2025ལོའི་མཚོ་སྔོན་ཞིང་ཆེན་གྱི་གཙང་གསུམ་མགོ་ཁུངས་རྟགས་མའི་སྡེ་བའི་མདའ་འཕེན་རྩེ་གྲ་བའི་འགྲན་སྡུར་དང་ཞིང་པའི་ལོ་ལེགས་དུས་ཀྱི་མདའ་བཞི་རྫོང་གི་ཞིང་ཕྱུགས་ཐོན་རྫས་འོས་སྦྱོར་བྱེད་སྒོ་དེ་རིང་མགོ་རྩོམ་པ།

རྩོམ་སྒྲིག ཀླུ་མོ་མཚོ།  ཡོང་ཁུངས། མདའ་བཞི་རྫོང་མི་རིགས་སྐད་ཡིག་ལས་དོན་ལྟེ་གནས།  བཤེར་འབེབས། རིན་ཆེན་ཚེ་རིང་།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་བྱེད་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱ་ཆེད་དང་། ཁུལ་ཨུ་དང་ཁུལ་སྲིད་གཞུང་གིས་ལྗང་མདོག་སྐྱེས་ལྡན་ཞིང་ཕྱུགས་ཐོན་རྫས་ཕྱིར་འཚོང་བྱ་ཡུལ་དང་རྒྱལ་སྤྱིའི་སྐྱེས་ཁམས་གནས་སྐོར་དམིགས་ས་འཛུགས་པའི་བླང་བྱ་ལག་ལེན་དང་། དེ་བཞིན་མི་རིགས་མཐུན་སྒྲིལ་ཡར་ཐོན་ཡོང་བར་སྐུལ་འདེད་གཏོང་བའི“ཞིང་ཆེན་ཡོངས་ཀྱི་མདུན་གྲལ་དུ་བསྐྱོད་པའི”དམིགས་འབེན་དང་བླང་བྱ་ཁྱོན་ཡོངས་ནས་དོན་འཁྱོལ་བྱས་ཏེ། སྐྱེས་ཁམས་ཞིང་ཕྱུགས་ལས་ཀྱི“དགུ་གཅིག་ཅན”གྱི་ཆ་སྒྲིག་བཟོ་སྐྲུན་བརྟན་པོར་ཡོང་བར་སྐུལ་འདེད། ཞིང་ལས་དང་ལུས་རྩལ། རིག་གནས་དང་གནས་སྐོར། ཚོང་ལས་མཉམ་འདྲེས་བཅས་གཏིང་ཟབ་ཏུ་གཏོང་བར་སྐུལ་འདེད་གཏོང་ཆེད། 2025ལོའི་མཚོ་སྔོན་ཞིང་ཆེན་གྱིགཙང་གསུམ་མགོ་ཁུངས་རྟགས་མའི་སྡེ་བའི་མདའ་འཕེན་རྩེ་གྲ་བའི་འགྲན་སྡུར་དང་ཞིང་པའི་ལོ་ལེགས་དུས་ཀྱི་མདའ་བཞི་རྫོང་གི་ཞིང་ཕྱུགས་ཐོན་རྫས་འོས་སྦྱོར་བྱེད་སྒོ་དེ2025ལོའི་ཟླ9ཚེས26ཉིན་ནས་ཚེས28ཉིན་བར་མཚོ་བྱང་ཁུལ་ལུས་རྩལ་ར་བར་གཟབ་རྒྱས་ངང་འཚོག་རྒྱུ་རེད། ཐེངས་འདིའི་མཛད་སྒོ་དེ“དམངས་ཡོངས་ལུས་སྦྱོང་དང་དམངས་ཡོངས་བདེ་ཐང་། དམངས་ཡོངས་མཉམ་ཞུགས་དང་དམངས་ཡོངས་མཉམ་སྤྱོད”བཅས་ཀྱི་བརྗོད་བྱ་གཅོ་བོར་བྱས་པ་ཞིག་ཡིན་ཞིང་། འདི་ནི་ཆུ་ཚད་མཐོ་བའི་ལུས་རྩལ་འགྲན་སྡུར་དང་ཕུན་སུམ་ཚོགས་པའི་མི་རིགས་ཀྱི་རིག་གནས་འགྲེམས་སྟོན་བྱེད་སྒོ་ཞིག་ཡིན་ལ། སྤུས་ལེགས་ཞིང་ཕྱུགས་ཐོན་རྫས་འོས་སྦྱོར་བྱེད་པ་བཅས་གཞི་གཅིག་ཏུ་འདུས་པའི་ཕྱོགས་བསྡུས་རང་བཞིན་གྱི་གསོལ་སྟོན་གཟབ་རྒྱས་ཤིག་ཀྱང་ཡིན།

རྒྱུས་ལོན་པ་ལྟར་ན། ཐེངས་འདིའི་འགྲན་སྡུར་གྱི་རྩལ་འགྲན་འགྲན་རིམ་ངོ་མཚར་ལྡན་ལ། ལྡོག་འཁྱོག་གཞུ་དང་མཉམ་འདུས་གཞུ། གླང་རྭའི་གཞུ་སོགས་སྲོལ་རྒྱུན་དང་དེང་རབས་ཀྱི་མདའ་འཕེན་འགྲན་སྡུར་བྱ་རྒྱུ་ཡིན་པ་མ་ཟད། ད་དུང་སྐྱེས་མའི་མདའ་འཕེན་འཁྲབ་སྟོན་གྱི་འགྲན་སྡུར་ཡང་ཆེད་དུ་བཀོད་སྒྲིག་བྱས་ཡོད། ཐེངས་འདིའི་འགྲན་སྡུར་གྱི་ཁྱབ་རྒྱ་ཤིན་ཏུ་ཆེ་བ་སྟེ། ཞིང་ཆེན་ཡོངས་ཀྱི་ས་གནས་ཁག་ནས་ཡོང་བའི་འཐུས་མིའི་རུ་ཁག57གྱི་ལུས་རྩལ་པ་ཆིག་སྟོང་ཙམ་གྱིས་མིང་ཐོ་བཀོད་ནས་འགྲན་སྡུར་ལ་ཞུགས་ཡོད་པ་དང་། འགྲན་སྡུར་གྱི་གཞི་ཁྱོན་ལ་ལོ་རྒྱུས་ཀྱི་ཟིན་ཐོ་གསར་བ་བསྐྲུན་ཡོད་ཅིང་། ཆུ་ཚད་མཐོ་ཞིང་ལྟ་རིན་ཆེས་ཆེར་ལྡན་པའི་མདའ་འཕེན་གསོལ་སྟོན་ཆེན་པོ་ཞིག་ཡིན་པ་གདོན་མི་ཟ།

ཐེངས་འདིའི་བྱེད་སྒོ་ནི་ལུས་རྩལ་འགྲན་སྡུར་གྱི་གར་སྟེགས་ཤིག་ཡིན་པར་མ་ཟད། མདའ་བཞི་རྫོང་གི་འཕེལ་རྒྱས་གྲུབ་འབྲས་འགྲེམ་སྟོན་བྱེད་པའི་གོ་སྐབས་ལེགས་པོ་ཞིག་ཀྱང་ཡིན། དེ་རིང་སྔ་དྲོའི་ཆུ་ཚོད10ཡི་སྟེང་མཛད་སྒོ་སྤེལ་རྒྱུ་ཡིན་པ་དང་། སྐབས་དེར་ཁུལ་སོ་སོའི་འགྲན་ཞུགས་རུ་ཁག་དང་སྡེ་བ། སྡེ་ཚོགས་མཉམ་འབྲེལ་འཛུགས་སྐྲུན་རུ་ཁག་དང་དེ་བཞིན་རྟ་ནོར་ལུག་གསུམ་དང་རྔ་ཁྱུ་སོགས་ལས་གྲུབ་པའི་གཡང་ར་སྒོ་ཕྱུགས་ཀྱང་འགྲེམ་སྟོན་བྱ་རྒྱུ་ཡིན་པ་དང་། གཟི་བརྗིད་ལྡན་པའི་རྒྱལ་དར་བསྒྲེང་བའི་མཛད་སྒོ་དང་སྤྲོ་སེམས་འཁོལ་བའི་དམ་འཇོག་གོ་རིམ། མི་རིགས་ཀྱི་ཁྱད་ཆོས་ལྡན་པའི་རིག་རྩལ་འཁྲབ་སྟོན་སྤེལ་རྒྱུ་ཡིན་ལ། ཞིང་ཆེན་ཡོངས་ཀྱི་མི་རིགས་ཁག་གི་མི་དམངས་མཐུན་སྒྲིལ་ཡར་ཐོན་དང་དར་རྒྱས་གོང་འཕེལ་གཏོང་བའི་དུས་རབས་ཀྱི་རྣམ་པ་ཁྱོན་ཡོངས་ནས་འགྲེམ་སྟོན་བྱེད་ཐེངས་ཤིག་ཀྱང་ཡིན། 

དེ་དང་ཆབས་ཅིག བྱེད་སྒོས་ཞིང་བའི་ལོ་ལེགས་དུས་ཆེན་གྱི་ཁྱད་ཆོས་མཉམ་འདྲེས་གཏིང་ཟབ་བྱས་ཏེ་ཆེད་དུ་ལྗང་མདོག་སྐྱེས་ལྡན་ཞིང་ཕྱུགས་ཐོན་རྫས་འགྲེམ་འཚོང་ཁུལ་བཙུགས་ཡོད་པ་དང་། “མདོ་ལ་རི་བོའི་འདབས་ཀྱི་ཕྱུགས་ར་བཟང་བོ”དང་“གསེར་དངུལ་ཐང་གི་ལུ་གུ”སོགས་ས་ཁུལ་གྱི་སྤྱི་སྤྱོད་ཟོང་རྟགས་གཅིག་སྡུད་ངང་ངོ་སྤྲོད་བྱས་ཏེ། དྲ་ཐོག་དང་ཡུལ་དངོས་མཉམ་འགུལ་བརྒྱུད་དེ་མདའ་བཞི་རྫོང་གི་སྤུས་ལེགས་ཞིང་ཕྱུགས་ཐོན་རྫས་སྔར་ལས་རྒྱ་ཆེ་བའི་ངང་ཁྲོམ་རར་ཁྱབ་གདལ་བཏང་ནས། “སྤུས་རྟགས་འགྲན་སྡུར”དང་ཁྱད་ལྡན་ཐོན་ལས་ཕན་ཚུན་ནུས་པ་འདོན་སྤྲོད་བྱས་ཏེ་རོང་འབྲོག་པའི་ཡོང་འབབ་འཕར་སྣོན་ཡོང་བར་རོགས་འདེགས་བྱ་ཐུབ་པ་རེད།

མིག་སྔར། བྱེད་སྒོའི་གྲ་སྒྲིག་ལས་དོན་ཁག་ཚང་མ་ཡོངས་སུ་ལེགས་འགྲུབ་བྱུང་ཟིན་པ་དང་། རྒྱ་ཆེའི་ལས་བྱེད་པ་དང་མང་ཚོགས། ལས་རིག་ཁག་གི་སྐུ་མགྲོན་རྣམས་ཡུལ་དངོས་སུ་ཕེབས་པར་ལྷག་བསམ་ཟོལ་མེད་ངང་གདན་འདྲེན་ཞུས་ཏེ། ལུས་རྩལ་གྱི་སྤྲོ་སེམས་དང་མི་རིགས་རིག་གནས། ལོ་ལེགས་ཀྱི་དགའ་སྤྲོ་བཅས་ཉམས་སུ་མྱངས་ཏེ། འགྲན་སྡུར་ལ་ཞུགས་པའི་ལུས་རྩལ་པར་ཤུགས་རྒྱག་པ་དང་སྐུལ་ལྕག་བྱས་ཏེ་མདའ་བཞིའི་འཕེལ་རྒྱས་ལ་རོགས་འདེགས་སྩོལ་དགོས།