ནད་ཀྱི་འབྱུང་གཞི་སེམས་ལ་ཐུག་ཅེས་པའི་དོན་ཅི་ཡིན།

རྩོམ་སྒྲིག དོན་འགྲུབ་མཚོ།  ཡོང་ཁུངས། བོད་ཀྱི་སྨན་རྩིས་རྒྱུན་ཤེས།  བཤེར་འབེབས། རིན་ཆེན་ཚེ་རིང་།

རླུང་དང་མཁྲིས་པ་བན་ཀན་ལྡན་འདུས་བཅས། བཞི་བརྒྱ་རྩ་བཞིའི་ནད་རིགས་འགོང་འདྲེ་དེ། ཟག་བཅས་ལུས་དང་སོ་སོར་རབ་གྱེས་ཏེ། འགྲོ་བའི་ལུས་ཁམས་དྭངས་གཙང་སོར་གནས་པའི། སངས་རྒྱས་སྨན་ལྷའི་ཞབས་ལ་སྒོ་གསུམ་འདུད། འདོད་ཡོན་རོ་ཡི་འཆོར་སྒེག་མཛེས་མ་དེས། བདག་རྐྱེན་ལྕེ་ཤེས་རྒྱུན་དུ་བསླད་པའི་མཐུས། བཞི་བརྒྱ་རྩ་བཞིའི་ནད་འབུའི་དཔུང་གི་ཚོགས། དེ་མུར་བཤམས་ནས་དོན་ལྔ་སྣོད་དྲུག་གྲོང་། མཐའ་དཀྲུགས་ཕུ་དཀྲུགས་བྱེད་དེ་སུ་ཡིས་ལན། མི་ནད་ཁ་དང་རྟ་ནད་རྒྱུགས་ནས་ཞེས། ནད་ཀྱི་འབྱུང་རྐྱེན་ཁ་ནས་ཡིན་ལྟར་ཡང་། དེ་ཡི་དབང་འཛིན་སེམས་ཀྱི་ས་སྐྱོང་ཉིད། རྒྱལ་པོ་ངན་རེངས་བཅོས་ཐབས་མི་བྱེད་པར། ཁ་ཙམ་སྲུང་བ་མདོ་མེད་ལས་སུ་གོ། སེམས་ཀྱི་བདག་རྐྱེན་ཉེར་ལེན་སྐྱེད་བྱེད་ཐོག ཕྱི་རོལ་དམིགས་རྐྱེན་ལྷན་ཅིག་རབ་མནན་ན། དོན་ལྔ་སྣོད་དྲུག་མཁར་རྫོང་སྲ་མཁྲེགས་ཀྱང་། ནམ་ཞིག་དགྲ་བོས་འབིགས་ངེས་བློས་བསམས་ཏེ། རྣམ་པ་ཀུན་ཏུ་སེམས་ལ་བྱ་ར་བྱོས། ཞེས་སོ།