ཞོགས་པའི་ཇ་ཡུན་གསར་འགྱུར།

རྩོམ་སྒྲིག དམ་ཆོས་བསམ་འགྲུབ། ལོ་ཙཱ། ཁོན་ཐར་ཚེ་རིང་།  ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས། བཤེར་འབེབས། རིན་ཆེན་ཚེ་རིང་།

གསར་འགྱུར་གལ་ཆེན།

• ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་རྒྱལ་ཁབ་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཚེས6ཉིན་གྱི་ཕྱི་དྲོར་རྒྱལ་ཡོངས་སྲིད་གྲོས་སྐབས་བཅུ་བཞི་བའི་གྲོས་ཚོགས་དང་ཐེངས་པའི་དམངས་གཙོ་རྒྱལ་འཛུགས་དང་བཟོ་ཚོང་མཉམ་འབྲེལ་ཚོགས་པའི་ཨུ་ཡོན་ལ་ཁམས་འདྲི་གནང་བ་མ་ཟད། བསམ་འཆར་དང་གྲོས་གཞི་ལ་ཉན།

• རྒྱལ་ཁབ་འཕེལ་བཅོས་ཨུས་ཚེས6ཉིན་བསྟན་དོན། ཀྲུང་གོའི་འབྲུ་རིགས་ཚོང་རར་མཁོ་སྤྲོད་འདང་ངེས་དང་འཁོར་སྐྱོད་བརྟན་འཇགས་ཡིན་པའི་རྣམ་པ་བཟང་བོ་རྒྱུན་འཁྱོངས་བྱས་ཡོད།

• ཉེ་ལམ། ཆེས་མཐོའི་ཞིབ་དཔྱོད་ཁང་གིས་ཞིབ་དཔྱོད་ལས་ཁུངས་ཡོངས་ཀྱིས་ཁྱོན་ཡོངས་ནས་བུད་མེད་ཀྱི་ཁེ་དབང་སྲུང་སྐྱོབ་བྱེད་དགོས་པའི་བླང་བྱ་གསལ་བོར་བཏོན།

• མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུའི་གནས་ཚུལ་ལྟར་ན། ཟླ2པའི་ཚེས28ཉིན་བར་དུ། དཔྱིད་རླུང་བྱེད་སྒོར་རིགས་སྣ་ཚོགས་ཀྱི་གདན་ཞུའི་བྱེད་སྒོ་ཁྲི4.6སྤེལ་བ་དང་། ལས་གནས་བྱེ་བ3དང་ས་ཡ2ཁྱབ་བསྒྲགས་བྱས།

• ཕྱི་འབྲེལ་པུས་ཚེས6ཉིན་བསྟན་དོན། ཚད་བཀག་དང་རྡུང་གནོན་བྱས་པས་ཀྲུང་གོའི་འཕེལ་རྒྱས་ལ་བཀག་འགོག་བྱེད་མི་ཐུབ་པ་དང་། དེས་ཀྲུང་གོའི་རང་བདག་རང་བཙན་དང་ཚན་རྩལ་གསར་གཏོད་ཀྱི་སེམས་ཐག་ཇེ་བརྟན་དང་ནུས་པ་ཇེ་མཐོར་འགྲོ་རུ་འཇུག་ངེས།

  
  

• ཚེས6ཉིན་སྤེལ་བའིU20སྐྱེས་པའི་རྐང་རྩེད་སྤོ་ལོའི་ཡ་གླིང་རྟགས་མའི་ཚོ་ཆུང་འགྲན་བསྡུར་གྱིDརིམ་པའི་རེས་སྐོར་གཉིས་པའི་འགྲན་བསྡུར་ཁྲོད། ཀྲུང་གོ་རུ་ཁག་གིས2：0སྐར་འབྲས་ཀྱིས་ཧྲ་ཐི་རུ་ཁག་ལས་རྒྱལ་བ་དང་། ཚོ་ཆུང་འགྲན་བསྡུར་གྱི་རྒྱལ་ཁ་ཐོག་མ་བླངས།

སྤྱི་ཚོགས།

• ཚེས9ཉིན་ནས་ཚེས10བར། ཧྭ་བྱང་དང་ནུབ་བྱང་ས་ཁུལ་གྱི་ཤར་རྒྱུད་དང་དེའི་ལྷོ་རྒྱུད་ས་ཁུལ་ཀྱི་ཆེས་མཐོ་བའི་དྲོད་ཚད20℃ཡན་ལ་སླེབས་རྒྱུ་རེད།

• ཀྲུང་གོའི་ཚོང་ལས་མཉམ་འབྲེལ་ཚོགས་པས་ཁྱབ་བསྒྲགས་བྱས་པའི་གཞི་གྲངས་ལྟར་ན། རང་རྒྱལ་གྱི་ཟླ3པའི་སིལ་འཚོང་ལས་རིགས་ཀྱི་འཕེལ་ཁའི་སྟོན་གྲངས50.6%ཡིན་པ་དང་། གདུབ་བསྡུར་0.3%ཙམ་འཕར།

• ཉེ་སྔོན། ཧུའུ་ཡུས་རུང་མྱུར་བགྲོད་ལྕགས་ལམ་གྱི་ཀྲུང་ཞང་ཧན་གཙང་བོའི་ལྕགས་ལམ་གྱི་ཟམ་ཆེན་གྱི་འདེགས་སྐྱོར་ཀ་བ་དངོས་སུ་བཙུགས།

  
  

• ཉེ་ལམ། རྒྱལ་ཡོངས་ཀྱི་གོམ་འགྲན་འགྲན་བསྡུར་གྱི་འགྲན་ཐེངས་དང་པོ་ཨན་ཧུའེ་ཧོང་ཧྲན་ནས་མཇུག་བསྡུས་པ་དང་། ཁྲུང་ཆིང་རུ་ཁག་གི་ཧི་ཞང་ཧོང་གིས་དུས་ཚོད2དང་སྐར་མ22སྐར་ཆ55ཡི་སྐར་འབྲས་ཀྱིས་སྐྱེས་པ་དར་མའི་ཚན་སྐོར་གྱི་སྤྱི་ལེ35རྣམ་གྲངས་ཀྱི་ཡ་གླིང་གི་ཟིན་ཐོ་གསར་བ་བྲིས།

• ཉེ་ལམ། སི་ཁྲོན་གྱི་གཟི་ཚ་སྡེ་དགུ་སོགས་ལྗོངས་ཁུལ་མང་པོས་བུད་མེད་དུས་ཆེན་གྱི་ཉིན་དེར་བུད་མེད་གནས་སྐོར་བར་སྒོ་འཛིན་མེད་པར་བྱས།

  
  

• ཧུའུ་ནན་ཡུའེ་དབྱང་གི་འཁོར་སྲུང་བ་ཞིག་གློ་བུར་དུ་ནད་འཕར་ནས་རྒྱལ་བར་གྱུར་བ་དང་། ལམ་དུ་འགྲོ་བཞིན་པའི་མཐོ་འབྲིང་སློབ་མ་ཀྲུང་ཝན་ཝན་དང་ཏེ་ཞིན་ལི་གཉིས་ཀྱིས་མྱུར་དུ་120ལ་ཁ་པར་བཏང་ནས། མྱུར་སྐྱོབ་རླངས་འཁོར་ཡོང་རྗེས་ད་གཟོད་ཡུལ་དངོས་ནས་ཁ་བྲལ།

སྲིད་ཇུས།

• ལུའོ་ཉིང་གིས་གསལ་བོར་བསྟན་དོན། ཞིང་ཆེན་ནང་ཁུལ་ནས་ཐོག་དང་པོར་ལས་བཏོད་བྱས་ཏེ་ལས་གཏོད་ཁག་ཐེག་དངུལ་བུན་བླངས་པའི་མཐོ་རིམ་སློབ་གྲྭའི་མཐར་ཕྱིན་སློབ་མར། ཐེངས་གཅིག་གི་སྒོར3000ལས་མི་དམའ་བའི་ལས་གཏོད་ཁ་གསབ་མ་དངུལ་སྟེར་རྒྱུ།

• ཧྲང་ཧེ་ཡིས་འཆར་གཞི་འགྲེམས་སྤེལ་བྱས་ཏེ། ལས་རིགས་ལག་རྩལ་གྱི་འཛིན་ཡིག་བླངས་པའི་དབང་བོ་སྐྱོན་ཅན་ལ་ལས་རིགས་རྩལ་ནུས་ཇེ་མཐོར་གཏོང་བའི་ཁ་གསབ་མ་དངུལ་སྟེར་རྒྱུ།

• ཀྲེ་ཅང་ཉིང་པའོ་ཡིས་གསལ་བོར་བསྟན་དོན། གསར་སྐྱེས་བྱིས་པའི་ནད་རིགས་གྲལ་བཤེར་ཞབས་ཞུའི་གྲོན་དངུལ་གྱི་འགན་སྲུང་ཚད་གཞི་མི་རེར་སྒོར153ནས་མི་རེར་སྒོར328དུ་ཇེ་མཐོར་གཏོང་རྒྱུ།

འཚོ་བའི་དྲན་སྐུལ།

• དེ་རིང་གི་གནམ་གཤིས། ནང་སོག་གི་ཤར་བྱང་རྒྱུད་དང་ཧའེ་ལུང་ཅང་གི་དབུས་བྱང་རྒྱུད། ཞིན་ཅང་གི་བྱང་རྒྱུད་སོགས་ཀྱི་ས་ཆ་ཁ་་ཤས་ལ་ཁངས་ཆུང་ཆུང་ནས་འབྲིང་ཙམ་འབབ་རྒྱུ་དང་ཡང་ན་ཁངས་ཆར་འདྲེས་མ་འབབ་རྒྱུ་རེད། དེའི་ནང་། ཧའེ་ལུང་ཅང་གི་བྱང་རྒྱུད་དང་ཞིན་ཅང་ཨ་ལི་ཐའེ་སོགས་ཀྱི་ས་ཆ་ཁ་ཤས་ལ་ཁངས་ཆེན་འབབ་རྒྱུ་རེད། བོད་ལྗོངས་ཀྱི་ཤར་ལྷོ་རྒྱུད་དང་ཧུའུ་པེ་ལྷོ་རྒྱུད་སོགས་ཀྱི་ས་ཆ་ཁ་ཤས་ལ་ཆར་ཆུང་ཆུང་ནས་འབྲིང་ཙམ་འབབ་རྒྱུ་རེད།

•   པེ་ཅིང་། མཐོ་རྒྱུགས་ཀྱི་སློབ་མ་བསྡུ་བའི་ལུས་ཕུང་བརྟག་བཤེར་ལས་དོན་ཟླ3པའི་ཚེས10ཉིན་ནས་ཟླ4པའི་ཚེས10ཉིན་བར་སྤེལ་རྒྱུ་རེད།

• ཧོ་པེ། ཞིང་ཆེན་ཡོངས་ཀྱི་ཆེད་ཁེ་རོགས་སྐྱོར་མ་དངུལ་སྙན་སེང་ཞུ་བའི་བྱ་བ་དེ་རིང་ནས་མགོ་རྩོམ་པ་དང་། ཟླ4པའི་ཚེས6ཉིན་བར་འཕྲུལ་ཐོག་ནས་སྐོང་སྤྲོད་བྱས་ཆོག