སྙིང་ཆུའི་ནད།

རྩོམ་སྒྲིག དོན་འགྲུབ་མཚོ། ཡོང་ཁུངས། རྒྱུན་མཐོང་ནད་རིགས་ཀྱི་སྔོན་འགོག་དང་བདེ་སྲུང་མཛུབ་སྟོན། བཤེར་འབེབས། རིན་ཆེན་ཚེ་རིང་།

རྒྱུ་རྐྱེན།

སྙིང་ཆུའི་ནད་ནི་སྙིང་ཁམས་ལ་ཆུ་སེར་ཞུགས་ནས་དེའི་གྲུབ་ཆུའི་ཆ་ཤས་ལ་ནད་འགྱུར་བྱུང་བའི་ནད་ཅིག་ཡིན་ལ།  སྤྱིར་བཏང་ཆམ་པ་སོགས་ཚ་བའི་ནད་སྙིང་ལ་ཞུགས་ཏེ་རིམ་བཞིན་ཆུ་སེར་བསགས་པ་ཡིན།

ནད་རྟགས།

ནད་འདི་ཐོག་མར་ཞུགས་པའི་སྐབས་སུ་སྣ་སྦུབས་དང་གྲེ་བ་ཚ་ཞིང་ན་བ་དང་།  གྲང་ཤུམ་བྱེད་པ། ཚིགས་གཞི་ན་བ།  ལུས་རྔུབ་བ་སོགས་འབྱུང་བ་དང་།  དེ་ནས་སྙིང་ལ་ཆུ་སེར་ཞུགས་ནས་སྙིང་གཡུགས་པ་དང་།  འཕར་ཚུལ་འཆོལ་བ།  ཁོང་འདར་བ།  གཉིད་ལོག་ལྟ་བུ་སྐེ་དང་མཇིང་བའི་འཕར་རྩ་སྤྲུགས་པ།  ནད་ཚབས་ཆེ་ན་གློ་ལུ་བ་དང་།  དབུགས་གྱེན་དུ་རྩེག་ཅིང་རྔུབ་གཏོང་དཀའ་བ།  ལུད་པ་ཁྲག་ཅན་ལྦུ་གསོབ་ཅན་ལུ་བ།  སྙིང་ཁམས་ཆེར་རྒྱས་པ།  མཆུ་ཏོ་དང་སེན་མོའི་མདོག་སོགས་སྨུག་ནག་ཆགས་པ།  སྙིང་ཤུགས་ཉམས་ནས་རྐང་བོལ་དང་ངར་གདོང་སོགས་སྐྲངས་པ།  ནད་པ་ལ་ལར་རྐང་ལག་གི་རུས་ཚིགས་ན་བ་དང་།  བྲང་ཁར་འབྲུམ་ཐོར་དམར་ལེབ་དོན་པ།  མཆུ་ལ་ཤུ་ཐོར་འདོན་པ།  སེམས་འཚབ་པ།  གཉིད་ཡེར་བ་སོགས་འབྱུང་། 

སྔོན་འགོག 

ངལ་དུབ་ཆེ་མི་རུང་བ་དང་།  ཆམ་པར་འཛེམ་པ།  ཆང་རག་དང་ཕག་ཤ་ལྟ་བུ་ཚིལ་ཞག་ཆེ་བའི་ཟས་རིགས་མི་བསྟེན་པ་དང་།  གང་ཐུབ་ཀྱིས་ངལ་གསོ་དགོས།

གསོ་ཐབས།

བོད་ལུགས་གསོ་རིག་ལྟར་ན།  ཆུ་སེར་སྐེམ་པ་དང་གཉན་ཁ་གཅོག་པ།  རླུང་ཁ་གནོན་པ་བཅས་ཀྱི་ཆེད་དུ་སྨན་ལ་ཏང་ཀུན་བརྒྱད་པ་དང་།  ཨ་གར་བརྒྱད་པ།  སྤོས་དཀར་བཅུ་པ།  ཟངས་ཐལ་ཉེར་ལྔ།  ཨ་གར་ཉི་ཤུ།  ཆབ་འདྲེན་དགུ་པ།  དྭངས་མ་གནས་འཇོག  སེ་འབྲུ་ལྔ་པ་སོགས་རྒྱུན་སྤྱོད་སྨན་སྦྱོར་གང་འཚམ་ལྟར་བསྟེན་པ་དང་།  གལ་ཏེ་དབུགས་འཚངས་ན་རྒུན་འབྲུམ་བདུན་པ་གོང་སྨན་གང་རུང་དང་ལྟག་སྤྲོད་དུ་གཏོང་དགོས།