སྒྲིག་སྒྱུར། སངས་དོན། ཡོང་ཁུངས། མཚོ་བྱང་སྨྱན་གསར། བཤེར་འབེབས། རིན་ཆེན་ཚེ་རིང་།
ཉེ་ཆར། “བརྩེ་བའི་ལག་རྡང་སྦྲེལ། མ་འོང་མཉམ་དུ་སྐྲུན”ཅེས་པ་བརྗོད་དོན་ཡིན་པའི2023ལོའི་མཚོ་བྱང་ཁུལ་གྱི་ཚོང་འགུགས་མ་འདྲེན་དང་སྤུས་ལེགས་ཐོན་རྫས་འོས་སྦྱོར་ཚོགས་འདུ་དེ་ཧྲན་ཏུང་ཞིང་ཆེན་ཅི་ནན་གྲོང་ཁྱེར་དུ་བདེ་བླག་ངང་འཚོགས། ཁུལ་ཨུའི་ཧྲུའུ་ཅི་ཤ་བོ་སྐྱབས་ཚོགས་འདུར་ཕེབས་ནས་ཤིས་ཚིག་ཕུལ།
ཤ་བོ་སྐྱབས་ཀྱིས་བསྟན་དོན། 2010ལོ་ནས་བཟུང་ཧྲན་ཏུང་ཞིང་ཆེན་གྱིས་ཁྱོན་སྡོམ་མཚོ་བྱང་ཁུལ་ལ་མ་དངུལ་སྒོར་དུང་ཕྱུར25.54བཏང་ནས་ལས་གཞི241ལག་བསྟར་བྱས་པ་དང་། ཏང་སྲིད་ལས་བྱེད་པ་དང་རིགས་སོ་སོའི་ཆེད་མཁས་པ་ཉིས་སྟོང་ལྷག་མཚོ་བྱང་དུ་རིག་སྟོབས་རོགས་སྐྱོར་བྱེད་པར་མངགས་ནས“མཚོ་བྱང་ལ་དགོས་མཁོ་ཅི་ཞིག་ཡོད་ན། ཧྲན་ཏུང་གིས་དེ་བཞིན་དུ་སྐོང་བའི”ཁས་ལེན་དོན་ཐོག་ཏུ་འཁྱོལ་བར་བྱས་ཡོད་ལ། ཧྲན་ཏུང་གི་ལས་རིགས་སོ་སོས་སྒེར་སེམས་མེད་པར་རོགས་རམ་བྱས་པ་མཚོ་བྱང་གི་རིགས་སོ་སོས་མི་དམངས་ཀྱིས་ཡིད་ལ་བརྟན་པོར་བཅངས་ནས་བཀའ་དྲིན་སེམས་སུ་ཉར་ཡོད། ཧྲན་ཏུང་པ་ནི་ལས་ལ་བརྩོན་ཞིང་གཤིས་རྒྱུད་དྲང་བ། ཕྱི་ཐག་རིང་བ། བློ་འཁེལ་ཆོག་པའི་གྲོགས་མཆོག་ཡིན་པས། མཚོ་བྱང་གི་རིགས་སོ་སོའི་མི་དམངས་ཀྱི་ཡིད་དབང་ཅིག་ཅར་དུ་འཕྲོག་ཡོད་པར་བསྟན།
ཤ་བོ་སྐྱབས་ཀྱིས་མཚོ་བྱང་ཁུལ་གྱི་གནས་ཚུལ་ངོ་སྤྲོད་བྱས་ཤིང་། ཁོང་གིས་མཚོ་བྱང་གི་རྒྱབ་ཕྱོགས་སུ་མདོ་ལ་རིང་མོ་ཡོད་ཅིང་། མདུན་ཕྱོགས་སུ་ཁྲི་ཤོར་རྒྱལ་མོ་ཡོད། པང་བར་ཀྲུང་གོའི་རྡུལ་ཕྲན་མཁར་དང་གསེར་དངུལ་ཐང་གསར་བརྗེའི་རྩྭ་ཐང་རུམ་ཡོད་ཅིང་། མདོ་ལ་རིང་མོ་དང་མཚོ་སྔོན་པོ་རྒྱལ་ཁབ་སྤྱི་གླིང་གཉིས་ཀྱི་ལྟེ་བའི་ས་ཁོངས་སུ་གནས་ཡོད། མཚོ་བྱང་ལ་ལོ་རྒྱུས་ཡུན་རིང་ལྡན་པ་དང་རིག་གནས་སྣ་མང་ཡོད་པར་མ་ཟད། སྐྱེ་ཁམས་གནས་བབ་གལ་ཆེན་ལྡན་ཞིང་། ཞིང་ཕྱུགས་དང་གནས་སྐོར་ཐོན་ཁུངས་ཕུན་སུམ་ཚོགས་པོ་ཡོད། ད་ལྟ་རྒྱལ་ཁབ5Aརིམ་པའི་ལྗོངས་ཁུལ2ཡོད་པས“རབ་མཛེས་མཚོ་སྔོན”གྱི་བསྡུས་གཟུགས་སུ་གྲུབ་ཅིང་། “དག་སྣང་མཚོ་བྱང”ཞེས་བརྗོད་ཀྱི་ཡོད། ལོ་རེར་མཚོ་བྱང་ལ་གནས་སྐོར་དུ་ཡོང་མཁན་མི་ཐེངས་ཁྲི1100ལྷག་ཙམ་ཟིན་ལ། 2021ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་མཚོ་བྱང་ལ་གཟིགས་ཞིབ་གནང་བར་ཕེབས་པར་མ་ཟད། 2022ལོའི་ལོ་སར་གྱི་ཤིས་ཚིག་ནང་ཆེད་དུ་རླབས་ཕྲེང་འཕྱུར་བའི་མཚོ་སྔོན་པོའི་སྐོར་གསུངས་ཡོད། མཚོ་བྱང་གི་གསར་བརྗེའི་ཐོན་ཁུངས་ཕུན་སུམ་ཚོགས་ཤིང་། ཀྲུང་གོའི་ཐོག་དང་པོའི་རྡུལ་ཕྲན་མཚོན་ཆ་གནས་འདི་ནས་ཞིབ་འཇུག་དང་གསར་བཟོ་ལེགས་གྲུབ་བྱུང་ཞིང་། “མདེལ་གཉིས་སྐར་གཅིག”གི་རླབས་ཆེའི་སྙིང་སྟོབས་ཀྱི་འབྱུང་གནས་དང་ཀྲུང་ཧྭ་མི་རིགས་ཀྱི་མགོ་བོ་ཡར་ལ་འཇོག་སའི་གནས་མཆོག ཚན་རིག་པའི་སྙིང་སྟོབས་ཀྱི་གྲུབ་ཆ་བཅས་ཡིན་པས་རང་རྒྱལ་གྱི་བསམ་པའི་བཙན་ས་གལ་ཆེན་ཞིག་ཏུ་གྱུར་ཡོད། མཚོ་སྔོན་མདེལ་གཉིས་སྐར་གཅིག་ལས་བྱེད་སློབ་གླིང་དེ་ཀྲུང་དབྱང་རྩ་འཛུགས་པུའུ་ཡིས་ལས་བྱེད་པའི་སློབ་གསོའི་ལས་སྟེགས་ཆེན་པོའི་ནང་བཅུག་པ་དང་། དེ་ནི་མཚོ་སྔོན་ཞིང་ཆེན་གྱི་ཏང་གཤིས་སློབ་གསོའི་ལས་བྱེད་སློབ་གླིང་གཅིག་པུ་ཡིན། མཚོ་བྱང་གི་ཞིང་ཕྱུགས་ཐོན་རྫས་ཀྱི་ཁྱད་ཆོས་མངོན་གསལ་དོད་ཅིང་། བོད་ལུག་དང་ནོར་གནག ནས། ལོག་དཀར། གཟན་རྩྭ་བཅས“ཐོན་ལས་ཆེ་གྲས་ལྔ”དར་སྤེལ་གཏོང་བའི་འཆར་གཞི་ཁྱོན་ཡོངས་ནས་ལག་བསྟར་བྱས་པ་བརྒྱུད“མཚོ་བྱང་རྟགས་ཅན”གྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཀྱི་རྫས་རྟགས་གང་མང་ཞིག་གྲུབ་ཡོད། ཁུལ་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་གནང་སྐབས་འཆར་འགོད་བྱས་པའི་ཐོན་ལས་ཀྱི“གནས་བཞི”འཛུགས་སྐྲུན་བྱེད་པའི་མངགས་བཅོལ་ཐོག་མཐའ་བར་གསུམ་དུ་ཡིད་ལ་བརྟན་པོར་བཅངས་ནས་མཚོ་བྱང་གི་ཐོན་ལས་ཀྱི“གནས་བཞིའི”འཕེལ་རྒྱས་ཀྱི་ཁ་ཕྱོགས་གཏན་འཁེལ་བྱས་ཏེ། དཔལ་འབྱོར་དང་སྤྱི་ཚོགས་ཀྱི་བྱ་གཞག་སོ་སོ་སྤུས་ཚད་མཐོན་པོའི་སྒོ་ནས་འཕེལ་རྒྱས་སུ་འགྲོ་རྒྱུར་སྐུལ་འདེད་བཏང་ཡོད་པར་བཤད།
ཤ་བོ་སྐྱབས་ཀྱིས་ཧྲན་ཏུང་དང་མཚོ་སྔོན་གཉིས་ནི་རྨ་ཆུ་སྔོན་མོ་མཉམ་འཐུང་བྱེད་པའི་ནང་མི་སྤུན་ཟླ་ཡིན། མཚོ་བྱང་གི་འདས་ཟིན་པའི་འཕེལ་རྒྱས་དེ་ཧྲན་ཏུང་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། ཧྲན་ཏུང་མི་དམངས་ཀྱི་བརྩེ་སེམས་ཟབ་མོའི་རོགས་སྐྱོར་དང་ཁ་འབྲལ་ཐབས་མེད། མགོ་འཛུགས་ས་གསར་བའི་ཐོག མཚོ་བྱང་ལ་ཧྲན་ཏུང་གི་ལས་རིགས་སོ་སོའི་མི་སྣའི་རྒྱབ་སྐྱོར་ཤུགས་ཆེན་མཁོ་ལ། མཚོ་བྱང་ལ་ཚོང་ལས་ཀྱི་གོ་སྐབས་མང་པོ་ཡོད་པ་དེ་ནི་ལས་རིགས་སོ་སོས་མ་འཇོག་ལས་གཏོད་བྱ་ཡུལ་ཞིག་ཡིན་པས། འོས་སྦྱོར་ཚོགས་འདུའི་ཚོང་ལས་ཀྱི་གོ་སྐབས་ཆེན་པོའི་ལས་སྟེགས་ལ་བརྟེན་ནས་མཚོ་བྱང་གི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཡག་ཤོས་འོས་སྦྱོར་བྱས་ཏེ། “མཚོ་བྱང་རྟགས་ཅན”གྱི་ཞིང་ཕྱུགས་ཐོན་རྫས་དེ་བས་མང་བ་ཧྲན་ཏུང་གི་ཁྲོམ་རར་བྲིན་ཚོང་ཡོང་བར་བྱ་རྒྱུའི་རེ་བ་བྱེད་ཀྱི་ཡོད་ལ། ཧྲན་ཏུང་ཞིང་ཆེན་གྱི་རྒྱ་ཆེའི་ཚོང་བ་དང་ཁེ་ལས་པ། ལས་རིགས་སོ་སོའི་གྲོགས་པོ་རྣམས་མཚོ་བྱང་ལ་རྟོག་ཞིབ་མཛུབ་ཁྲིད་དང་མ་འཇོག་ལས་གཉེར། ཐུན་མོང་ཐོག་འཕེལ་རྒྱས་གཏོང་བར་ཕེབས་པར་སྙིང་ཐག་པ་ནས་དགའ་བསུ་ཞུ་བ་ཡིན་པར་བཤད།
སྐད་འཕྲིན་སྤྱི་སྟེགས།
དྲ་ཚིགསAPP
iOSAPP