ཅི་ཞིག་ལ་བརྟག་ཐབས་མེད་པའི་སྐྱོན་ཟེར།

རྩོམ་སྒྲིག  དོན་འགྲུབ་མཚོ།   ཡོང་ཁུངས།  བོད་ཀྱི་སྨན་རྩིས་རྒྱུན་ཤེས།   བཤེར་འབེབས།  རིན་ཆེན་ཚེ་རིང་།

བརྟག་ཐབས་མེད་པའི་སྨན་པ་ཡིས། རྟགས་ཉིད་རྟགས་སུ་མི་ཤེས་ཏེ། དུ་བ་རླངས་པར་འཁྲུལ་དང་འདྲ། སྤྲིན་འདུས་ཆར་འབྱུང་ཟེར་བ་ལྟར། མ་ངེས་རྟགས་སུ་བྱེད་པ་ཡོད། ཅེས་གསུངས་པ་སྟེ། འཆད་འགྱུར་གྱི་བརྟག་ཐབས་དེ་ལྟ་བུ་མེད་པའི་སྨན་པ་རྣམས་ཀྱིས་ནི་ནད་རང་རང་གིས་གསལ་བར་བསྟན་པའི་རྟགས་འཁྲུལ་མེད་ཉིད་ཀྱང་རྟགས་དེ་ལྟ་བུ་ཡིན་པར་མི་ཤེས་ཏེ། ཅིའི་ཕྱིར་ཞེ་ན་མེ་འདོད་པའི་སྐྱེས་བུ་འགའ་ཞིག་གིས་དུ་བ་མཐོང་དུ་ཟིན་ཀྱང་། ཆུ་ཆེན་གྱི་རླངས་པའམ་དབྱར་དུས་ཀྱི་རླངས་པ་ཡིན་པ་ལྟར་འཁྲུལ་ནས་མེའི་འབྲས་བུ་མཐོང་ཡང་མེ་མི་རྙེད་པ་དང་འདྲ་ལ། ཡང་ན་དབྱར་དུས་སྤྲིན་གྱི་ཁ་དོག་དལ་བྲེལ་སོགས་ཀྱི་ཤེས་བྱེད་གང་ཡང་མེད་པར་སྤྲིན་འདུས་པ་ཙམ་ལས་དེ་རིང་ངེས་པར་ཆར་འབྱུང་བར་འགྱུར་རོ་ཞེས་ཟེར་བ་ལྟར། ལྟར་སྣང་གི་ནད་རྟགས་མ་ངེས་པ་རེ་ལ་འདི་ནི་ནད་འདིའི་རྟགས་ཡང་དག་པ་ཡིན་ནོ་ཞེས་ཡིད་ཆེས་བྱེད་པ་དག་ཀྱང་ཡོད་དོ།