མཚོ་བྱང་ཁུལ་མདའ་བཞི་རྫོང་གིས་ནུས་ཤུགས་ཡོད་རྒུས་ལྗང་མདོག་རྩིས་ནུས་རྣམ་གྲངས་དོན་འཁྱོལ་ཐུབ་རྒྱུར་འགན་ལེན་བྱས་པ།

རྩོམ་སྒྲིག  ཀླུ་མོ་མཚོ།   ཡོང་ཁུངས། མདའ་བཞི་རྫོང་མི་རིགས་སྐད་ཡིག་ལས་དོན་ལྟེ་གནས།   བཤེར་འབེབས། རིན་ཆེན་ཚེ་རིང་།

 ད་ལོ་ནས་བཟུང་། མཚོ་བྱང་ཁུལ་མདའ་བཞི་རྫོང་གིས་རྒྱལ་ཁབ་ཀྱི་འཐབ་ཇུས་གལ་ཆེན་དམ་འཛིན་ཤུགས་ཆེན་བྱས་ཏེ། མདའ་བཞི་རྫོང་གི་གནས་ཚུལ་དངོས་དང་ཐོན་ཁུངས་ཀྱི་ཁྱད་ཆོས། གནས་ཡུལ་གྱི་ལེགས་ཆ་བཅས་དང་ཟུང་འབྲེལ་བྱས་ནས་ཧྲན་ཏུང་ཅི་ནན་ལན་ཅན་ཅུན་ཆ་འཕྲིན་གསར་བའི་ཚན་རྩལ་ཚད་ཡོད་སྤྱི་གཉེར་མངའ་འོག་གི་མ་རྩ་ཆ་ཚང་བཏང་བའི་ཡན་ལག་སྤྱི་གཉེར་མཚོ་བྱང་ཤིན་ཁྲེན་རིག་ནུས་ཚན་རྩལ་ཚད་ཡོད་སྤྱི་གཉེར་མདའ་བཞི་རུ་ཐོ་འགོད་བྱ་རྒྱུར་སྐུལ་འདེད་བཏང་སྟེ། ལྗང་མདོག་རྩིས་ནུས་རྣམ་གྲངས་དེ་མདའ་བཞི་ནས་མྱུ་གུ་འབུས་རྒྱུར་རམ་འདེགས་བྱས།

མཚོ་བྱང་ཤིན་ཁྲེན་རིག་ནུས་ཚན་རྩལ་ཚད་ཡོད་སྤྱི་གཉེར་དེ་མཚོ་བྱང་ཁུལ་གྱི་ཐོན་སྐྱེད་ནུས་ཤུགས་གསར་པའི་གྲངས་གཞིའི་མཐོ་གསར་ཁེ་ལས་དང་པོ་དེ་ཡིན་པའི་ངོས་ནས། ཐོན་སྐྱེད་བྱེད་མགོ་བརྩམས་རྗེས་རྒྱལ་ཁབ་ལ་འཕྲལ་དུ་མཁོ་བའི་གཞི་ཁྱོན་ཆེ་བའི་ཆེད་སྤྱོད་རྩིས་རྒྱག་ནུས་པ་དང་ཞིང་ཆེན་གྲོང་ཁྱེར། ས་གནས་བཅས་ལ་འཕྲལ་དུ་མཁོ་བའི་རྩིས་རྒྱག་ཞབས་ཞུའི་ནུས་པ་ཐག་གཅོད་བྱེད་ཐུབ་པ་དེས། མཚོ་བྱང་ཁུལ་ལ་ཤུགས་རྐྱེན་ངེས་ཅན་ལྡན་པའི་ཆེད་ལས་ཁྱབ་ཁོངས་ཀྱི་ཁེ་ལས་ཤིག་ཆགས་པ་མཚོན་ལ། ཐུན་མོང་རྩིས་རྒྱག་ནུས་པ་དང་ཆེད་སྤྱོད་རྩིས་རྒྱག་ནུས་པ་ཕན་ཚུན་གཞོགས་འདེགས་དང་ཐུན་མོང་ངང་འཕེལ་རྒྱས་སུ་གཏོང་བ། ཕན་ཚུན་སྐུལ་འདེད་གཏོང་བའི་ཞིབ་འཇུག་གསར་སྤེལ་དང་ཐོན་ལས་རྣམ་པ་བཟང་པོ་ཞིག་ཆགས་ཡོད། དེ་དང་ཆབས་ཅིག་ལོ་གཅིག་གི་ཕྱིར་འཚོང་ཡོང་འབབ་སྒོར་དུང་ཕྱུར9.83བརྒལ་ཡོད་པ་དང་། ལོ་གཅིག་གི་དཔྱ་ཁྲལ་འཇལ་འབོར་སྒོར་ཁྲི4000མངོན་འགྱུར་བྱས་ཡོད། ལས་ཞུགས་མི་སྣ50བཀོད་སྒྲིག་ཐུབ་ནས་ཆབ་སྲིད་དང་དཔལ་འབྱོར། སྤྱི་ཚོགས་བཅས་ཀྱི་ངོས་ཐད་ནས་ཕན་འབྲས་ཅུང་ཆེན་པོ་ཐོན་ཡོད།

མདའ་བཞི་རྫོང་ཨུ་དང་རྫོང་སྲིད་གཞུང་གིས་རྣམ་གྲངས་འཛུགས་སྐྲུན་ལ་ཚད་མཐོའི་མཐོང་ཆེན་བྱས་ནས་ཁྱབ་ཁོངས་ཁག་གི་རྒྱུ་རྐྱེན་གཙོ་བོར་འགན་ལེན་བྱ་རྒྱུར་སྤྱི་འདོམས་དང་། ཆེད་མི་ཆེད་དོན་གྱིས་བརྒྱུད་རིམ་ཧྲིལ་པོར་འགན་འཁུར་བྱ་རྒྱུ་ལག་བསྟར་བྱེད་པ། ཁེ་ལས་ལ་བར་ཐག་མེད་པ་དང་སྟབས་བདེའི་ཞབས་ཞུ་མཁོ་སྤྲོད་བྱས་ཤིང་། ཧུར་ཐག་གིས་རྣམ་གྲངས་ཀྱི་ཞབས་ཞུ་བ་ཆུང་ཆུང་ཞིག་བྱས་ཏེ། ནུས་ཤུགས་ཡོད་རྒུས་སྤྱོད་བཟང་གཞུང་དྲང་དང་འདྲ་མཉམ་འགྲན་རྩོད། སྐྱེ་སྟོབས་ཀྱི་དཔལ་འབར་བའི་ལྗང་མདོག་རྩིས་རྒྱག་ཐོན་ལས་ཁྲོམ་ར་ཞིག་བསྐྲུན་ཡོད། རྣམ་གྲངས་ཞབས་ཞུའི་དགོས་མཁོར་དམིགས་ནས་རྣམ་གྲངས་མཐུན་སྦྱོར་སྐུལ་འདེད་ཀྱི་ཆེད་དོན་འཛིན་གྲྭ་བཙུགས་པ་དང་། རྣམ་གྲངས་ཀྱི་རྒྱུ་རྐྱེན་གཙོ་བོའི་འགན་ལེན་གྱི་སྐུལ་འདེད་ཚོགས་འདུ་ཐེངས7འཚོགས་པ་དང་། རྣམ་གྲངས་དེར་ཆེད་མཁས་པས་དཔྱད་ཞིབ་ཐོབ་པ་མ་ཟད་མདའ་བཞི་རྫོང་གིས་ཐོ་འགོད་སྙན་སེང་བྱེད་རྒྱུའི་ཆོག་མཆན་སྤྲད་ཡོད། ཡུལ་དངོས་སུ་རྣམ་གྲངས་རྩད་ཞིབ་དང་ས་གནས་གཏན་འཁེལ་བྱེད་པ། ས་ཡིག་གི་འགྲོ་ལུགས་སྒྲུབ་པ་སོགས་ཀྱི་འབྲེལ་ཡོད་ལས་དོན་ཧུར་ཐག་གིས་སྤེལ་ཞིང་། ནུས་ཤུགས་ཡོད་རྒུས་ཁེ་ལས་ལ་རྣམ་གྲངས་མཐུན་སྦྱོར་དང་སྦྲེལ་མཐུད་གཞོགས་འདེགས་སོགས་ཀྱི་ལས་དོན་ལེགས་པོ་སྒྲུབ་རྒྱུར་རྒྱབ་སྐྱོར་དང་གཞོགས་འདེགས་བྱས་ཡོད། 

      ཁེ་ལས་ཀྱི་དགོས་མཁོ་ལྟར་རང་རྫོང་གིས་རྣམ་གྲངས་ནགས་རྩྭ་བསྡུ་སྤྱོད་ཀྱི་འགྲོ་ལུགས་ལ་མཆན་འགོད་ཆོག་མཆན་སྤྲད་པ་དང་། ཞིང་ལས་ལ་སྤྱོད་པའི་རྣམ་གྲངས་འཛུགས་སྐྲུན་ལ་མཁོ་བའི་ས་ཡིག་འགྲོ་ལུགས་སྙན་ཞུའི་ཡིག་ཆར་ཐོག་མའི་བཤེར་འབེབས་བྱས་ཟིན། མིག་སྔར་མདའ་བཞི་རྫོང་གིས་ཁེ་ལས་ལ་གཞུང་སྒྲུབ་ཁང་མཁོ་འདོན་བྱས་པ་དང་ཁེ་ལས་ཀྱིས་དངུལ་ཁང་དུ་ཐོ་ཁུངས་འཛུགས་པ་སོགས་ཀྱི་བྱ་བ་ལེགས་གྲུབ་བྱས་ཟིན་པ་དང་། དེ་དང་ཆབས་ཅིག་ཁེ་ལས་ཀྱིས་མ་དངུལ་སྒོར་ཁྲི5000བཏང་ནསGPUམ་ལག་དངFPGAམ་ལག་སོགས་མཉེན་ཆས་དང་སྒྲིག་ཆས་ཉོ་སྒྲུབ་བྱས་ཡོད་ཅིང་། ད་ལྟ་དམིགས་འགུག་ཉོ་སྒྲུབ་བྱེད་བཞིན་ཡོད་པ་མ་ཟད། ཧྲན་ཏུང་ལན་ཅན་ཚོགས་པས་མཚོ་བྱང་ཤིན་ཁྲེན་རིག་ནུས་ཚན་རྩལ་ཚད་ཡོད་སྤྱི་གཉེར་ལ་མ་དངུལ་སྒོར་ཁྲི2000གཏོང་རྒྱུའི་འཆར་གཞི་ཡོད་པ་དང་སྔོན་དཔག་བྱས་ན་ལོ་མཇུག་གི་སྔོན་ལ་མ་རྐང་གཏོང་ལས་ལས་ཀ་བསྒྲུབ་རྒྱུ་རེད།