གཤོག་ཐོག་གསུམ་གྱི་རྩྭ་གཟན་ཅི་ཁེད།
ལན། རྫ་ཁའི་གོང་མོས་རྫ་རྩྭ་ཟ།
ཐང་དཀར་རྒོད་པོས་སྤ་ཏོག་ཟ།
ངང་བ་སེར་པོས་འདམ་རྩྭ་ཟ།
རྨིག་ཐོག་གསུམ་གྱི་ཤ་གཟན་ཅི་ཁེད།
ལན། མ་མོ་གྲོ་མོས་ས་རྨིགས་ཟ།
སྟོན་ཀའི་ཤ་བོས་སྦལ་བ་ཟ།
མཛོ་མོ་སྔོན་མོས་ཤ་མ་ཟ།
འཇིག་རྟེན་ཁམས་ཀྱི་མི་དལ་རྣམ་གསུམ་ཅི་ཁེད།
ལན། གཡག་གུ་ཞོན་ན་སུག་མི་དལ།
སྤེན་མ་བུས་ན་ལག་མི་དལ།
ཆུང་མ་ངན་ན་ཁ་མི་དལ།
ཨ་དོག་དོག་གསུམ་ཅི་ཁེད།
ལན། ནམ་མཁའ་ཡངས་རུང་བྱ་ལམ་དོག།
ཁྱིམ་གཞི་ཡངས་རུང་སྒོ་ཁ་དོག།
ཕུ་ཞབས་ཡངས་རུང་ཕུར་ཁ་དོག།
གཤོག་ཐོག་གཅིག་ལ་དོ་ཟླ་གསུམ་ཅི་ཁེད།
ལན། ཡ་ཐོད་མིག་གིས་གང་བ་དོམ་ནག་སྨྱོན་པའི་དོ་ཟླ།
སྐད་ཅིག་ཉིད་ལ་འཕུར་བ་ཐང་དཀར་རྒོད་པོའི་དོ་ཟླ།
གསོན་པོའི་ཁྲག་ལ་དགའ་བ་རི་སྤྱང་སྔོན་མོའི་དོ་ཟླ།
བོད་ཀྱི་ཨ་འཛའ་འཛའ་གསུམ་ཅི་ཁེད།
ལན། སྟག་ཤ་རའི་རྒྱབ་ལ་འཁོར་གསུམ་འཛའ།
རྟ་འདོ་བའི་རྒྱབ་ལ་སྒ་ཁྲ་འཛའ།
སྨན་བུ་མོའི་རྒྱབ་ལ་དུང་ར་འཛའ།
རྒྱ་ཡི་ཨ་འཛའ་འཛའ་གསུམ་ཅི་ཁེད།
ལན། རྣ་ཁྲི་གང་བོང་བུའི་མགོ་ན་འཛའ།
ནས་ཐར་གང་བོང་བུའི་རྒྱབ་ན་འཛའ།
རྒྱ་ཁ་སྤུ་ཅན་ཞིག་རྗེས་ན་འཛའ།
བར་སྣང་ཁམས་ཀྱི་ཚོས་གསུམ་ཅི་ཁེད།
ལན། ཉི་མ་སེར་པོ་གསེར་གྱི་ཚོས།
ཟླ་བ་དཀར་ཆུང་དུང་གི་ཚོས།
སྐར་ཚོགས་ཁྲ་མོ་དངུལ་གྱི་ཚོས།
མི་སྲིད་སྲིད་པ་རྣམ་གསུམ་ཅི་ཁེད།
ལན། བྱ་སྐྱ་ཀའི་མཁྲིས་པ་ཁ་ན་སྲིད།
སྦྲུལ་ལྟོ་འགྲོའི་རྐང་ལག་ཁོག་ན་སྲིད།
ཉ་གསེར་མིག་སོག་པ་མགོ་ན་སྲིད།
སྲིད་པའི་སྲིད་པ་རྣམ་གསུམ་ཅི་ཁེད།
ལན། རྡོ་ལྕགས་བར་ནས་མེ་སྟག་སྲིད།
ཤ་ཀོ་བར་ནས་འོ་མ་སྲིད།
ས་གནམ་བར་ནས་སྦྲང་ཆར་སྲིད།
མ་མགར་རྩེ་མོ་རྣམ་གསུམ་ཅི་ཁེད།
ལན། རྭ་རྩེ།
བྲག་རྩེ།
མདུང་རྩེ།
སྡེར་མོ་ཅན་གྱི་རྩྭ་གཟན་གསུམ་ཅི་ཁེད།
ལན། རྨ་བྱ་སྔོན་མོས་དུག་རྩྭ་ཟ།
ཐང་དཀར་རྒོད་ཀྱིས་བྲག་རྩྭ་ཟ།
ངང་བ་སེར་བོས་འདམ་རྩྭ་ཟ།
སྡེར་ཐོག་གསུམ་གྱི་སྒོང་འཇོག་གསུམ་ཅི་ཁེད།
ལན། སྲེ་མོང་དམར་མོས་ཁྲག་སྒོང་འཇོག།
གཡུ་འབྲུག་སྔོན་མོས་གཡུ་སྒོང་འཇོག།
སེང་གེ་དཀར་མོས་དུང་སྒོང་འཇོག།
མགར་བའི་རྩེ་མོ་རྣམ་བཞི་ཅི་ཁེད།
ལན། ཁབ་རྩེ།
འབིག་རྩེ།
གྲི་རྩེ།
མདུང་རྩེ།
ཨ་འབུམ་མ་འབུམ་བཞི་ཅི་ཁེད།
ལན། ཀླད་པ་ཀོར་མོའི་མན་ཆད་ཀྱི།
ཐོད་པ་ལེབ་མོའི་ཡན་ཆད་ཀྱི།
སྐྲ་ནག་པོའི་སྐྱེ་ཚུལ་ཁྲི་མ་འབུམ།
ཐོད་པ་ལེབ་མོའི་མན་ཆད་ཀྱི།
སྣ་ཁུང་སྦུ་གུའི་ཡན་ཆད་ཀྱི།
མིག་ཁྲ་རིལ་ལྟ་ཚུལ་ཁྲི་མ་འབུམ།
སྣ་ཁུང་སྦུ་གུའི་མན་ཆད་ཀྱི།
མ་ནེ་སྒུར་རེ་ཡན་ཆད་ཀྱི།
ལྕེ་དར་མའི་བཤད་ཚུལ་ཁྲི་མ་འབུམ།
མ་ནེ་སྒུར་རེ་མན་ཆད་ཀྱི།
དང་ག་ལེབ་མོའི་ཡན་ཆད་ཀྱི།
སེམས་སྐྱ་མོའི་དྲན་ཚུལ་ཁྲི་མ་འབུམ།
ཨ་འདྲ་བ་འདྲ་བཞི་ཅི་ཁེད།
ལན། ཤྭ་ཁིས་ནས་བུད་ན་མདུང་བཟུང་འདྲ།
རྐྱང་ཐང་ནས་ཞོགས་ན་རྟ་དེད་འདྲ།
འཕྱི་ཁུང་ཁར་གྲགས་ན་བུ་ཆུང་འདྲ།
ལུག་རྫི་ཐོད་ནས་བསྡད་ན་སོ་བ་འདྲ།
རྙེད་པ་ལྔ་ཅི་ཁེད།
ལན། ཁབ་རོ་བོར་བ་རྒོད་ཀྱིས་རྙེད།
རྒོད་རོ་བོར་བ་གོ་བོས་རྙེད།
གོ་རོ་བོར་བ་གླག་གིས་རྙེད།
གླག་རོ་བོར་བ་བྱིའུ་ཡིས་རྙེད།
བྱིའུ་རོ་བོར་བ་བ་ཡིས་རྙེད།
བ་མོ་ལྡོམ་ནས་རྫ་མཐར་ཉུལ།
ཨ་འགུག་ག་འགུག་དྲུག་ཅི་ཁེད།
ལན། འདོ་རིག་རྟ་བོ་ཆས་ཀྱིས་འགུག།
མཛོ་མོ་དྲི་མ་སྐད་ཀྱིས་འགུག།
འཕར་བ་དམར་ཆུང་ཕེ་ཀྱིས་འགུག།
རི་བོང་ཕར་ལོག་སྤ་ཡིས་འགུག།
ཐང་དཀར་རྒོད་པོ་ཐེད་ཀྱིས་འགུག།
རི་སྤྱང་སྔོན་མོ་གཟན་གྱིས་འགུག།
ཨ་དྲུག་པ་དྲུག་ཅི་ཁེད།
ལན། ཐོད་པ། ཀླད་པ། མཆིན་པ།
མཁྲིས་པ། སྒྱིད་པ། རྩིད་པ།
རྒོད་པོའི་མཁོ་དྲུག་ཅི་ཁེད།
ལན། མིག་ཟུང་ཆུ་ཤེལ་དྭངས་མོ་དེ།
ཐག་རིང་གྲོ་ཁ་འཚོལ་ཉིན་མཁོ།
མཆུ་ཏོ་ལྕགས་ནག་སྦུ་གུ་དེ།
རྩིབ་གུའི་བར་འཚང་འབྲུ་ཉིན་མཁོ།
ཡ་མཆུ་ཨ་མོ་འགུག་ཡག་འདི།
ཉྭ་ཤའི་སྒྱུས་པ་ལེན་ཉིན་མཁོ།
མ་མཆུ་སྨུག་པོ་སྒྲོ་ཡག་འདི།
ལུས་ཀྱི་ཟུངས་ཁྲག་གཞིབ་ཉིན་མཁོ།
གཤོག་པ་སུམ་བརྒྱ་དྲུག་ཅུ་འདི།
བར་སྣང་ཁམས་ལ་འཕུར་ཉིན་མཁོ།
སྡེར་མོ་ནོར་བུ་སུམ་འཛོམས་འདི།
ཤིང་གི་རྩེ་ལ་འབབ་ཉིན་མཁོ།
འཛམ་བུ་གླིང་གི་རང་གྲུབ་དྲུག་ཅི་ཁེད།
ལན། རིའི་རྒྱལ་བོའི་རི་རབ་རྩེ་མོ་དེ།
བཞེངས་ནི་མ་རེད་རང་སྐྱེས་རེད།
ཤར་ཤིང་ཁམས་རྒྱལ་བོའི་བླ་ཤིང་དེ།
བཙུགས་ནི་མ་རེད་རང་སྐྱེས་རེད།
ལྷོ་མེ་ཁམས་རྒྱལ་བོའི་མེ་རི་དེ།
མེ་བུས་ནི་མ་རེད་རང་འབར་རེད།
ནུབ་ལྕགས་ཁམས་རྒྱལ་བོའི་གཏེར་ཁ་དེ།
གཏེར་སྦས་ནི་མ་རེད་རང་གྲུབ་རེད།
བྱང་ཆུ་ཁམས་རྒྱལ་བོའི་བླ་མཚོ་དེ།
མཚོ་བསྐྱིལ་ནི་མ་རེད་རང་འཁྱིལ་རེད།
ཉིན་མཚན་མོ་གཉིས་ཀ་བརྗེ་བ་འདི།
བརྗེ་ནི་མ་རེད་རང་འཁོར་རེད།
སྒོ་མོ་ཕྱེ་བ་དྲུག་ཅི་ཁེད།
ལན། དམ་པའི་ཆོས་སྒོ་གང་གིས་ཕྱེས།
དམ་པའི་ཆོས་སྒོ་སྤོས་ཀྱིས་ཕྱེས།
སྤོས་ཀྱི་སྒོ་མོ་གང་གིས་ཕྱེས།
སྤོས་ཀྱི་སྒོ་མོ་མེ་ཡིས་ཕྱེས།
གཡུང་དྲུང་བོན་སྒོ་གང་གིས་ཕྱེས།
གཡུང་དྲུང་བོན་སྒོ་དུང་གིས་ཕྱེས།
རྔ་ཡི་སྒོ་མོ་གང་གིས་ཕྱེས།
རྔ་ཡི་སྒོ་མོ་ཤིང་གིས་ཕྱེས།
ཁྲོམ་པའི་སྒོ་མོ་གང་གིས་ཕྱེས།
ཁྲོམ་པའི་སྒོ་མོ་ཆང་གིས་ཕྱེས།
ཆང་གི་སྒོ་མོ་གང་གིས་ཕྱེས།
ཆང་གི་སྒོ་མོ་གླུ་ཡིས་ཕྱེས།
ཨ་མཁོ་བ་དྲུག་ཅི་ཁེད།
ལན། རྒོད་ཐང་དཀར་རྒྱབ་ཀྱི་སྤུ་སྣ་འདི།
བུ་མོ་གནས་ལ་འགྲོ་དུས་མཁོ།
མིག་རྡོ་ཁྲོ་ཆུ་བླུགས་མ་འདི།
ས་ཐག་རིང་རྒྱང་བལྟ་བྱེད་དུས་མཁོ།
ཡ་ཁའི་མཆེ་བ་ནག་པོ་འདི།
ཚོན་པོ་ཚིལ་སྐྱ་ཟ་དུས་མཁོ།
མ་ཁའི་མཆེ་བ་ནག་པོ་འདི།
སྒྱིད་པའི་ཉྭ་ཤ་བྲུ་དུས་མཁོ།
དིང་རུ་ལྷུ་ཆེན་བཅུ་གཉིས་འདི།
དགུང་ཨ་སྔོན་ནམ་འཕང་བསྟོད་དུས་མཁོ།
ལྕགས་ཀྱི་སྡེར་གསུམ་སྐྱ་བོ་འདི།
ས་ནག་པོའི་སྟེང་ལ་འབབ་དུས་མཁོ།
གླ་ཡི་ཐེ་དྲུག་ཅི་ཁེད།
ལན། གླ་མགོ་དྲེད་ལ་ཐེ།
གླ་ལྤགས་གོས་ལ་ཐེ།
གླ་རྩི་སྨན་ལ་ཐེ།
གླ་ཚིལ་དུང་ལ་ཐེ།
གླ་སྤུ་ཚེར་མ་ཐེ།
གླ་ཁྲག་སྤྱིན་ལ་ཐེ།
ཨ་དྲབ་དྲབ་དྲུག་ཅི་ཁེད།
ལན། འབུ་ནག་བལ་གསེང་ན་དྲབ་དྲབ་དྲབ།
དུག་སྡོམ་གྱང་ངོས་ན་དྲབ་དྲབ་དྲབ།
གྲོག་མ་ཁུང་སྒོ་ན་དྲབ་དྲབ་དྲབ།
བོང་བུ་དར་ཐོག་ན་དྲབ་དྲབ་དྲབ།
ཤིག་སྐྲ་གསེང་ན་དྲབ་དྲབ་དྲབ།
སྦལ་བ་ཞིང་ནང་ན་དྲབ་དྲབ་དྲབ།
གཡག་སོ་དྲུག་ཅིག་ལ་པ་དྲུག་ཡོད་པ་ཅི་ཁེད།
ལན། ཀླད་པ། ཐོད་པ། རྒྱུད་པ།
རུས་པ། རྩིད་པ། མཆིན་པ།
ཨ་མ་མ་དགུ་ཅི་ཁེད།
ལན། ཨ་མ། རྒོད་མ། རྟེའུ་མ། རྒྱུ་མ། སྙེག་མ།
མཁལ་མ། རྔོག་མ། རྔ་མ། ནུ་མ།
མེད་ལ་མེད་དགུ་ཅི་ཁེད།
ལན། འདོ་རིགས་རྟ་བོར་རྭ་ཅོ་མེད།
ཐོད་དཀར་འབྲི་མོར་ཡ་སོ་མེད།
སྐྱ་ཀ་ཕྲ་མོར་མཁལ་ཡས་མེད།
ནམ་མཁའི་བྱ་ལ་གློ་བ་མེད།
མགོ་ནག་མི་ལ་རྔ་མ་མེད།
ནག་པོ་ཁྱི་ལ་ཕྱི་རྟིང་མེད།
ཙི་གུ་ར་མ་མགོ་འཛིན་མེད།
རི་བོང་ཕར་ལོག་མཚེར་བ་མེད།
གཡང་མོ་ལུག་ལ་ཁལ་འགེལ་མེད།
ཨ་མཚར་མཚར་དགུ་ཅི་ཁེད།
ལན། ཐང་བདའ་ནི་མེད་ལ་བདེ་ནི་གན་ཨ་མཚར་རོ།
རྩི་ཐོ་ཁ་མིག་མེད་ལ་ཤུབ་སྒྲ་གྲགས་ནི་གན་ཨ་མཚར་རོ།
ཆུ་བོ་འཁྲིད་ནི་མེད་ལ་བཞུར་ནི་གན་ཨ་མཚར་རོ།
གནམ་འགྱོག་ནི་མེད་ལ་མཐོ་ནི་གན་ཨ་མཚར་རོ།
ལམ་རྐོ་ནི་མེད་ལ་དྲང་ནི་གན་ཨ་མཚར་རོ།
རིལ་མ་རྐང་ལག་མེད་ལ་ལྡིང་ནི་གན་ཨ་མཚར་རོ།
བྲག་རྩིག་ནི་མེད་ལ་མཐོ་ནི་གན་ཨ་མཚར་རོ།
རྡོ་ཕ་མ་མེད་ལ་འཕེལ་ནི་གན་ཨ་མཚར་རོ།
བྱ་ནུ་མ་མེད་ལ་ཕྲུ་གུ་གསོ་ནི་གན་ཨ་མཚར་རོ།
ཨ་ཐེ་ཐེ་དགུ་ཅི་ཁེད།
ལན། གླ་རྩི་སྨན་ལ་ཐེ།
གླུ་སྤུ་ཚེར་མ་ཐེ།
གླ་མགོ་ར་མ་ཐེ།
གླ་སུག་དགོ་ལ་ཐེ།
གླ་རྨིག་མཆོང་ལ་ཐེ།
གླ་ཁྲག་ཚོན་ལ་ཐེ།
གླ་མཆེ་བ་སོར་ཐེ།
གླ་པགས་གོས་ལ་ཐེ།
གླ་རྔ་སྐྱུར་ལ་ཐེ།
ཨ་ཆགས་ཆགས་དགུ་ཅི་ཁེད།
ལན། ས་ཐོག་ལ་རྡོ་ཆགས།
རྡོ་ཐོག་ལ་ཆུ་ཆགས།
ཆུ་ཐོག་ལ་དར་ཆགས།
དར་ཐོག་ལ་རྟ་ཆགས།
རྟ་ཐོག་ལ་སྒ་ཆགས།
སྒ་ཐོག་ལ་མི་ཆགས།
མི་ཐོག་ལ་ཞྭ་ཆགས།
ཞྭ་ཐོག་ལ་ཏོག་ཆགས།
ཏོག་ཐོག་ལ་གནམ་ཆགས།
ཨ་དཀའ་དཀའ་དགུ་ཅི་ཁེད།
ལན། བྱེ་མའི་ཁུག་ནས་སྦྲ་ཕུབ་དཀའ།
ཆུ་ཆེན་དཀྱིལ་ནས་རྗེས་ཕབ་དཀའ།
བོའུ་ཁྲ་རིང་ཁུར་ནས་ཞགས་འདེབས་དཀའ།
སྐེད་འཁོར་གསུམ་གོན་ནས་ཧྲག་འཛུལ་དཀའ།
མགོ་ཝ་མོ་གོན་ནས་མེ་འབུད་དཀའ།
རྒྱབ་དུང་ར་ཅན་གྱིས་དར་ཤུད་དཀའ།
ཁ་དཀར་རྐྱང་ལ་མཐུར་བསྐོན་དཀའ།
ས་ནག་ན་ནས་རྟ་རྒྱུག་དཀའ།
བྲག་དམར་དཀྱིལ་ནས་བོའུ་འཕེན་དཀའ།
བྲེ་སེར་འབྲོང་གི་མཚོ་དགུ་ཅི་ཁེད།
ལན། ཀོ་བ་རྩིད་པའི་མཚོ་མོ།
གློ་བ་དབུགས་ཀྱི་མཚོ་མོ།
སྙིང་དམར་ངར་གྱི་མཚོ་མོ།
ཡ་ཆུང་ཁྲག་གི་མཚོ་མོ།
གྲོད་པུ་རྩྭ་ཡི་མཚོ་མོ།
རྐང་དུང་མར་གྱི་མཚོ་མོ།
རྣ་བ་རླུང་གི་མཚོ་མོ།
རྒྱུ་མ་རྙང་བའི་མཚོ་མོ།
མཁལ་མ་ཚིལ་གྱི་མཚོ་མོ།
ར་མའི་སྟེང་གི་མ་དགུ་ཅི་ཁེད།
ལན། ར་མ་ནུ་མ་འོ་མ་དང་།
རྒྱུ་མ་རིལ་མ་རྔ་མ་དང་།
མཁལ་མ་སྙེག་མ་ཤ་མ་བཅས།
ར་མའི་སྟེང་གི་མ་དགུ་ཡིན།
རྐྱང་ཁ་དཀར་ཞིག་ལ་འདྲ་དགུ་ཅི་ཁེད།
ལན། རྐྱང་ལ་ཁར་ཐོན་དུས་སོ་བ་འདྲ།
རྐྱང་ལ་ཁུག་ཐོན་དུས་ཉུལ་མ་འདྲ།
རྐྱང་ཐང་ན་འགྲོ་དུས་ལྕི་འཐུ་འདྲ།
རྐྱང་ཆུ་ཁར་ཐོན་དུས་ཆུ་ལེན་འདྲ།
ཁྲ་ཐར་རེ་འགྲོ་དུས་ཁྲམ་པ་འདྲ།
དམར་སོབ་བེ་འཚོགས་དུས་ཚོགས་པ་འདྲ།
ཁ་ཕར་འཁོར་རྐང་ཐང་ལུག་ཁྲིད་འདྲ།
ཁ་ཚུར་འཁོར་ཁྲམ་པ་དུ་འཐེན་འདྲ།
ཨ་ཡིན་ན་ཡིན་དགུ་ཅི་ཁེད།
ལན། ཁྱུང་ཆེན་བྱ་བརྒྱའི་དཔོན་པོ་ཡིན།
ཕོ་རོག་བྱ་བརྒྱའི་ཕོ་ཉ་ཡིན།
ངང་བ་བྱ་བརྒྱའི་བན་ཆུང་ཡིན།
རྨ་བྱ་བྱ་བརྒྱའི་འཆོར་བོ་ཡིན།
སྐྱ་ཀ་བྱ་བརྒྱའི་བག་མ་ཡིན།
གོང་མོ་བྱ་བརྒྱའི་སྨན་པ་ཡིན།
ཁུ་བྱུག་བྱ་བརྒྱའི་གླུ་བ་ཡིན།
བྱེའུ་བྱ་བརྒྱའི་ནས་རྔོ་ཡིན།
ཕུག་རོན་བྱ་བརྒྱའི་ཐལ་འབོ་ཡིན།
ཨ་བཅུ་ཆ་བཅུ་ཅི་ཁེད།
ལན། ཨ་གཅིག་ཆ་གཅིག་བསེ་རུ་རྭ་གཅིག།
ཨ་གཉིས་ཆ་གཉིས་ར་མ་ནུ་གཉིས།
ཨ་གསུམ་ཆ་གསུམ་སྒྱེད་པུ་མགོ་གསུམ།
ཨ་བཞི་ཆ་བཞི་མཛོ་མོ་ནུ་བཞི།
ཨ་ལྔ་ཆ་ལྔ་མཛུབ་གུ་སྤུན་ལྔ།
ཨ་དྲུག་ཆ་དྲུག་སྐར་མ་སྨིན་དྲུག།
ཨ་བདུན་ཆ་བདུན་སྐར་མ་སྨེ་བདུན།
ཨ་བརྒྱད་ཆ་བརྒྱད་ཤ་བོ་རྭ་བརྒྱད།
ཨ་དགུ་ཆ་དགུ་སྲིན་པོ་མགོ་དགུ།
ཨ་བཅུ་ཆ་བཅུ་ཁྱི་མོ་ནུ་བཅུ།