ཀྲུང་གོའི་གུང་ཁྲན་ཏང་གི་ཏང་ཡོན་ནི་དུས་ནམ་ཡང་ངལ་རྩོལ་མི་དམངས་ཀྱི་ཁོངས་མི་དཀྱུས་མ་ཞིག་ཡིན། བཅའ་ཁྲིམས་དང་སྲིད་ཇུས་ཀྱི་གཏན་འབེབས་ཁོངས་སུ་ཚུད་པའི་སྒེར་གྱི་ཁེ་ཕན་དང་ལས་ཀའི་འགན་དབང་ཕུད། གུང་ཁྲན་ཏང་ཡོན་སུ་ཞིག་གིས་ཀྱང་སྒེར་གྱི་ཁེ་ཕན་དང་དམིགས་བསལ་གྱི་དབང་ཆ་གང་ཡང་ཧམ་གཉེར་བྱས་མི་ཆོག

དོན་ཚན་གསུམ་པ། ཏང་ཡོན་གྱིས་གཤམ་གསལ་འོས་འགན་རྣམས་ངེས་པར་དུ་སྒྲུབ་དགོས་པ་སྟེ།

(གཅིག) མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་དགོངས་པ། ཏེང་ཞའོ་ཕིན་གྱི་རིགས་པའི་གཞུང་ལུགས། "མཚོན་བྱེད་གསུམ"གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་བཅས་ནན་ཏན་གྱི་སྒོ་ནས་སློབ་སྦྱོང་དང་། ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས། གྲོས་ཆོད་བཅས་སློབ་སྦྱོང་། ཏང་གི་གཞི་རྩའི་ཤེས་བྱ་དང་ཏང་གི་ལོ་རྒྱུས་སློབ་སྦྱོང་། ཚན་རིག་དང་། རིག་གནས། བཅའ་ཁྲིམས། ལས་སྒོའི་ཤེས་བྱ་བཅས་སློབ་སྦྱོང་བྱས་ནས་མི་དམངས་ལ་ཞབས་འདེགས་ཞུ་བའི་ནུས་པ་ཆེ་རུ་གཏོང་གང་ཐུབ་བྱེད་དགོས།

(གཉིས) "འདུ་ཤེས་བཞི་"ཟབ་གཏོང་དང་"གདེང་ཚོད་བཞི་"བརྟན་དུ་གཏོང་བ། "སྲུང་སྐྱོང་གཉིས་"ཐུབ་པ་བཅས་བྱེད་དགོས། ཏང་གི་གཞི་རྩའི་ལམ་ཕྱོགས་དང་། བྱེད་ཕྱོགས་སྲིད་ཇུས་ཁག་ལག་ལེན་མཐར་ཕྱིན་བསྟར་ནས་སྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་དུ་འགྱུར་བའི་འཛུགས་སྐྲུན་ལ་སྣེ་ཁྲིད་ཀྱིས་ཞུགས་དགོས་པ་དང་། མང་ཚོགས་ལ་སྐུལ་ཁྲིད་བྱས་ནས་དཔལ་འབྱོར་གོང་འཕེལ་དང་སྤྱི་ཚོགས་ཡར་ཐོན་ཡོང་ཕྱིར་དཀའ་སྤྱད་འབད་བརྩོན་བྱས་ནས་ཐོན་སྐྱེད་དང་། ལས་ཀ སློབ་སྦྱོང་། སྤྱི་ཚོགས་ཀྱི་འཚོ་བ་བཅས་ཀྱི་ནང་དུ་གདོང་ལེན་དང་དཔེ་བཟང་གི་ནུས་པ་འདོན་དགོས།

(གསུམ) ཏང་དང་མི་དམངས་ཀྱི་ཁེ་ཕན་དེ་ཁེ་ཕན་གང་ལས་ཀྱང་ལྷག་པར་འཛིན་རྒྱུ་མཐའ་འཁྱོངས་བྱས་ནས་སྒེར་གྱི་ཁེ་ཕན་གྱིས་ཏང་དང་མི་དམངས་ཀྱི་ཁེ་ཕན་ལ་བསྟུན་དགོས་པ་དང་། དཀའ་བ་སྔོན་ལ་སྤྱོད་པ་དང་བདེ་བ་རྗེས་སུ་མྱོང་དགོས་ཤིང་། སྒེར་དོན་སྤངས་ནས་གཞུང་དོན་སྒྲུབ་སྟེ་བྱས་རྗེས་གང་མང་འཇོག་དགོས།

(བཞི) ཏང་གི་སྒྲིག་ཁྲིམས་ལ་རང་རྟོགས་ངང་བརྩི་སྲུང་ཞུ་བར། དང་ཐོག་ཏང་གི་ཆབ་སྲིད་ཀྱི་སྒྲིག་ཁྲིམས་དང་སྒྲིག་ལམ་ལ་བརྩི་སྲུང་ཞུ་བ་དང་། རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་དཔེ་སྟོན་གྱིས་བརྩི་སྲུང་བྱ་དགོས་པ། ཏང་དང་རྒྱལ་ཁབ་ཀྱི་གསང་དོན་དམ་སྲུང་དང་། ཏང་གི་ཆོད་དོན་ལག་བསྟར། རྩ་འཛུགས་ཀྱི་བསྐོ་མངག་དང་ལེན། ཧུར་བརྩོན་ཆེན་པོས་ཏང་གི་ལས་འགན་ལེགས་འགྲུབ་བཅས་བྱེད་དགོས།

(ལྔ) ཏང་གི་མཐུན་སྒྲིལ་དང་གཅིག་གྱུར་སྲུང་སྐྱོང་བྱེད་པར། ཏང་ལ་ལྷག་བསམ་རྣམ་དག་དང་ཁ་ཞེ་གཉིས་མེད་བྱེད་པ་དང་། སེམས་ཐག་གཙང་བཅད་ཀྱིས་ཕྱོགས་ཁག་གི་རྩ་འཛུགས་དང་ཚོགས་པ་ཆུང་གྲས་ཀྱི་བྱ་སྤྱོད་མཐའ་དག་ལ་ངོ་རྒོལ་དང་། མངོན་བརྩི་ལྐོག་འགལ་གྱི་མགོ་གཉིས་མའི་སྤྱོད་ཚུལ་དང་ལྐོག་གཡོ་ངན་ཇུས་མཐའ་དག་ལ་ངོ་རྒོལ་བྱེད་དགོས།

(དྲུག) སྐྱོན་བརྗོད་དང་རང་སྐྱོན་རང་བརྗོད་ཏན་ཏིག་བྱས་ནས་ཏང་གི་རྩ་དོན་དང་འགལ་བའི་གཏམ་སྤྱོད་དང་ལས་ཀའི་ནང་གི་སྐྱོན་དང་ནོར་འཁྲུལ་ཐེར་འདོན་དང་ཡོ་བསྲང་བྱེད་ཕོད་པ་དང་། སྒྱིད་ལུག་དང་རུལ་སུངས་སུ་འགྱུར་བའི་སྣང་ཚུལ་ལ་འཐབ་རྩོད་མཐའ་གཅིག་ཏུ་བྱེད་དགོས།

(བདུན) མང་ཚོགས་དང་འབྲེལ་འདྲིས་དམ་ཟབ་བྱས་ནས་མང་ཚོགས་ལ་ཏང་གི་འདོད་ཚུལ་དྲིལ་བསྒྲགས་དང་། དོན་དག་བྱུང་ཚེ་མང་ཚོགས་དང་གོ་བསྡུར་བྱས་ཐོག་མང་ཚོགས་ཀྱི་བསམ་འཆར་དང་རེ་འདུན་དུས་ཐོག་ཏུ་ཏང་ལ་སྙན་སེང་ཞུ་བ། མང་ཚོགས་ཀྱི་ལུགས་མཐུན་ཁེ་ཕན་སྲུང་སྐྱོང་བཅས་བྱེད་དགོས།

(བརྒྱད) སྤྱི་ཚོགས་རིང་ལུགས་ཀྱི་གོམས་སྲོལ་གསར་པ་དར་སྤེལ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དང་སྤྱི་ཚོགས་རིང་ལུགས་ཀྱི་གཟི་ཁྲེལ་ལྟ་བ་སྣེ་ཁྲིད་ནས་ལག་བསྟར། གུང་ཁྲན་རིང་ལུགས་ཀྱི་ཀུན་སྤྱོད་དར་སྤེལ། ཀྲུང་ཧྭ་མི་རིགས་ཀྱི་སྲོལ་རྒྱུན་གྱི་སྤྱོད་བཟང་དར་སྤེལ་བཅས་བྱས་ནས་རྒྱལ་ཁབ་དང་མི་དམངས་ཀྱི་ཁེ་ཕན་སྲུང་སྐྱོང་བྱེད་ཆེད་དཀའ་ངལ་དང་ཉེན་ཁ་གང་ཞིག་ལ་ཐུག་ཚེ་དཔའ་ངར་ཆེར་བསྐྱེད་ཀྱིས་མདུན་དུ་ཐོན་ཏེ་དཔའ་མཛངས་རྟུལ་ཕོད་ཀྱིས་འཐབ་རྩོད་བྱེད་ཅིང་རང་སྲོག་བློས་གཏོང་བར་མི་སྐྲག་པ་བྱེད་དགོས།

དོན་ཚན་བཞི་པ། ཏང་ཡོན་ལ་གཤམ་གསལ་ཁེ་དབང་ལོངས་སུ་སྤྱོད་རྒྱུ་ཡོད་དེ།

(གཅིག) ཏང་གི་འབྲེལ་ཡོད་གྲོས་ཚོགས་ནང་ཞུགས་པ་དང་། ཏང་གི་འབྲེལ་ཡོད་ཡིག་ཆ་ལྟ་བ། ཏང་གི་སློབ་གསོ་དང་གསོ་སྐྱོང་སྦྱོང་བརྡར་དང་ལེན་བཅས་བྱས་ཆོག

(གཉིས) ཏང་གི་གྲོས་ཚོགས་ཐོག་དང་ཏང་གི་ཚགས་པར་དང་དུས་དེབ་ཐོག་ཏུ་ཏང་གི་སྲིད་ཇུས་ཀྱི་གནད་དོན་སྐོར་གྲོས་བསྡུར་བྱེད་པར་ཞུགས་ཆོག

(གསུམ) ཏང་གི་ལས་ཀར་བསམ་འཆར་དང་གྲོས་གཞི་བཏོན་ཆོག

(བཞི) ཏང་གི་གྲོས་ཚོགས་ཐོག་ཏང་གི་རྩ་འཛུགས་གང་ཞིག་དང་ཏང་ཡོན་སུ་ཞིག་ལའང་གཞི་འཛིན་ས་ཡོད་པའི་ངང་ནས་སྐྱོན་བརྗོད་བྱས་ཆོག་པ་དང་། ཏང་ལ་འགན་འཁུར་བའི་སྒོ་ནས་ཏང་གི་རྩ་འཛུགས་གང་ཞིག་དང་ཏང་ཡོན་སུ་ཞིག་གི་ཁྲིམས་འགལ་ལུགས་དཀྲུག་གི་དོན་དངོས་ཐེར་འདོན་བྱས་ཆོག་པ་དང་འབྲེལ། ཁྲིམས་འགལ་ལུགས་དཀྲུག་བྱེད་མཁན་ཏང་ཡོན་ལ་ཆད་པ་གཅོད་དགོས་པའི་རེ་བ་བཏོན་ཆོག་པ་དང་། ལས་གོ་མི་འཕེར་བའི་ལས་བྱེད་པའི་གོ་གནས་འབེབས་པའམ་བརྗེ་འཐེན་བྱ་དགོས་པའི་རེ་བ་བཏོན་ཆོག

(ལྔ) བརྡས་ཐག་གཅོད་པའི་དབང་ཆ་དང་འདེམས་བྱེད་དབང་ཆ་སྤྱད་ཆོག་ལ་གདམ་བྱའི་དབང་ཆའང་ཡོད།

(དྲུག) ཏང་གི་རྩ་འཛུགས་ཀྱིས་ཏང་ཡོན་སུ་ཞིག་ལ་ཏང་གི་སྒྲིག་ཁྲིམས་ཐོག་ནས་ཆད་པ་གཅོད་རྒྱུའི་གྲོས་ཐག་གཅོད་པའམ་སྐྱོན་ཡོན་གསལ་འབྱེད་བྱེད་སྐབས་ཏང་ཡོན་དེ་ཉིད་ལ་གྲོས་ཚོགས་ནང་ཞུགས་པ་དང་དག་སེལ་བྱེད་པའི་དབང་ཆ་ཡོད་པ་དང་། ཏང་ཡོན་གཞན་དག་གིས་དེའི་དཔང་པོ་བྱས་ཆོག་པ་དང་དེའི་དོན་དུ་དག་སེལ་བྱས་ཆོག

(བདུན) ཏང་གི་གྲོས་ཆོད་དང་སྲིད་ཇུས་ལ་བསམ་འཆར་མི་མཐུན་པ་ཡོད་ན་སེམས་ཐག་གཙང་བཅད་ཀྱིས་ལག་བསྟར་བྱེད་པའི་སྔོན་འགྲོའི་ཆ་རྐྱེན་འོག རང་ཉིད་ཀྱི་བསམ་འཆར་སོར་ཉར་བྱ་རྒྱུའི་གསལ་བསྒྲགས་བྱས་ཆོག་པ་མ་ཟད། ཏང་གི་གོང་རིམ་རྩ་འཛུགས་ནས་ཀྲུང་དབྱང་བར་ལ་རང་ཉིད་ཀྱི་བསམ་འཆར་བཏོན་ཆོག

(བརྒྱད) ཏང་གི་གོང་རིམ་རྩ་འཛུགས་ནས་ཀྲུང་དབྱང་བར་ལ་རེ་ཞུ་དང་། ཞུ་གཏུག གྱོད་གཏུག་བཅས་བྱས་ཆོག་པ་མ་ཟད། འབྲེལ་ཡོད་རྩ་འཛུགས་ལ་འགན་ཁུར་བའི་སྒོ་ནས་དྲིས་ལན་འདེབས་དགོས་པའི་རེ་འདུན་ཡང་བཏོན་ཆོག

ཏང་གི་རྩ་འཛུགས་རིམ་པ་གང་རུང་ཞིག་ནས་ཀྲུང་དབྱང་བར་ཚང་མར་ཏང་ཡོན་གྱི་གོང་གསལ་ཁེ་དབང་དག་འཕྲོག་པའི་དབང་ཆ་མེད།

དོན་ཚན་ལྔ་པ། ཏང་ཡོན་བསྡུ་ལེན་བྱེད་སྐབས་ངེས་པར་དུ་ཆབ་སྲིད་ཀྱི་ཚད་གཞི་དེ་ཨང་དང་པོར་བཞག་རྗེས་ཏང་གི་ཀྲི་པུའུ་བརྒྱུད་དེ་མི་རེ་ཟུང་བསྡུ་ལེན་བྱེད་པའི་རྩ་དོན་མཐའ་འཁྱོངས་བྱེད་དགོས།

ཏང་ནང་དུ་ཞུགས་རྒྱུའི་རེ་འདུན་ཞུ་མཁན་རྣམས་ཀྱིས་ཏང་ནང་དུ་ཞུགས་རྒྱུའི་རེ་འདུན་ཞུ་ཡིག་གི་རེའུ་མིག་འགོད་དགོས་པ་དང་འབྲེལ། ངོ་སྤྲོད་བྱེད་མཁན་དངོས་གཞིའི་ཏང་ཡོན་གཉིས་དགོས་ཤིང་། ཀྲི་པུའུ་ཡི་ཚོགས་ཆེན་ཐོག་གྲོས་འཆམ་བྱུང་བ་དང་གོང་རིམ་ཏང་གི་རྩ་འཛུགས་ཀྱི་ཆོག་མཆན་ཐོབ་པ་མ་ཟད། གྲ་སྒྲིག་ཡུན་ཚད་ནང་རྟོག་ཞིབ་བྱས་པ་བརྒྱུད་རྗེས། གཞི་ནས་དངོས་གཞིའི་ཏང་ཡོན་བྱས་ཆོག

ངོ་སྤྲོད་བྱེད་མཁན་གྱིས་རེ་འདུན་ཞུ་མཁན་གྱི་བསམ་བློ་དང་། གཤིས་རྒྱུད། ལོ་རྒྱུས། ལས་ཀ་བྱེད་ཚུལ་བཅས་ཆ་རྒྱུས་ནན་ཏན་ལོན་པར་བྱ་དགོས་པ་དང་། རེ་འདུན་ཞུ་མཁན་ལ་ཏང་གི་རྩ་འཛིན་དང་ཏང་གི་སྒྲིག་ཡིག་འགྲེལ་བཤད་རྒྱག་དགོས་ཤིང་། ཏང་ཡོན་གྱི་ཆ་རྐྱེན་དང་། འོས་འགན། ཁེ་དབང་བཅས་གསལ་བཤད་བྱ་དགོས་པ་མ་ཟད། ཏང་གི་རྩ་འཛུགས་ལ་འགན་འཁུར་བའི་སྒོ་ནས་སྙན་སེང་ཡང་ཞུ་དགོས།

ཏང་གི་ཀྲི་པུའུ་ཨུ་ཡོན་ལྷན་ཁང་གིས་ཏང་ཕྱི་ནང་གི་འབྲེལ་ཡོད་མང་ཚོགས་ཀྱི་ས་ནས་ཏང་ནང་དུ་ཞུགས་རྒྱུའི་རེ་འདུན་ཞུ་མཁན་དེར་བསམ་འཆར་གང་ཡོད་བསྡུ་ལེན་བྱ་རྒྱུར་ཡིད་འཇོག་བྱ་དགོས་པ་དང་ཞིབ་བཤེར་ནན་ཏན་བྱས་ཐོག ཚད་ལོན་འདུག་སྙམ་ན་ཀྲི་པུའུ་ཡི་ཚོགས་ཆེན་ལ་གྲོས་བསྡུར་བྱ་རྒྱུར་འབུལ་དགོས།

གོང་རིམ་ཏང་གི་རྩ་འཛུགས་ཀྱིས་ཏང་ནང་དུ་ཞུགས་རྒྱུའི་རེ་འདུན་ཞུ་མཁན་དེ་ཏང་ནང་ཞུགས་སུ་འཇུག་པའི་ཆོག་མཆན་མ་བཀོད་གོང་ལ་ཁོང་དང་གླེང་མོལ་བྱེད་མི་མངགས་ནས་ཆ་རྒྱུས་སྔར་ལས་ལྷག་པར་ལོན་པ་བྱེད་པ་དང་སྦྲགས། ཁོང་ལ་རོགས་རམ་བྱས་ནས་ཏང་ལ་ངོས་འཛིན་བྱེད་པའི་ཆུ་ཚད་མཐོ་རུ་གཏོང་དགོས།

དམིགས་བསལ་གྱི་གནས་ཚུལ་བྱུང་ན་ཏང་གི་ཀྲུང་དབྱང་དང་། ཞིང་ཆེན། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཀྱི་ཨུ་ཡོན་ལྷན་ཁང་གིས་ཏང་ཡོན་ཐད་ཀར་བསྡུ་ལེན་བྱས་ཆོག

དོན་ཚན་དྲུག་པ། གྲ་སྒྲིག་ཏང་ཡོན་གྱིས་ངེས་པར་དུ་ཏང་གི་དར་ཆའི་མདུན་དུ་ཏང་ནང་དུ་ཞུགས་པའི་དམ་བཅའ་འཇོག་དགོས། དམ་བཅའི་ཚིག་གཤམ་གསལ་ཏེ། ངས་རང་མོས་ཐོག་ཀྲུང་གོའི་གུང་ཁྲན་ཏང་ནང་དུ་ཞུགས་ཏེ་ཏང་གི་རྩ་འཛིན་ལ་བརྩི་བཀུར་དང་། ཏང་གི་སྒྲིག་ཡིག་བརྩི་སྲུང་། ཏང་ཡོན་གྱི་འོས་འགན་ལེགས་འགྲུབ། ཏང་གི་ཆོད་དོན་ལག་བསྟར། ཏང་གི་སྒྲིག་ཁྲིམས་ནན་སྲུང་། ཏང་གི་གསང་དོན་དམ་སྲུང་། ཏང་ལ་བློ་དཀར་ཟོལ་མེད། ལས་སྒྲུབ་ཧུར་ཐག་བཅས་བྱས་ནས་གུང་ཁྲན་རིང་ལུགས་ཀྱི་དོན་དུ་ཚེ་གང་འབད་འཐབ་དང་། དུས་དང་རྣམ་པ་ཀུན་ཏུ་ཏང་དང་མི་དམངས་ཀྱི་དོན་དུ་རང་ཉིད་ཀྱི་ཡོད་རྒུ་བློས་གཏོང་རྒྱུའི་གྲ་སྒྲིག་བྱེད་ཅིང་། དུས་ནམ་ཡང་ཏང་ལ་རྒྱབ་གཏོད་མི་བྱེད་པ་དེ་ཡིན།

དོན་ཚན་བདུན་པ། གྲ་སྒྲིག་ཏང་ཡོན་གྱི་གྲ་སྒྲིག་ཡུན་ཚད་ལོ་གཅིག་ཡིན། ཏང་གི་རྩ་འཛུགས་ཀྱིས་གྲ་སྒྲིག་ཏང་ཡོན་ལ་སློབ་གསོ་དང་རྟོག་ཞིབ་ནན་ཏན་བྱེད་དགོས།

གྲ་སྒྲིག་ཏང་ཡོན་གྱི་འོས་འགན་ནི་དངོས་གཞིའི་ཏང་ཡོན་དང་གཅིག་མཚུངས་ཡིན། གྲ་སྒྲིག་ཏང་ཡོན་གྱི་ཁེ་དབང་ཐད་ལ་བརྡས་ཐག་གཅོད་པའི་དབང་ཆ་དང་། འདེམས་བྱེད་དབང་ཆ། གདམ་བྱའི་དབང་ཆ་བཅས་མེད་པ་ཕུད། དེ་བྱིངས་དབང་ཆ་རྣམས་དངོས་གཞིའི་ཏང་ཡོན་དང་གཅིག་མཚུངས་ཡིན།

གྲ་སྒྲིག་ཏང་ཡོན་གྱི་གྲ་སྒྲིག་ཡུན་ཚད་འཐིམས་མཚམས་ཏང་གི་ཀྲི་པུའུ་ཡིས་མི་དེ་དངོས་གཞིའི་ཏང་ཡོན་དུ་བསྒྱུར་ཆོག་མིན་དུས་ཐོག་ཏུ་གྲོས་བསྡུར་བྱེད་དགོས། ཏང་ཡོན་གྱི་འོས་འགན་ནན་ཏན་བསྒྲུབས་པ་དང་། ཏང་ཡོན་གྱི་ཆ་རྐྱེན་འཛོམས་པ་རྣམས་དུས་ཐོག་ཏུ་དངོས་གཞིའི་ཏང་ཡོན་དུ་བསྒྱུར་དགོས་པ་དང་། ད་དུང་མུ་མཐུད་དེ་རྟོག་ཞིབ་དང་སློབ་གསོ་གཏོང་དགོས་པ་འདུག་ན་དེའི་གྲ་སྒྲིག་གི་ཡུན་ཚད་བསྲིངས་ཆོག་ཀྱང་ལོ་གཅིག་ལས་བརྒལ་མི་ཆོག ཏང་ཡོན་གྱི་འོས་འགན་མི་བསྒྲུབ་པ་དང་ཏང་ཡོན་གྱི་ཆ་རྐྱེན་འཛོམས་མེད་ན། དེའི་གྲ་སྒྲིག་ཏང་ཡོན་གྱི་ཐོབ་ཐང་མེད་པ་བཟོ་དགོས། གྲ་སྒྲིག་ཏང་ཡོན་ནས་དངོས་གཞིའི་ཏང་ཡོན་དུ་བསྒྱུར་རྒྱུ་དང་། ཡང་ན་གྲ་སྒྲིག་གི་ཡུན་ཚད་བསྲིང་རྒྱུ། ཡང་ན་གྲ་སྒྲིག་ཏང་ཡོན་གྱི་ཐོབ་ཐང་མེད་པ་བཟོ་རྒྱུ་བཅས་གང་བྱས་རུང་། ཚང་མ་ཀྲི་པུའུ་ཡི་ཚོགས་ཆེན་ཐོག་གྲོས་བསྡུར་བྱས་ནས་གྲོས་འཆམ་བྱེད་དགོས་པ་དང་གོང་རིམ་ཏང་གི་རྩ་འཛུགས་ཀྱི་ཆོག་མཆན་འཐོབ་དགོས།

གྲ་སྒྲིག་ཏང་ཡོན་གྱི་གྲ་སྒྲིག་ཡུན་ཚད་དེ་ཀྲི་པུའུ་ཡི་ཚོགས་ཆེན་ཐོག་མི་དེ་གྲ་སྒྲིག་ཏང་ཡོན་དུ་བསྡུ་ལེན་བྱེད་པའི་གྲོས་འཆམ་བྱུང་ཉིན་ནས་བརྩི་དགོས་པ་དང་། ཏང་ཡོན་གྱི་ཏང་ལོ་དེ་གྲ་སྒྲིག་ཡུན་ཚད་འཐིམས་ནས་དངོས་གཞིའི་ཏང་ཡོན་དུ་བསྒྱུར་བའི་ཉིན་ནས་བརྩི་དགོས།

དོན་ཚན་བརྒྱད་པ། ཏང་ཡོན་སུ་ཞིག་ཡིན་རུང་གོ་གནས་མཐོ་དམན་གང་ཡིན་ལ་མ་བལྟོས་པར་ངེས་པར་དུ་ཏང་གི་ཀྲི་པུའུ་དང་། ཚོ་ཆུང་ངམ་ཡང་ན་རྩ་འཛུགས་ངེས་ཅན་ཞིག་གི་ནང་བཅུག་སྟེ་ཚང་མ་ཏང་གི་རྩ་འཛུགས་ཀྱི་འཚོ་བའི་ནང་ཞུགས་དགོས་པ་དང་། ཏང་ཕྱི་ནང་གི་མང་ཚོགས་རྣམས་ཀྱི་ལྟ་སྐུལ་དང་ལེན་བྱེད་དགོས། ཏང་ཡོན་འགོ་ཁྲིད་ལས་བྱེད་པ་ཚོ་ད་དུང་ཏང་ཨུད་དང་ཏང་ཙུའུ་ཡི་དམངས་གཙོའི་འཚོ་བའི་ཚོགས་འདུར་ངེས་པར་དུ་ཞུགས་དགོས། ཏང་གི་རྩ་འཛུགས་ཀྱི་འཚོ་བའི་ནང་མི་ཞུགས་པ་དང་། ཏང་ཕྱི་ནང་གི་མང་ཚོགས་ཀྱི་ལྟ་སྐུལ་དང་ལེན་མི་བྱེད་པའི་ཏང་ཡོན་དམིགས་བསལ་ཅན་གཏན་ནས་ཡོད་མི་ཆོག

དོན་ཚན་དགུ་པ། ཏང་ཡོན་ལ་རང་ཉིད་ཏང་གི་སྐྱིད་སྡུག་ནས་ཕྱིར་འཐེན་བྱེད་པའི་རང་དབང་ཡོད། ཏང་ཡོན་གྱིས་རང་ཉིད་ཏང་གི་སྐྱིད་སྡུག་ནས་ཕྱིར་འཐེན་བྱ་རྒྱུའི་རེ་འདུན་ཞུས་པ་ཡིན་ན། ཀྲི་པུའུ་ཡི་ཚོགས་ཆེན་གྱིས་གྲོས་བསྡུར་བྱས་རྗེས་མིང་ཐོ་བསུབས་པའི་ཁྱབ་བསྒྲགས་བྱེད་དགོས་པ་མ་ཟད། གོང་རིམ་ཏང་གི་རྩ་འཛུགས་ལ་ཐོ་འགོད་སྙན་སེང་ཡང་ཞུ་དགོས། གལ་སྲིད་ཏང་ཡོན་ཞིག་གི་གསར་བརྗེའི་སྙིང་སྟོབས་ཉམས་ནས་ཏང་ཡོན་གྱི་འོས་འགན་མ་བསྒྲུབས་པ་དང་། ཏང་ཡོན་གྱི་ཆ་རྐྱེན་དང་མི་མཐུན་པར་གྱུར་ན། ཏང་ཀྲི་པུའུ་ནས་མི་དེར་སློབ་གསོ་བརྒྱབ་ནས་དུས་བཀག་ནང་ཡོ་བསྲང་བྱེད་དགོས་པའི་བླང་བྱ་འདོན་དགོས་པ་དང་། སློབ་གསོ་བཏང་ནའང་ལེགས་འགྱུར་མ་བྱུང་ན་མི་དེ་ལ་ཏང་གི་སྐྱིད་སྡུག་ནས་ཕྱིར་འཐེན་བྱ་རྒྱུའི་ཁ་ཏ་བྱེད་དགོས། ཏང་ཡོན་ལ་ཏང་གི་སྐྱིད་སྡུག་ནས་ཕྱིར་འཐེན་བྱེད་དགོས་པའི་ཁ་ཏ་བྱེད་སྐབས་ཀྲི་པུའུ་ཡི་ཚོགས་ཆེན་ཐོག་གྲོས་བསྡུར་བྱས་ཏེ་ཐག་གཅོད་དགོས་པ་མ་ཟད། གོང་རིམ་ཏང་གི་རྩ་འཛུགས་ལ་ཆོག་མཆན་སྤྲོད་རྒྱུའི་སྙན་སེང་ཡང་ཞུ་དགོས། གལ་སྲིད་ཏང་གི་སྐྱིད་སྡུག་ནས་ཕྱིར་འཐེན་བྱ་དགོས་པའི་ཁ་ཏ་བྱེད་ཡུལ་ཏང་ཡོན་དེས་ཨུ་ཚུགས་ཀྱིས་ཏང་ནང་ནས་ཕྱིར་འཐེན་མ་བྱས་ན། ཀྲི་པུའུ་ཡི་ཚོགས་ཆེན་ལ་ཕུལ་ནས་གྲོས་བསྡུར་བྱས་ཏེ་མི་དེའི་མིང་ཐོ་བསུབ་རྒྱུའི་གྲོས་ཐག་བཅད་ཐོག གོང་རིམ་ཏང་གི་རྩ་འཛུགས་ལ་ཆོག་མཆན་སྤྲོད་རྒྱུའི་སྙན་སེང་ཞུ་དགོས།

ཏང་ཡོན་ལ་རྒྱུ་མཚན་ལུགས་མཐུན་མེད་པར་བསྟུད་མར་ཟླ་བ་དྲུག་རིང་ཏང་གི་རྩ་འཛུགས་ཀྱི་འཚོ་བར་མ་ཞུགས་པའམ་ཡང་ན་ཏང་དངུལ་མི་འབུལ་བའམ་ཡང་ན་ཏང་གིས་སྤྲད་པའི་ལས་ཀ་མི་བྱེད་པ་བཅས་ཀྱི་རིགས་གང་ཞིག་བྱུང་ན་རང་ཤུགས་སུ་ཏང་གི་སྐྱིད་སྡུག་དང་བྲལ་བར་བརྩི་དགོས། ཀྲི་པུའུ་ཡི་ཚོགས་ཆེན་ཐོག་ཏང་ཡོན་དེ་རིགས་ཀྱི་མིང་ཐོ་བསུབ་རྒྱུའི་ཐག་གཅོད་དགོས་པ་མ་ཟད། གོང་རིམ་ཏང་གི་རྩ་འཛུགས་ལ་ཆོག་མཆན་སྤྲོད་རྒྱུའི་སྙན་སེང་ཡང་ཞུ་དགོས།

ལེའུ་གཉིས་པ། ཏང་གི་རྩ་འཛུགས་ལམ་ལུགས།

དོན་ཚན་བཅུ་པ། ཏང་ནི་རང་ཉིད་ཀྱི་རྩ་འཛིན་དང་སྒྲིག་ཡིག་ལ་གཞིགས་ཤིང་དམངས་གཙོ་གཅིག་སྡུད་ལམ་ལུགས་ལྟར་སྒྲིག་འཛུགས་བྱས་པའི་གོང་བུ་གཅིག་ཏུ་གྱུར་པ་ཞིག་ཡིན། ཏང་གི་དམངས་གཙོ་གཅིག་སྡུད་ལམ་ལུགས་ཀྱི་གཞི་རྩའི་རྩ་དོན་གཤམ་གསལ་ཏེ།

(གཅིག) ཏང་ཡོན་སྒེར་གྱིས་ཏང་གི་རྩ་འཛུགས་ལ་བརྩི་བཀུར་དང་། ཉུང་བས་མང་བར་བརྩི་བཀུར། འོག་རིམ་རྩ་འཛུགས་ཀྱིས་གོང་རིམ་རྩ་འཛུགས་ལ་བརྩི་བཀུར། ཏང་ཡོངས་ཀྱི་རྩ་འཛུགས་ཁག་དང་ཏང་ཡོན་ཡོངས་ཀྱིས་ཏང་གི་རྒྱལ་ཡོངས་འཐུས་མིའི་ཚོགས་ཆེན་དང་ཀྲུང་དབྱང་ཨུ་ཡོན་ལྷན་ཁང་ལ་བརྩི་བཀུར་བཅས་བྱེད་དགོས།

(གཉིས) ཏང་གི་འགོ་ཁྲིད་ལས་ཁུངས་རིམ་པ་ཁག་གིས་མངགས་པའི་འཐུས་ཚབ་ལས་ཁུངས་དང་ཏང་གི་རྩ་འཛུགས་མ་ཡིན་པའི་རྩ་འཛུགས་ཁྲོད་ཀྱི་ཏང་ཙུའུ་ཕུད། དེ་བྱིངས་ཏང་གི་འགོ་ཁྲིད་ལས་ཁུངས་རིམ་པ་ཁག་ཚང་མ་འདེམས་བསྐོ་བྱས་ནས་བདམས་ཐོན་ཡོང་བ་བྱེད་དགོས།

(གསུམ) ཏང་གི་འགོ་ཁྲིད་ལས་ཁུངས་མཐོ་ཤོས་ནི་ཏང་གི་རྒྱལ་ཡོངས་འཐུས་མིའི་ཚོགས་ཆེན་དང་དེ་ལས་བདམས་ཐོན་བྱུང་བའི་ཀྲུང་དབྱང་ཨུ་ཡོན་ལྷན་ཁང་ཡིན། ཏང་གི་ས་གནས་རིམ་ཁག་འགོ་ཁྲིད་ལས་ཁུངས་ནི་ཏང་གི་ས་གནས་འཐུས་མིའི་ཚོགས་ཆེན་རིམ་པ་ཁག་དང་དེ་ཚོ་ལས་བདམས་ཐོན་བྱུང་བའི་ཨུ་ཡོན་ལྷན་ཁང་ཡིན། ཏང་གི་རིམ་ཁག་ཨུ་ཡོན་ལྷན་ཁང་གིས་རང་དང་རིམ་པ་མཉམ་པའི་འཐུས་མིའི་ཚོགས་ཆེན་ལ་འགན་འཁུར་དགོས་པ་མ་ཟད། ལས་ཀའི་སྙན་སེང་ཡང་ཞུ་དགོས།

(བཞི) ཏང་གི་གོང་རིམ་རྩ་འཛུགས་ཀྱིས་དུས་རྒྱུན་དུ་འོག་རིམ་རྩ་འཛུགས་དང་ཏང་ཡོན་མང་ཚོགས་ཀྱི་བསམ་འཆར་ཉན་འཇོག་དང་། ཁོང་ཚོས་བཏོན་པའི་གནད་དོན་དུས་ཐོག་ཏུ་ཐག་གཅོད་བྱེད་དགོས། ཏང་གི་འོག་རིམ་རྩ་འཛུགས་ཀྱིས་གོང་རིམ་རྩ་འཛུགས་ལ་ལས་ཀའི་སྐོར་དགོངས་སྐོར་དང་སྙན་སེང་ཞུ་དགོས་ལ་རང་ཚུགས་དང་འགན་འཁུར་བའི་སྒོ་ནས་རང་འགན་ཁོངས་སུ་གཏོགས་པའི་གནད་དོན་ཡང་ཐག་གཅོད་བྱེད་དགོས། རྩ་འཛུགས་རིམ་པ་གོང་འོག་གི་དབར་ལ་ཕན་ཚུན་གནས་ཚུལ་ཤོད་རེས་དང་། ཕན་ཚུན་རྒྱབ་སྐྱོར། ཕན་ཚུན་ལྟ་སྐུལ་བཅས་བྱེད་དགོས། ཏང་གི་རིམ་ཁག་རྩ་འཛུགས་ཀྱིས་གཏན་འབེབས་ལྟར་ཏང་གི་ལས་དོན་ཡོངས་བསྒྲགས་བྱས་ཏེ། ཏང་ཡོན་རྣམས་ཏང་ནང་གི་ལས་དོན་ཆ་རྒྱུས་སྔར་ལས་ལྷག་པར་ཡོང་བ་དང་དེར་གང་མང་ཞུགས་ཐུབ་པ་བྱེད་དགོས།

(ལྔ) ཏང་གི་ཨུ་ཡོན་ལྷན་ཁང་རིམ་པ་ཁག་གིས་ཐུན་མོང་དུ་འགོ་ཁྲིད་བྱ་རྒྱུ་དང་སོ་སོས་ལས་བགོས་འགན་ལེན་ཟུང་འབྲེལ་བྱེད་པའི་ལམ་ལུགས་ལག་ལེན་བྱེད་དགོས། གནད་དོན་གལ་ཆེ་རིགས་ཚང་མ་ཐུན་མོང་དུ་འགོ་ཁྲིད་དང་། དམངས་གཙོ་གཅིག་སྡུད། རེ་རེ་བྱས་ནས་གྲོས་མོལ། གྲོས་ཚོགས་ཐོག་ཐག་གཅོད་བཅས་བྱེད་པའི་རྩ་དོན་ལྟར་ཏང་གི་ཨུ་ཡོན་ལྷན་ཁང་གིས་ཐུན་མོང་དུ་གྲོས་བསྡུར་བྱས་ཏེ་ཐག་གཅོད་བྱེད་དགོས་པ་དང་། ཨུ་ཡོན་ལྷན་ཁང་གི་ཁོངས་མི་ཚོས་ཐུན་མོང་གི་གྲོས་ཆོད་དང་ལས་བགོས་ལྟར་སོ་སོའི་འགན་འཁྲི་ཏན་ཏིག་གིས་སྒྲུབ་དགོས།

(དྲུག) ཏང་གིས་མི་སྒེར་ལ་དད་བཀུར་བྱེད་པའི་རིགས་མཐའ་དག་བཀག་སྡོམ་བྱེད་དགོས། ཏང་གི་འགོ་ཁྲིད་མི་སྣའི་བྱེད་སྒོ་རྣམས་ཏང་དང་མི་དམངས་ཀྱི་ལྟ་སྐུལ་འོག་ཏུ་སྤེལ་རྒྱུའི་འགན་ལེན་བྱེད་དགོས་པ་དང་ཆབས་ཅིག ཏང་དང་མི་དམངས་ཀྱི་ཁེ་ཕན་ཐམས་ཅད་མཚོན་མཁན་འགོ་ཁྲིད་པའི་སྙན་གྲགས་སྲུང་སྐྱོང་བྱེད་དགོས།

དོན་ཚན་བཅུ་གཅིག་པ། ཏང་གི་རིམ་ཁག་འཐུས་མིའི་ཚོགས་ཆེན་གྱི་འཐུས་མི་དང་ཨུ་ཡོན་ལྷན་ཁང་བདམས་ཐོན་བྱེད་སྐབས་འདེམས་བསྐོ་བྱེད་མཁན་གྱི་བསམ་འདུན་མཚོན་པར་བྱེད་དགོས། རང་མིང་མ་བཀོད་པར་འདེམས་ཤོག་འཕེན་པའི་འདེམས་བསྐོ་བྱེད་སྟངས་སྤྱོད་དགོས། འོས་མིའི་མཚན་ཐོ་ལ་ཏང་གི་རྩ་འཛུགས་དང་འདེམས་བསྐོ་བྱེད་མཁན་གྱིས་ནང་མོལ་དང་གྲོས་བསྡུར་གང་ལེགས་བྱེད་དགོས། འོས་མིའི་མི་གྲངས་དེ་འདེམས་དགོས་པའི་མི་གྲངས་ལས་མང་བ་སྟེ་ལྷག་གྲངས་ཡོད་པའི་འདེམས་བསྐོ་བྱེད་ཐབས་ཐད་ཀར་ལག་བསྟར་བྱས་ནས་འདེམས་བསྐོ་དངོས་སུ་བྱས་ཆོག་ལ། སྔོན་ལ་ལྷག་གྲངས་ཡོད་པའི་འདེམས་བསྐོ་བྱེད་ཐབས་སྤྱད་དེ་སྟ་གོན་གྱི་འདེམས་བསྐོ་བྱས་ནས་འོས་མིའི་མཚན་ཐོ་ཐོན་རྗེས་འདེམས་བསྐོ་དངོས་སུ་བྱས་ནའང་ཆོག འདེམས་བསྐོ་བྱེད་མཁན་ལ་འོས་མིའི་གནས་ཚུལ་ཤེས་རྟོགས་བྱེད་པ་དང་། འོས་མི་བརྗེ་སྒྱུར་བྱེད་པའི་རེ་བ་འདོན་པ། འོས་མི་སུ་ཞིག་ཀྱང་མི་འདེམས་པ། མི་གཞན་དག་འདེམས་པ་བཅས་ཀྱི་དབང་ཆ་ཡོད། རྩ་འཛུགས་གང་དང་མི་སུས་ཀྱང་ཐབས་གང་རུང་ལ་བརྟེན་ནས་འདེམས་བསྐོ་བྱེད་མཁན་ལ་མི་སུ་ཞིག་འདེམས་བསྐོ་བྱེད་དུ་འཇུག་པའམ་ཡང་ན་མི་འཇུག་པའི་བཙན་སྐུལ་བྱས་མི་ཆོག

ཏང་གི་ས་གནས་རིམ་ཁག་འཐུས་མིའི་ཚོགས་ཆེན་དང་གཞི་རིམ་འཐུས་མིའི་ཚོགས་ཆེན་ཐོག་འདེམས་བསྐོ་བྱེད་སྐབས་ཏང་གི་སྒྲིག་ཡིག་དང་འགལ་བའི་གནས་ཚུལ་བྱུང་ན། རིམ་པ་གཅིག་གིས་མཐོ་བའི་ཏང་གི་ཨུ་ཡོན་ལྷན་ཁང་གིས་བརྟག་དཔྱད་ཁུངས་འཚོལ་བྱས་རྗེས་འདེམས་བསྐོ་དེ་རྩིས་མེད་དུ་གཏོང་རྒྱུ་དང་འོས་བབ་ཀྱི་བྱེད་ཐབས་སྤྱོད་རྒྱུའི་ཐག་གཅོད་པ་དང་འབྲེལ། རང་ལས་རིམ་པ་གཉིས་ཀྱིས་མཐོ་བའི་ཏང་གི་ཨུ་ཡོན་ལྷན་ཁང་ལ་སྙན་སེང་ཞུས་ནས་ཞིབ་བཤེར་ཆོག་མཆན་ཐོབ་མཚམས་དངོས་སུ་ལག་བསྟར་བྱ་རྒྱུའི་ཁྱབ་བསྒྲགས་བྱེད་དགོས།

ཏང་གི་རིམ་ཁག་འཐུས་མིའི་ཚོགས་ཆེན་གྱི་འཐུས་མིར་འགན་འཛིན་ཡུན་ཚད་ལམ་ལུགས་ལག་བསྟར་བྱེད་དགོས།

དོན་ཚན་བཅུ་གཉིས་པ། ཏང་གི་ཀྲུང་དབྱང་དང་ས་གནས་རིམ་ཁག་ཨུ་ཡོན་ལྷན་ཁང་གིས་དགོས་གལ་བྱུང་ཚེ་ཏང་གི་འཐུས་མིའི་གྲོས་ཚོགས་སྐོང་ཚོགས་བྱས་ཏེ་དུས་ཐོག་ཏུ་ཐག་གཅོད་དགོས་པའི་གནད་དོན་གལ་ཆེ་རིགས་གྲོས་བསྡུར་དང་གཏན་འཁེལ་བྱས་ཆོག འཐུས་མིའི་གྲོས་ཚོགས་ཀྱི་འཐུས་མིའི་མི་གྲངས་དང་འཐུས་མི་བདམས་ཐོན་བྱེད་ཐབས་དེ་འཐུས་མིའི་གྲོས་ཚོགས་སྐོང་ཚོགས་བྱེད་མཁན་ཨུ་ཡོན་ལྷན་ཁང་གིས་གཏན་འཁེལ་བྱེད་དགོས།

དོན་ཚན་བཅུ་གསུམ་པ། ཏང་གི་རྩ་འཛུགས་གསར་པ་འཛུགས་པའམ་ཡང་ན་ཏང་གི་སྔར་ཡོད་རྩ་འཛུགས་མེད་པ་བཟོ་རྒྱུ་དེ་ངེས་པར་དུ་གོང་རིམ་ཏང་གི་རྩ་འཛུགས་ཀྱིས་གཏན་འཁེལ་བྱེད་དགོས།

ཏང་གི་ས་གནས་རིམ་ཁག་འཐུས་མིའི་ཚོགས་ཆེན་དང་གཞི་རིམ་འཐུས་མིའི་ཚོགས་ཆེན་གྲོལ་རྗེས་ཀྱི་རིང་ལ། གོང་རིམ་ཏང་གི་རྩ་འཛུགས་ཀྱིས་དགོས་གལ་འདུག་བསམ་དུས། འོག་རིམ་ཏང་གི་རྩ་འཛུགས་ཀྱི་འགན་འཁུར་བའི་ལས་གནས་སྤོ་བའམ་འགན་གཞན་དག་འཁུར་བར་མངགས་གཏོང་བྱས་ཆོག

ཏང་གི་ཀྲུང་དབྱང་ཨུ་ཡོན་ལྷན་ཁང་དང་ས་གནས་རིམ་ཁག་ཨུ་ཡོན་ལྷན་ཁང་གིས་རང་གི་འཐུས་ཚབ་ལས་ཁུངས་མངགས་གཏོང་བྱས་ཆོག

དོན་ཚན་བཅུ་བཞི་པ། ཏང་གི་ཀྲུང་དབྱང་དང་། ཞིང་ཆེན། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཀྱི་ཨུ་ཡོན་ལྷན་ཁང་གིས་སྐོར་གཟིགས་ལམ་ལུགས་ལག་བསྟར་བྱེད་དགོས་པ་དང་། སྐབས་རེའི་ལས་འགན་འཁུར་ཡུན་ནང་དོ་དམ་བྱེད་སའི་ས་གནས་དང་། སྡེ་ཚན། ཁེ་ལས་དང་བྱ་ལས་སྡེ་ཚན་བཅས་ཀྱི་ཏང་རྩ་འཛུགས་ལ་སྐོར་གཟིགས་ཡོངས་ཁྱབ་ཏུ་ཁེབས་པར་བྱེད་དགོས།

ཀྲུང་དབྱང་གི་འབྲེལ་ཡོད་པུའུ་ཨུད་དང་རྒྱལ་ཁབ་ལས་ཁུངས་སྡེ་ཚན་ཏང་ཙུའུ(ཏང་ཨུ)ཡིས་ལས་ཀའི་དགོས་མཁོ་ལྟར་སྐོར་གཟིགས་ལས་ཀ་བྱེད་དགོས། ཏང་གི་གྲོང་ཁྱེར(ས་ཁུལ། ཀྲོའུ། མོང)དང་རྫོང(གྲོང་ཁྱེར། ཆུད། ཆི)གི་ཨུ་ཡོན་ལྷན་ཁང་གིས་སྐོར་གཟིགས་ལམ་ལུགས་འཛུགས་དགོས།

དོན་ཚན་བཅོ་ལྔ་པ། ཏང་གི་རིམ་ཁག་འགོ་ཁྲིད་ལས་ཁུངས་ཀྱིས་འོག་རིམ་རྩ་འཛུགས་དང་འབྲེལ་བ་ཡོད་པའི་གནད་དོན་གལ་ཆེན་ཐག་གཅོད་སྐབས་སྤྱིར་བཏང་གི་གནས་ཚུལ་འོག་ཏུ་འོག་རིམ་རྩ་འཛུགས་ཀྱི་བསམ་འཆར་བསྡུ་ལེན་བྱེད་དགོས། འོག་རིམ་རྩ་འཛུགས་ཀྱིས་རྒྱུན་སྲོལ་ལྟར་རང་ཉིད་ཀྱི་འགན་དབང་སྤྱོད་ཐུབ་པར་འགན་ལེན་བྱེད་དགོས། འོག་རིམ་རྩ་འཛུགས་ཀྱིས་ཐག་གཅོད་དགོས་པའི་གནད་དོན་ཡིན་ཞིང་། དམིགས་བསལ་གྱི་གནས་ཚུལ་མ་བྱུང་ན། གོང་རིམ་འགོ་ཁྲིད་ལས་ཁུངས་ཀྱིས་ཐེ་གཏོགས་བྱེད་མི་རུང་།

དོན་ཚན་བཅུ་དྲུག་པ། འབྲེལ་ཡོད་རྒྱལ་ཡོངས་རང་བཞིན་གྱི་སྲིད་ཇུས་ཀྱི་གནད་དོན་གལ་ཆེན་རིགས་ལ་ཏང་ཀྲུང་དབྱང་ཁོ་ནར་མ་གཏོགས་གཏན་འཁེལ་བྱེད་དབང་མེད། སྡེ་ཚན་སོ་སོ་དང་ས་གནས་ཁག་གི་ཏང་རྩ་འཛུགས་ཀྱིས་ཀྲུང་དབྱང་ལ་གྲོས་འགོ་བཏོན་ཆོག་པ་ལས་རང་མཚམས་ཀྱིས་ཐག་གཅོད་པ་དང་ཕྱི་ཕྱོགས་སུ་འདོད་ཚུལ་འདོན་པའི་རིགས་བྱས་མི་ཆོག

ཏང་གི་འོག་རིམ་རྩ་འཛུགས་ཀྱིས་ངེས་པར་དུ་གོང་རིམ་རྩ་འཛུགས་ཀྱི་ཆོད་དོན་རྣམས་ལག་བསྟར་མཐའ་གཅིག་ཏུ་བྱེད་དགོས། འོག་རིམ་རྩ་འཛུགས་ཀྱིས་གོང་རིམ་རྩ་འཛུགས་ཀྱི་ཆོད་དོན་དེ་རང་གི་ས་ཁུལ་དང་རང་གི་སྡེ་ཚན་གྱི་དངོས་ཡོད་གནས་ཚུལ་དང་མི་འཚམ་པ་འདུག་བསམས་ན། དེ་བསྒྱུར་དགོས་པའི་རེ་འདུན་ཞུས་ཆོག གལ་ཏེ་གོང་རིམ་རྩ་འཛུགས་ཀྱིས་སྔར་གྱི་ཆོད་དོན་དེ་ཉིད་མཐའ་གཅིག་ཏུ་འཛིན་པ་ཡིན་ན། འོག་རིམ་རྩ་འཛུགས་ཀྱིས་ངེས་པར་དུ་ལག་ལེན་བྱ་དགོས་པ་ལས། མི་མཐུན་པའི་བསམ་འཆར་ཡོངས་བསྒྲགས་སུ་བཏོན་མི་ཆོག འོན་ཀྱང་རང་ལས་རིམ་པ་གཉིས་ཀྱིས་མཐོ་བའི་རྩ་འཛུགས་ལ་སྙན་སེང་ཞུ་བའི་དབང་ཆ་ཡོད།

ཏང་གི་རིམ་ཁག་རྩ་འཛུགས་ཀྱི་ཚགས་པར་དང་དུས་དེབ་དང་དྲིལ་བསྒྲགས་ཡོ་བྱད་གཞན་དག་བཅས་ཀྱི་ཐོག་ངེས་པར་དུ་ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས། གྲོས་ཆོད་བཅས་དྲིལ་བསྒྲགས་བྱེད་དགོས།

དོན་ཚན་བཅུ་བདུན་པ། ཏང་གི་རྩ་འཛུགས་ཀྱིས་གནད་དོན་གྲོས་བསྡུར་དང་གཏན་འཁེལ་བྱེད་སྐབས་ངེས་པར་དུ་ཉུང་བས་མང་བར་བརྩི་བཀུར་བྱེད་པའི་རྩ་དོན་ལག་བསྟར་བྱེད་དགོས། གནད་དོན་གལ་ཆེ་རིགས་གཏན་འཁེལ་བྱེད་སྐབས་བརྡས་ཐག་གཅོད་དགོས། མི་ཉུང་ཤས་ཀྱི་བསམ་འཆར་མི་འདྲ་བ་དག་ལ་བསམ་གཞིག་ནན་ཏན་བྱེད་དགོས། གལ་ཏེ་གནད་དོན་གལ་ཆེན་ཐད་རྩོད་གླེང་བྱུང་བ་དང་། ཕྱོགས་གཉིས་ཀའི་མི་གྲངས་མང་ཉུང་ཧ་ལམ་འདྲ་བ་བྱུང་བའི་སྐབས་སུ། ཛ་དྲག་ཆེ་བའི་གནས་ཚུལ་འོག་ངེས་པར་དུ་མི་མང་བའི་བསམ་འཆར་ལྟར་ལག་ལེན་བྱེད་དགོས་པ་མ་གཏོགས་དེ་བྱིངས་གནས་སྐབས་སུ་གྲོས་ཐག་གཅོད་མཚམས་བཞག་སྟེ་བརྟག་དཔྱད་ཞིབ་འཇུག་སྔར་ལས་ལྷག་པར་བྱེད་ཅིང་ཕན་ཚུན་བསམ་འཆར་བརྗེ་རེས་བྱས་ཏེ་གྲོས་ཚོགས་རྗེས་མའི་ཐོག་ཏུ་བརྡས་ཐག་གཅོད་དགོས། དམིགས་བསལ་གྱི་གནས་ཚུལ་བྱུང་དུས་རྩོད་གླེང་བྱེད་པའི་གནས་ཚུལ་དེ་གོང་རིམ་རྩ་འཛུགས་ལ་སྙན་སེང་ཞུས་ཏེ་འདུམ་གཅོད་གནང་རོགས་ཞུས་ཆོག

ཏང་ཡོན་སྒེར་གྱིས་ཏང་གི་རྩ་འཛུགས་ཀྱི་ཚབ་བྱས་ནས་འདོད་ཚུལ་གལ་ཆེན་འདོན་པའི་སྐབས་སུ་གལ་ཏེ་ཏང་གི་རྩ་འཛུགས་ཀྱིས་གཏན་ཁེལ་བའི་ཆོད་དོན་གྱི་ཁྱབ་ཁོངས་ལས་བརྒལ་བའི་འདོད་ཚུལ་འདོན་དགོས་བྱུང་ན། ངེས་པར་དུ་རང་ཉིད་གཏོགས་སའི་ཏང་རྩ་འཛུགས་ལ་གྲོས་བསྡུར་དང་གཏན་འཁེལ་བྱ་རྒྱུར་འབུལ་བའམ་ཡང་ན་གོང་རིམ་ཏང་གི་རྩ་འཛུགས་ལ་དགོངས་སྐོར་ཞུ་དགོས། གོ་གནས་མཐོ་དམན་གང་ཡིན་ལ་མ་བལྟོས་པར་ཏང་ཡོན་སུ་ཞིག་ཡིན་རུང་གནད་དོན་གལ་ཆེན་རྣམས་སྒེར་གྱིས་ཐག་གཅོད་བྱེད་མི་རུང་། གལ་ཏེ་ཛ་དྲག་ཆེ་བའི་གནས་ཚུལ་དང་ཕྲད་ནས་ངེས་པར་དུ་སྒེར་གྱིས་གཏན་འཁེལ་བྱེད་དགོས་ན། གཏན་འཁེལ་བྱས་རྗེས་མགྱོགས་མྱུར་གྱིས་ཏང་གི་རྩ་འཛུགས་ལ་སྙན་སེང་ཞུ་དགོས། འགོ་ཁྲིད་སུ་ཞིག་ཡིན་ནའང་རང་གཅིག་པུས་བརྒྱ་ཁ་གཅིག་གཅོད་དང་རང་ཉིད་རྩ་འཛུགས་ལས་བརྒལ་མི་ཆོག

དོན་ཚན་བཅོ་བརྒྱད་པ། ཏང་གི་ཀྲུང་དབྱང་དང་། ས་གནས། གཞི་རིམ་རྩ་འཛུགས་བཅས་ཀྱིས་ངེས་པར་དུ་ཏང་འཛུགས་སྐྱོང་ལ་མཐོང་ཆེན་བྱ་དགོས་ཤིང་། ཏང་གི་དྲིལ་བསྒྲགས་ལས་ཀ་དང་། སློབ་གསོའི་ལས་ཀ རྩ་འཛུགས་ཀྱི་ལས་ཀ སྒྲིག་ཁྲིམས་ཞིབ་བཤེར་གྱི་ལས་ཀ མང་ཚོགས་ཀྱི་ལས་ཀ འཐབ་ཕྱོགས་གཅིག་གྱུར་གྱི་ལས་ཀ་སོགས་ལ་རྒྱུན་དུ་གྲོས་བསྡུར་དང་ཞིབ་བཤེར་བྱ་དགོས་པ་དང་། ཏང་ཕྱི་ནང་གི་བསམ་བློ་དང་ཆབ་སྲིད་ཀྱི་གནས་ཚུལ་ལ་ཞིབ་འཇུག་བྱ་རྒྱུར་ཡིད་འཇོག་བྱེད་དགོས། (མུ་དགོད།)