ཀྲུང་གོ་གུང་ཁྲན་ཏང་གི་སྒྲིག་ཡིག（བཀོད་ཚར）

རྩོམ་སྒྲིག  སངས་དོན།   ཡོང་ཁུངས། ལྷ་ས་གྲོང་ཁྱེར་བོད་སྐད་ཡིག་ལས་དོན་ཨུའི་འཕྲིན་སྟེགས།    བཤེར་འབེབས།  རིན་ཆེན་ཚེ་རིང་། 

(ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་ཉི་ཤུ་པའི་ཐོག་ཆ་ཤས་ལ་བཟོ་བཅོས་བརྒྱབ་ནས2022ལོའི་ཟླ10 ཚེས22ཉིན་གྲོས་འཆམ་བྱུང་བ) 

(སྤེལ་ཐེངས་ཁག་གཉིས་པར་མཐུད)

ལེའུ་གསུམ་པ། ཏང་གི་ཀྲུང་དབྱང་རྩ་འཛུགས།

དོན་ཚན་བཅུ་དགུ་པ། ཏང་གི་རྒྱལ་ཡོངས་འཐུས་མིའི་ཚོགས་ཆེན་ལོ་ལྔ་རེར་ཐེངས་རེ་འཚོག་དགོས་པ་དང་། ཀྲུང་དབྱང་ཨུ་ཡོན་ལྷན་ཁང་གིས་སྐོང་ཚོགས་བྱེད་དགོས། ཀྲུང་དབྱང་ཨུ་ཡོན་ལྷན་ཁང་གིས་དགོས་གལ་འདུག་བསམས་པའམ་ཡང་ན་ཞིང་ཆེན་རིམ་པའི་རྩ་འཛུགས་གསུམ་ཆ་གཅིག་ཡན་ཆད་ཀྱིས་རེ་འདུན་ཞུས་ན། དུས་བཀག་གི་སྔོན་ལ་རྒྱལ་ཡོངས་འཐུས་མིའི་ཚོགས་ཆེན་འཚོགས་ཆོག་པ་དང་། གནས་ཚུལ་ཛ་དྲག་ཆེ་རིགས་མ་བྱུང་ན་ཚོགས་ཆེན་ཕྱིར་འགྱངས་ཀྱིས་འཚོག་མི་ཆོག

རྒྱལ་ཡོངས་འཐུས་མིའི་ཚོགས་ཆེན་གྱི་འཐུས་མིའི་མི་གྲངས་མང་ཉུང་དང་འདེམས་བསྐོ་བྱེད་ཐབས་ཀྲུང་དབྱང་ཨུ་ཡོན་ལྷན་ཁང་གིས་གཏན་འཁེལ་བྱེད་དགོས།

དོན་ཚན་ཉི་ཤུ་པ། ཏང་གི་རྒྱལ་ཡོངས་འཐུས་མིའི་ཚོགས་ཆེན་གྱི་འགན་དབང་གཤམ་གསལ་ཏེ།

(གཅིག) ཀྲུང་དབྱང་ཨུ་ཡོན་ལྷན་ཁང་གི་སྙན་ཞུ་ཉན་པ་དང་འབྲེལ། དེར་ཞིབ་བཤེར་བྱ་རྒྱུ་དང་།

(གཉིས) ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་སྙན་ཞུ་ལ་ཞིབ་བཤེར་བྱ་རྒྱུ།

(གསུམ) ཏང་གི་གནད་དོན་གལ་འགངས་ཆེ་རིགས་གྲོས་བསྡུར་བྱེད་པ་དང་འབྲེལ། ཐག་གཅོད་བྱ་རྒྱུ།

(བཞི) ཏང་གི་སྒྲིག་ཡིག་ལ་བཟོ་བཅོས་རྒྱག་རྒྱུ།

(ལྔ) ཀྲུང་དབྱང་ཨུ་ཡོན་ལྷན་ཁང་འདེམས་བསྐོ་བྱ་རྒྱུ།

(དྲུག) ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་འདེམས་བསྐོ་བྱ་རྒྱུ་བཅས་ཡིན།

དོན་ཚན་ཉེར་གཅིག་པ། ཏང་གི་རྒྱལ་ཡོངས་འཐུས་མིའི་གྲོས་ཚོགས་ཀྱི་འགན་དབང་ནི་གནད་དོན་གལ་འགངས་ཆེ་རིགས་གྲོས་བསྡུར་དང་ཐག་གཅོད་བྱ་རྒྱུ་དང་། ཀྲུང་དབྱང་ཨུ་ཡོན་ལྷན་ཁང་དང་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཁོངས་མི་ཁ་ཤས་ལེགས་སྒྲིག་དང་སྣོན་འདེམས་བྱ་རྒྱུ་དེ་ཡིན། ཀྲུང་དབྱང་ཨུ་ཡོན་དང་རྗེས་སྣོན་ཀྲུང་དབྱང་ཨུ་ཡོན་ལེགས་སྒྲིག་དང་སྣོན་འདེམས་བྱ་རྒྱུའི་མི་གྲངས་དེ་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐོག་འདེམས་བསྐོ་བྱས་པའི་ཀྲུང་དབྱང་ཨུ་ཡོན་དང་རྗེས་སྣོན་ཀྲུང་དབྱང་ཨུ་ཡོན་ཁག་སོ་སོའི་བསྡོམས་གྲངས་ཀྱི་ལྔ་ཆ་གཅིག་ལས་བརྒལ་མི་ཆོག

དོན་ཚན་ཉེར་གཉིས་པ། ཏང་གི་ཀྲུང་དབྱང་ཨུ་ཡོན་ལྷན་ཁང་སྐབས་རེའི་འགན་འཁུར་ཡུན་ཚད་ནི་ལོ་ལྔ་རེ་ཡིན། གལ་ཏེ་དུས་བཀག་གི་སྔོན་ནམ་ཡང་ན་དུས་འགྱངས་ཀྱིས་རྒྱལ་ཡོངས་འཐུས་མིའི་ཚོགས་ཆེན་འཚོགས་ཚེ། དེའི་འགན་འཁུར་ཡུན་ཚད་ཀྱང་དེ་མཚུངས་སུ་བསྒྱུར་དགོས། ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ནི་ངེས་པར་དུ་ཏང་ལོ་ལྔ་ཡན་ལོན་པ་ཡིན་དགོས། ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་གྱི་མི་གྲངས་མང་ཉུང་རྒྱལ་ཡོངས་འཐུས་མིའི་ཚོགས་ཆེན་ནས་གཏན་འཁེལ་བྱེད་དགོས། ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་མ་ཚང་བའི་སྐབས་སུ་ཀྲུང་དབྱང་ཨུ་ཡོན་ལྷན་ཁང་གི་རྗེས་སྣོན་ཨུ་ཡོན་ནང་ནས་འདེམས་ཤོག་ཐོབ་གྲངས་མང་ཉུང་ལ་གཞིགས་ནས་རིམ་པ་ལྟར་ཁ་སྐོང་བྱེད་དགོས།

ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ནི་ཀྲུང་དབྱང་ཆབ་སྲིད་ཅུས་ཀྱིས་སྐོང་འཚོག་བྱ་དགོས་ཤིང་། ལོ་རེར་ཉུང་མཐར་ཡང་ཐེངས་རེ་འཚོག་དགོས། ཀྲུང་དབྱང་ཆབ་སྲིད་ཅུས་ཀྱིས་ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ལ་ལས་ཀའི་སྙན་སེང་ཞུ་དགོས་པ་དང་དེའི་ལྟ་སྐུལ་དང་དུ་ལེན་དགོས།

རྒྱལ་ཡོངས་འཐུས་མིའི་ཚོགས་ཆེན་གྲོལ་རྗེས་ཀྱི་རིང་ལ། ཀྲུང་དབྱང་ཨུ་ཡོན་ལྷན་ཁང་གིས་རྒྱལ་ཡོངས་འཐུས་མིའི་ཚོགས་ཆེན་གྱི་གྲོས་ཆོད་ལག་ལེན་བྱས་ཏེ་ཏང་གི་ལས་ཀ་ཡོངས་རྫོགས་ལ་འགོ་ཁྲིད་དང་། ཕྱི་ཕྱོགས་ལ་ཀྲུང་གོའི་གུང་ཁྲན་ཏང་གི་འཐུས་ཚབ་བྱ་རྒྱུ།

དོན་ཚན་ཉེར་གསུམ་པ། ཏང་གི་ཀྲུང་དབྱང་ཆབ་སྲིད་ཅུས་དང་། ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལྷན་ཁང་། ཀྲུང་དབྱང་ཨུ་ཡོན་ལྷན་ཁང་གི་སྤྱི་ཁྱབ་ཧྲུའུ་ཅི་བཅས་ནི་ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐོག་འདེམས་བསྐོ་བྱེད་དགོས། ཀྲུང་དབྱང་ཨུ་ཡོན་ལྷན་ཁང་གི་སྤྱི་ཁྱབ་ཧྲུའུ་ཅི་ནི་ངེས་པར་དུ་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་གྲས་ནས་འདེམས་དགོས།

ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་གྲོལ་རྗེས་ཀྱི་རིང་ལ། ཀྲུང་དབྱང་ཆབ་སྲིད་ཅུས་དང་དེའི་རྒྱུན་ལས་ཨུ་ཡོན་ལྷན་ཁང་གིས་ཀྲུང་དབྱང་ཨུ་ཡོན་ལྷན་ཁང་གི་འགན་དབང་སྤྱོད་རྒྱུ།

ཀྲུང་དབྱང་ཧྲུའུ་ཅི་ཁྲུའུ་ནི་ཀྲུང་དབྱང་ཆབ་སྲིད་ཅུས་དང་དེའི་རྒྱུན་ལས་ཨུ་ཡོན་ལྷན་ཁང་གི་དོན་གཅོད་ལས་ཁུངས་ཡིན་ཞིང་། དེའི་ཁོངས་མི་ནི་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལྷན་ཁང་གིས་འོས་མིང་བཏོན་ཏེ་ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐོག་གྲོས་འཆམ་བྱེད་དགོས།

ཀྲུང་དབྱང་ཨུ་ཡོན་ལྷན་ཁང་གི་སྤྱི་ཁྱབ་ཧྲུའུ་ཅི་ཡིས་ཀྲུང་དབྱང་ཆབ་སྲིད་ཅུས་ཀྱི་གྲོས་ཚོགས་དང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་སྐོང་འཚོག་བྱ་རྒྱུའི་འགན་འཁུར་དགོས་པ་མ་ཟད། ཀྲུང་དབྱང་ཧྲུའུ་ཅི་ཁྲུའུ་ཡི་ལས་ཀའང་གཙོ་སྐྱོང་བྱེད་དགོས།

ཏང་གི་ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཁོངས་མི་རྣམས་ནི་ཀྲུང་དབྱང་ཨུ་ཡོན་ལྷན་ཁང་གིས་གཏན་འཁེལ་བྱ་རྒྱུ་དང་། ཀྲུང་དབྱང་དམག་དོན་ཨུ་ཡོན་ལྷན་ཁང་གིས་ཀྲུའུ་ཞིས་འགན་འཁྲི་འཁུར་བའི་ལམ་ལུགས་ལག་ལེན་བསྟར་དགོས།

སྐབས་རེ་རེའི་ཀྲུང་དབྱང་ཨུ་ཡོན་ལྷན་ཁང་ལས་བདམས་ཐོན་བྱུང་བའི་ཀྲུང་དབྱང་གི་འགོ་ཁྲིད་ལས་ཁུངས་དང་ཀྲུང་དབྱང་གི་འགོ་ཁྲིད་པས་སྐབས་རྗེས་མའི་རྒྱལ་ཡོངས་འཐུས་མིའི་ཚོགས་ཆེན་འཚོག་རིང་སྐབས་རྗེས་མའི་ཀྲུང་དབྱང་ཨུ་ཡོན་ལྷན་ཁང་ནས་ཀྲུང་དབྱང་གི་འགོ་ཁྲིད་ལས་ཁུངས་དང་ཀྲུང་དབྱང་གི་འགོ་ཁྲིད་པ་གསར་པ་བདམས་ཐོན་མ་བྱུང་བར་དུ་ཏང་གི་རྒྱུན་ལྡན་གྱི་ལས་ཀ་རྣམས་མུ་མཐུད་དེ་གཙོ་སྐྱོང་བྱ་དགོས།

དོན་ཚན་ཉེར་བཞི་པ། ཀྲུང་གོའི་མི་དམངས་བཅིངས་འགྲོལ་དམག་གི་ཏང་གི་རྩ་འཛུགས་ཀྱིས་ཀྲུང་དབྱང་ཨུ་ཡོན་ལྷན་ཁང་གི་སློབ་སྟོན་ལྟར་ལས་ཀ་བྱེད་དགོས། ཀྲུང་དབྱང་དམག་དོན་ཨུ་ཡོན་ལྷན་ཁང་གིས་དམག་དཔུང་ནང་གི་ཏང་གི་ལས་ཀ་དང་ཆབ་སྲིད་ཀྱི་ལས་ཀར་འགན་འཁུར་རྒྱུ་དང་། དམག་དཔུང་ནང་གི་ཏང་གི་རྩ་འཛུགས་ཀྱི་སྒྲིག་སྲོལ་དང་སྒྲིག་གཞིའི་ཐད་ལ་གཏན་འབེབས་བྱ་རྒྱུ།

ལེའུ་བཞི་པ། ཏང་གི་ས་གནས་རྩ་འཛུགས།

དོན་ཚན་ཉེར་ལྔ་པ། ཏང་གི་ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཀྱི་འཐུས་མིའི་ཚོགས་ཆེན་དང་། ཆུས་བཙུགས་ཡོད་པའི་གྲོང་ཁྱེར་དང་རང་སྐྱོང་ཁུལ་གྱི་འཐུས་མིའི་ཚོགས་ཆེན། རྫོང(ཆི)དང་། རང་སྐྱོང་རྫོང་། ཆུས་བཙུགས་མེད་པའི་གྲོང་ཁྱེར་དང་གྲོང་ཁྱེར་གྱི་ཐད་སྐྱོང་ཆུས་བཅས་ཀྱི་འཐུས་མིའི་ཚོགས་ཆེན་བཅས་ལོ་ལྔ་རེར་ཐེངས་རེ་འཚོག་རྒྱུ།

ཏང་གི་ས་གནས་ཀྱི་འཐུས་མིའི་ཚོགས་ཆེན་རིམ་པ་ཁག་ནི་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གིས་སྐོང་འཚོག་བྱ་རྒྱུ། གནས་ཚུལ་དམིགས་བསལ་ཅན་བྱུང་ན། རང་ལས་རིམ་པ་གཅིག་གིས་མཐོ་བའི་ཨུ་ཡོན་ལྷན་ཁང་གི་ཆོག་མཆན་ཐོབ་རྗེས་དུས་བཀག་གི་སྔོན་ནམ་ཕྱིར་འགྱངས་ཀྱིས་སྐོང་འཚོག་བྱས་ཆོག ཏང་གི་ས་གནས་ཀྱི་འཐུས་མིའི་ཚོགས་ཆེན་རིམ་པ་ཁག་གི་འཐུས་མིའི་མི་གྲངས་དང་འདེམས་བསྐོ་བྱེད་ཐབས་དེ་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གིས་གཏན་འཁེལ་བྱ་རྒྱུ་མ་ཟད། རང་ལས་རིམ་པ་གཅིག་གིས་མཐོ་བའི་ཏང་གི་ཨུ་ཡོན་ལྷན་ཁང་ལ་ཆོག་མཆན་ཡང་ཞུ་རྒྱུ།

དོན་ཚན་ཉེར་དྲུག་པ། ཏང་གི་ས་གནས་ཀྱི་འཐུས་མིའི་ཚོགས་ཆེན་རིམ་པ་ཁག་གི་འགན་དབང་གཤམ་གསལ་ཏེ།

(གཅིག) རང་དང་རིམ་པ་མཉམ་པའི་ཨུ་ཡོན་ལྷན་ཁང་གི་སྙན་ཞུ་ཉན་པ་དང་འབྲེལ་དེར་ཞིབ་བཤེར་བྱ་རྒྱུ་དང་།

(གཉིས) རང་དང་རིམ་པ་མཉམ་པའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་སྙན་ཞུ་ལ་ཞིབ་བཤེར་བྱ་རྒྱུ།

(གསུམ) ས་ཁུལ་དེ་གའི་ཁོངས་གཏོགས་ཀྱི་གནད་དོན་གལ་འགངས་ཆེ་རིགས་གྲོས་བསྡུར་བྱེད་པ་དང་འབྲེལ་གྲོས་ཆོད་འཇོག་རྒྱུ།

(བཞི) རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་འདེམས་བསྐོ་དང་། རང་དང་རིམ་པ་མཉམ་པའི་ཏང་གི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་འདེམས་བསྐོ་བྱ་རྒྱུ་བཅས་ཡིན།

དོན་ཚན་ཉེར་བདུན་པ། ཏང་གི་ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར། ཆུད་བཙུགས་ཡོད་པའི་གྲོང་ཁྱེར། རང་སྐྱོང་ཁུལ་བཅས་ཀྱི་ཨུ་ཡོན་ལྷན་ཁང་སྐབས་རེའི་འགན་འཁུར་ཡུན་ཚད་ལོ་ལྔ་རེ་ཡིན། ཨུ་ཡོན་ལྷན་ཁང་དེ་དག་གི་ཨུ་ཡོན་དང་རྗེས་སྣོན་ཨུ་ཡོན་ངེས་པར་དུ་ཏང་ལོ་ལྔ་ཡན་ལོན་པ་ཡིན་དགོས། ཏང་གི་རྫོང(ཆི)དང་། རང་སྐྱོང་རྫོང་། ཆུད་བཙུགས་མེད་པའི་གྲོང་ཁྱེར། གྲོང་ཁྱེར་གྱི་ཐད་སྐྱོང་ཆུད་བཅས་ཀྱི་ཨུ་ཡོན་ལྷན་ཁང་སྐབས་རེའི་འགན་འཁུར་ཡུན་ཚད་ལོ་ལྔ་རེ་ཡིན། ཨུ་ཡོན་ལྷན་ཁང་དེ་དག་གི་ཨུ་ཡོན་དང་རྗེས་སྣོན་ཨུ་ཡོན་ངེས་པར་དུ་ཏང་ལོ་གསུམ་ཡན་ལོན་པ་ཡིན་དགོས།

ཏང་གི་ས་གནས་ཀྱི་འཐུས་མིའི་ཚོགས་ཆེན་རིམ་པ་ཁག་དུས་བཀག་གི་སྔོན་ནམ་དུས་འགྱངས་ཀྱིས་འཚོགས་ཚེ། དེ་ལས་བདམས་ཐོན་བྱུང་བའི་ཨུ་ཡོན་ལྷན་ཁང་གི་འགན་འཁུར་ཡུན་ཚད་ཀྱང་དེ་མཚུངས་སུ་བསྒྱུར་རྒྱུ།

ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གི་ཨུ་ཡོན་དང་རྗེས་སྣོན་ཨུ་ཡོན་གྱི་མི་གྲངས་ནི་སོ་སོར་རང་ལས་རིམ་པ་གཅིག་གིས་མཐོ་བའི་ཨུ་ཡོན་ལྷན་ཁང་གིས་གཏན་འཁེལ་བྱ་རྒྱུ། ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གི་ཨུ་ཡོན་མ་ཚང་བའི་སྐབས་སུ་རྗེས་སྣོན་ཨུ་ཡོན་ནང་ནས་འདེམས་ཤོག་ཐོབ་གྲངས་མང་ཉུང་ལ་གཞིགས་ནས་རིམ་པ་ལྟར་ཁ་སྐོང་བྱ་རྒྱུ།

ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གི་ཚང་འཛོམས་གྲོས་ཚོགས་ལོ་རེར་ཉུང་མཐར་ཡང་ཐེངས་གཉིས་རེ་འཚོག་རྒྱུ།

འཐུས་མིའི་ཚོགས་ཆེན་གྲོལ་རྗེས་ཀྱི་རིང་ལ་ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གིས་གོང་རིམ་ཏང་གི་རྩ་འཛུགས་ཀྱི་སློབ་སྟོན་དང་རང་དང་རིམ་པ་མཉམ་པའི་ཏང་གི་འཐུས་མིའི་ཚོགས་ཆེན་གྱི་གྲོས་ཆོད་ལག་བསྟར་བྱ་རྒྱུ་དང་། ས་གནས་དེ་གའི་ལས་དོན་ལ་འགོ་ཁྲིད་བྱ་རྒྱུ། དུས་བཀག་ལྟར་གོང་རིམ་ཏང་གི་ཨུ་ཡོན་ལྷན་ཁང་ལ་ལས་དོན་སྙན་སེང་ཞུ་རྒྱུ།

དོན་ཚན་ཉེར་བརྒྱད་པ། ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གི་ཚང་འཛོམས་གྲོས་ཚོགས་ཀྱིས་རྒྱུན་ལས་ཨུ་ཡོན་ལྷན་ཁང་དང་ཧྲུའུ་ཅི་རྒན་གཞོན་བཅས་འདེམས་བསྐོ་བྱ་རྒྱུ་མ་ཟད། གོང་རིམ་ཏང་གི་ཨུ་ཡོན་ལྷན་ཁང་ལ་ཆོག་མཆན་ཡང་ཞུ་རྒྱུ། ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་གྲོལ་རྗེས་ཀྱི་རིང་ལ་ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གི་རྒྱུན་ལས་ཨུ་ཡོན་ལྷན་ཁང་གིས་ཨུ་ཡོན་ལྷན་ཁང་གི་འགན་དབང་སྤྱོད་རྒྱུ་དང་། སྐབས་རྗེས་མའི་འཐུས་མིའི་ཚོགས་ཆེན་འཚོག་རིང་རྒྱུན་ལས་ཨུ་ཡོན་ལྷན་ཁང་གསར་པ་བདམས་ཐོན་མ་བྱུང་བར་དུ་རྒྱུན་གཏན་གྱི་ལས་ཀ་རྣམས་མུ་མཐུད་དེ་གཙོ་སྐྱོང་བྱ་རྒྱུ། ཏང་གི་ས་གནས་ཨུ་ཡོན་ལྷན་ཁང་རིམ་པ་ཁག་གི་རྒྱུན་ལས་ཨུ་ཡོན་ལྷན་ཁང་གིས་དུས་བཀག་ལྟར་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ལ་ལས་ཀའི་སྙན་སེང་ཞུ་རྒྱུ་དང་དེའི་ལྟ་སྐུལ་དང་དུ་ལེན་དགོས།

དོན་ཚན་ཉེར་དགུ་པ། ཏང་གི་ས་ཁུལ་ཨུ་ཡོན་ལྷན་ཁང་དང་ས་ཁུལ་ཨུ་ཡོན་ལྷན་ཁང་དང་འདྲ་མཚུངས་ཀྱི་རྩ་འཛུགས་ནི་ཏང་གི་ཞིང་ཆེན་དང་རང་སྐྱོང་ལྗོངས་ཀྱི་ཨུ་ཡོན་ལྷན་ཁང་གིས་རྫོང་ཁ་ཤས་དང་། རང་སྐྱོང་རྫོང་ཁ་ཤས། གྲོང་ཁྱེར་ཁ་ཤས་བཅས་ཀྱི་ཁྱབ་ཁོངས་སུ་མངགས་པའི་འཐུས་ཚབ་ལས་ཁུངས་ཡིན། ལས་ཁུངས་དེས་ཞིང་ཆེན་དང་རང་སྐྱོང་ལྗོངས་ཀྱི་ཨུ་ཡོན་ལྷན་ཁང་གིས་དབང་ཆ་བསྐུར་བ་ལྟར་ས་ཁུལ་དེ་གའི་ལས་ཀར་འགོ་ཁྲིད་བྱ་རྒྱུ།

ལེའུ་ལྔ་པ། ཏང་གི་གཞི་རིམ་རྩ་འཛུགས།

དོན་ཚན་སུམ་ཅུ་པ། ཁེ་ལས་དང་། གྲོང་གསེབ། ལས་ཁུངས། སློབ་གྲྭ སྨན་ཁང་། ཚན་རིག་ཞིབ་འཇུག་ཁང་། སྲང་ལམ་སྡེ་ཁུལ། སྤྱི་ཚོགས་ཀྱི་རྩ་འཛུགས། མི་དམངས་བཅིངས་འགྲོལ་དམག་གི་བརྒྱ་ཤོག་བཅས་དང་གཞི་རིམ་སྡེ་ཚན་གཞན་དག་གི་ནང་དངོས་གཞིའི་ཏང་ཡོན་གསུམ་ཡན་ཡོད་ཕྱིན། དེ་ཚོ་ཚང་མར་ཏང་གི་གཞི་རིམ་རྩ་འཛུགས་འཛུགས་དགོས།　

ཏང་གི་གཞི་རིམ་རྩ་འཛུགས་དེ་ལས་ཀའི་དགོས་མཁོ་དང་ཏང་ཡོན་མི་གྲངས་ལ་གཞིགས་ཏེ་གོང་རིམ་ཏང་གི་རྩ་འཛུགས་ཀྱི་ཆོག་མཆན་ཐོབ་རྗེས་སོ་སོར་ཏང་གི་གཞི་རིམ་ཨུ་ཡོན་ལྷན་ཁང་དང་། སྤྱི་ཁྱབ་ཀྲི་པུའུ་ཨུ་ཡོན་ལྷན་ཁང་། ཀྲི་པུའུ་ཨུ་ཡོན་ལྷན་ཁང་བཅས་འཛུགས་རྒྱུ། གཞི་རིམ་ཨུ་ཡོན་ལྷན་ཁང་དེ་ཏང་ཡོན་གྱི་ཚོགས་ཆེན་ནམ་འཐུས་མིའི་ཚོགས་ཆེན་ཐོག་ནས་བདམས་ཐོན་བྱ་རྒྱུ་དང་། སྤྱི་ཁྱབ་ཀྲི་པུའུ་ཨུ་ཡོན་ལྷན་ཁང་དང་ཀྲི་པུའུ་ཨུ་ཡོན་ལྷན་ཁང་དག་ཏང་ཡོན་གྱི་ཚོགས་ཆེན་ཐོག་ནས་བདམས་ཐོན་བྱ་རྒྱུ། ཨུ་ཡོན་གྱི་འོས་མི་འདོན་དུས་ཏང་ཡོན་དང་མང་ཚོགས་ཀྱི་བསམ་འཆར་རྒྱ་ཁྱབ་ཏུ་བསྡུ་ལེན་བྱེད་དགོས།

དོན་ཚན་སོ་གཅིག་པ། ཏང་གི་གཞི་རིམ་ཨུ་ཡོན་ལྷན་ཁང་དང་། སྤྱི་ཁྱབ་ཀྲི་པུའུ་ཨུ་ཡོན་ལྷན་ཁང་། ཀྲི་པུའུ་ཨུ་ཡོན་ལྷན་ཁང་བཅས་སྐབས་རེའི་འགན་འཁུར་ཡུན་ཚད་ལོ་གསུམ་ནས་ལོ་ལྔའི་བར་ཡིན། གཞི་རིམ་ཨུ་ཡོན་ལྷན་ཁང་དང་། སྤྱི་ཁྱབ་ཀྲི་པུའུ་ཨུ་ཡོན་ལྷན་ཁང་། ཀྲི་པུའུ་ཨུ་ཡོན་ལྷན་ཁང་བཅས་ཀྱི་ཧྲུའུ་ཅི་རྒན་གཞོན་བདམས་ཐོན་བྱུང་རྗེས། གོང་རིམ་ཏང་གི་རྩ་འཛུགས་ལ་ཆོག་མཆན་སྤྲོད་རྒྱུའི་སྙན་སེང་ཞུ་དགོས།

དོན་ཚན་སོ་གཉིས་པ། ཏང་གི་གཞི་རིམ་རྩ་འཛུགས་ནི་སྤྱི་ཚོགས་ཀྱི་གཞི་རིམ་རྩ་འཛུགས་ནང་གི་ཏང་གི་འཐབ་འཛིང་བཙན་རྫོང་ཡིན་པ་དང་། ཏང་གི་ལས་དོན་ཡོད་ཚད་དང་འཐབ་འཛིང་ནུས་ཤུགས་ཀྱི་རྨང་གཞི་ཡིན། དེའི་གཞི་རྩའི་ལས་འགན་གཤམ་གསལ་ཏེ།

(གཅིག) ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས་བཅས་དྲིལ་བསྒྲགས་དང་ལག་བསྟར་བྱ་རྒྱུ་དང་། ཏང་ཀྲུང་དབྱང་དང་། གོང་རིམ་རྩ་འཛུགས། རྩ་འཛུགས་རང་ངོས་བཅས་ཀྱི་གྲོས་ཆོད་དྲིལ་བསྒྲགས་དང་ལག་བསྟར་བྱ་རྒྱུ། ཏང་ཡོན་གྱི་གདོང་ལེན་དང་དཔེ་བཟང་གི་ནུས་པ་འདོན་སྤེལ་གང་ལེགས་བྱ་རྒྱུ། སྔོན་ཐོན་དང་དཔེ་བཟང་བརྩོན་ལེན་ཧུར་ཐག་བྱ་རྒྱུ། ཏང་ཕྱི་ནང་གི་ལས་བྱེད་པ་དང་མང་ཚོགས་མཐུན་སྒྲིལ་དང་སྒྲིག་འཛུགས་བྱས་ནས་རང་སྡེ་ཚན་གྱིས་ཁུར་བའི་ལས་འགན་རྣམས་ཧུར་བརྩོན་གྱིས་བསྒྲུབ་རྒྱུ་བཅས།

(གཉིས) ཏང་ཡོན་རྣམས་སྒྲིག་འཛུགས་བྱས་ཏེ་མར་ཁེ་སི་ལེ་ཉིང་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། "མཚོན་བྱེད་གསུམ"གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་བཅས་སློབ་སྦྱོང་ནན་ཏན་བྱ་རྒྱུ་དང་། "སློབ་སྦྱོང་གཉིས་དང་ཚད་ལོན་གཅིག"གི་སློབ་སྦྱོང་དང་ཏང་གི་ལོ་རྒྱུས་སློབ་སྦྱོང་སློབ་གསོ་རྒྱུན་རྣམ་ཅན་དང་ལམ་ལུགས་ཅན་དུ་འགྱུར་བར་སྐུལ་སྤེལ་གཏོང་རྒྱུ། ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས། གྲོས་ཆོད་བཅས་སློབ་སྦྱོང་བྱ་རྒྱུ། ཏང་གི་གཞི་རྩའི་ཤེས་བྱ་སློབ་སྦྱོང་བྱ་རྒྱུ། ཚན་རིག་དང་། རིག་གནས། བཅའ་ཁྲིམས། ལས་སྒོ་བཅས་ཐད་ཀྱི་ཤེས་བྱ་སློབ་སྦྱོང་བྱ་རྒྱུ།

(གསུམ) ཏང་ཡོན་ལ་སློབ་གསོ་དང་། དོ་དམ། ལྟ་སྐུལ། ཞབས་ཞུ་བཅས་བྱས་ཏེ་ཏང་ཡོན་གྱི་བྱང་ཚད་མཐོ་རུ་འགྲོ་བ་དང་། ཕུགས་བསམ་དང་དད་སེམས་བརྟན་པོ་འགྱུར་བ། ཏང་གཤིས་ཤུགས་ཆེ་རུ་འགྲོ་བ་བཅས་བྱེད་པ་དང་། ཏང་གི་རྩ་འཛུགས་ཀྱི་འཚོ་བ་ནན་དུ་གཏོང་བ། སྐྱོན་བརྗོད་དང་རང་སྐྱོན་རང་བརྗོད་སྤེལ་བ། ཏང་གི་སྒྲིག་ཁྲིམས་བརྩི་སྲུང་དང་ལག་ལེན། ཏང་ཡོན་གྱིས་འོས་འགན་ཏན་ཏིག་གིས་སྒྲུབ་པར་ལྟ་སྐུལ། ཏང་ཡོན་གྱི་ཁེ་དབང་ལ་བཙན་གནོད་མི་ཕོག་པའི་འགན་ལེན་བཅས་བྱ་རྒྱུ། ཕྱོགས་མིའི་ཏང་ཡོན་ལ་དོ་དམ་བྱ་རྒྱུར་ཤུགས་སྣོན་རྒྱག་པ་དང་ལེགས་བཅོས་བྱ་རྒྱུ།

(བཞི) མང་ཚོགས་དང་འབྲེལ་འདྲིས་དམ་ཟབ་བྱས་ཐོག་ཏང་ཡོན་དང་ཏང་གི་ལས་ཀའི་ཐད་མང་ཚོགས་ཀྱི་སྐྱོན་བརྗོད་དང་བསམ་འཆར་ཇི་འདྲ་ཡོད་པ་རྟག་ཏུ་ཤེས་རྟོགས་དང་། མང་ཚོགས་ཀྱི་ལུགས་མཐུན་ཁེ་དབང་དང་ཁེ་ཕན་སྲུང་སྐྱོང་། མང་ཚོགས་ཀྱི་བསམ་བློ་དང་ཆབ་སྲིད་ཀྱི་ལས་ཀ་ལེགས་སྒྲུབ་བཅས་བྱ་རྒྱུ།

(ལྔ) ཏང་ཡོན་དང་མང་ཚོགས་ཀྱི་ཧུར་བརྩོན་བྱེད་སེམས་དང་གསར་སྐྲུན་བྱེད་སེམས་འདོན་སྤེལ་གང་ལེགས་དང་། ཁོང་ཚོའི་ཁྲོད་ཀྱི་ཤེས་ལྡན་པ་ཕུལ་བྱུང་ཅན་རྣམས་རྙེད་པ་དང་། གསོ་སྐྱོང་། འོས་སྦྱོར་བཅས་བྱས་ནས་སྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་འཛུགས་སྐྲུན་ནང་ཁོང་ཚོས་སོ་སོའི་བློ་གྲོས་དང་ཡོན་ཏན་འབུལ་རྒྱུར་བསྔགས་སྐུལ་དང་རྒྱབ་སྐྱོར་བྱ་རྒྱུ།

(དྲུག) ཏང་ལ་ཞུགས་རྒྱུའི་རེ་འདུན་བཏོན་པའི་ཧུར་བརྩོན་ཅན་རྣམས་ལ་སློབ་གསོ་དང་གསོ་སྐྱོང་བྱས་ནས་ཏང་ཡོན་བསྡུ་ལེན་གྱི་རྒྱུན་གཏན་ལས་ཀ་ལེགས་པར་བསྒྲུབ་རྒྱུ་དང་། ཐོན་སྐྱེད་དང་ལས་ཀ་དངོས་སུ་བྱེད་ས་དང་གཞོན་ནུ་རྣམས་ཀྱི་ཁྲོད་ནས་ཏང་ཡོན་བསྡུ་ལེན་བྱེད་པར་མཐོང་ཆེན་བྱ་རྒྱུ།

(བདུན) ཏང་ཡོན་ལས་བྱེད་པ་དང་ལས་དོན་པ་གཞན་དག་སུ་ཞིག་ཡིན་རུང་ཚང་མས་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་བརྩི་སྲུང་ནན་པོ་བྱ་དགོས་པ་དང་། རྒྱལ་ཁབ་ཀྱི་ནོར་སྲིད་དཔལ་འབྱོར་སྐོར་གྱི་ཁྲིམས་སྲོལ་དང་མི་དོན་ལམ་ལུགས་བརྩི་སྲུང་ནན་པོ་བྱ་དགོས་པ་ལས་རྒྱལ་ཁབ་དང་། ཐུན་མོང་། མང་ཚོགས་བཅས་ཀྱི་ཁེ་ཕན་ཧམ་བཟུང་བྱེད་མི་རུང་བའི་ལྟ་སྐུལ་བྱ་རྒྱུ།

(བརྒྱད) ཏང་ཡོན་དང་མང་ཚོགས་ལ་ཕྱོགས་ལྷུང་ངན་པ་རང་རྟོགས་ཀྱིས་བཀག་འགོག་དང་། ཁྲིམས་འགལ་ལུགས་འགལ་གྱི་སྤྱོད་ངན་སྣ་ཚོགས་ལ་སེམས་ཐག་གཙང་བཅད་ཀྱིས་འཐབ་རྩོད་བྱེད་དགོས་པའི་སློབ་གསོ་གཏོང་རྒྱུ་བཅས་ཡིན།

དོན་ཚན་སོ་གསུམ་པ། སྲང་ལམ་དང་། ཤང་། གྲོང་རྡལ་བཅས་ཀྱི་ཏང་གི་གཞི་རིམ་ཨུ་ཡོན་ལྷན་ཁང་དང་གྲོང་ཚོ་དང་སྡེ་ཁུལ་གྱི་ཏང་གི་རྩ་འཛུགས་བཅས་ཀྱིས་ས་ཁུལ་དེ་གའི་གཞི་རིམ་རིགས་ཁག་གི་རྩ་འཛུགས་དང་ལས་ཀ་ཁག་ལ་འགོ་ཁྲིད་གཅིག་གྱུར་དང་གཞི་རིམ་སྤྱི་ཚོགས་བཅོས་སྐྱོང་ལས་ཀར་ཤུགས་སྣོན་རྒྱག་རྒྱུ་དང་། སྲིད་འཛིན་རྩ་འཛུགས་དང་།  དཔལ་འབྱོར་རྩ་འཛུགས།    མང་ཚོགས་མང་ཚོགས་རང་བཞིན་གྱི་རང་སྐྱོང་རྩ་འཛུགས་བཅས་ཀྱིས་འགན་དབང་གང་ལེགས་སྤྱོད་པར་རྒྱབ་སྐྱོར་དང་ཁག་ཐེག་བྱ་རྒྱུ།　          རྒྱལ་ཁབ་ལ་དབང་བའི་ཁེ་ལས་ཀྱི་ཏང་ཨུད(ཏང་ཙུའུ)ཀྱིས་འགོ་ཁྲིད་ཀྱི་ནུས་པ་འདོན་སྤེལ་བྱས་ཏེ་ཁ་ཕྱོགས་ཁྲིད་སྟོན་དང་། ཁྱོན་ཡོངས་ལ་དོ་དམ། དོན་ཐོག་འཁྱོལ་བར་འགན་ལེན་བཅས་བྱ་རྒྱུ་དང་། གཏན་འབེབས་ལྟར་ཁེ་ལས་ཀྱི་དོན་དག་གལ་ཆེན་རྣམས་གྲོས་བསྡུར་དང་ཐག་གཅོད་བྱ་རྒྱུ། རྒྱལ་ཁབ་ལ་དབང་བའི་ཁེ་ལས་དང་ཐུན་མོང་གི་ཁེ་ལས་ནང་གི་ཏང་གི་གཞི་རིམ་རྩ་འཛུགས་ཀྱིས་ཁེ་ལས་ཀྱི་ཐོན་སྐྱེད་དང་གཉེར་སྐྱོང་བྱ་བར་དམིགས་ནས་ལས་དོན་བསྒྲུབ་རྒྱུ། ཏང་དང་རྒྱལ་ཁབ་ཀྱི་བྱེད་ཕྱོགས་དང་སྲིད་ཇུས་རྣམས་ཁེ་ལས་སོ་སོའི་ནང་ལག་ལེན་དཔྱིས་ཕྱིན་པར་བྱེད་པར་ཁག་ཐེག་དང་ལྟ་སྐུལ་དང་། མ་རྐང་འཇོག་མཁན་ལྷན་ཚོགས་དང་། ལས་འཛིན་པའི་ལྷན་ཚོགས། ལྟ་ཞིབ་ལྷན་ཚོགས། ཅིང་ལི(བཟོ་གྲྭའི་འགོ་འཛིན)བཅས་ཀྱིས་བཅའ་ཁྲིམས་ལྟར་འགན་དབང་སྤྱོད་པར་རྒྱབ་སྐྱོར། བློ་གཅིག་སེམས་གཅིག་གིས་ལས་བཟོ་པ་མང་ཚོགས་ལ་བརྟེན་པ་དང་། ལས་བཟོ་པའི་འཐུས་མིའི་ཚོགས་ཆེན་གྱིས་ལས་དོན་སྒྲུབ་པར་རྒྱབ་སྐྱོར། ཁེ་ལས་ཀྱི་གནད་དོན་གལ་ཆེན་རྣམས་ཇུས་ཐག་གཅོད་པར་ཞུགས་པ། ཏང་གི་རྩ་འཛུགས་རང་ངོས་ལེགས་སྐྱོང་བྱ་རྒྱུར་ཤུགས་སྣོན་རྒྱག་རྒྱུ་དང་འབྲེལ་བསམ་བློ་དང་ཆབ་སྲིད་ཀྱི་ལས་ཀ་དང་། བསམ་པའི་དཔལ་ཡོན་སྤེལ་བ། འཐབ་ཕྱོགས་གཅིག་གྱུར་ལས་དོན་དང་བཟོ་ཚོགས། གུང་གཞོན་སྡེ་ཚོགས་བུད་མེད་རྩ་འཛུགས་སོགས་པའི་མང་ཚོགས་ཚོགས་པའི་རྩ་འཛུགས་ལ་འགོ་ཁྲིད་བཅས་བྱ་རྒྱུ།

སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་རྩ་འཛུགས་ཁྲོད་ཀྱི་ཏང་གི་གཞི་རིམ་རྩ་འཛུགས་ཀྱིས་ཏང་གི་བྱེད་ཕྱོགས་དང་སྲིད་ཇུས་ལག་ལེན་མཐར་ཕྱིན་པ་བསྟར་ནས་ཁེ་ལས་ཀྱིས་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་བརྩི་སྲུང་བྱེད་པར་ཁྲིད་སྟོན་དང་ལྟ་སྐུལ་བྱ་རྒྱུ་དང་། བཟོ་ཚོགས་དང་གུང་གཞོན་སྡེ་ཚོགས་ལ་སོགས་པའི་མང་ཚོགས་ཚོགས་པའི་རྩ་འཛུགས་ཀྱི་འགོ་ཁྲིད་དེ་ལས་བཟོ་པ་མང་ཚོགས་དང་མཐུན་སྒྲིལ་བྱས་ནས་གོང་བུར་བསྒྲིལ་ཏེ་ཕྱོགས་གང་ཅིའི་ཁྲིམས་མཐུན་ཁེ་དབང་སྲུང་སྐྱོང་དང་། ཁེ་ལས་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་སྤེལ་གཏོང་རྒྱུ།

སྤྱི་ཚོགས་ཀྱི་རྩ་འཛུགས་ནང་གི་ཏང་གི་གཞི་རིམ་རྩ་འཛུགས་ཀྱིས་ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས་བཅས་དྲིལ་བསྒྲགས་དང་ལག་བསྟར་དང་། བཟོ་ཚོགས་དང་གུང་གཞོན་སྡེ་ཚོགས་ལ་སོགས་པའི་མང་ཚོགས་ཚོགས་པའི་རྩ་འཛུགས་ལ་འགོ་ཁྲིད་པ། ཏང་ཡོན་རྣམས་ལ་སློབ་གསོ་དང་དོ་དམ། མང་ཚོགས་ལ་ཁྲིད་སྟོན་དང་ཞབས་ཞུ་བཅས་བྱས་ནས་བྱ་གཞག་གོང་དུ་འཕེལ་བར་སྐུལ་འདེད་གཏོང་དགོས།

སྲིད་འཛིན་འགོ་ཁྲིད་ཀྱིས་འགན་འཁུར་བའི་ལམ་ལུགས་ལག་ལེན་བསྟར་བའི་བྱ་གཞག་ཚན་པའི་ནང་གི་ཏང་གི་གཞི་རིམ་རྩ་འཛུགས་ཀྱིས་འཐབ་འཛིང་བཙན་རྫོང་གི་ནུས་པ་འདོན་སྤེལ་བྱེད་དགོས། ཏང་ཨུད་ཀྱི་འགོ་ཁྲིད་འོག་གི་སྲིད་འཛིན་འགོ་ཁྲིད་ཀྱིས་འགན་འཁུར་བའི་ལམ་ལུགས་ལག་ལེན་བསྟར་བའི་བྱ་གཞག་ཚན་པའི་ནང་གི་ཏང་གི་གཞི་རིམ་རྩ་འཛུགས་ཀྱིས་གནད་དོན་གལ་འགངས་ཆེ་རིགས་གྲོས་བསྡུར་དང་འབྲེལ་གྲོས་ཐག་གཅོད་རྒྱུ་དང་། དུས་མཚུངས་སུ་སྲིད་འཛིན་འགོ་ཁྲིད་ཀྱིས་རང་ཉིད་ཀྱི་འགན་དབང་གང་ལེགས་སྤྱོད་ཐུབ་པར་ཁག་ཐེག་བྱ་རྒྱུ།

ཏང་དང་རྒྱལ་ཁབ་ཀྱི་ལས་ཁུངས་རིམ་པ་ཁག་ནང་གི་ཏང་གི་གཞི་རིམ་རྩ་འཛུགས་ཀྱིས་སྲིད་འཛིན་འགན་འཁུར་བར་གཞོགས་འདེགས་ཀྱིས་ལས་འགན་ལེགས་འགྲུབ་དང་ལས་ཀ་བྱེད་སྟངས་ལེགས་བཅོས་བྱ་རྒྱུ་དང་། སྲིད་འཛིན་འགན་འཁུར་བ་ཚུད་པའི་ཏང་ཡོན་ཚང་མར་སློབ་གསོ་དང་། དོ་དམ། ལྟ་སྐུལ་བཅས་བྱེད་དགོས་པ་ལས་སྡེ་ཚན་དེ་ཉིད་ཀྱི་ལས་སྒོར་འགོ་ཁྲིད་བྱེད་མི་དགོས།

དོན་ཚན་སོ་བཞི་པ། ཏང་ཀྲི་པུའུ་ནི་ཏང་གི་རྨང་གཞིའི་རྩ་འཛུགས་ཡིན་ཞིང་། ཏང་ཡོན་ལ་ཐད་ཀར་སློབ་གསོ་དང་། དོ་དམ། ལྟ་སྐུལ་བཅས་བྱེད་པ་དང་། མང་ཚོགས་སྒྲིག་འཛུགས་དང་། མང་ཚོགས་ལ་དྲིལ་བསྒྲགས། མང་ཚོགས་གོང་བུར་འགྲིལ་བ། མང་ཚོགས་ལ་ཞབས་ཞུ་བཅས་བྱེད་པའི་འགན་འཁྲི་འཁུར་དགོས།

ལེའུ་དྲུག་པ། ཏང་གི་ལས་བྱེད་པ།

དོན་ཚན་སོ་ལྔ་པ། ཏང་གི་ལས་བྱེད་པ་ནི་ཏང་གི་བྱ་གཞག་གི་རྐང་འཛིན་པ་དང་མི་དམངས་ཀྱི་སྤྱི་ཞབས་པ་ཡིན་པས། བློ་དཀར་སྤྱོད་གཙང་དང་འགན་འཁུར་ཕོད་པ་བྱེད་ཐུབ་པ་དགོས། ཏང་གིས་སྤྱོད་ཡོན་གཉིས་ལྡན་དང་ཀུན་སྤྱོད་སྔོན་ལ་འཛིན་པའི་རྩ་དོན་ལ་གཞིགས་ནས་ལས་བྱེད་པ་གདམ་གསེས་བྱ་རྒྱུ་དང་། ཕྱོགས་བཞི་མཚམས་བརྒྱད་དང་སྤྱོད་ཡོན་གཉིས་ལྡན་གྱི་མི་ཁོ་ན་བསྐོ་གཞག་བྱ་རྒྱུ་མཐའ་འཁྱོངས་དང་། བྱ་གཞག་སྔོན་དུ་འཇོག་པ་དང་གཞུང་དྲང་ཚུལ་མཐུན་བྱ་རྒྱུ་མཐའ་འཁྱོངས་བྱས་ནས་རང་གི་དགའ་ཉེ་ཁོ་ན་བསྐོ་གཞག་བྱེད་པར་ངོ་རྒོལ་བྱས་ཐོག ལས་བྱེད་པའི་དཔུང་སྡེ་གསར་བརྗེ་ཅན་དང་། ལོ་ན་གཞོན་པ། ཤེས་ཡོན་ལྡན་པ། ཆེད་ལས་ཅན་བཅས་སུ་འགྱུར་བར་འབད་བརྩོན་བྱེད་དགོས།

ཏང་གིས་ལས་བྱེད་པར་སློབ་གསོ་དང་། གསོ་སྦྱོང་། འདེམས་སྒྲུག དཔྱད་ཞིབ། ལྟ་སྐུལ་བཅས་བྱ་རྒྱུ་སྤྱི་དང་། ཁྱད་པར་དུ་ན་གཞོན་ལས་བྱེད་པ་ཕུལ་བྱུང་ཅན་གསོ་སྐྱོང་དང་འདེམས་སྒྲུག་བྱེད་པར་མཐོང་ཆེན་བྱ་རྒྱུ། ལས་བྱེད་པའི་ལམ་ལུགས་སྒྱུར་བཅོས་ལ་སྐུལ་སྤེལ་ཧུར་ཐག་གཏོང་རྒྱུ།

ཏང་གིས་བུད་མེད་ལས་བྱེད་པ་དང་གྲངས་ཉུང་མི་རིགས་ཀྱི་ལས་བྱེད་པ་གསོ་སྐྱོང་དང་འདེམས་སྒྲུག་བྱེད་པར་མཐོང་ཆེན་བྱ་རྒྱུ།

དོན་ཚན་སོ་དྲུག་པ། ཏང་གི་རིམ་པ་ཁག་གི་འགོ་ཁྲིད་ལས་བྱེད་པ་རྣམས་ཀྱིས་དད་སེམས་འགྱུར་མེད་དང་། མི་དམངས་ལ་ཞབས་ཞུ། སྲིད་བརྩོན་དོན་གཉེར། འགན་འཁུར་ཕོད་པ། གཞུང་དྲང་སྤྱོད་གཙང་བཅས་བྱ་དགོས་པ་དང་། སྒྲིག་ཡིག་འདིའི་དོན་ཚན་གསུམ་པར་བཀོད་པའི་ཏང་ཡོན་གྱི་འོས་འགན་ཁག་ངེས་པར་དུ་དཔེ་བཟང་གི་སྒོ་ནས་སྒྲུབ་དགོས་པ་མ་ཟད། ངེས་པར་དུ་གཤམ་གསལ་གྱི་གཞི་རྩའི་ཆ་རྐྱེན་ཡང་འཛོམས་དགོས་པ་སྟེ།

(གཅིག) འགན་འཁྲི་སྒྲུབ་པར་མཁོ་བའི་མར་ཁེ་སི་ལེ་ཉིང་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། "མཚོན་བྱེད་གསུམ"གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་ཀྱི་ཆུ་ཚད་ཡོད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་སྣེ་ཁྲིད་ཀྱིས་དོན་འཁྱོལ་མཐར་ཕྱིན་བྱེད་པ། ཧུར་བརྩོན་ཆེན་པོས་མར་ཁེ་སི་རིང་ལུགས་ཀྱི་ལངས་ཕྱོགས་དང་། ལྟ་བ། བྱེད་ཐབས་བཅས་ལ་བརྟེན་ནས་གནད་དོན་དངོས་དབྱེ་ཞིབ་དང་ཐག་གཅོད་བྱེད་པ། སློབ་སྦྱོང་ལ་མཐོང་ཆེན་དང་། ཆབ་སྲིད་ལ་དང་དོད། སྲོལ་བཟང་དར་སྤེལ་བཅས་མཐའ་འཁྱོངས་བྱས་ནས་དཀའ་ཉེན་སྣ་ཚོགས་ཀྱི་ཉམས་སད་ཐེག་ཐུབ་པ་བཅས།

(གཉིས) གུང་ཁྲན་རིང་ལུགས་ཀྱི་ཕུགས་བསམ་ཆེན་པོ་ལྡན་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལ་ཡིད་ཆེས་བརྟན་པོ་འཆང་བ། ཏང་གི་གཞི་རྩའི་ལམ་ཕྱོགས་དང་བྱེད་ཕྱོགས་དང་སྲིད་ཇུས་ཁག་ལག་ལེན་མཐའ་གཅིག་ཏུ་བྱེད་པ། སྒྱུར་བཅོས་སྒོ་འབྱེད་བྱ་རྒྱུའི་སེམས་ཐག་གཅོད་པ། དེང་རབས་ཅན་དུ་འགྱུར་བའི་བྱ་གཞག་ལ་རང་ནུས་གང་ཡོད་འདོན་པ། སྤྱི་ཚོགས་རིང་ལུགས་འཛུགས་སྐྲུན་བྱེད་རིང་དཀའ་སྤྱད་ལས་སྒྲུབ། སྲིད་སྐྱོང་གི་བྱས་རྗེས་ལྟ་བ་ཡང་དག་པ་འཛིན་པ་བཅས་བྱས་ནས་ལག་ལེན་དང་། མི་དམངས། ལོ་རྒྱུས་བཅས་ཀྱི་ཞིབ་བཤེར་ཐེག་ཐུབ་པའི་བྱས་རྗེས་དངོས་སུ་འཇོག་པ།

(གསུམ) བསམ་བློ་བཅིངས་འགྲོལ་དང་། དངོས་ཐོག་བདེན་འཚོལ། དུས་བསྟུན་མདུན་སྐྱོད། གསར་གཏོད་གསར་སྐྲུན་བཅས་མཐའ་འཁྱོངས་བྱེད་པ་དང་། བརྟག་དཔྱད་ཞིབ་འཇུག་ནན་ཏན་བྱེད་པ། ཏང་གི་བྱེད་ཕྱོགས་དང་སྲིད་ཇུས་རྣམས་ས་ཁུལ་དེ་ག་དང་སྡེ་ཁག་དེ་གའི་དོན་དངོས་དང་ཟུང་འབྲེལ་བྱས་ཏེ་ཕན་འབྲས་རྨད་དུ་བྱུང་བའི་སྒོ་ནས་ལས་དོན་སྤེལ་བ་དང་། སྐད་ཆ་དྲང་པོ་ཤོད་པ། ལས་དོན་དངོས་སུ་སྒྲུབ་པ། ཕན་འབྲས་དངོས་སུ་གཉེར་བ་བཅས་བྱེད་ཐུབ་པ།

(བཞི) གསར་བརྗེའི་བྱ་གཞག་སྒྲུབ་སེམས་དང་ཆབ་སྲིད་ཀྱི་འགན་འཁྲི་ཁུར་སེམས་ཆེ་ལ་ལག་ལེན་གྱི་ཉམས་མྱོང་ཡོད་ཅིང་། འགོ་ཁྲིད་ཀྱི་ལས་སྒོ་འཕེར་བའི་སྒྲིག་འཛུགས་བྱེད་ནུས་དང་། རིག་གནས་ཀྱི་ཡོན་ཚད། ཆེད་ལས་ཀྱི་ཤེས་ཡོན་བཅས་ཡོད་པ།

(ལྔ) མི་དམངས་ཀྱིས་སྤྲད་པའི་དབང་ཆ་རྣམས་ལག་བསྟར་ཡང་དག་པ་བྱེད་ཅིང་། རྩ་དོན་མཐའ་འཁྱོངས་དང་། བཅའ་ཁྲིམས་ལྟར་ལས་སྒྲུབ། གཞུང་དྲང་སྤྱོད་གཙང་། སྲིད་བརྩོན་དམངས་བསམ། རང་དཔེ་གཞན་སྟོན། དཀའ་སྤྱད་བབ་ཆགས། མང་ཚོགས་དང་འབྲེལ་འདྲིས་དམ་ཟབ། ཏང་གི་མང་ཚོགས་ལམ་ཕྱོགས་མཐའ་འཁྱོངས།  རང་རྟོགས་ཀྱི་སྒོ་ནས་ཏང་དང་མང་ཚོགས་ཀྱི་སྐྱོན་བརྗོད་དང་ལྟ་སྐུལ་དང་ལེན། ཀུན་སྤྱོད་བློ་སྦྱོང་བྱེད་ཤུགས་ཆེ་རུ་གཏོང་བ། ཏང་གཤིས་སྨྲ་བ། གཤིས་སྤྱོད་བཟང་པོ་གཙིགས་སུ་འཛིན་པ། མིག་དཔེ་བཟང་པོ་སྟོན་པ་བཅས་བྱས་ཏེ་རང་བརྩི་དང་། རང་ཞིབ། རང་གཅུན། རང་སྐུལ་བཅས་བྱེད་ཐུབ་པ་དང་། ཕྱི་ཚུལ་རིང་ལུགས་དང་། དཔོན་ཉམས་རིང་ལུགས། སྐྱིད་འདོད་རིང་ལུགས། བག་མེད་ལོངས་སྤྱོད་ཀྱི་སྤྱོད་ཚུལ་བཅས་ལ་ངོ་རྒོལ་དང་།  ཁྱད་དབང་བསམ་བློ་དང་ཁྱད་དབང་སྣང་ཚུལ་ལ་ངོ་རྒོལ་བྱེད་པ། དབང་ཆ་གང་བྱུང་དུ་སྤྱོད་པ་དང་སྒེར་གྱི་ཁེ་ཕན་གཉེར་བའི་རིགས་ལ་ངོ་རྒོལ་བཅས་བྱེད་པ།

(དྲུག) ཏང་གི་དམངས་གཙོ་གཅིག་སྡུད་ལམ་ལུགས་མཐའ་འཁྱོངས་དང་སྲུང་སྐྱོང་བྱས་ཐོག དམངས་གཙོའི་སྤྱོད་ཚུལ་ལྡན་ལ་ཕྱོགས་ཡོངས་ལ་བསམ་བློ་གཏོང་བའི་འདུ་ཤེས་ཡོད་པ་དང་། རང་ཉིད་དང་བསམ་འཆར་མི་མཐུན་པ་ཡོད་མཁན་བློ་མཐུན་ཚུད་པའི་བློ་མཐུན་རྣམས་དང་མཐུན་སྒྲིལ་མཁས་པོ་བྱས་ཏེ་མཉམ་དུ་ལས་ཀ་བྱེད་པ་བཅས་ཡིན།

དོན་ཚན་སོ་བདུན་པ། ཏང་ཡོན་ལས་བྱེད་པས་ཏང་ཕྱིའི་ལས་བྱེད་པ་དང་མཉམ་ལས་མཉམ་སྒྲུབ་བྱེད་མཁས་པོ་བྱས་ཏེ་ཁོང་ཚོར་བརྩི་འཇོག་བྱ་དགོས་པ་དང་། ཁེངས་སྐྱུང་གིས་ཁོང་ཚོའི་དགེ་མཚན་སློབ་སྦྱོང་བྱེད་དགོས།

ཏང་གི་རྩ་འཛུགས་རིམ་པ་ཁག་གིས་ནུས་པ་དང་ཡོན་ཏན་ངོ་མ་ཡོད་ཅིང་འགོ་ཁྲིད་ཀྱི་ལས་ཀ་སྤྲོད་རུང་བའི་ཏང་ཕྱིའི་ལས་བྱེད་པ་གསར་རྙེད་དང་འོས་སྦྱོར་མཁས་པོ་བྱས་ཏེ་ཁོང་ཚོར་གོ་གནས་དང་དབང་ཆ་གཉིས་ཀ་ཡོད་པར་འགན་ལེན་བྱེད་པ་དང་སྦྲགས་ཁོང་ཚོའི་ནུས་པ་འདོན་སྤེལ་གང་ལེགས་བྱེད་དགོས།

དོན་ཚན་སོ་བརྒྱད་པ། ཏང་གི་རིམ་པ་ཁག་གི་འགོ་ཁྲིད་ལས་བྱེད་པ་དམངས་གཙོས་འདེམས་བསྐོ་བྱས་པའམ་ཡང་ན་འགོ་ཁྲིད་ལས་ཁུངས་ནས་བསྐོ་གཞག་བྱས་པ་གང་ཡིན་ནའང་། ཁོང་ཚོའི་གོ་གནས་དེ་ཚེ་གང་ལ་བཟུང་ཆོག་པ་ཞིག་མིན་པར་ཚང་མ་བསྒྱུར་ཆོག་པའམ་ཕྱིར་འཐེན་བྱས་ཆོག

ལོ་ན་བགྲེས་པ་དང་གཟུགས་པོ་བདེ་ཐང་མིན་པའི་རྐྱེན་གྱིས་ལས་ཀ་མུ་མཐུད་བྱེད་མི་འོས་པའི་ལས་བྱེད་པ་རྣམས་རྒྱལ་ཁབ་ཀྱི་གཏན་འབེབས་ལྟར་ལས་འཁྱུར་དང་ལས་བྲལ་ངལ་གསོ་བྱེད་དགོས།

ལེའུ་བདུན་པ། ཏང་གི་སྒྲིག་ཁྲིམས།

དོན་ཚན་སོ་དགུ་པ། ཏང་གི་སྒྲིག་ཁྲིམས་ནི་ཏང་གི་རིམ་ཁག་རྩ་འཛུགས་དང་ཏང་ཡོན་ཡོངས་ཀྱིས་ངེས་པར་དུ་བརྩི་སྲུང་ཞུ་དགོས་པའི་བྱ་སྤྱོད་སྤེལ་བའི་ལམ་སྲོལ་ཡིན་པ་དང་། ཏང་གི་མཐུན་སྒྲིལ་དང་གཅིག་གྱུར་སྲུང་སྐྱོང་དང་ཏང་གི་ལས་འགན་རྣམས་ལེགས་གྲུབ་བྱེད་པའི་འགན་ལེན་ཡིན། ཏང་རྩ་འཛུགས་ཀྱིས་ངེས་པར་དུ་ཏང་གི་སྒྲིག་ཁྲིམས་ལག་བསྟར་དང་སྲུང་སྐྱོང་ནན་ཏན་བྱ་དགོས་པ་དང་། གུང་ཁྲན་ཏང་ཡོན་རྣམས་ཀྱིས་ངེས་པར་དུ་མ་བསྐུལ་དང་བླངས་ཀྱི་སྒོ་ནས་ཏང་གི་སྒྲིག་ཁྲིམས་ཀྱི་གཅུན་སྡོམ་དང་དུ་ལེན་དགོས།

དོན་ཚན་བཞི་བཅུ་པ། ཏང་གི་སྒྲིག་ཁྲིམས་སུ་གཙོ་བོ་ཆབ་སྲིད་ཀྱི་སྒྲིག་ཁྲིམས་དང་། རྩ་འཛུགས་ཀྱི་སྒྲིག་ཁྲིམས། སྤྱོད་གཙང་གི་སྒྲིག་ཁྲིམས། མང་ཚོགས་ཀྱི་སྒྲིག་ཁྲིམས། ལས་ཀའི་སྒྲིག་ཁྲིམས། འཚོ་བའི་སྒྲིག་ཁྲིམས་བཅས་ཚུད་ཡོད།

སྔ་བསླབ་ཕྱི་འདོམས་དང་ནད་བཅོས་སྲོག་སྐྱོབ་བྱ་རྒྱུ་དང་། ཁྲིམས་ནན་པོ་འཛིན་པ་དང་སྒྲིག་ཁྲིམས་དང་འགལ་རིགས་རྩད་གཅོད་བདའ་འདེད་གཏོང་བ། དོན་སྔ་ཙམ་དང་ཆུང་ཐོག་ནས་འཛིན་པ་དང་སྐྱོན་ཆུང་ཐོག་ནས་སེལ་བ་བཅས་མཐའ་འཁྱོངས་བྱས་ཏེ་ནོར་འཁྲུལ་གྱི་ངོ་བོ་དང་ནོར་འཁྲུལ་ཤོར་ཚུལ་ཚབས་ཆེ་ཆུང་ལ་གཞིགས་ནས་སྐྱོན་བརྗོད་སློབ་གསོ་གཏོང་བ།  ཞིབ་བཤེར་བྱ་རྒྱུར་བཀའ་ཕབ་པ།  བསླབ་འདོམས་སྐུལ་ལྕག་ནས་སྒྲིག་ཁྲིམས་ཀྱི་ཆད་པ་གཅོད་དགོས།　 ལྟ་སྐུལ་དང་སྒྲིག་བསྟར་ཐད་ཀྱི"རྣམ་པ་བཞི"ལ་བརྟེན་ནས"གདོང་མདོག་དམར་འགྱུར་དང་རྔུལ་ཆུ་བཞུར་བ་བྱ་རྒྱུ"དེ་རྒྱུན་རྣམ་ཞིག་ཏུ་འགྱུར་བར་འཇུག་རྒྱུ་དང་། ཏང་གི་སྒྲིག་ཁྲིམས་ལྟར་ཆད་པ་གཅོད་རྒྱུ་དང་རྩ་འཛུགས་ཀྱིས་ལེགས་སྒྲིག་བྱ་རྒྱུ་དེ་ཏང་དོ་དམ་དང་ལེགས་སྐྱོང་བྱེད་ཐབས་གལ་ཆེན་ཞིག་བྱ་རྒྱུ། སྒྲིག་ཁྲིམས་དང་ཉེས་ཁྲིམས་ལས་ཚབས་ཆེན་འགལ་བའི་ཏང་ཡོན་ནི་ངེས་པར་དུ་ཏང་གི་སྐྱིད་སྡུག་ནས་འབུད་དགོས།

ཏང་ནང་ཏང་གི་སྒྲིག་ཡིག་དང་རྒྱལ་ཁབ་ཀྱི་བཅའ་ཁྲིམས་ལས་འགལ་བའི་བྱེད་ཐབས་སྤྱད་ནས་ཏང་ཡོན་ལ་སྤྱོད་ཚུལ་འཛིན་པའི་རིགས་གཏན་འགོག་དང་། གནག་ལན་སློག་པ་དང་སྙོན་འཛུགས་ཞུ་གཏུག་དང་མ་ཉེས་ཁག་གཡོག་བྱེད་པའི་རིགས་གཏན་འགོག་བྱེད་དགོས། གཏན་འབེབས་དེ་དག་དང་འགལ་མཁན་རྩ་འཛུགས་སམ་སྐྱེ་བོར་ངེས་པར་དུ་ཏང་གི་སྒྲིག་ཁྲིམས་དང་རྒྱལ་ཁབ་ཀྱི་བཅའ་ཁྲིམས་ལྟར་བདའ་འདེད་གཏོང་དགོས།

དོན་ཚན་ཞེ་གཅིག་པ། ཏང་ཡོན་ལ་སྒྲིག་ཁྲིམས་ཐོག་ནས་ཆད་པ་གཅོད་སྟངས་སྣ་ལྔ་ཡོད་པ་སྟེ། ཐ་ཚིག་སྒྲོག་པ་དང་། ཐ་ཚིག་དྲག་པོ་སྒྲོག་པ། ཏང་ནང་གི་གོ་གནས་ཕྱིར་འཐེན་བྱེད་པ། ཏང་ནང་བཞག་ནས་ལྟ་ཞིབ་བྱེད་པ། ཏང་གི་སྐྱིད་སྡུག་ནས་འབུད་པ་བཅས་ཡིན།

ཏང་ནང་བཞག་ནས་ལྟ་ཞིབ་བྱེད་ཡུན་རིང་ཤོས་ནི་ལོ་གཉིས་ལས་བརྒལ་མི་རུང་། ཏང་ནང་བཞག་ནས་ལྟ་ཞིབ་བྱེད་པའི་རིང་ཏང་ཡོན་དེར་བརྡས་ཐག་གཅོད་པའི་དབང་ཆ་དང་འདེམས་བསྐོའི་དབང་ཆ། གདམ་བྱའི་དབང་ཆ་བཅས་མེད། ཏང་ཡོན་ཞིག་ཏང་ནང་བཞག་ནས་ལྟ་ཞིབ་བྱས་རྗེས་དེས་དངོས་གནས་ནོར་འཁྲུལ་ཡོ་བསྲང་བྱས་ཡོད་ན་དེའི་ཏང་ཡོན་གྱི་དབང་ཆ་སླར་གསོ་བྱེད་དགོས། ནོར་འཁྲུལ་མཁྲེགས་བཟུང་བྱས་ནས་ཡོ་བསྲང་མ་བྱས་ཚེ་ཏང་གི་སྐྱིད་སྡུག་ནས་འབུད་དགོས།

ཏང་གི་སྐྱིད་སྡུག་ནས་ཕྱིར་འབུད་གཏོང་བ་དེ་ནི་ཏང་ནང་གི་ཆད་པ་ཆེ་ཤོས་ཡིན། ཏང་གི་རིམ་ཁག་རྩ་འཛུགས་ཀྱིས་ཏང་ཡོན་ཞིག་ཏང་གི་སྐྱིད་སྡུག་ནས་འབུད་རྒྱུའི་ཐག་གཅོད་པའམ་ཆོག་མཆན་འགོད་པའི་སྐབས་སུ་འབྲེལ་ཡོད་དཔྱད་གཞི་དང་བསམ་འཆར་ལ་ཕྱོགས་ཡོངས་ནས་ཞིབ་འཇུག་བྱེད་དགོས་པ་དང་ཧ་ཅང་གཟབ་ནན་གྱི་སྤྱོད་ཚུལ་འཛིན་དགོས།

དོན་ཚན་ཞེ་གཉིས་པ། ཏང་ཡོན་ལ་སྒྲིག་ཁྲིམས་ཐོག་གི་ཆད་པ་གཅོད་དུས་ངེས་པར་དུ་ཀྲི་པུའུ་ཡི་ཚོགས་ཆེན་ཐོག་གྲོས་བསྡུར་གྱིས་ཐག་གཅོད་བྱས་རྗེས་ཏང་གི་གཞི་རིམ་ཨུ་ཡོན་ལྷན་ཁང་ལ་ཆོག་མཆན་ཞུ་དགོས་པ་དང་། གལ་ཏེ་དེ་དང་འབྲེལ་བའི་གནད་དོན་ཅུང་གལ་ཆེ་བའམ་རྙོག་འཛིང་ཆེ་བ་ཡིན་པའམ། ཡང་ན་ཏང་ཡོན་ལ་ཏང་གི་སྐྱིད་སྡུག་ནས་འབུད་རྒྱུའི་ཆད་པ་གཅོད་རྒྱུ་ཡིན་ན། གནས་ཚུལ་མི་འདྲ་བར་གཞིགས་ཏེ་རྫོང་རིམ་པའམ་རྫོང་རིམ་པ་ཡན་གྱི་ཏང་གི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་ཞིབ་བཤེར་ཆོག་མཆན་ཞུ་དགོས། དམིགས་བསལ་གྱི་གནས་ཚུལ་འབྱུང་སྐབས་རྫོང་རིམ་པ་དང་རྫོང་རིམ་པ་ཡན་གྱི་རིམ་ཁག་ཏང་གི་ཨུ་ཡོན་ལྷན་ཁང་དང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་ཏང་ཡོན་ལ་སྒྲིག་ཁྲིམས་ཐོག་གི་ཆད་པ་གཅོད་རྒྱུའི་གྲོས་ཐག་ཐད་ཀར་གཅོད་དབང་ཡོད།

ཏང་གི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ལ་ཐ་ཚིག་སྒྲོག་པ་དང་ཐ་ཚིག་དྲག་པོ་སྒྲོག་པའི་ཆད་པ་གཅོད་རྒྱུ་དེ་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་རྒྱུན་ལས་ཨུ་ཡོན་ལྷན་ཁང་གིས་གྲོས་ཞིབ་བྱས་རྗེས་ཏང་ཀྲུང་དབྱང་ལ་ཆོག་མཆན་ཞུ་དགོས། ས་གནས་རིམ་ཁག་ཏང་གི་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ལ་ཐ་ཚིག་སྒྲོག་པ་དང་ཐ་ཚིག་དྲག་པོ་སྒྲོག་པའི་ཆད་པ་གཅོད་རྒྱུར་རིམ་པ་གཅིག་གིས་མཐོ་བའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཆོག་མཆན་ཐོབ་པ་དང་སྦྲགས་དེ་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ལ་ཐོ་འགོད་སྙན་སེང་ཞུ་དགོས།

ཏང་གི་ཀྲུང་དབྱང་ཨུ་ཡོན་ལྷན་ཁང་དང་ས་གནས་རིམ་ཁག་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ལ་ཏང་ནང་གི་གོ་གནས་ཕྱིར་འཐེན་དང་ཏང་ནང་བཞག་ནས་ལྟ་ཞིབ་བྱེད་པའམ་ཡང་ན་ཏང་གི་སྐྱིད་སྡུག་ནས་འབུད་རྒྱུའི་ཆད་པ་གཅོད་མིན་དེ་ངེས་པར་དུ་མི་དེ་གནས་སའི་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཀྱི་མི་གྲངས་བསྡོམས་འབོར་གྱི་སུམ་ཆ་གཉིས་ཡན་གྱི་མི་གྲངས་མང་ཤོས་ཀྱིས་ཐག་གཅོད་དགོས། ཚང་འཛོམས་གྲོས་ཚོགས་གྲོལ་རྗེས་ཀྱི་རིང་ལ། ཀྲུང་དབྱང་ཆབ་སྲིད་ཅུས་དང་ས་གནས་རིམ་ཁག་ཨུ་ཡོན་ལྷན་ཁང་གི་རྒྱུན་ལས་ཨུ་ཡོན་ལྷན་ཁང་གིས་སྔོན་ལ་གོང་གསལ་ཆད་པ་གཅོད་རྒྱུའི་གྲོས་ཐག་བཅད་དེ་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་འཚོག་དུས་རྗེས་སུ་ཁས་ལེན་བྱས་ཆོག ས་གནས་རིམ་ཁག་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ལ་ཆད་པ་གོང་བཞིན་གཅོད་རྒྱུ་ནི་ངེས་པར་དུ་གོང་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་རྒྱུན་ལས་ཨུ་ཡོན་ལྷན་ཁང་གིས་གྲོས་ཞིབ་བྱས་པ་བརྒྱུད་དེ་རིམ་པ་དེའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ལ་ཆོག་མཆན་ཞུ་དགོས།

ཉེས་ཁྲིམས་དང་ཚབས་ཆེན་འགལ་བའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ནི་ཀྲུང་དབྱང་ཆབ་སྲིད་ཅུས་ཀྱིས་ཏང་གི་སྐྱིད་སྡུག་ནས་འབུད་རྒྱུའི་ཐག་གཅོད་རྒྱུ་དང་། ཉེས་ཁྲིམས་དང་ཚབས་ཆེན་འགལ་བའི་ས་གནས་རིམ་ཁག་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་ནི་དེ་དང་རིམ་པ་མཉམ་པའི་ཨུ་ཡོན་ལྷན་ཁང་གི་རྒྱུན་ལས་ཨུ་ཡོན་ལྷན་ཁང་གིས་ཏང་གི་སྐྱིད་སྡུག་ནས་འབུད་རྒྱུའི་ཐག་གཅོད་རྒྱུ།

དོན་ཚན་ཞེ་གསུམ་པ། ཏང་རྩ་འཛུགས་ཀྱིས་ཏང་ཡོན་ལ་ཆད་པ་གཅོད་རྒྱུའི་ཆོད་དོན་འཇོག་སྐབས། དངོས་ཐོག་བདེན་འཚོལ་གྱི་སྒོ་ནས་དོན་དངོས་ལ་རྩད་ཞིབ་གསལ་པོ་བྱེད་དགོས། ཆད་པ་གཅོད་རྒྱུའི་ཆོད་དོན་གྱིས་གཞི་འཛིན་སའི་དོན་དངོས་ཀྱི་དཔྱད་གཞིའི་ཡིག་རིགས་དང་ཆད་པ་བཅད་པའི་ཆོད་དོན་རྣམས་ངེས་པར་དུ་དོ་བདག་རང་ལ་བསྟན་དགོས་པ་དང་སྦྲགས་ཁོ་རང་གིས་གནས་ཚུལ་གསལ་བཤད་དང་དག་སེལ་བྱས་པར་ཉན་དགོས། གལ་ཏེ་ཆད་པ་བཅད་པའི་ཆོད་དོན་དོ་བདག་གི་བློ་ལ་མ་བབས་ན་རྒྱུ་མཚན་ཞུ་འབུལ་བྱས་ཆོག་ཅིང་། འབྲེལ་ཡོད་ཏང་རྩ་འཛུགས་ཀྱིས་ངེས་པར་དུ་ཐག་གཅོད་རྒྱུའི་འགན་འཁུར་བའམ་ཡང་ན་མྱུར་དུ་བརྒྱུད་སྤྲོད་བྱ་དགོས་པ་ལས་བཀག་ཉར་བྱས་མི་ཆོག དངོས་འབྲེལ་ནོར་འཁྲུལ་གྱི་བསམ་འཆར་དང་ཁུངས་ལུང་མེད་པའི་རེ་འདུན་མཁྲེགས་བཟུང་བྱེད་མཁན་རྣམས་ལ་སྐྱོན་བརྗོད་དང་སློབ་གསོ་གཏོང་དགོས།

དོན་ཚན་ཞེ་བཞི་པ། ཏང་གི་སྒྲིག་ཁྲིམས་སྲུང་སྐྱོང་ཐད་ཏང་གི་རྩ་འཛུགས་ལ་གལ་ཏེ་འགན་འཛོལ་བྱུང་བ་ཡིན་ན། ངེས་པར་དུ་འགན་འཁྲི་རྩད་གཅོད་བྱེད་དགོས།

ཏང་གི་སྒྲིག་ཁྲིམས་ལས་ཚབས་ཆེན་འགལ་བ་དང་དེ་ཉིད་ཀྱིས་ཡོ་བསྲང་ཡང་བྱེད་མི་ཐུབ་པའི་ཏང་གི་རྩ་འཛུགས་བྱུང་ན། དེ་ལས་རིམ་པ་གཅིག་གིས་མཐོ་བའི་ཏང་གི་ཨུ་ཡོན་ལྷན་ཁང་གིས་གནས་ཚུལ་རྩད་ཞིབ་ཁུངས་འཚོལ་བྱས་རྗེས། གནས་ཚུལ་ཚབས་ཆེ་ཆུང་ལ་གཞིགས་ཏེ་དེ་ཉིད་བཅོས་སྒྲིག་གམ་ཡང་ན་མི་དགོས་པ་བཟོ་རྒྱུའི་ཐག་གཅོད་དགོས་པ་དང་འབྲེལ་རང་ལས་རིམ་པ་གཉིས་ཀྱིས་མཐོ་བའི་ཏང་གི་ཨུ་ཡོན་ལྷན་ཁང་ལ་ཞིབ་བཤེར་ཆོག་མཆན་ཞུས་ནས་ལག་ལེན་བསྟར་རྒྱུའི་ཁྱབ་བསྒྲགས་དངོས་སུ་བྱེད་དགོས།

ལེའུ་བརྒྱད་པ། ཏང་གི་སྒྲིག་ཁྲིམས་ཞིབ་བཤེར་ལས་ཁུངས།

དོན་ཚན་ཞེ་ལྔ་པ། ཏང་གི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་ཏང་གི་ཀྲུང་དབྱང་ཨུ་ཡོན་ལྷན་ཁང་གི་འགོ་ཁྲིད་འོག་ལས་ཀ་བྱ་རྒྱུ། ཏང་གི་ས་གནས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་དང་གཞི་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་དང་གོང་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་འགོ་ཁྲིད་ཉིས་བརྩེགས་འོག་ལས་ཀ་བྱ་རྒྱུ། གོང་རིམ་ཏང་གི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་འོག་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་འགོ་ཁྲིད་བྱེད་ཤུགས་ཆེ་རུ་གཏོང་དགོས།

ཏང་གི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་གི་སྐབས་རེའི་འགན་འཁུར་ཡུན་ཚད་ནི་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གི་འགན་འཁུར་ཡུན་ཚད་དང་འདྲ་མཚུངས་ཡིན།

ཏང་གི་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཀྱིས་རྒྱུན་ལས་ཨུ་ཡོན་ལྷན་ཁང་དང་ཧྲུའུ་ཅི་རྒན་གཞོན་འདེམས་བསྐོ་བྱེད་པ་དང་སྦྲགས་ཏང་གི་ཀྲུང་དབྱང་ཨུ་ཡོན་ལྷན་ཁང་ལ་ཆོག་མཆན་ཞུ་རྒྱུ། ཏང་གི་ས་གནས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་གི་ཚང་འཛོམས་གྲོས་ཚོགས་ཀྱིས་རྒྱུན་ལས་ཨུ་ཡོན་ལྷན་ཁང་དང་ཧྲུའུ་ཅི་རྒན་གཞོན་འདེམས་བསྐོ་བྱེད་པ་དང་སྦྲགས་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ནས་གྲོས་འཆམ་བྱས་རྗེས་གོང་རིམ་ཏང་གི་ཨུ་ཡོན་ལྷན་ཁང་ལ་ཆོག་མཆན་ཞུ་རྒྱུ། ཏང་གི་གཞི་རིམ་ཨུ་ཡོན་ལྷན་ཁང་དུ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་འཛུགས་རྒྱུའམ་ཡང་ན་སྒྲིག་ཁྲིམས་ཞིབ་བཤེར་ཨུ་ཡོན་བསྐོ་གཞག་གང་བྱ་རྒྱུ་ནི་དེ་ལས་རིམ་པ་གཅིག་གིས་མཐོ་བའི་ཏང་གི་རྩ་འཛུགས་ཀྱིས་གནས་ཚུལ་དངོས་ལ་གཞིགས་ནས་ཐག་གཅོད་རྒྱུ། ཏང་གི་སྤྱི་ཁྱབ་ཀྲི་པུའུ་ཨུ་ཡོན་ལྷན་ཁང་དང་ཀྲི་པུའུ་ཨུ་ཡོན་ལྷན་ཁང་དུ་སྒྲིག་ཁྲིམས་ཞིབ་བཤེར་ཨུ་ཡོན་བསྐོ་གཞག་བྱ་རྒྱུ།

ཏང་གི་ཀྲུང་དབྱང་དང་ས་གནས་ཀྱི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་རང་དང་རིམ་པ་མཉམ་པའི་ཏང་དང་རྒྱལ་ཁབ་ཀྱི་ལས་ཁུངས་ལ་ཕྱོགས་ཡོངས་ནས་ཏང་གི་སྒྲིག་ཁྲིམས་ཞིབ་བཤེར་ཚོ་ཆུང་མངགས་གཏོང་བྱ་རྒྱུ། གཏན་འབེབས་བཞིན་འབྲེལ་ཡོད་ཀྱི་གཞུང་ཁོངས་ཁེ་ལས་དང་བྱ་གཞག་ཚན་པར་ཏང་གི་སྒྲིག་ཁྲིམས་ཞིབ་བཤེར་ཚོ་ཆུང་མངགས་གཏོང་བྱེད་དགོས། སྒྲིག་ཁྲིམས་ཞིབ་བཤེར་ཚོ་ཆུང་གི་འགོ་འཛིན་བཅའ་སྡོད་ཚན་པ་ཡི་ཏང་གི་འགོ་ཁྲིད་རྩ་འཛུགས་ཀྱི་འབྲེལ་ཡོད་གྲོས་ཚོགས་ལ་ཞུགས་དགོས། ཁོང་ཚོའི་ལས་ཀར་ཚན་པ་དེའི་ཏང་གི་འགོ་ཁྲིད་རྩ་འཛུགས་ཀྱིས་ངེས་པར་དུ་རྒྱབ་སྐྱོར་བྱེད་དགོས།

དོན་ཚན་ཞེ་དྲུག་པ། ཏང་གི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་ནི་ཏང་ནང་ལྟ་སྐུལ་ཆེད་སྒྲུབ་འགན་ཁུར་ལས་ཁུངས་ཡིན་ཞིང་། དེའི་ལས་འགན་གཙོ་བོ་ནི། ཏང་གི་སྒྲིག་ཡིག་དང་ཏང་ནང་གི་ཁྲིམས་སྲོལ་གཞན་དག་རྣམས་སྲུང་སྐྱོང་བྱ་རྒྱུ་དང་། ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས། གྲོས་ཆོད་བཅས་ལག་བསྟར་བྱས་ཚུལ་ལ་ཞིབ་བཤེར་བྱ་རྒྱུ། ཏང་གི་ཨུ་ཡོན་ལྷན་ཁང་ལ་གཞོགས་འདེགས་བྱས་ནས་ཕྱོགས་ཡོངས་ནས་ཏང་ནན་པོ་སྐྱོང་བར་སྐུལ་འདེད་དང་། ཏང་སྲོལ་འཛུགས་སྐྱོང་དང་རུལ་སུངས་ལ་ངོ་རྒོལ་ལས་ཀར་སྒྲིག་འཛུགས་མཐུན་སྦྱོར་བྱེད་དགོས། ཏང་དང་རྒྱལ་ཁབ་ཀྱི་ལྟ་སྐུལ་མ་ལག་འཐུས་ཚང་གཏོང་བར་སྐུལ་འདེད་གཏོང་དགོས་པ་བཅས་བྱ་རྒྱུ་དེ་ཡིན།

ཏང་གི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་གི་འགན་འཁྲི་ནི་ལྟ་སྐུལ་དང་། སྒྲིག་ཁྲིམས་ལག་བསྟར། འགན་འཁྲི་རྩད་གཅོད་བཅས་བྱ་རྒྱུ་དེ་ཡིན་ཞིང་། ཏང་ཡོན་རྣམས་ལ་རྟག་པར་སྒྲིག་ཁྲིམས་བརྩི་སྲུང་བྱ་རྒྱུའི་སྐོར་གྱི་སློབ་གསོ་གཏོང་བ་དང་། ཏང་གི་སྒྲིག་ཁྲིམས་སྲུང་སྐྱོང་བྱ་རྒྱུའི་སྐོར་གྱི་ཆོད་དོན་འཇོག་དགོས་པ་དང་། ཏང་གི་རྩ་འཛུགས་དང་ཏང་ཡོན་འགོ་ཁྲིད་ལས་བྱེད་པའི་འགན་འཁྲི་འཁུར་ཚུལ་དང་འགན་དབང་སྤྱོད་ཚུལ་ལ་ལྟ་སྐུལ་དང་། ཏང་ཡོན་དང་མང་ཚོགས་ཀྱིས་ཉེས་འདོན་དང་ཐེར་འདོན་བྱས་པའི་གནད་དོན་བདག་སྤྲོད་དང་ཐག་གཅོད། ཁ་བརྡ་བྱས་ནས་དྲན་སྐུལ་བྱེད་ཅིང་སྐོང་འདྲི་དང་ཡིག་བསྐུར་འདྲི་རྩད་བཅས་བྱེད་པ། ཏང་གི་རྩ་འཛུགས་དང་ཏང་ཡོན་གྱིས་ཏང་གི་སྒྲིག་ཡིག་དང་ཏང་ནང་གི་ཁྲིམས་སྲོལ་གཞན་དག་དང་འགལ་བའི་གྱོད་དོན་ཅུང་གལ་ཆེ་བའམ་རྙོག་དྲ་ཆེ་བ་རྣམས་ལ་ཞིབ་བཤེར་དང་ཐག་གཅོད་བྱས་ནས་གྱོད་དོན་དེ་ཚོའི་ནང་ཐེ་བའི་ཏང་ཡོན་ལ་ཆད་པ་གཅོད་རྒྱུའམ་ཆད་པ་ཕྱིར་འཐེན། འགན་འཁྲི་རྩད་གཅོད་དམ་ཁག་འགན་བདའ་འདེད་བྱ་རྒྱུའི་གྲོས་འགོ་འདོན་པ། ཏང་ཡོན་གྱིས་ཞུ་གཏུག་དང་རྒྱུ་མཚན་ཞུ་འབུལ་བྱེད་རིགས་བདག་སྤྲོད། ཏང་ཡོན་གྱི་ཁེ་དབང་འགན་ལེན་བཅས་བྱེད་དགོས།

སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་གིས་གྱོད་དོན་ཧ་ཅང་གལ་ཆེ་བའམ་ཡང་ན་རྙོག་དྲ་ཆེ་བ་རྣམས་ཐག་གཅོད་བྱེད་སྐབས་བྱུང་བའི་གནད་དོན་དང་ཐག་བཅད་འབྲས་དེ་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ལ་སྙན་སེང་ཞུ་དགོས། ཏང་གི་ས་གནས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་དང་གཞི་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་དུས་མཚུངས་སུ་གོང་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་སྙན་སེང་ཞུ་དགོས།

སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་གིས་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གི་ཨུ་ཡོན་ལ་ཏང་གི་སྒྲིག་ཁྲིམས་དང་འགལ་བའི་བྱ་སྤྱོད་གནས་པ་ཤེས་ན། སྔོན་ལ་བདེན་མིན་ཞིབ་དཔྱད་རགས་ཙམ་བྱས་ཆོག གལ་སྲིད་གྱོད་དོན་ཐོ་འགོད་ཀྱིས་ཞིབ་བཤེར་བྱ་དགོས་པ་འདུག་ན་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ལ་སྙན་སེང་ཞུ་བ་དང་དུས་མཚུངས་རང་ལས་རིམ་པ་གཅིག་གིས་མཐོ་བའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་སྙན་སེང་ཞུ་དགོས། རྒྱུན་ལས་ཨུ་ཡོན་དང་འབྲེལ་བ་ཡོད་པ་རྣམས་རང་ལས་རིམ་པ་གཅིག་གིས་མཐོ་བའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་སྙན་ཞུ་ཕུལ་རྗེས་རང་ལས་རིམ་པ་གཅིག་གིས་མཐོ་བའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་སྔོན་ལ་བདེན་མིན་ཞིབ་དཔྱད་རགས་ཙམ་བྱེད་དགོས། ཞིབ་བཤེར་བྱེད་དགོས་པ་འདུག་ན་རང་ལས་རིམ་པ་གཅིག་གིས་མཐོ་བའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ལ་ཆོག་མཆན་ཞུ་དགོས།

དོན་ཚན་ཞེ་བདུན་པ། གོང་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་འོག་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ལས་ཀར་ཞིབ་བཤེར་བྱེད་པའི་དབང་ཆ་ཡོད་པ་མ་ཟད། འོག་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་གྱོད་དོན་ལ་ཆོད་དོན་བཞག་པའི་རིགས་ལ་ཆོག་མཆན་འགོད་པའམ་དེ་སྒྱུར་བའི་དབང་ཆའང་ཡོད། གལ་སྲིད་སྒྱུར་རྩིས་ཡོད་པའི་འོག་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་དེའི་ཆོད་དོན་ལ་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གི་ཆོག་མཆན་ཐོབ་པ་ཡིན་ན། བསྒྱུར་དོན་དེར་ངེས་པར་དུ་དེ་ལས་རིམ་པ་གཅིག་གིས་མཐོ་བའི་ཏང་གི་ཨུ་ཡོན་ལྷན་ཁང་གི་ཆོག་མཆན་ཐོབ་དགོས།

ཏང་གི་ས་གནས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་རིམ་པ་ཁག་དང་གཞི་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གིས་གྱོད་དོན་ཐག་བཅད་པའི་ཆོད་དོན་ཐད་བསམ་འཆར་མི་མཐུན་པ་ཡོད་ན། རང་ལས་རིམ་པ་གཅིག་གིས་མཐོ་བའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་བསྐྱར་ཞིབ་གནང་རོགས་ཞུས་ཆོག་པ་དང་། གལ་སྲིད་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་ངམ་དེའི་ཁོངས་མིར་ཏང་གི་སྒྲིག་ཁྲིམས་དང་འགལ་བའི་གནས་ཚུལ་ཡོད་པ་ཤེས་རུང་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གིས་ཐག་གཅོད་མི་བྱེད་པའམ་ཡང་ན་ཐག་གཅོད་ཡང་དག་པ་མི་བྱེད་པའི་སྐབས་སུ་གོང་རིམ་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་རྒྱུ་མཚན་ཞུ་འབུལ་བྱས་ནས་ཐག་གཅོད་གནང་རོགས་ཞུས་ཆོག

ལེའུ་དགུ་པ། ཏང་ཙུའུ།

དོན་ཚན་ཞེ་བརྒྱད་པ། ཀྲུང་དབྱང་དང་ས་གནས་ཀྱི་རྒྱལ་ཁབ་ལས་ཁུངས་དང་། མི་དམངས་ཚོགས་པ། དཔལ་འབྱོར་རྩ་འཛུགས། རིག་གནས་རྩ་འཛུགས། ཏང་གི་རྩ་འཛུགས་མ་ཡིན་པའི་འགོ་ཁྲིད་ལས་ཁུངས་གཞན་དག་བཅས་ཀྱི་ནང་དུ་ཏང་ཙུའུ་བཙུགས་ཆོག ཏང་ཙུའུ་ཡིས་འགོ་ཁྲིད་ནུས་པ་འདོན་སྤེལ་བྱེད་དགོས། ཏང་ཙུའུ་ཡི་ལས་འགན་གཙོ་བོ་ནི་ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས་བཅས་ལག་ལེན་མཐར་ཕྱིན་བྱེད་པའི་འགན་འཁུར་རྒྱུ་དང་། རང་གི་སྡེ་ཚན་གྱི་ཏང་འཛུགས་སྐྱོང་ལ་འགོ་ཁྲིད་བྱེད་ཤུགས་ཆེ་རུ་བཏང་སྟེ་ཕྱོགས་ཡོངས་ནས་ཏང་ནན་པོ་སྐྱོང་བའི་འགན་འཁྲི་འཁུར་རྒྱུ། རང་གི་སྡེ་ཚན་གྱི་གནད་དོན་གལ་འགངས་ཆེ་རིགས་གྲོས་བསྡུར་དང་ཐག་གཅོད་རྒྱུ། ལས་བྱེད་པའི་དོ་དམ་ལས་ཀ་ལེགས་པར་བསྒྲུབ་རྒྱུ། གཞི་རིམ་ཏང་གི་རྩ་འཛུགས་གསར་འཛུགས་དང་ལེགས་སྒྲིག་དང་། ཏང་ཡོན་འཕེལ་རྒྱས་དང་། ཏང་ཡོན་ལ་ཆད་པ་གཅོད་རྒྱུ་སོགས་དོན་དག་གལ་འགངས་ཆེ་རིགས་གྲོས་བསྡུར་དང་ཐག་གཅོད་རྒྱུ། ཏང་ཕྱིའི་ལས་བྱེད་པ་དང་མང་ཚོགས་ལ་མཐུན་སྒྲིལ་བྱས་ནས་ཏང་དང་རྒྱལ་ཁབ་ཀྱིས་སྤྲད་པའི་ལས་འགན་ལེགས་གྲུབ་བྱ་རྒྱུ། ལས་ཁུངས་དང་ཐད་གཏོགས་སྡེ་ཚན་གྱི་ཏང་གི་རྩ་འཛུགས་ཀྱི་ལས་ཀར་འགོ་ཁྲིད་བྱ་རྒྱུ་བཅས་ཡིན།

དོན་ཚན་ཞེ་དགུ་པ། ཏང་ཙུའུ་ཡི་ཁོངས་མི་ནི་ཏང་ཙུའུ་འཛུགས་རྒྱུར་ཆོག་མཆན་འགོད་མཁན་ཏང་གི་རྩ་འཛུགས་ཀྱིས་གཏན་འཁེལ་བྱ་རྒྱུ་དང་། ཏང་ཙུའུ་ཡི་ནང་ཧྲུའུ་ཅི་བཀོད་སྒྲིག་བྱ་རྒྱུ་དང་། དགོས་པ་བྱུང་ཚེ་ཧྲུའུ་ཅི་གཞོན་པའང་བཀོད་སྒྲིག་བྱས་ཆོག

ཏང་ཙུའུ་ཡིས་ངེས་པར་དུ་རང་ཉིད་བཙུགས་འཐུས་ཀྱི་ཆོག་མཆན་འགོད་མཁན་ཏང་གི་རྩ་འཛུགས་ཀྱི་འགོ་ཁྲིད་ལ་བརྩི་བཀུར་ཞུ་དགོས།

དོན་ཚན་ལྔ་བཅུ་པ། ཁོངས་གཏོགས་པའི་ཚན་པ་ལ་གཅིག་སྡུད་གཅིག་གྱུར་གྱི་འགོ་ཁྲིད་བྱེད་པའི་རྒྱལ་ཁབ་ལས་དོན་ཚན་པ་དང་འབྲེལ་ཡོད་ཚན་པའི་འགོ་ཁྲིད་ཚན་ཁག་ནང་། ཏང་ཨུད་བཙུགས་ཆོག་ཅིང་། ཏང་ཨུད་འགྲུབ་སྟངས་དང་དེའི་འགན་དབང་། ལས་འགན་བཅས་ནི་ཀྲུང་དབྱང་གིས་ལོགས་སུ་གཏན་འབེབས་བྱ་རྒྱུ།

ལེའུ་བཅུ་པ། ཏང་དང་གུང་ཁྲན་རིང་ལུགས་གཞོན་ནུ་ཚོགས་པའི་བར་གྱི་འབྲེལ་བ།

དོན་ཚན་ང་གཅིག་པ། ཀྲུང་གོའི་གུང་ཁྲན་རིང་ལུགས་གཞོན་ནུ་ཚོགས་པ་ནི་ཀྲུང་གོ་གུང་ཁྲན་ཏང་གིས་འགོ་ཁྲིད་པའི་སྔོན་ཐོན་གཞོན་ནུ་རྣམས་ཀྱི་མང་ཚོགས་ཀྱི་ཚོགས་པ་ཞིག་དང་། རྒྱ་ཆེའི་གཞོན་ནུ་རྣམས་ཀྱིས་ལག་ལེན་དངོས་ཀྱི་ནང་དུ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དང་གུང་ཁྲན་རིང་ལུགས་སློབ་སྦྱོང་བྱེད་སའི་སློབ་གྲྭ ཏང་གི་ལས་རོགས་པ་དང་རྗེས་གྲབས་དམག་བཅས་ཡིན། གུང་གཞོན་ཚོགས་པའི་ཀྲུང་དབྱང་ཨུ་ཡོན་ལྷན་ཁང་གིས་ཏང་ཀྲུང་དབྱང་ཨུ་ཡོན་ལྷན་ཁང་གི་འགོ་ཁྲིད་དང་དུ་ལེན་དགོས། གུང་གཞོན་ཚོགས་པའི་ས་གནས་ཀྱི་རྩ་འཛུགས་རིམ་པ་ཁག་གིས་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་གི་འགོ་ཁྲིད་དང་ལེན་བྱ་རྒྱུ་དང་ཆབས་ཅིག་ཏུ་གུང་གཞོན་ཚོགས་པའི་གོང་རིམ་རྩ་འཛུགས་ཀྱི་འགོ་ཁྲིད་དང་ལེན་བྱ་རྒྱུ།

དོན་ཚན་ང་གཉིས་པ། ཏང་གི་ཨུ་ཡོན་ལྷན་ཁང་རིམ་པ་ཁག་གིས་གུང་གཞོན་ཚོགས་པར་འགོ་ཁྲིད་བྱ་རྒྱུར་ཤུགས་སྣོན་རྒྱག་དགོས་པ་དང་། གཞོན་ནུ་ཚོགས་པའི་ལས་བྱེད་པ་གདམ་གསེས་དང་གསོ་སྦྱོང་བྱ་རྒྱུར་ཡིད་འཇོག་བྱེད་དགོས། གུང་གཞོན་ཚོགས་པས་རྒྱ་ཆེའི་གཞོན་ནུའི་ཁྱད་ཆོས་དང་དགོས་མཁོར་གཞིགས་ཏེ་སྐྱེ་སྟོབས་ཀྱི་དཔལ་འབར་ཞིང་གསར་སྐྲུན་བྱེད་ཤུགས་ཆེན་པོ་ལྡན་པའི་སྒོ་ནས་ལས་ཀ་བྱེད་པར་ཏང་གིས་རྒྱབ་སྐྱོར་མཐའ་གཅིག་ཏུ་བྱས་ཏེ་གཞོན་ནུ་ཚོགས་པའི་འཕྲལ་སྒྲུབ་རུ་ཁག་གི་ནུས་པ་དང་རྒྱ་ཆེའི་གཞོན་ནུ་དང་འབྲེལ་འདྲིས་བྱེད་པའི་ཟམ་པ་ལྟ་བུའི་ནུས་པ་འདོན་སྤེལ་གང་ལེགས་བྱེད་དགོས།

རྫོང་རིམ་པ་དང་རྫོང་རིམ་པ་མན་གྱི་གཞོན་ནུ་ཚོགས་པའི་ཨུ་ཡོན་ལྷན་ཁང་རིམ་པ་ཁག་གི་ཧྲུའུ་ཅི་དང་། ཁེ་ལས་དང་བྱ་ལས་སྡེ་ཚན་གྱི་གཞོན་ནུ་ཚོགས་པའི་ཨུ་ཡོན་ལྷན་ཁང་གི་ཧྲུའུ་ཅི་ནི་ཏང་ཡོན་ཡིན་ན་རང་དང་རིམ་པ་མཉམ་པའི་ཏང་གི་ཨུ་ཡོན་ལྷན་ཁང་དང་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་སུ་ཟུར་ཞུགས་བྱས་ཆོག

ལེའུ་བཅུ་གཅིག་པ། ཏང་རྟགས་དང་ཏང་གི་དར་ཆ།

དོན་ཚན་ང་གསུམ་པ། ཀྲུང་གོ་གུང་ཁྲན་ཏང་གི་ཏང་རྟགས་ནི་ཟོར་བ་དང་ཐོ་བ་ལས་གྲུབ་པའི་རི་མོ་ཡིན།

དོན་ཚན་ང་བཞི་པ། ཀྲུང་གོ་གུང་ཁྲན་ཏང་གི་དར་ཆ་ནི་དར་ཆའི་ངོས་སུ་ཏང་རྟགས་ཀྱི་རི་མོ་གསེར་མདོག་ཅན་དྲུབས་པའི་དར་དམར་ཡིན།

དོན་ཚན་ང་ལྔ་པ། ཀྲུང་གོ་གུང་ཁྲན་ཏང་གི་ཏང་རྟགས་དང་ཏང་གི་དར་ཆ་ནི་ཀྲུང་གོ་གུང་ཁྲན་ཏང་གི་རྟགས་མཚན་དང་མཚོན་རྟགས་ཡིན། ཏང་གི་རྩ་འཛུགས་རིམ་པ་ཁག་དང་ཏང་ཡོན་ཚང་མས་ཏང་རྟགས་དང་ཏང་གི་དར་ཆའི་བརྗིད་ཉམས་སྲུང་སྐྱོང་བྱེད་དགོས། གཏན་འབེབས་ལྟར་ཏང་རྟགས་དང་ཏང་གི་དར་ཆ་བཟོ་བ་དང་བེད་སྤྱོད་བྱེད་དགོས།