མཚོ་བྱང་བོད་རིགས་རང་སྐྱོང་ཁུལ་གྱི་རང་སྐྱོང་སྲོལ་ཡིག

རྩོམ་སྒྲིག  སངས་དོན།     ལོ་ཙཱ།  རྡོ་རྗེ་བྱམས།    བཤེར་འབེབས།   རིན་ཆེན་ཚེ་རིང་། 

(1987ལོའི་ཟླ4ཚེས25ཉིན་མཚོ་བྱང་བོད་རིགས་རང་སྐྱོང་ཁུལ་གྱི་སྐབས་བརྒྱད་པའི་མི་དམངས་འཐུས་མི་ཚོགས་ཆེན་གྲོས་ཚོགས་ཐེངས་གཉིས་པའི་སྟེང་གྲོས་འཆམ་བྱུང་ཞིང་། 1987ལོའི་ཟླ7ཚེས18ཉིན་མཚོ་སྔོན་ཞིང་ཆེན་གྱི་སྐབས་དྲུག་པའི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་ཉེར་བདུན་པའི་སྟེང་ཆོག་མཆན་བཀོད་ལ། 2004ལོའི་ཟླ1ཚེས6ཉིན་མཚོ་བྱང་བོད་རིགས་རང་སྐྱོང་ཁུལ་གྱི་སྐབས་བཅུ་གཅིག་པའི་མི་དམངས་འཐུས་མི་ཚོགས་ཆེན་གྲོས་ཚོགས་ཐེངས་ལྔ་བའི་སྟེང་གྲོས་འཆམ་བྱུང་། 2004ལོའི་ཟླ9ཚེས25ཉིན་མཚོ་སྔོན་ཞིང་ཆེན་གྱི་སྐབས་བཅུ་བའི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་གཉིས་པས་ཆོག་མཆན་བཀོད་པའི《མཚོ་བྱང་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་གྱིས〈མཚོ་བྱང་བོད་རིགས་རང་སྐྱོང་ཁུལ་གྱི་རང་སྐྱོང་སྲོལ་ཡིག〉ལ་བཟོ་བཅོས་རྒྱག་རྒྱུའི་སྐོར་གྱི་གཏན་འབེབས》གཞིར་བཟུང་ནས་དག་བཅོས་བྱས། 2020ལོའི་ཟླ4ཚེས1ཉིན་མཚོ་བྱང་བོད་རིགས་རང་སྐྱོང་ཁུལ་གྱི་སྐབས་བཅུ་བཞི་པའི་མི་དམངས་འཐུས་མི་ཚོགས་ཆེན་གྲོས་ཚོགས་ཐེངས་དྲུག་པས་བཟོ་བཅོས་བྱས་ཤིང་།  2020ལོའི་ཟླ6ཚེས10ཉིན་མཚོ་སྔོན་ཞིང་ཆེན་གྱི་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་བདུན་པས་ཆོག་མཆན་བཀོད།)

      དཀར་    ཆག

ལེའུ་དང་པོ།         སྤྱིའི་རྩ་དོན།

ལེའུ་གཉིས་པ།      རང་སྐྱོང་ལས་ཁུངས་དང་ས་གནས་ཀྱི་རྒྱལ་ཁབ་ལས་ཁུངས་གཞན་དག

ལེའུ་གསུམ་པ།      དཔལ་འབྱོར་འཛུགས་སྐྲུན།

ལེའུ་བཞི་པ།         སྤྱི་ཚོགས་བྱ་གཞག

ལེའུ་ལྔ་པ།          སྐྱེ་ཁམས་ཁོར་ཡུག་སྲུང་སྐྱོང་།

ལེའུ་དྲུག་པ།        མི་རིགས་དང་ཆོས་ལུགས་ལས་དོན།

ལེའུ་བདུན་པ།      མི་ཤུགས་ཐོན་ཁུངས།

ལེའུ་བརྒྱད་པ།      ཞར་བྱུང་དོན་ཚན།

ལེའུ་དང་པོ།  སྤྱིའི་རྩ་དོན།

དོན་ཚན་དང་པོ། རྩ་ཁྲིམས་དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་ས་ཁོངས་རང་སྐྱོང་བཅའ་ཁྲིམས》སོགས་ཁྲིམས་ལུགས་ཁྲིམས་སྲོལ་ཀྱི་གཏན་འབེབས་གཞིར་བཟུང་ནས།  མཚོ་བྱང་བོད་རིགས་རང་སྐྱོང་ཁུལ(གཤམ་དུ་བསྡུས་མིང་དུ་རང་སྐྱོང་ཁུལ་ཞེས་འབོད་རྒྱུ)གྱི་དོན་དངོས་ལ་ཟུང་འབྲེལ་བྱས་ཏེ་སྲོལ་ཡིག་འདི་གཏན་འབེབས་བྱས་པ་ཡིན།

དོན་ཚན་གཉིས་པ། རང་སྐྱོང་ཁུལ་ནི་མཚོ་སྔོན་ཞིང་ཆེན་གྱི་མངའ་ཁོངས་སུ་བོད་རིགས་ཀྱིས་ས་ཁོངས་རང་སྐྱོང་ལག་བསྟར་བྱེད་པའི་ས་གནས་ཀྱི་གྲས་ཤིག་ཡིན། 

རང་སྐྱོང་ཁུལ་གྱི་ཁོངས་གཏོགས་སུ་མདའ་བཞི་རྫོང་དང་འཇུ་ལག་ཧེ་རིགས་རང་སྐྱོང་རྫོང་། མདོ་ལ་རྫོང་། རྐང་ཚ་རྫོང་བཅས་ཡོད།

རང་སྐྱོང་ཁུལ་གྱི་ཁུལ་སྲིད་གཞུང་ནི་མདའ་བཞི་རྫོང་གི་ནུབ་མཚོ་གྲོང་རྡལ་དུ་བཙུགས་ཡོད།

དོན་ཚན་གསུམ་པ། རང་སྐྱོང་ཁུལ་གྱི་རང་སྐྱོང་ལས་ཁུངས་ནི(གཤམ་དུ་བསྡུས་མིང་དུ་རང་སྐྱོང་ལས་ཁུངས་ཞེས་འབོད་རྒྱུ) ནི་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་དང་རང་སྐྱོང་ཁུལ་གྱི་མི་དམངས་སྲིད་གཞུང་ཡིན།

དོན་ཚན་བཞི་བ། རང་སྐྱོང་ཁུལ་གྱི་མི་རིགས་ཁག་གི་མི་དམངས་ཀྱིས་ཀྲུང་གོ་གུང་ཁྲན་ཏང་གི་མགོ་ཁྲིད་འོག  མར་ཁེ་སི་ལེ་ཉིན་རིང་ལུགས་དང་མའོ་ཙེ་ཏུང་གི་དགོངས་པ། ཏིན་ཞོ་ཕིན་གྱི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས་མཛུབ་སྟོན་དུ་བཟུང་ནས། ཕྱོགས་ཡོངས་ནས་ཏང་གི་གཞི་རྩའི་གཞུང་ལུགས་དང་། གཞི་རྩའི་ལམ་ཕྱོགས། གཞི་རྩའི་ཇུས་གཞི་ཆེན་མོ་བཅས་ལག་ལེན་མཐར་ཕྱིན་བྱེད་པ་དང་། སྐྱེ་ཁམས་སྲུང་སྐྱོང་སྔོན་སྤེལ་རྒྱུན་འཁྱོངས་བྱེད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། ཚད་མཐོ་བའི་འཚོ་བ་གསར་སྐྲུན་བཅས་བྱས་ཏེ། རང་སྐྱོང་ཁུལ་འབྱོར་ཕྱུག་དང་དཔལ་ཡོན། འཆམ་མཐུན། མཛེས་སྡུག  བདེ་སྐྱིད་ལྡན་པའི་མི་རིགས་རང་སྐྱོང་ས་གནས་སུ་འཛུགས་སྐྲུན་བྱེད་དགོས།

དོན་ཚན་ལྔ་བ། རང་སྐྱོང་ལས་ཁུངས་ཀྱིས་རྩ་ཁྲིམས་དང་བཅའ་ཁྲིམས་རང་ཁུལ་དུ་བརྩི་སྲུང་དང་ལག་བསྟར་བྱེད་པར་ཁག་ཐེག་བྱས་ཏེ། རྒྱལ་ཁབ་ཀྱི་སྤྱིའི་ཁེ་ཕན་ཨང་དང་པོར་བཞག་ནས། ཧུར་བརྩོན་གྱིས་གོང་རིམ་རྒྱལ་ཁབ་ལས་ཁུངས་ཀྱིས་སྤྲད་པའི་ལས་འགན་སྣ་ཚོགས་ཡོངས་འགྲུབ་བྱེད་དགོས།

རང་སྐྱོང་ལས་ཁུངས་ཀྱིས་དོན་དངོས་གཞིར་བཟུང་ནས་རྩ་ཁྲིམས་དང་བཅའ་ཁྲིམས་ལ་མི་འགལ་བའི་རྩ་དོན་འོག་དམིགས་བསལ་གྱི་སྲིད་ཇུས་དང་སྟབས་བསྟུན་གྱི་བྱེད་ཐབས་སྤྱད་དེ་ས་གནས་ཀྱི་དཔལ་འབྱོར་དང་རིག་གནས་འཛུགས་སྐྲུན་གྱི་བྱ་གཞག་འཕེལ་རྒྱས་ཇེ་མགྱོགས་སུ་གཏོང་དགོས། རང་སྐྱོང་ལས་ཁུངས་ཀྱིས་གོང་རིམ་རྒྱལ་ཁབ་ལས་ཁུངས་ཀྱི་གྲོས་ཆོད་དང་ཆོད་དོན། བཀའ་རྒྱ། མཛུབ་སྟོན་སོགས་ལག་བསྟར་བྱེད་པའི་སྐབས་སུ། རང་ཁུལ་གྱི་གནས་ཚུལ་དངོས་དང་མི་མཐུན་པའི་རིགས་ཡོད་ན། གོང་རིམ་རྒྱལ་ཁབ་ལས་ཁུངས་ལ་སྙན་སེང་ཞུས་ནས་ཆོག་མཆན་ཐོབ་རྗེས། སྐབས་བསྟུན་གྱིས་ལག་བསྟར་བྱེད་པའམ་ལག་བསྟར་བྱེད་མཚམས་བཞག་ཆོག

དོན་ཚན་དྲུག་པ། རང་སྐྱོང་ལས་ཁུངས་ཀྱིས་ཕྱོགས་ཡོངས་ནས་ཁྲིམས་ལྟར་ཁུལ་སྐྱོང་བ་རྒྱུན་འཁྱོངས་བྱས་ཏེ། ཁྲིམས་སྐྱོང་འཛུགས་སྐྲུན་ལ་ཤུགས་སྣོན་པ་དང་། ཚན་རིག་དང་མཐུན་པའི་ཁྲིམས་འཛུགས་དང་ཁྲིམས་བསྟར་གཟབ་ནན། ཁྲིམས་འཛིན་དྲང་གཞག  དམངས་ཡོངས་ཀྱིས་ཁྲིམས་སྲུང་བཅས་བྱེད་པར་སྐུལ་འདེད་བཏང་ནས། རང་སྐྱོང་ཁུལ་གྱི་སྤྱི་དམངས་དང་ཁྲིམས་མི། རྩ་འཛུགས་གཞན་དག་བཅས་ཀྱི་ཁྲིམས་མཐུན་ཁེ་དབང་འགན་སྲུང་བྱ་དགོས།

དོན་ཚན་བདུན་པ། རང་སྐྱོང་ལས་ཁུངས་ཀྱིས་གཞི་རིམ་རྩ་འཛུགས་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། མང་ཚོགས་ཀྱི་རང་སྐྱོང་རྩ་འཛུགས་ཀྱི་ནུས་པ་འདོན་སྤེལ་བྱེད་པ། སྤྱི་ཚོགས་བདེ་འཇགས་ཀྱི་སྔོན་འགོག་ཚོད་འཛིན་མ་ལག་འཐུས་ཚང་དུ་གཏོང་བ། འགལ་བ་དང་རྩོད་གཞི་འདུམ་སྒྲིག་བྱེད་པའི་ལམ་སྲོལ་འཐུས་ཚང་དུ་གཏོང་བ། ས་གནས་ཀྱི་སྤྱི་ཚོགས་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་བ་བཅས་བྱེད་དགོས།

དོན་ཚན་བརྒྱད་པ། རང་སྐྱོང་ལས་ཁུངས་ཀྱིས་ཏང་གི་མི་རིགས་སྲིད་ཇུས་ཕྱོགས་ཡོངས་ནས་ལག་ལེན་མཐར་ཕྱིན་བྱས་ཏེ། མི་རིགས་ཁག་གི་མང་ཚོགས་ལ་རྒྱ་རིགས་གྲངས་ཉུང་མི་རིགས་དང་ཁ་འབྲལ་ཐབས་མེད་པ་དང་། གྲངས་ཉུང་མི་རིགས་རྒྱ་རིགས་དང་ཁ་འབྲལ་ཐབས་མེད་པ། གྲངས་ཉུང་མི་རིགས་སོ་སོའང་ཕན་ཚུན་འབྲལ་ཐབས་མེད་པ་བཅས་ཀྱི་བསམ་བློ་བརྟན་པོ་འཛུགས་པར་ཁྲིད་སྟོན་དང་། རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭ་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བཅས་ཀྱི་ངོས་འཛིན་གཅིག་མཐུན་བྱེད་ཤུགས་ཆེ་རུ་གཏོང་བ་དང་། འདྲ་མཉམ་དང་མཐུན་སྒྲིལ། རོགས་རེས། འཆམ་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་དང་འཕེལ་རྒྱས་སུ་གཏོང་བ། མི་རིགས་ཁག་གི་འགྲོ་འོང་དང་སྤེལ་རེས། མཉམ་འདྲེས་བཅས་ཡོང་བར་སྐུལ་འདེད་གཏོང་བ། ཀྲུང་ཧྭ་མི་རིགས་ཀྱི་ཕུང་བོ་གཅིག་གི་འདུ་ཤེས་བརྟན་པོར་འཛུགས་པ་བཅས་བྱས་ནས། མི་རིགས་ཁག་གི་མང་ཚོགས་ཀྱིས་མཉམ་དུ་མཐུན་སྒྲིལ་འབད་བརྩོན་དང་མཉམ་དུ་དར་རྒྱས་གོང་འཕེལ་གཏོང་དགོས།

དོན་ཚན་དགུ་བ། རང་སྐྱོང་ལས་ཁུངས་ཀྱིས་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། སྤྱི་ཚོགས་རིང་ལུགས་ཀྱི་སྲོག་ཤིང་གི་རིན་ཐང་ལྟ་བ་གསོ་སྐྱོང་དང་ལག་ལེན་བྱེད་པ། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་དང་སྲོལ་རྒྱུན་སྤྱོད་བཟང་རྒྱུན་འཛིན་དང་དར་སྤེལ་བྱེད་པ ། རྒྱལ་གཅེས་རིང་ལུགས་གཙོ་བོ་ཡིན་པའི་མི་རིགས་ཀྱི་སྙིང་སྟོབས་དང་བཅོས་བསྒྱུར་གསར་གཏོད་གཙོ་བོ་ཡིན་པའི་དུས་རབས་ཀྱི་སྙིང་སྟོབས་དར་སྤེལ་བྱེད་པ ། “མདེལ་གཉིས་སྐར་གཅིག”གི་སྙིང་སྟོབས་དར་སྤེལ་བཅས་བྱས་ཏེ ། མི་རིགས་ཁག་གི་མང་ཚོགས་ཀྱི་བསམ་བློ་ཀུན་སྤྱོད་ཀྱི་བློ་སྦྱོང་དང་ཚན་རིག་རིག་གནས་ཀྱི་བྱང་ཚད་མཐོ་རུ་གཏོང་དགོས།

དོན་ཚན་བཅུ་བ། རང་སྐྱོང་ལས་ཁུངས་ཀྱིས་རྒྱལ་ཁབ་ཀྱི་སྤྱི་སྐད་དང་ཡི་གེ་ཁྱབ་གདལ་དང་བཀོལ་སྤྱོད་བྱེད་པ་དང་། མི་རིགས་ཁག་ལ་རང་མི་རིགས་ཀྱི་སྐད་དང་ཡི་གེ་བཀོལ་སྤྱོད་དང་འཕེལ་རྒྱས་སུ་གཏོང་བའི་རང་དབང་ཡོད་པར་འགན་སྲུང་བྱེད་དགོས། རིམ་པ་སོ་སོའི་རྒྱལ་ཁབ་ལས་ཁུངས་ཀྱི་བྱ་བ་ལས་མཁན་གྱིས་གཞུང་དོན་སྒྲུབ་སྐབས། དུས་མཉམ་དུའམ་ཡང་ན་སོ་སོར་རྒྱ་བོད་ཡིག་རིགས་གཉིས་ཀྱི་སྐད་དང་ཡི་གེ་བཀོལ་སྤྱོད་བྱེད་དགོས། ཁྲིམས་འཛིན་ལས་ཁུངས་ཀྱིས་གྱོད་དོན་སྒྲུབ་སྐབས།  རྒྱལ་ཁབ་ཀྱི་སྤྱི་སྐད་དང་ཡི་གེ་མི་ཤེས་བའི་དོ་བདག་པ་ལ་ལོ་ཙཱ་བྱེད་དགོས།

རང་སྐྱོང་ཁུལ་གྱི་རིམ་པ་སོ་སོའི་རྒྱལ་ཁབ་ལས་ཁུངས་དང་སྤྱི་ཚོགས་ཚོགས་པ། ཁེ་ལས་དང་བྱ་ལས་ལས་ཁུངས་ཀྱི་གཞུང་ཐེལ་དང་སྒོ་བྱང་། མཚོན་རྟགས། དྲ་ཚིགས་ཀྱི་མིང་སོགས་རྒྱ་བོད་ཡིག་རིགས་གཉིས་བཀོལ་སྤྱོད་བྱེད་དགོས། འཇུ་ལག་ཧེ་རིགས་རང་སྐྱོང་རྫོང་དང་མི་རིགས་ཡུལ་ཚོས་དགོས་མཁོ་དངོས་ལ་གཞིགས་ནས་ལག་བསྟར་བྱས་ཆོག

དོན་ཚན་བཅུ་གཅིག་པ། རང་སྐྱོང་ཁུལ་གྱིས་འཇུ་ལག་ཧེ་རིགས་རང་སྐྱོང་རྫོང་གིས་རྩ་ཁྲིམས་དང་བཅའ་ཁྲིམས་ཀྱི་གཏན་འབེབས་ལྟར་རང་སྐྱོང་དབང་ཆ་སྤྱོད་པར་བརྩི་འཇོག་དང་འགན་སྲུང་བྱ་དགོས།

རང་སྐྱོང་ལས་ཁུངས་ཀྱིས་མི་ཤུགས་དང་དངོས་ཤུགས། ནོར་ཤུགས་སོགས་ཀྱི་ཐད་ནས་རང་སྐྱོང་རྫོང་དང་མི་རིགས་ཡུལ་ཚོའི་དཔལ་འབྱོར་སྤྱི་ཚོགས་ཀྱི་ལས་དོན་སྣ་ཚོགས་འཕེལ་རྒྱས་སུ་གཏོང་བར་རོགས་རམ་དང་རྒྱབ་སྐྱོར་བྱ་དགོས།

དོན་ཚན་བཅུ་གཉིས་པ། རང་སྐྱོང་ཁུལ་གྱི་རིམ་པ་ཁག་གི་རྒྱལ་ཁབ་ལས་ཁུངས་དང་སྤྱི་ཚོགས་ཚོགས་པ། ཁེ་ལས་བྱ་ལས་ལས་ཁུངས། རྩ་འཛུགས་གཞན་དག་དང་སྤྱི་དམངས་བཅས་ཀྱིས་ངེས་པར་དུ་སྲོལ་ཡིག་འདིར་བརྩི་སྲུང་བྱ་དགོས།

ལེའུ་གཉིས་པ།  རང་སྐྱོང་ལས་ཁུངས་དང་ས་གནས་ཀྱི་རྒྱལ་ཁབ་ལས་ཁུངས་གཞན་དག

དོན་ཚན་བཅུ་གསུམ་པ། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་ནི་རང་སྐྱོང་ཁུལ་གྱི་ས་གནས་ཀྱི་རྒྱལ་ཁབ་དབང་ཤུགས་ལས་ཁུངས་ཡིན།

རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱིས་ཁྲིམས་ལྟར་ཆེད་དོན་ཨུ་ཡོན་ལྷན་ཁང་བཙུགས་ནས། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱིས་མགོ་ཁྲིད་བྱེད་རྒྱུ་དང་ལེན་བྱ་དགོས། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་མི་འཚོག་པའི་རིང་ལ་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་གིས་མགོ་ཁྲིད་བྱེད་རྒྱུ་དང་ལེན་བྱ་དགོས།

དོན་ཚན་བཅུ་བཞི་བ། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་ནི་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་འཛུགས་ལས་ཁུངས་ཡིན་ཞིང་། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་ལ་འགན་ཁུར་དགོས་པ་མ་ཟད་ལས་དོན་གྱི་སྙན་ཞུའང་འབུལ་དགོས།

རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་གིས་བྱ་བའི་དགོས་མཁོ་ལྟར་དོན་གཅོད་ལས་ཁུངས་དང་ལས་སྒྲུབ་ལས་ཁུངས་གཞན་དག་འཛུགས་རྒྱུ།

རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་གི་ཁོངས་མིའི་ནང་བོད་རིགས་དང་གྲངས་ཉུང་མི་རིགས་གཞན་དག་གི་སྤྱི་དམངས་བཀོད་སྒྲིག་ལུགས་མཐུན་བྱ་དགོས། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་ལ་བོད་རིགས་སྤྱི་དམངས་ཀྱིས་ཀྲུའུ་རིན་ནམ་ཀྲུའུ་རིན་གཞོན་པའི་འགན་འཁུར་དགོས།

དོན་ཚན་བཅོ་ལྔ་བ། རང་སྐྱོང་ཁུལ་གྱི་མི་དམངས་སྲིད་གཞུང་ནི་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་ལས་འཛིན་ལས་ཁུངས་ཡིན་པ་དང་། རང་སྐྱོང་ཁུལ་གྱི་ས་གནས་རྒྱལ་ཁབ་ཀྱི་སྲིད་འཛིན་ལས་ཁུངས་ཡིན།

རང་སྐྱོང་ཁུལ་མི་དམངས་སྲིད་གཞུང་གིས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་དང་མཚོ་སྔོན་ཞིང་ཆེན་མི་དམངས་སྲིད་གཞུང་ལ་འགན་ཁུར་བ་མ་ཟད་བྱ་བའི་སྙན་ཞུ་འབུལ་དགོས། རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་མི་འཚོག་པའི་རིང་ལ་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་ལ་འགན་ཁུར་བ་མ་ཟད་བྱ་བའི་སྙན་ཞུའང་འབུལ་དགོས།

རང་སྐྱོང་ཁུལ་མི་དམངས་སྲིད་གཞུང་གིས་ཁུལ་དཔོན་གྱིས་འགན་ཁུར་བའི་ལམ་ལུགས་ལག་བསྟར་བྱེད་དགོས། རང་སྐྱོང་ཁུལ་གྱི་ཁུལ་དཔོན་ནི་བོད་རིགས་སྤྱི་དམངས་ཀྱིས་འགན་ཁུར་དགོས། རང་སྐྱོང་ཁུལ་གྱི་མི་དམངས་སྲིད་གཞུང་གི་ཁོངས་མིའི་ཁྲོད་དུ་བོད་རིགས་དང་གྲངས་ཉུང་མི་རིགས་གཞན་དག་གི་སྤྱི་དམངས་བཀོད་སྒྲིག་ལུགས་མཐུན་བྱ་དགོས།

དོན་ཚན་བཅུ་དྲུག་པ། རང་སྐྱོང་ཁུལ་གྱི་ལྟ་ཞིབ་ཨུ་ཡོན་ལྷན་ཁང་ནི་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་ལས་ཐོན་དགོས་པ་དང་། རང་སྐྱོང་ཁུལ་གྱི་ལྟ་ཞིབ་བྱ་བར་འགན་ཁུར་དགོས། 

རང་སྐྱོང་ཁུལ་གྱི་ལྟ་ཞིབ་ཨུ་ཡོན་ལྷན་ཁང་གིས་རང་སྐྱོང་ཁུལ་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་དང་གོང་རིམ་ལྟ་ཞིབ་ཨུ་ཡོན་ལྷན་ཁང་ལ་འགན་ཁུར་དགོས་པ་མ་ཟད་དེའི་ལྟ་སྐུལ་དང་ལེན་བྱ་དགོས།

རང་སྐྱོང་ཁུལ་གྱི་ལྟ་ཞིབ་ཨུ་ཡོན་ལྷན་ཁང་གིས་ཁྲིམས་ལྟར་རང་ཚུགས་ཀྱིས་ལྟ་ཞིབ་བྱེད་དབང་སྤྱོད་རྒྱུ་ལས། སྲིད་འཛིན་ལས་ཁུངས་དང་སྤྱི་ཚོགས་ཚོགས་པ། མི་སྒེར་བཅས་ཀྱི་ཐེ་གཏོགས་དང་ལེན་བྱེད་མི་དགོས།

དོན་ཚན་བཅུ་བདུན་པ། རང་སྐྱོང་ཁུལ་གྱི་འབྲིང་རིམ་མི་དམངས་ཁྲིམས་ཁང་དང་རང་སྐྱོང་ཁུལ་གྱི་མི་དམངས་ཞིབ་དཔྱོད་ཁང་གིས་བཅའ་ཁྲིམས་ལྟར་རང་ཚུགས་ཀྱིས་འདྲི་གཅོད་བྱེད་དབང་དང་ཞིབ་དཔྱོད་བྱེད་དབང་སྤྱོད་དགོས། རང་སྐྱོང་ཁུལ་གྱི་འབྲིང་རིམ་མི་དམངས་ཁྲིམས་ཁང་དང་རང་སྐྱོང་ཁུལ་གྱི་མི་དམངས་ཞིབ་དཔྱོད་ཁང་གིས་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་ལ་འགན་ཁུར་བ་མ་ཟད་བྱ་བའི་སྙན་ཞུའང་འབུལ་དགོས།

དོན་ཚན་བཅོ་བརྒྱད་པ། རང་སྐྱོང་ཁུལ་གྱི་ལྟ་ཞིབ་ཨུ་ཡོན་ལྷན་ཁང་དང་། རང་སྐྱོང་ཁུལ་གྱི་འབྲིང་རིམ་མི་དམངས་ཁྲིམས་ཁང་། རང་སྐྱོང་ཁུལ་གྱི་མི་དམངས་ཞིབ་དཔྱོད་ཁང་བཅས་ཀྱི་མགོ་ཁྲིད་ཁོངས་མི་དང་ལས་བྱེད་མི་སྣའི་ཁྲོད་དུ་བོད་རིགས་སྤྱི་དམངས་ཡོད་དགོས།

ལེའུ་གསུམ་པ། དཔལ་འབྱོར་འཛུགས་སྐྲུན།

དོན་ཚན་བཅུ་དགུ་བ། རང་སྐྱོང་ལས་ཁུངས་ཀྱིས་རྒྱལ་ཁབ་ཀྱི་སྤྱི་ཁོག་དཔལ་འབྱོར་སྲིད་ཇུས་ཀྱི་མཛུབ་ཁྲིད་འོག  གསར་གཏོད་དང་མཐུན་སྦྱོར། ལྗང་མདོག  སྒོ་འབྱེད། མཉམ་སྤྱོད་བཅས་ཀྱི་འཕེལ་རྒྱས་ཀྱི་འདུ་ཤེས་གསར་པ་རྒྱུན་འཁྱོངས་བྱས་ནས། ཏང་དང་རྒྱལ་ཁབ་ཀྱིས་མི་རིགས་ས་ཁུལ་གྱི་འཕེལ་རྒྱས་ལ་རྒྱབ་སྐྱོར་བྱེད་པའི་སྲིད་ཇུས་ལག་བསྟར་དོན་འཁྱོལ་བྱེད་དགོས། རང་སྐྱོང་ཁུལ་གྱི་དོན་དངོས་ལ་གཞིགས་ནས་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འཆར་འགོད་དང་སྲིད་ཇུས་བྱེད་ཐབས་གཏན་འབེབས་དང་། སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་འཕེལ་རྒྱས་སུ་བཏང་ནས། ས་གནས་ཀྱི་དཔལ་འབྱོར་སྤྱི་ཚོགས་ཁྱོན་ཡོངས་ནས་མཐུན་སྦྱོར་ངང་རྒྱུན་མཐུད་འཕེལ་རྒྱས་སུ་འགྲོ་བར་སྐུལ་འདེད་གཏོང་བ་བཅས་བྱ་དགོས།

དོན་ཚན་ཉི་ཤུ་བ། རང་སྐྱོང་ལས་ཁུངས་ཀྱིས་མཐོ་གཞོང་དེང་རབས་སྐྱེ་ཁམས་ཞིང་ཕྱུགས་ལས་འཕེལ་རྒྱས་གཏོང་རྒྱུ་དང་། ཞིང་ཕྱུགས་ལས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་བྱེད་རྒྱུར་ཤུགས་སྣོན་རྒྱག་དགོས་ལ། ཞིང་སྡེ་འབྲོག་ཁུལ་གྱི་དཔལ་འབྱོར་གྲུབ་ཚུལ་དང་ཞིང་ཕྱུགས་ལས་ཀྱི་ཐོན་ལས་གྲུབ་ཚུལ་ལེགས་སྒྲིག་བྱས་ནས། ས་གནས་ཀྱི་ཁྱད་ཆོས་ལྡན་པའི་གསོ་སྤེལ་དང་འདེབས་འཛུགས། ལས་སྣོན་སོགས་ཀྱི་ཐོན་ལས་འཕེལ་རྒྱས་སུ་གཏོང་བ་དང་། སྐྱེ་ཁམས་ཞིང་ཕྱུགས་ལས་འཕེལ་རྒྱས་སུ་འགྲོ་བའི་ཆུ་ཚད་མཐོ་རུ་བཏང་སྟེ་ཞིང་སྡེ་འབྲོག་ཁུལ་གྱི་དཔལ་འབྱོར་སྟོབས་ཆེར་གཏོང་དགོས།

རང་སྐྱོང་ལས་ཁུངས་ཀྱིས་ཞིང་ཕྱུགས་ལས་ཐོན་ལས་ཅན་གྱི་སྣེ་འདྲེན་ཁེ་ལས་དང་། རོང་འབྲོག་པའི་ཆེད་ལས་མཉམ་ལས་ཁང་། ཁྱིམ་ཚང་གི་ཞིང་ཕྱུགས་ར་བ་སོགས་གཉེར་སྐྱོང་བྱེད་པོ་གསར་པ་སྐྱེད་སྲིང་བྱེད་པ་དང་། གཞི་ཁྱོན་འོས་འཚམ་གྱི་གཉེར་སྐྱོང་འཕེལ་རྒྱས་སུ་གཏོང་དགོས་ལ། ཞིང་ཕྱུགས་ལས་ཀྱི་རྣམ་པ་སྒྱུར་ནས་རིམ་པ་་སྤོར་བ་དང་སྤུས་ཚད་མཐོར་གཏོང་དང་ཕན་འབྲས་ཆེ་རུ་གཏོང་རྒྱུར་སྐུལ་འདེད་གཏོང་བ་བཅས་བྱེད་དགོས།

དོན་ཚན་ཉེར་གཅིག་པ། རང་སྐྱོང་ལས་ཁུངས་ཀྱིས་རོང་འབྲོག་ཁུལ་གྱི་གཞི་རྩའི་གཉེར་སྐྱོང་ལམ་ལུགས་སྲ་བརྟན་དང་འཐུས་ཚང་དུ་གཏོང་བ་དང་། ཞིང་སྡེ་དང་འབྲོག་ཁུལ་གྱི་ས་ཆ་དང་རྩྭ་རའི་ལམ་ལུགས་བསྒྱུར་བཅོས་གཏིང་ཟབ་བྱེད་པ། ས་ཆའི་བདག་དབང་དང་། འགན་གཙང་ལེན་དབང་ཆ། གཉེར་སྐྱོང་དབང་ཆ་བཅས་ལོགས་སུ་དབྱེ་བའི་ལམ་ལུགས་འཐུས་ཚང་དུ་གཏོང་བ། ཞིང་སྡེ་འབྲོག་ཁུལ་གྱི་ས་ཆ་དང་རྩྭ་རའི་འགན་གཙང་ལེན་གྱི་འབྲེལ་བ་བརྟན་པོ་ཡོང་བ་རྒྱུན་འཁྱོངས་བྱེད་པ་མ་ཟད་ཡུན་རིང་དུ་མི་འགྱུར་བ་བཅས་བྱེད་དགོས།

རང་སྐྱོང་ལས་ཁུངས་ཀྱིས་གཞི་རྩའི་ཞིང་ས་དང་རྩྭ་ཐང་སྲུང་སྐྱོང་ལམ་ལུགས་རྒྱུན་འཁྱོངས་བྱེད་དགོས། འཆར་འགོད་དང་སྤྱོད་སྒོ་རྩིས་སྤྲོད་དོ་དམ་དང་མཐུན་པའི་སྔོན་འགྲོའི་ཆ་རྐྱེན་འོག  ཞིང་སྡེ་འབྲོག་ཁུལ་གྱི་ཐུན་མོང་གཉེར་སྐྱོང་རང་བཞིན་གྱི་འཛུགས་སྐྲུན་ལ་མཁོ་བའི་ས་ཆ་ཚོང་རར་འདྲེན་པར་སྐུལ་འདེད་གཏོང་བ་དང་། རྒྱལ་ཁབ་ལ་དབང་བའི་ས་ཞིང་དང་འདྲ་མཚུངས་ཀྱི་ཁེ་དབང་ལོངས་སུ་སྤྱོད་རྒྱུ་ཡོད་པ་བྱེད་དགོས།

དོན་ཚན་ཉེར་གཉིས་པ། རང་སྐྱོང་ལས་ཁུངས་ཀྱིས་ངེས་པར་དུ་ཞིང་ཕྱུགས་ཐོན་རྫས་ཀྱི་སྤུས་རྟགས་གཏོད་རྒྱུར་ཤུགས་སྣོན་རྒྱག་དགོས་པ་དང་། ཞིང་ཕྱུགས་ལས་ཀྱི་སོན་བཟང་གསོ་སྤེལ་བྱེད་རྒྱུར་མཐོང་ཆེན་བྱེད་དགོས་ཤིང་། ས་གནས་ཀྱི་སོན་བཟང་སྲུང་སྐྱོབ་བྱེད་དགོས་ལ། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཀྱི་ས་གནས་མཚོན་རྟགས་ཐོན་རྫས་གསར་འཛུགས་དང་ཁས་ལེན་ར་སྤྲོད་བྱས་ཏེ། ས་ཁོངས་ཀྱི་སྤུས་རྟགས་གསོ་སྤེལ་བྱེད་དགོས།

དོན་ཚན་ཉེར་གསུམ་པ། རང་སྐྱོང་ལས་ཁུངས་ཀྱིས་བཟོ་ལས་ཐོན་ལས་ལེགས་སྒྱུར་རིམ་སྤར་ལ་སྐུལ་འདེད་གཏོང་བ་དང་། དགེ་མཚན་ལྡན་པའི་ཐོན་ཁུངས་ལ་བརྟེན་ནས་ལྗང་མདོག་གསར་དར་ཐོན་ལས་འཕེལ་རྒྱས་སུ་གཏོང་དགོས། 

རང་སྐྱོང་ལས་ཁུངས་ཀྱིས་གྲངས་ཉུང་མི་རིགས་ཀྱི་དམིགས་བསལ་དགོས་མཁོའི་ཚོང་ཟོག་དང་སྲོལ་རྒྱུན་ལག་ཤེས་བཟོ་ལས་ཀྱི་ཐོན་རྫས་ཐོན་སྐྱེད་བྱེད་པར་རྒྱབ་སྐྱོར་དང་། གྲངས་ཉུང་མི་རིགས་མང་ཚོགས་ཀྱི་འཚོ་བའི་དགོས་མཁོ་སྐོང་དགོས་ལ། ཁྱད་མཁོའི་ཐོན་རྫས་ཀྱི་ཚོང་རའི་འགྲན་རྩོད་ནུས་པ་ཆེ་རུ་གཏོང་བ་བཅས་བྱ་དགོས།

དོན་ཚན་ཉེར་བཞི་བ། རང་སྐྱོང་ལས་ཁུངས་ཀྱིས་མཐོ་གཞོང་སྐྱེ་ཁམས་གནས་སྐོར་ཐོན་ལས་གཙོ་བོ་ཡིན་པའི་ཐོན་ལས་གསུམ་པ་འཕེལ་རྒྱས་སུ་བཏང་ནས། ཁྱོན་ཡོངས་ནས་ས་ཁོངས་ཐོན་ཁུངས་གའཆམ་མཐུན་པར་བསྡུ་སྒྲིལ་བྱེད་པ་དང་། ཐོན་ལས་མཉམ་འདྲེས་འཕེལ་རྒྱས་སུ་གཏོང་བ། སྤྱི་ཚོགས་ཧྲིལ་བོ་མཉམ་ཞུགས་བྱེད་པ་བཅས་ཀྱི་ས་ཁོངས་ཧྲིལ་པོའི་གནས་སྐོར་འཕེལ་རྒྱས་སུ་གཏོང་བའི་མ་དཔེ་ཁྱབ་གདལ་གཏོང་དགོས། ཀྲུང་གོའི་ཐོག་དང་པོའི་ཉིང་རྡུལ་མཚོན་ཆ་ཞིབ་བཟོ་རྟེན་གཞི་དང་སྐྱེ་ཁམས་ཐོན་ཁུངས། མི་རིགས་རིག་གནས་སོགས་ལ་བརྟེན་ནས། གསར་བརྗེའི་གནས་སྐོར་དང་སྐྱེ་ཁམས་གནས་སྐོར། ཁྱད་ཆོས་ལྡན་པའི་རིག་གནས་གནས་སྐོར་བཅས་འཕེལ་རྒྱས་སུ་གཏོང་དགོས། 

རང་སྐྱོང་ལས་ཁུངས་ཀྱིས་འཕྲིན་གཏོང་དང་འགྲིམ་འགྲུལ་སྐྱེལ་འདྲེན། དངོས་ཟོག་མངག་སྐྱེལ། གློག་རྡུལ་ཚོང་དོན་སོགས་དེང་རབས་ཀྱི་ཚོང་དོན་ཞབས་ཞུའི་ལས་རིགས་འཕེལ་རྒྱས་སུ་གཏོང་བ་དང་། དེང་རབས་ཀྱི་ཚོང་དོན་འགྲོ་རྒྱུག་མ་ལག་འཛུགས་སྐྲུན་བྱས་ནས་ཞབས་ཞུ་ལས་རིགས་འཕེལ་རྒྱས་གཏོང་བའི་ཆུ་ཚད་མཐོ་རུ་གཏོང་དགོས།

དོན་ཚན་ཉེར་ལྔ་བ། རང་སྐྱོང་ལས་ཁུངས་ཀྱིས་ཡུལ་སྡེ་དར་རྒྱས་སུ་གཏོང་བའི་འཐབ་ཇུས་ལག་བསྟར་བྱས་ཏེ། དབུལ་ཐར་མཁྲེགས་གཏོར་གྱི་གྲུབ་འབྲས་སྲ་བརྟན་དུ་གཏོང་བ་དང་། མི་རིགས་ཀྱི་ཁྱད་ཆོས་ལྡན་པའི་གྲོང་ཚོ་འཛུགས་སྐྲུན་དང་མཐོ་སྒང་གི་མཛེས་སྡུག་ལྡན་པའི་ཡུལ་སྡེ་འཛུགས་སྐྲུན་ལ་སྐུལ་འདེད་བྱེད་དགོས།

རང་སྐྱོང་ལས་ཁུངས་ཀྱིས་མཁར་གྲོང་ཅན་གསར་པ་འཛུགས་སྐྲུན་བྱེད་པར་སྐུལ་འདེད་གཏོང་བ་དང་། མཁར་གྲོང་དང་ཡུལ་ཚོ་མཉམ་འདྲེས་འཕེལ་རྒྱས་ཀྱི་ལམ་སྲོལ་འཐུས་ཚང་དུ་གཏོང་དགོས་ལ། མཁར་གྲོང་དང་ཡུལ་ཚོ་མཐུན་སྦྱོར་ངང་འཕེལ་རྒྱས་ཡོང་བར་གཅིག་གྱུར་འཆར་འགོད་བཅས་བྱ་དགོས།  

དོན་ཚན་ཉེར་དྲུག་པ། རང་སྐྱོང་ལས་ཁུངས་ཀྱིས་སྤྱི་ཚོགས་ཀྱི་ཡིད་རྟོན་མ་ལག་འཛུགས་སྐྲུན་ལ་སྐུལ་འདེད་བྱེད་པ་དང་། ཚོང་གཉེར་ཁོར་ཡུག་ལེགས་སུ་གཏོང་བ། ཚོང་འགུགས་མ་འདྲེན་གྱི་སྲིད་ཇུས་འཐུས་ཚང་དུ་གཏོང་བ། ཁྲོམ་ར་གཙོ་བོའི་ཞབས་ཞུའི་ནུས་པ་ཆེ་རུ་གཏོང་བ་བཅས་བྱས་ནས་དཔལ་འབྱོར་རྩ་འཛུགས་སྣ་ཚོགས་དང་མི་སྒེར་གྱི་མ་འཇོག་ལས་དར་བྱེད་པ་འགུག་དགོས།

རང་སྐྱོང་ལས་ཁུངས་ཀྱིས་ཁ་གཏད་རོགས་སྐྱོར་ས་ཁུལ་དང་རོགས་ལས་བྱེད་ཤུགས་ཆེ་རུ་བཏང་ནས། རང་སྐྱོང་ཁུལ་གྱི་ལས་དོན་སྣ་ཚོགས་འཕེལ་རྒྱས་ཡོང་བར་མཉམ་དུ་སྐུལ་འདེད་བྱེད་དགོས།

དོན་ཚན་ཉེར་བདུན་པ། རང་སྐྱོང་ལས་ཁུངས་ཀྱིས་སྔོན་རྩིས་བཟོ་འགོད་དང་ལག་བསྟར་ལས་དོན་གྱི་ལྟ་སྐུལ་དོ་དམ་སྒྱུར་བཅོས་གཏིང་ཟབ་ཏུ་གཏོང་བ་དང་། སྔོན་རྩིས་ཀྱི་ཕན་འབྲས་དོ་དམ་ལག་བསྟར་བྱས་ཏེ། ནོར་སྲིད་ཐོན་ཁུངས་བཀོད་སྒྲིག་གི་ལས་ཕྱོད་དང་མ་དངུལ་བེད་སྤྱོད་ཀྱི་ཕན་འབྲས་ཆེ་རུ་གཏོང་དགོས། ནོར་སྲིད་ཀྱི་འབྱུང་ཁུངས་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། དམངས་འཚོའི་གཏོང་སྒོ་སྔོན་ལ་འགན་སྲུང་དང་། ནོར་སྲིད་ཀྱི་འགན་སྲུང་བྱེད་ནུས་ཆེ་རུ་གཏོང་དགོས།

དོན་ཚན་ཉེར་བརྒྱད་པ། རང་སྐྱོང་ལས་ཁུངས་ཀྱིས་རྒྱལ་དབང་རྒྱུ་ནོར་ལ་ལྟ་སྐུལ་དོ་དམ་བྱེད་ཤུགས་ཆེ་རུ་བཏང་ནས། ཁུལ་དང་རྫོང་མི་དམངས་སྲིད་གཞུང་གིས་ལོ་ལྟར་རིམ་པ་གཅིག་པའི་དམངས་ཆེན་རྒྱུན་ལས་ཨུ་ཡོན་ལྷན་ཁང་ལ་རྒྱལ་དབང་རྒྱུ་ནོར་དོ་དམ་བྱས་ཚུལ་སྙན་སེང་ཞུ་དགོས།

དོན་ཚན་ཉེར་དགུ་བ། རང་སྐྱོང་ལས་ཁུངས་ཀྱིས་དངུལ་རྩའི་ལས་ཁུངས་ཁག་གིས་ཡན་ལག་ལས་ཁུངས་སྒྲིག་འཛུགས་བྱ་རྒྱུར་སྐུལ་ལྕག་དང་རྒྱབ་སྐྱོར་བྱས་ནས། ཀུན་ཕན་དངུལ་རྩའི་སྲིད་ཇུས་དོན་འཁྱོལ་བྱས་ཏེ་སྤྱི་ཚོགས་ཀྱི་ཡིད་རྟོན་ཁོར་ཡུག་ལེགས་སུ་གཏོང་དགོས། ནོར་སྲིད་དང་ཁྲལ་བསྡུ། དངུལ་རྩ། ཉེན་སྲུང་སོགས་ལ་བརྟེན་ནས་དངོས་གཞིའི་དཔལ་འབྱོར་གྱི་རོགས་སྐྱོར་བྱེད་ཤུགས་ཆེ་རུ་བཏང་སྟེ་ས་གནས་ཀྱི་ཐོན་ལས་འཕེལ་རྒྱས་ཡོང་བར་སྐུལ་འདེད་གཏོང་དགོས།

ལེའུ་བཞི་བ། སྤྱི་ཚོགས་བྱ་གཞག

དོན་ཚན་སུམ་ཅུ་བ། རང་སྐྱོང་ཁུལ་གྱིས་སློབ་གསོ་དང་ཚན་རྩལ། རིག་གནས། འཕྲོད་བསྟེན། ལུས་རྩལ་སོགས་སྤྱི་ཚོགས་ཀྱི་བྱ་གཞག་སྣ་སོ་སོ་འཕེལ་རྒྱས་སུ་གཏོང་བ་དང་། སྤྱི་བའི་ཞབས་ཞུའི་མ་ལག་འཐུས་ཚང་དུ་བཏང་སྟེ། སྤྱི་བའི་ཞབས་ཞུ་ཆ་སྙོམས་ཅན་དུ་མངོན་འགྱུར་བྱེད་དགོས།

དོན་ཚན་སོ་གཅིག་པ། རང་སྐྱོང་ལས་ཁུངས་ཀྱིས་སློབ་གསོ་སྔོན་ལ་འཕེལ་རྒྱས་སུ་གཏོང་བ་དང་། མཁར་གྲོང་དང་ཡུལ་ཚོའི་སློབ་གསོའི་ཐོན་ཁུངས་དོ་མཉམ་ངང་བཀོད་སྒྲིག་བྱས་ནས། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་རྩ་བའི་ལས་འགན་དོན་འཁྱོལ་བྱེད་དགོས་ལ། སློབ་སྔོན་སློབ་གསོ་འཕེལ་རྒྱས་སུ་གཏོང་བ་དང་། འོས་འགན་སློབ་གསོ་སྲ་བརྟན་དང་མཐོ་རུ་གཏོང་བ། མཐོ་རིམ་སློབ་འབྲིང་གི་སློབ་གསོ་ཁྱབ་གདལ་གཏོང་བ། ལས་རིགས་སློབ་གསོ་དང་དར་མའི་སློབ་གསོ་འཕེལ་རྒྱས་གཏོང་རྒྱུར་མཐོང་ཆེན་བཅས་བྱས་ནས་སློབ་གསོ་དང་སློབ་ཁྲིད་ཀྱི་སྤུས་ཚད་མཐོ་རུ་གཏོང་དགོས།

དོན་ཚན་སོ་གཉིས་པ། རང་སྐྱོང་ལས་ཁུངས་ཀྱིས་དགེ་རྒན་གྱི་དཔུང་ཁག་འཛུགས་སྐྱོང་བྱེད་ཤུགས་ཆེ་རུ་གཏོང་དགོས་པ་དང་། དགེ་རྒན་གྱི་དཔུང་ཁག་གྲུབ་ཚུལ་ལེགས་བསྒྱུར་དང་། དགེ་རྒན་གྱི་ནུས་པ་དང་ཆུ་ཚད་མཐོ་རུ་གཏོང་དགོས། དགེ་རྒན་གྱི་ཁྲིམས་མཐུན་ཁེ་དབང་སྲུང་སྐྱོང་དང་འགན་སྲུང་བྱས་ཏེ། དགེ་རྒན་གྱི་ཐོབ་ཐང་མཐོ་རུ་བཏང་ནས། དགེ་རྒན་ལ་གུས་བཀུར་དང་སློབ་གསོར་མཐོང་ཆེན་བཅས་བྱེད་པའི་སྤྱི་ཚོགས་ཀྱི་ཁོར་ཡུག་བཟང་བོ་བསྐྲུན་དགོས།

རང་སྐྱོང་ལས་ཁུངས་ཀྱིས་ཡུལ་སྡེའི་དགེ་རྒན་དཔུང་ཁག་བརྟན་པོ་ཡོང་བར་བྱས་ནས། ཡུལ་སྡེའི་སློབ་གྲྭར་དགེ་རྒན་བྱེད་དུ་བསྐྱོད་པར་སྐུལ་སློང་བྱེད་དགོས།

དོན་ཚན་སོ་གསུམ་པ། རང་སྐྱོང་ལས་ཁུངས་ཀྱིས་ཚན་རིག་ལག་རྩལ་གྱི་བྱ་གཞག་གོང་དུ་སྤེལ་རྒྱུ་དང་། ཚན་རིག་ལག་རྩལ་གསར་གཏོད་བྱེད་པར་མཐོང་ཆེན་བྱ་དགོས། མཐོ་རིམ་སློབ་གྲྭ་དང་ཚན་རིག་ཞིབ་འཇུག་ལས་ཁུངས། ཁ་གཏད་རོགས་སྐྲུན་ས་ཁུལ་བཅས་དང་མཉམ་ལས་བྱེད་ཤུགས་ཆེ་རུ་བཏང་ནས་ཚན་རིག་ལག་རྩལ་གྱི་གྲུབ་འབྲས་འཕོ་འགྱུར་ཡོང་བར་སྐུལ་འདེད་གཏོང་དགོས།

དོན་ཚན་སོ་བཞི་བ། རང་སྐྱོང་ལས་ཁུངས་ཀྱིས་རིག་གནས་བྱ་གཞག་དང་རིག་གནས་ཐོན་ལས་གོང་དུ་སྤེལ་བར་སྐུལ་འདེད་གཏོང་བ་དང་། རིག་གནས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་བྱེད་ཤུགས་ཆེ་རུ་གཏོང་བ། སྤྱི་བའི་རིག་གནས་ཞབས་ཞུའི་མ་ལག་འཛུགས་པ་དང་འཐུས་ཚང་དུ་གཏོང་བ། རིག་གནས་ཤེས་ལྡན་མི་སྣའི་དཔུང་ཁག་གསོ་སྐྱོང་བཅས་བྱ་དགོས། མི་རིགས་ཀྱི་རིག་རྩལ་གསར་རྩོམ་ལ་རྒྱབ་སྐྱོར་དང་། ཕྱི་ཕྱོགས་དང་རིག་གནས་སྤེལ་རེས་བྱེད་རྒྱ་ཆེ་རུ་བཏང་ནས་མི་རིགས་ཁག་གི་མང་ཚོགས་ཀྱི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་དགོས།

རང་སྐྱོང་ལས་ཁུངས་ཀྱིས་ཁྲིམས་ལྟར་རིག་དངོས་དང་རིག་གནས་ཤུལ་བཞག་སྲུང་སྐྱོང་དང་། མི་རིགས་ཀྱི་གནའ་དཔེ་འཚོལ་བསྡུ་དང་ལེགས་སྒྲིག  ཞིབ་འཇུག  པར་སྐྲུན་བཅས་བྱ་རྒྱུར་མཐོང་ཆེན་བྱ་དགོས།

རང་སྐྱོང་ལས་ཁུངས་ཀྱིས་ས་གནས་ཀྱི་ལོ་རྒྱུས་རྩོམ་སྒྲིག་བྱ་བར་ཤུགས་སྣོན་རྒྱག་དགོས།

དོན་ཚན་སོ་ལྔ་བ། རང་སྐྱོང་ལས་ཁུངས་ཀྱིས་རླུང་འཕྲིན་དང་བརྙན་འཕྲིན། ཚགས་པར་དང་དུས་དེབ། དྲ་རྒྱ་སོགས་སྨྱན་སྦྱོར་འཕེལ་རྒྱས་ཡོང་བར་སྐུལ་འདེད་གཏོང་དགོས་ལ། དྲ་རྒྱ་དང་སྨྱན་སྦྱོར་གསར་པའི་དོ་དམ་ལ་ཤུགས་སྣོན་རྒྱག་པ་དང་། ཁྲིམས་ལྟར་དྲ་རྒྱའི་བདེ་འཇགས་སྲུང་སྐྱོང་བྱེད་དགོས།

དོན་ཚན་སོ་དྲུག་པ། རང་སྐྱོང་ལས་ཁུངས་ཀྱིས་འཕྲོད་བསྟེན་བདེ་ཐང་བྱ་གཞག་འཕེལ་རྒྱས་སུ་གཏོང་རྒྱུ་དང་། སྤྱི་བའི་འཕྲོད་བསྟེན་ཞབས་ཞུའི་མ་ལག་འཛུགས་པ། སྨན་བཅོས་འཕྲོད་བསྟེན་གྱི་ཐོན་ཁུངས་བཀོད་སྒྲིག་ཇེ་ལེགས་སུ་གཏོང་བ། སྨན་བཅོས་ཤེས་ལྡན་པ་གསོ་སྐྱོང་དང་ནང་འདྲེན་བྱེད་རྒྱུར་མཐོང་ཆེན་བྱེད་པ། སྨན་བཅོས་འཕྲོད་བསྟེན་ཞབས་ཞུའི་ཆ་རྐྱེན་ལེགས་སུ་གཏོང་བ། སྨན་བཅོས་ཞབས་ཞུའི་སྤུས་ཚད་མཐོ་རུ་གཏོང་བ། མི་རིགས་སོ་སོའི་མང་ཚོགས་ཀྱི་བདེ་ཐང་ཆུ་ཚད་མཐོ་རུ་གཏོང་བ་བཅས་བྱེད་དགོས།

དོན་ཚན་སོ་བདུན་པ། རང་སྐྱོང་ལས་ཁུངས་ཀྱིས་སྤྱི་བའི་འཕྲོད་བསྟེན་ནུས་བའི་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། འགོས་ནད་དང་ཡུལ་ནད། ནད་གཞི་ཚབས་ཆེན་བཅས་འབྱུང་བ་སྔོན་འགོག་དང་ཚོད་འཛིན་བྱས་ཏེ། གློ་བུར་དུ་བྱུང་བའི་སྤྱི་བའི་འཕྲོད་བསྟེན་དོན་རྐྱེན་གྱི་འཚུབ་བསྟུན་ཐག་གཅོད་བྱེད་ནུས་ཆེ་རུ་གཏོང་དགོས། 

དོན་ཚན་སོ་བརྒྱད་པ། རང་སྐྱོང་ལས་ཁུངས་ཀྱིས་ཀྲུང་ལུགས་གསོ་རིག་དང་བོད་ལུགས་གསོ་རིག་སོགས་སྲོལ་རྒྱུན་གྱི་མི་རིགས་གསོ་རིག་སྲུང་སྐྱོང་དང་རྒྱུན་འཛིན། ཞིབ་འཇུག བེད་སྤྱོད་བཅས་བྱ་རྒྱུར་ཤུགས་སྣོན་རྒྱག་པ་དང་། མི་རིགས་ཀྱི་གསོ་རིག་དང་སྨན་རྫས་ཐོན་ལས་ལ་རོགས་སྐྱོར་བྱས་ནས་མི་རིགས་ཀྱི་གསོ་རིག་དང་སྨན་རྫས་བྱ་གཞག་དར་རྒྱས་གོང་འཕེལ་ཡོང་བར་སྐུལ་འདེད་གཏོང་དགོས།

དོན་ཚན་སོ་དགུ་བ། རང་སྐྱོང་ལས་ཁུངས་ཀྱིས་མི་གྲངས་དང་འཆར་ལྡན་བུ་སྐྱེའི་བྱ་བར་གཙིགས་འཛིན་བྱེད་དགོས་ལ། སྐྱེ་གསོ་གཉིས་ལེགས་དང་མ་བུ་བདེ་སྲུང་བྱ་བར་ཤུགས་སྣོན་བྱས་ཏེ། མི་རིགས་ཁག་གི་མི་གྲངས་བྱང་ཚད་ཇེ་མཐོར་གཏོང་དགོས། 

དོན་ཚན་བཞི་བཅུ་བ། རང་སྐྱོང་ལས་ཁུངས་ཀྱིས་ལུས་རྩལ་བྱ་གཞག་གོང་དུ་སྤེལ་བ་དང་། ལུས་རྩལ་ཐོན་ལས་གོང་དུ་སྤེལ་བར་སྐུལ་འདེད་གཏོང་བ། དམངས་ཡོངས་ཀྱི་ལུས་སྦྱོང་བྱེད་སྒོ་སྤེལ་བ། མི་རིགས་ཀྱི་སྲོལ་རྒྱུན་ལུས་རྩལ་ལས་འགུལ་འཕེལ་རྒྱས་སུ་གཏོང་བ་བཅས་བྱས་ནས་མི་རིགས་སོ་སོའི་མང་ཚོགས་ཀྱི་གཟུགས་གཞི་བདེ་ཐང་ཡོང་བར་བྱེད་དགོས།

དོན་ཚན་ཞེ་གཅིག་པ། རང་སྐྱོང་ལས་ཁུངས་ཀྱིས་ལས་ཞུགས་ལས་གཏོད་ལས་དོན་ལ་མཐོང་ཆེན་བྱེད་པ་དང་། འགན་སྲུང་ལམ་སྲོལ་འཐུས་ཚང་དུ་གཏོང་བ། ཁོར་ཡུག་ཆ་རྐྱེན་ལེགས་སུ་གཏོང་བ། རོགས་སྐྱོར་སྲིད་ཇུས་དོན་འཁྱོལ་བྱེད་པ། འཆམ་མཐུན་གྱི་ངལ་རྩོལ་འབྲེལ་བ་འཛུགས་པ་བཅས་བྱེད་དགོས།

དོན་ཚན་ཞེ་གཉིས་པ། རང་སྐྱོང་ལས་ཁུངས་ཀྱིས་སྤྱི་ཚོགས་རོགས་སྐྱོབ་དང་སྤྱི་ཚོགས་ཕན་བདེ། དགེ་སྒྲུབ་བྱ་གཞག སྤྱི་ཚོགས་ཉེན་སྲུང་བཅས་གཅིག་གྱུར་འཆར་འགོད་ཀྱིས་འཕེལ་རྒྱས་སུ་གཏོང་བ་དང་། སྤྱི་ཚོགས་འགན་སྲུང་མ་ལག་འཐུས་ཚང་དུ་གཏོང་བ་བཅས་བྱ་དགོས་ལ། ཁམས་གསོའི་ཐོན་ལས་འཕེལ་རྒྱས་སུ་བཏང་ནས། རྒན་གསོའི་ཞབས་ཞུ་སྐུལ་འདེད་གཏོང་དགོས།

རང་སྐྱོང་ལས་ཁུངས་ཀྱིས་བུད་མེད་དང་ལོ་ན་མ་སོན་པ། རྒན་པ་བཅས་ཀྱི་ཁྲིམས་མཐུན་ཁེ་དབང་ལ་འགན་སྲུང་བྱེད་པ་དང་། ཡུལ་སྐྱུར་བྱིས་པར་གཅེས་སྐྱོང་བྱེད་དགོས་ལ། དྭ་ཕྲུག་དང་བདག་མེད་རྒན་པ། དབང་པོ་སྐྱོན་ཅན་བཅས་ཀྱི་དོན་དངོས་དཀའ་ཁག་ཐག་གཅོད་བྱེད་དགོས།

དོན་ཚན་ཞེ་གསུམ་པ། རང་སྐྱོང་ལས་ཁུངས་ཀྱིས་དམག་དམངས་མཉམ་འདྲེས་དང་དམངས་ཡོངས་ཀྱི་རྒྱལ་སྲུང་སྐུལ་སློང་མ་ལག་འཛུགས་པར་སྐུལ་འདེད་གཏོང་དགོས། རྒྱལ་སྲུང་སློབ་གསོར་ཤུགས་སྣོན་བརྒྱབ་ནས་ལོ་ན་རན་པའི་གཞོན་ནུ་དམག་ལ་ཞུགས་སུ་བཅུག་སྟེ་རྒྱལ་སྲུང་བྱ་གཞག་ནང་ཞུགས་པར་བསྔགས་སྐུལ་བྱ་དགོས།

རང་སྐྱོང་ལས་ཁུངས་ཀྱིས་ཁྲིམས་ལྟར་དམག་ཁོངས་ནས་ཕྱིར་ཡོང་བའི་དམག་མི་བཀོད་སྒྲིག་དང་ལས་ཞུགས་ལས་གཏོད་ཀྱི་སྲིད་ཇུས་དོན་འཁྱོལ་བྱེད་པ་དང་། དམག་ཁོངས་སུ་ཡོད་པའི་དམག་མི་དང་དམག་ཁོངས་ནས་ཕྱིར་ཡོང་བའི་དམག་མི། སྔོན་གཤེགས་དཔའ་བོའི་ནང་མི་དང་དམག་མིའི་ནང་མིར་གཟིགས་སྐྱོང་བྱེད་ཤུགས་ཆེ་རུ་གཏོང་དགོས་ལ། སྔོན་གཤེགས་དཔའ་བོར་བསྟོད་བསྔགས་དང་དྲན་གསོའི་སྒྲིག་ཆས་ཀྱི་དོ་དམ་སྲུང་སྐྱོང་སོགས་ཀྱི་ལས་དོན་ལ་ཤུགས་སྣོན་རྒྱག་དགོས།

དོན་ཚན་ཞེ་བཞི་བ། རང་སྐྱོང་ལས་ཁུངས་ཀྱིས་འཚུབ་བསྟུན་དོ་དམ་མ་ལག་དང་འཚུབ་བསྟུན་དཔུང་ཁག་འཛུགས་སྐྲུན་ལ་ཤུགས་སྣོན་རྒྱག་པ་དང་། འཚུབ་བསྟུན་དོ་དམ་དང་གེགས་སེལ་གནོད་འགོག་རྒུད་སྐྱོབ་ཀྱི་ནུས་པ་ཆེ་རུ་བཏང་ནས། བདེ་འཇགས་ཀྱི་ཉེན་ཁ་ཚབས་ཆེན་འགོག་ཟོན་དང་སེལ་བར་བྱས་ཏེ། མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་འགན་སྲུང་བཅས་བྱེད་དགོས།

ལེའུ་ལྔ་བ། སྐྱེ་ཁམས་ཁོར་ཡུག་སྲུང་སྐྱོང་།

དོན་ཚན་ཞེ་ལྔ་བ། རང་སྐྱོང་ལས་ཁུངས་ཀྱིས་རང་བྱུང་ཐོན་ཁུངས་དང་སྐྱེ་ཁམས་ཁོར་ཡུག་སྲུང་སྐྱོང་ལ་ཤུགས་སྣོན་བརྒྱབ་སྟེ། རྒྱལ་ཁབ་ཀྱི་སྤྱིའི་བཀོད་སྒྲིག་ལྟར། ཚན་རིག་དང་མཐུན་པའི་སྒོ་ནས་སྲུང་སྐྱོང་འཆར་འགོད་བཟོ་བ་དང་། མི་འབོར་དང་ཐོན་ཁུངས། ཁོར་ཡུག་བཅས་མཐུན་སྦྱོར་ཡོང་བ་དང་རྒྱུན་མཐུད་ངང་འཕེལ་རྒྱས་སུ་གཏོང་དགོས།

དོན་ཚན་ཞེ་དྲུག་པ། རང་སྐྱོང་ལས་ཁུངས་ཀྱིས་སྐྱེ་ཁམས་ཁོར་ཡུག་སྲུང་སྐྱོང་དྲིལ་སྒྲོག་བྱེད་ཤུགས་ཆེ་རུ་གཏོང་བ་དང་། སྤྱི་དམངས་དང་ཁྲིམས་མི། སྤྱི་ཚོགས་ཀྱི་རྩ་འཛུགས་བཅས་ལ་སྣེ་ཁྲིད་བྱས་ཏེ་སྐྱེ་ཁམས་ཁོར་ཡུག་སྲུང་སྐྱོང་གི་འདུ་ཤེས་འཛིན་ཤུགས་ཆེ་རུ་གཏོང་དགོས་ལ། ལྗང་མདོག་དང་ཐཱན་ཉུང་། གྲོན་ཆུང་བཅས་ཀྱི་འཚོ་བ་སྐྱེལ་སྟངས་དར་སྤེལ་བཏང་ནས་རང་རྟོགས་སྒོས་སྐྱེ་ཁམས་ཁོར་ཡུག་སྲུང་སྐྱོང་གི་འོས་འགན་བསྒྲུབ་དགོས།

དོན་ཚན་ཞེ་བདུན་པ། རང་སྐྱོང་ལས་ཁུངས་ཀྱིས་སྐྱེ་ཁམས་ཁོར་ཡུག་སྲུང་སྐྱོང་ལས་དོན་གྱི་མགོ་ཁྲིད་ལ་ཤུགས་སྣོན་བྱེད་པ་དང་།  སྐྱེ་ཁམས་ཁོར་ཡུག་སྲུང་སྐྱོང་གི་དམིགས་འབེན་དང་ལས་འགན་དོན་འཁྱོལ་བྱ་རྒྱུ་རྩ་འཛུགས་བྱེད་དགོས་ལ། སྐྱེ་ཁམས་སྐྱིན་གསབ་ལམ་སྲོལ་དོན་འཁྱོལ་བྱེད་པ་དང་། སྐྱེ་ཁམས་ཁོར་ཡུག་གི་བདེ་འཇགས་འགན་སྲུང་བྱེད་པ། མུ་མཐུད་དུ་སྐྱེ་ཁམས་ཁོར་ཡུག་གི་སྤུས་ཚད་ལེགས་བཅོས་བྱེད་པ། ཁོར་ཡུག་བཅོས་སྐྱོང་བྱེད་ནུས་ཆེ་རུ་གཏོང་བ་བཅས་བྱ་དགོས།

རང་སྐྱོང་ལས་ཁུངས་ཀྱིས་ཁྲིམས་འཛིན་ལས་ཁུངས་ཀྱིས་སྐྱེ་ཁམས་ཁོར་ཡུག་གི་སྤྱི་ཕན་གཏུག་བཤེར་སྤེལ་བར་རྒྱབ་སྐྱོར་བྱེད་དགོས།

དོན་ཚན་ཞེ་བརྒྱད་པ། རང་སྐྱོང་ལས་ཁུངས་ཀྱིས་མདོ་ལ་རིང་མོའི་རྒྱལ་ཁབ་སྤྱི་གླིང་གི་མཚོ་བྱང་ཡུལ་གནས་གཙོ་བོ་ཡིན་པའི་རང་བྱུང་སྲུང་སྐྱོང་གནས་ཀྱི་མ་ལག་འཛུགས་སྐྲུན་ལ་ཤུགས་སྣོན་རྒྱག་པ་དང་། རང་བྱུང་ནགས་ཚལ་སྲུང་སྐྱོང་དང་། ས་ནག་གྲམ་ཐང་བཅོས་སྐྱོང་། འདམ་ར་སྲུང་སྐྱོང་སོགས་སྐྱེ་ཁམས་སླར་གསོ་བཅོས་སྐྱོང་བཟོ་སྐྲུན་ལག་བསྟར་བྱེད་པ་དང་། སྐྱེ་ཁམས་བར་ཁྱམས་སྦྲེལ་མཐུད་དང་གཏོར་སྐྱོན་ཕོག་པའི་བྱེས་སྐྱེས་སྲོག་ཆགས་འཚོ་སྡོད་ཁུལ་ཉམས་གསོ་བྱ་རྒྱུར་སྐུལ་སྤེལ་བྱས་ནས། སྐྱེ་ཁམས་མ་ལག་གི་གདོད་མའི་རང་བཞིན་དང་ཆ་ཚང་རང་བཞིན་སྲུང་སྐྱོང་ལ་སྐུལ་འདེད་གཏོང་བ་བཅས་བྱེད་དགོས།

དོན་ཚན་ཞེ་དགུ་བ། རང་སྐྱོང་ལས་ཁུངས་ཀྱིས་ཁོངས་གཏོགས་ས་ཆའི་འགན་འཁྲི་དོན་འཁྱོལ་བྱས་ནས། མཚོ་སྔོན་པོའི་བྱང་འགྲམ་འབབ་རྒྱུད་ཀྱི་ཆུ་ལམ་དང་མཚེའུ་འགྲམ་གྱི་རང་བྱུང་སྐྱེ་ཁམས་སྲུང་སྐྱོང་དང་། ཆུ་ཁུངས་གསོ་འཁྱོངས་ས་ཁོངས་སྲུང་སྐྱོང་བྱེད་ཤུགས་ཆེ་རུ་གཏོང་བ་བཅས་བྱས་ནས་སྐྱེ་ཁམས་རང་བྱུང་སླར་གསོ་ཡོང་བར་སྐུལ་འདེད་གཏོང་དགོས།

རང་སྐྱོང་ལས་ཁུངས་ཀྱིས་ཆུ་བདག་དོ་དམ་ལམ་ལུགས་ལག་བསྟར་བཅས་བྱས་ཏེ། བར་དམ་ཆུ་བོ་དང་རྟ་ཐང་ཆུ་བོ། ཙོང་ཆུ་བཅས་འབབ་རྒྱུད་ཀྱི་ཕྱོགས་བསྡུས་བཅོས་སྐྱོང་ལ་ཤུགས་སྣོན་རྒྱག་པ་དང་། ཆུའི་ཐོན་ཁུངས་ལུགས་མཐུན་གྱིས་གསར་སྤེལ་དང་བེད་སྤྱོད་གཏོང་དགོས་ལ། ཆུའི་སྐྱེ་ཁམས་ཁོར་ཡུག་གི་བདེ་འཇགས་འགན་སྲུང་བྱེད་དགོས།

དོན་ཚན་ལྔ་བཅུ་བ། རང་སྐྱོང་ལས་ཁུངས་ཀྱིས་ས་ཞིང་ཞན་འགྱུར་དང་བྱེ་འགྱུར། ས་ཆུ་ཤོར་བ་བཅས་ཀྱི་ཕྱོགས་བསྡུས་བཅོས་སྐྱོང་བྱེད་ཤུགས་ཆེ་རུ་གཏོང་བ་དང་། རི་རྒྱ་བསྡམས་ནས་རྩྭ་འདེབས་པ་དང་སྔོ་ཁེབས་སླར་གསོ་བྱེད་པ། རྒྱལ་ཁབ་ཀྱི་མངའ་ཁོངས་སྔོ་ལྗང་ཅན་དུ་འགྱུར་བའི་བྱ་བ་རྒྱུན་མཐུད་ངང་སྤེལ་བ། རི་ཆུ་ནགས་ཞིང་མཚེའུ་རྩྭ་བཅས་ཀྱི་མ་ལག་གཅིག་གྱུར་གྱིས་བཅོས་སྐྱོང་བྱ་དགོས།

དོན་ཚན་ང་གཅིག་པ། རང་སྐྱོང་ལས་ཁུངས་ཀྱིས་ཁྲིམས་ལྟར་གཏེར་ཁ་དང་བཞུར་ཆུ། ནགས་ཚལ། རི་རྒྱུད། རྩྭ་ཐང་། ས་རྒོད། གྲམ་ཐང་། རྩ་ཆེའི་བྱེས་སྐྱེས་སྲོག་ཆགས་དང་རྩི་ཤིང་སོགས་རང་བྱུང་ཐོན་ཁུངས་སྲུང་སྐྱོང་དང་དོ་དམ་བྱ་དགོས། རྒྱལ་ཁབ་ཀྱིས་རང་སྐྱོང་ཁུལ་ལ་གསར་སྤེལ་བྱེད་དུ་བཅུག་པའི་རང་བྱུང་ཐོན་ཁུངས་སྔོན་ལ་སྲུང་སྐྱོང་བྱེད་པ་རྒྱུན་འཁྱོངས་དང་ལུགས་མཐུན་གྱིས་གསར་སྤེལ་དང་བེད་སྤྱོད་བྱེད་དགོས།

རང་སྐྱོང་ལས་ཁུངས་ཀྱིས་བྱེས་སྐྱེས་སྲོག་ཆགས་སྲུང་སྐྱོབ་བྱ་བའི་ལམ་སྲོལ་འཛུགས་པ་དང་འཐུས་ཚང་དུ་བཏང་སྟེ། ཁྲིམས་འགལ་ངང་བྱེས་སྐྱེས་སྲོག་ཆགས་རྔོན་པ་དང་སྐྱེལ་འདྲེན། ཉོ་འཚོང་བཅས་བྱེད་པ་བཀག་འགོག་དང་། བྱེས་སྐྱེས་སྲོག་ཆགས་བག་མེད་ལོངས་སྤྱོད་བྱེད་པའི་གོམས་སྲོལ་ངན་པ་མེད་པར་བཟོས་ནས། ཚན་རིག་དང་མཐུན་ལ་བདེ་ཐང་ངང་ཡ་རབས་ཚུལ་ལྡན་གྱི་འཚོ་བ་སྐྱེལ་སྟངས་དར་སྤེལ་གཏོང་དགོས།

ལེའུ་དྲུག་པ། མི་རིགས་དང་ཆོས་ལུགས་ལས་དོན།

དོན་ཚན་ང་གཉིས་པ།  རང་སྐྱོང་ཁུལ་ནང་ཁུལ་གྱི་མི་རིགས་ཁག་ཚང་མ་འདྲ་མཉམ་ཡིན། རང་སྐྱོང་ལས་ཁུངས་ཀྱིས་བཅའ་ཁྲིམས་ལྟར་མི་རིགས་ཁག་གི་སྤྱི་དམངས་ཀྱི་ཁྲིམས་མཐུན་ཁེ་དབང་འགན་སྲུང་བྱས་ཏེ། འདྲ་མཉམ་དང་མཐུན་སྒྲིལ། རོགས་རེས། འཆམ་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲུང་སྐྱོང་དང་འཕེལ་རྒྱས་གཏོང་དགོས། མི་རིགས་གང་ཞིག་ལའང་མཐོང་ཆུང་དང་གཉའ་གནོན་བྱེད་པ་བཀག་འགོག་བྱ་རྒྱུ་དང་། མི་རིགས་མཐུན་སྒྲིལ་ལ་གཏོར་བཤིག་གཏོང་བ་དང་མི་རིགས་ཁ་འབྲལ་གྱི་བྱ་སྤྱོད་བཀག་འགོག་བྱ་དགོས།

དོན་ཚན་ང་གསུམ་པ། རང་སྐྱོང་ལས་ཁུངས་ཀྱིས་ཁྲིམས་ལྟར་མི་རིགས་མཐུན་སྒྲིལ་ལ་གནོད་པའི་འགལ་བ་དང་རྩོད་གཞི་ཐག་གཅོད་འོས་འཚམ་བྱ་དགོས། རྩ་འཛུགས་གང་དང་མི་སྒེར་སུ་ཞིག་གིས་ཀྱང་མི་རིགས་མཐུན་སྒྲིལ་ལ་གནོད་པའི་གཏམ་བརྗོད་ཁྱབ་སྤེལ་བྱས་མི་ཆོག མི་རིགས་མཐུན་སྒྲིལ་ལ་གནོད་པའི་ཆ་འཕྲིན་འཚོལ་སྡུད་དང་འདོན་སྤྲོད། སྒྲིག་བཟོ། ཁྱབ་སྤེལ་བཅས་བྱས་མི་ཆོག ཐལ་དྲགས་པའི་བསམ་བློ་སྒྲོག་སྤེལ་དང་ཁྱབ་སྤེལ་བྱས་མི་ཆོག མི་རིགས་མཐུན་སྒྲིལ་ལ་གཏོར་བཤིག་གཏོང་བ་དང་། སྤྱི་ཚོགས་བརྟན་ལྷིང་ལ་ཤུགས་རྐྱེན་བཟོ་བ། རྒྱལ་ཁབ་གཅིག་གྱུར་ལ་གནོད་འཚེ་གཏོང་བ་བཅས་ཀྱི་བྱ་སྤྱོད་སྤེལ་མི་ཆོག

དོན་ཚན་ང་བཞི་བ། རང་སྐྱོང་ལས་ཁུངས་ཀྱིས་མི་རིགས་མཐུན་སྒྲིལ་ཡར་ཐོན་གྱི་སློབ་གསོ་གཏིང་ཟབ་ཏུ་སྤེལ་བ་དང་། མི་རིགས་ཁག་གི་མང་ཚོགས་ལ་སྣེ་ཁྲིད་དེ་ཡང་དག་པའི་རྒྱལ་ཁབ་ཀྱི་ལྟ་བ་དང་མི་རིགས་ཀྱི་ལྟ་བ། ཆོས་ལུགས་ཀྱི་ལྟ་བ། ལོ་རྒྱུས་ཀྱི་ལྟ་བ། རིག་གནས་ཀྱི་ལྟ་བ་བཅས་བརྟན་པོར་བཙུགས་ནས། མི་རིགས་མཐུན་སྒྲིལ་ཡར་ཐོན་གྱི་བསམ་བློའི་རྨང་གཞི་བརྟན་པོ་འཛུགས་དགོས།

དོན་ཚན་ང་ལྔ་བ། རང་སྐྱོང་ལས་ཁུངས་ཀྱིས་མི་རིགས་མཐུན་སྒྲིལ་ཡར་ཐོན་གསར་འཛུགས་ལས་དོན་རྒྱུན་སྲིང་དང་གཏིང་ཟབ་ངང་སྤེལ་བ་དང་། སྤྱི་ཚོགས་བཅོས་སྐྱོང་བྱེད་སྟངས་གསར་གཏོད་བྱས་ནས། ཕན་ཚུན་མཉམ་འདྲེས་རྣམ་པའི་སྤྱི་ཚོགས་ཀྱི་གྲུབ་ཚུལ་དང་གཞིས་ཁུལ་གྱི་ཁོར་ཡུག་འཛུགས་དགོས་ལ། ཧུར་ཐག་གིས་མི་རིགས་ཁག་མཉམ་སྡོད་མཉམ་སློབ་དང་མཉམ་ལས་མཉམ་སྐྱིད་ཀྱི་སྤྱི་ཚོགས་ཆ་རྐྱེན་སྐྲུན་པ་དང་། རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་གསར་འཛུགས་བྱེད་པའི་གྲུབ་འབྲས་སྲ་བརྟན་དང་མཐོ་རུ་གཏོང་བ་བཅས་བྱེད་དགོས།

དོན་ཚན་ང་དྲུག་པ། རང་སྐྱོང་ལས་ཁུངས་ཀྱིས་ཆོས་ལུགས་དད་མོས་རང་དབང་གི་སྲིད་ཇུས་ཕྱོགས་ཡོངས་ནས་ལག་ལེན་མཐར་ཕྱིན་བྱས་ཏེ་སྤྱི་དམངས་ཀྱི་ཆོས་ལུགས་དད་མོས་རང་དབང་ལ་འགན་སྲུང་བྱ་དགོས། རྩ་འཛུགས་གང་དང་མི་སྒེར་སུ་ཞིག་ཡིན་རུང་བཙན་ཤེད་ཀྱིས་སྤྱི་དམངས་ལ་ཆོས་དད་བྱེད་དུ་འཇུག་པའམ་ཆོས་དད་བྱེད་དུ་མི་འཇུག་པ་བྱས་མི་ཆོག་པ་དང་། ཆོས་དད་ཡོད་པའི་སྤྱི་དམངས་སམ་ཆོས་དད་མེད་པའི་སྤྱི་དམངས་ལ་མཐོང་ཆུང་བྱས་མི་ཆོག

དོན་ཚན་ང་བདུན་པ། རང་སྐྱོང་ལས་ཁུངས་ཀྱིས་ཁྲིམས་ལྟར་ཆོས་ལུགས་ལས་དོན་དོ་དམ་བྱེད་ཤུགས་ཆེ་རུ་གཏོང་བ་དང་། ཆོས་ལུགས་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས་བྱས་ཏེ། ཧུར་ཐག་གིས་ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་ཕན་ཚུན་འཚམ་པོ་ཡོང་བར་སྣེ་ཁྲིད་བྱ་དགོས།

རང་སྐྱོང་ལས་ཁུངས་ཀྱི་ཆོས་ལུགས་ཚོགས་པ་དང་ཆོས་ལུགས་བྱེད་སྒོ། ཆོས་ལུགས་ལས་དོན་བཅས་ལ་ཕྱི་རྒྱལ་གྱི་སྟོབས་ཤུགས་ཀྱིས་ཁ་ལོ་བསྒྱུར་མི་ཆོག

དོན་ཚན་ང་བརྒྱད་པ། རང་སྐྱོང་ལས་ཁུངས་ཀྱིས་རྒྱུན་ལྡན་གྱི་ཆོས་ལུགས་བྱེད་སྒོར་སྲུང་སྐྱོང་བྱ་རྒྱུ་དང་། ཆོས་ལུགས་ཚོགས་པ་དང་ཆོས་ལུགས་བྱེད་སྒོ་སྤེལ་ས། ཆོས་དོན་ལས་སྒྲུབ་མི་སྣ། ཆོས་དད་སྤྱི་དམངས་བཅས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོབ་བྱས་ཏེ། ཁྲིམས་དང་མི་མཐུན་པའི་ཆོས་ལུགས་བྱེད་སྒོ་དང་ཆོས་སྤེལ་བྱ་སྤྱོད་བཀག་འགོག་བྱེད་དགོས།

རྩ་འཛུགས་གང་དང་མི་སྒེར་སུ་ཞིག་གིས་ཀྱང་ཆོས་ལུགས་ལ་བརྟེན་ནས་རྒྱལ་ཁབ་ཀྱི་སྲིད་འཛིན་དང་ཁྲིམས་འཛིན། སློབ་གསོ། རིག་གནས། འཆར་ལྡན་བུ་སྐྱེས་བཅས་ཀྱི་སྲིད་ཇུས་ལག་ལེན་བསྟར་བར་ཐེ་གཏོགས་བྱས་མི་ཆོག་པ་དང་། ཆོས་ལུགས་བེད་སྤྱད་ནས་སྤྱི་ཚོགས་ཀྱི་སྒྲིག་ལམ་དང་བྱ་བའི་སྒྲིག་ལམ། སྤྱི་དམངས་ཀྱི་ཐོན་སྐྱེད་དང་འཚོ་བར་གནོད་སྐྱོན་བཏང་མི་ཆོག ཆོས་ལུགས་དད་མོས་དང་ཡུལ་སྲོལ་གོམས་གཤིས་སམ་ཡང་ན་རྒྱུ་མཚན་གཞན་དག་ལ་བརྟེན་ནས་གཉེན་སྒྲིག་རང་དབང་ལ་ཐེ་གཏོགས་བྱས་མི་ཆོག ཆོས་ལུགས་ཀྱི་མིང་ཐོག་ནས་བསྡུ་ཆ་རྒྱག་པ་དང་ཞལ་འདེབས་བསྡུ་བ།  མ་དངུལ་བསྡུ་རུབ་བྱེད་མི་ཆོག

དོན་ཚན་ང་དགུ་བ། རང་སྐྱོང་ཁུལ་ནང་ཁུལ་གྱི་ཆོས་ལུགས་བྱེད་སྒོ་སྤེལ་ས་རུ་ཁྲིམས་ལྟར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་དར་བསྒྲེངས་དགོས།

དོན་ཚན་དྲུག་ཅུ་བ། ལོ་རེའི་ཟླ་བརྒྱད་པར་རང་སྐྱོང་ཁུལ་གྱི་མི་རིགས་མཐུན་སྒྲིལ་ཡར་ཐོན་གྱི་དྲིལ་སྒྲོག་ཟླ་བ་ཡིན། ལོ་ལྔ་རེའི་ནང་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་འཚོགས་ནས་ལོ་ལྟར་མི་རིགས་མཐུན་སྒྲིལ་ཡར་ཐོན་གསར་འཛུགས་ཀྱི་ཚད་ལོན་ལས་ཁུངས་ཀྱི་ལས་བྱེད་ལས་བཟོ་བར་བྱ་དགའ་སྤྲོད་དགོས།

དོན་ཚན་རེ་གཅིག་པ། ལོ་རེའི་ཟླ་བརྒྱད་པའི་ཚེས་དགུ་ཉིན་ནི་རང་སྐྱོང་ཁུལ་དབུ་བརྙེས་པའི་དྲན་གསོའི་ཉིན་མོ་ཡིན་པས་ཉིན་གཅིག་ལ་ངལ་གསོ་གནང་བ་གཏོང་རྒྱུ།

རང་སྐྱོང་ཁུལ་གྱིས་མི་རིགས་ཁག་གི་སྲོལ་རྒྱུན་དུས་ཆེན་ལ་བརྩི་འཇོག་བྱེད་དགོས། བོད་ཀྱི་ལོ་གསར་དང་སྨྱུང་གྲོལ་དུས་ཆེན་སོགས་གྲངས་ཉུང་མི་རིགས་ཀྱི་སྲོལ་རྒྱུན་དུས་ཆེན་ལ་ངལ་གསོ་གནང་བ་གཏོང་རྒྱུ་དང་།  ངལ་གསོ་གནང་བའི་ཞིབ་ཕྲའི་བྱ་ཐབས་ནི་རང་སྐྱོང་ཁུལ་མི་དམངས་སྲིད་གཞུང་གིས་ལོགས་སུ་གཏན་འབེབས་བྱ་རྒྱུ།

ལེའུ་བདུན་པ། མི་ཤུགས་ཐོན་ཁུངས།

དོན་ཚན་རེ་གཉིས་པ། རང་སྐྱོང་ལས་ཁུངས་ཀྱིས་ཤེས་ལྡན་མི་སྣར་བརྟེན་ནས་ཁུལ་སྟོབས་ཆེར་གཏོང་བའི་འཐབ་ཇུས་ལག་བསྟར་དང་། ཤེས་ལྡན་མི་སྣ་གསོ་སྐྱོང་དང་ནང་འདྲེན། བཀོལ་སྤྱོད་བཅས་བྱ་རྒྱུར་མཐོང་ཆེན་བྱས་ནས། རང་སྐྱོང་ཁུལ་གྱི་དཔལ་འབྱོར་འཛུགས་སྐྲུན་དང་སྤྱི་ཚོགས་འཕེལ་རྒྱས་གཏོང་བར་ཤེས་ལྡན་མི་སྣའི་འགན་སྲུང་འདོན་སྤྲོད་བྱེད་དགོས།

དོན་ཚན་རེ་གསུམ་པ། རང་སྐྱོང་ལས་ཁུངས་ཀྱིས་ཤེས་ལྡན་མི་སྣའི་དཔུང་ཁག་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། གྲངས་ཉུང་མི་རིགས་ཀྱི་ལས་བྱེད་པ་དང་ན་གཞོན་ལས་བྱེད་པ། བུད་མེད་ལས་བྱེད་པ་བཅས་གསོ་སྐྱོང་དང་གདམ་གསེས། བཀོལ་སྤྱོད་བཅས་བྱ་རྒྱུར་མཐོང་ཆེན་བྱ་དགོས།

དོན་ཚན་རེ་བཞི་བ། རང་སྐྱོང་ལས་ཁུངས་ཀྱིས་ཤེས་ལྡན་མི་སྣའི་དཔུང་ཁག་ལ་སྐུལ་མ་གཏོང་བའི་ལམ་སྲོལ་འཛུགས་པ་དང་འཐུས་ཚང་དུ་གཏོང་བ་དང་། ཤེས་ལྡན་མི་སྣའི་བྱ་དགའི་ཐེབས་རྩ་འཛུགས་པ། ཤེས་ལྡན་མི་སྣའི་བྱ་བའི་ཐོབ་ཐང་དོན་འཁྱོལ་བཅས་བྱེད་དགོས་ལ། ཞིབ་ཕྲའི་བྱ་ཐབས་ནི་ཁུལ་མི་དམངས་སྲིད་གཞུང་གིས་གཏན་འབེབས་བྱེད་དགོས།

དོན་ཚན་རེ་ལྔ་བ། རང་སྐྱོང་ཁུལ་གྱི་རྒྱལ་ཁབ་ལས་ཁུངས་དང་སྤྱི་ཚོགས་ཚོགས་པ། བྱ་ལས་སྡེ་ཚན། མཁར་གྲོང་དང་ཡུལ་ཚོའི་གཞི་རིམ་རྩ་འཛུགས་བཅས་ཀྱིས་ལས་བྱེད་མི་སྣ་སྡུད་སྐབས་བོད་རིགས་དང་གྲངས་ཉུང་མི་རིགས་གཞན་པའི་སྤྱི་དམངས་ལ་ལྟ་སྐྱོང་འོས་འཚམ་བྱ་དགོས།

དོན་ཚན་རེ་དྲུག་པ། རང་སྐྱོང་ལས་ཁུངས་ཀྱིས་འབྲེལ་ཡོད་ཀྱི་བཅའ་ཁྲིམས་དང་སྲིད་ཇུས་གཞིར་བཟུང་ནས། མཐོ་གཞོང་གནམ་གཤིས་ཀྱི་ཁྱད་ཆོས་དང་མཐུན་པའི་ངལ་གསོའི་ལམ་ལུགས་བཟོ་དགོས། ལས་བྱེད་ལས་བཟོ་བའི་ཟླ་ཕོགས་མི་འཐེན་པར་ངལ་གསོའི་གནང་ཞུ་ལམ་ལུགས་དོན་འཁྱོལ་ནན་པོ་བྱས་ཏེ་ངལ་རྩོལ་པའི་ཁྲིམས་མཐུན་ཁེ་དབང་འགན་སྲུང་བྱེད་དགོས།

ལེའུ་བརྒྱད་པ། ཞར་བྱུང་དོན་ཚན།

དོན་ཚན་རེ་བདུན་པ། སྲོལ་ཡིག་འདི་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་ཐོག་གྲོས་འཆམ་བྱུང་རྗེས། མཚོ་སྔོན་ཞིང་ཆེན་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་ལ་སྙན་སེང་ཞུས་ནས་ཆོག་མཆན་ཐོབ་རྗེས་ལག་བསྟར་བྱེད་རྒྱུ།

དོན་ཚན་རེ་བརྒྱད་པ། སྲོལ་ཡིག་འདི་རང་སྐྱོང་ཁུལ་གྱི་མི་དམངས་འཐུས་མི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་གིས་གསལ་འགྲེལ་བྱེད་པའི་འགན་འཁུར་རྒྱུ།

དོན་ཚན་རེ་དགུ་བ། སྲོལ་ཡིག་འདི2020ལོའི་ཟླ7ཚེས1ཉིན་ནས་བཟུང་ལག་བསྟར་བྱེད་རྒྱུ།