2026ལོའི་མཚོ་སྔོན་ཞིང་ཆེན་གྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་མ“མ་རྡུལ་མཁར་དུ་བསྐྱོད་པའི”རྒྱལ་གཅེས་རིང་ལུགས་ཀྱི་སློབ་གསོའི་བྱེད་སྒོ་སྤེལ་མགོ་བརྩམས་པ།

རྩོམ་སྒྲིག ཀླུ་མོ་མཚོ།  ཡོང་ཁུངས། མདའ་བཞི་རྫོང་མི་རིགས་སྐད་ཡིག་ལས་དོན་ལྟེ་གནས།  བཤེར་འབེབས། རིན་ཆེན་ཚེ་རིང་།

ཀྲུང་གོ་གསར་འགྱུར་དྲ་བའི་མཚོ་སྔོན་མདའ་བཞིའི་ཟླ3ཚེས1ཉིན་གྱི་གློག་འཕྲིན་འབྱོར་གསལ་ལྟར་ན། 2026ལོའི་མཚོ་སྔོན་ཞིང་ཆེན་གྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་མ“མ་རྡུལ་མཁར་དུ་བསྐྱོད་པའི”རྒྱལ་གཅེས་རིང་ལུགས་ཀྱི་སློབ་གསོའི་བྱེད་སྒོ་སྤེལ་བའི་མགོ་རྩོམ་མཛད་སྒོ་ཟི་ལིང་མེ་འཁོར་འབབ་ཚུགས་སུ་འཚོགས་ཤིང་། མཚོ་སྔོན་ས་གནས་ཁག་ནས་ཡོང་བའི་དགེ་སློབ་འཐུས་མི500ཙམ་ཆེད་གཏོང་མེ་འཁོར་དུ་བསྡད་དེ་མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་དུ་གནས་པའི་ཀྲུང་གོའི་མ་རྡུལ་མཁར་དུ་ཕྱིན།

མཚོ་སྔོན་ཞིང་ཆེན་ཏང་ཨུའི་རྒྱུན་ལས་ཨུ་ཡོན་དང་དྲིལ་སྒྲོག་པུའི་པུ་ཀྲང་ཝང་ཏ་ནན་གྱིས་སློབ་མའི་འཐུས་མིར་ཞིབ་འཇུག་སློབ་སྦྱོང་དར་ཆ་སྤྲད་པ་དང་འབྲེལ་བྱེད་སྒོ་སྤེལ་མགོ་བརྩམས་པ་ཁྱབ་བསྒྲགས་བྱས།

བྱེད་སྒོ་འདི་ནི་མཚོ་སྔོན་ཞིང་ཆེན་ཏང་ཨུའི་དྲིལ་སྒྲོག་པུ་དང་ཞིང་ཆེན་སློབ་གསོ་ཐིང་། ཀྲུང་གུང་མཚོ་བྱང་ཁུལ་ཨུ། མཚོ་བྱང་ཁུལ་མི་དམངས་སྲིད་གཞུང་བཅས་ཀྱིས་མཉམ་གཅིག་ཏུ་སྤེལ་བ་ཞིག་ཡིན་པ་དང་དེའི་དམིགས་ཡུལ་ནི་གསར་བརྗེ་སློབ་ཚན་གྱི་རྣམ་པ་བརྒྱུད་ནས་དགེ་སློབ་རྩ་འཛུགས་བྱས་ནས་སྤེལ་བའི་ལག་ལེན་རང་བཞིན་གྱི་སློབ་ཁྲིད་ཅིག་ཡིན།

ཆེད་གཏོང་མེ་འཁོར་གཏོང་བའི་ལམ་བར་དུ་འཁོར་སྒམ་ནང་དུ་དྲིལ་སྒྲོག་སློབ་གསོའི་སློབ་ཚན་དུས་མཉམ་དུ་སྤེལ་ཡོད། མ་རྡུལ་མཁར་དྲན་གསོ་ཁང་དུ་འབྱོར་རྗེས་སློབ་མ་ཚོས་འགྲེལ་བཤད་པའི་ཁྲིད་སྟོན་འོག ལོ་རྒྱུས་འགྲེམས་སྟོན་ལ་ལྟ་སྐོར་བྱས་པ་དང་། རིག་དངོས་དང་པར་རིས། ཡུལ་ལྗོངས་བཅས་སླར་གསོ་བྱས་པ་བརྒྱུད་གསོན་ཉམས་དོད་པའི་ལྟ་སྐོར་ཉམས་ལེན་སློབ་ཁྲིད་ཉམས་སུ་མྱངས། དེའི་རྗེས་སུ་དགེ་སློབ་ཚོས“མདེལ་གཉིས་སྐར་གཅིག”གི་སྙིང་སྟོབས་སློབ་སྦྱོང་དང་རྒྱུན་འཛིན། མི་རིགས་བསྐྱར་དར་གྱི་ལས་འགན་ལྕི་མོ་འཁུར་བའི་དུས་རབས་ཀྱི་མི་གསར་གསོ་སྐྱོང་བྱ་རྒྱུ་བརྗོད་བྱ་གཙོ་བོར་བྱས་པའི་བསམ་བློ་ཆབ་སྲིད་ཀྱི་སློབ་ཚན་ལ་ཉན།

མཚོ་སྔོན་ཞིང་ཆེན་གཙང་གསུམ་མི་རིགས་སློབ་འབྲིང་གི་མཐོ་རིམ་སློབ་འབྲིང་དང་པོའི་སློབ་མ་དབྱང་ཡུས་ཧྲེན་གྱིས“འདི་ནི་ང་རང་མ་རྡུལ་མཁར་དུ་བསྐྱོད་ཐེངས་དང་པོ་ཡིན་ལ། ངས་ཡུལ་དངོས་སུ་ལྟ་སྐོར་བྱས་པ་བརྒྱུད“མདེལ་གཉིས་སྐར་གཅིག”གི་སྙིང་སྟོབས་སློབ་སྐབས་གསར་བའི་སློབ་སྦྱོང་གི་སྒུལ་ཤུགས་སུ་འགྱུར་བར་རེ་བ་བྱེད་ཀྱི་ཡོད”ཅེས་བཤད།

མཚོ་སྔོན་ཞིང་ཆེན་སློབ་གསོ་ཐིང་གི་ཏང་ཙུའུ་ཧྲུའུ་ཅི་དང་ཐིང་ཀྲང་ཧྲེན་ཧུང་ཤིན་གྱིས་ངོ་སྤྲོད་བྱས་པར་གཞིགས་ན། 2025ལོ་ནས་བཟུང་ཞིང་ཆེན་ཡོངས་ཀྱི་སློབ་མ་ཁྲི6.5ལྷག་ཙམ་སྔ་རྗེས་སུ་མ་རྡུལ་མཁར་དུ་བསྐྱོད་ནས་ལག་ལེན་སློབ་ཁྲིད་བྱས་པ་དང་། མཚོ་སྔོན་སློབ་གསོ་སྡེ་ཁག་སློབ་གསོ་པུ་དང་པེ་ཅིང་གྲོང་ཁྱེར་དུ་བསྐྱོད་ནས་རྒྱབ་སྐྱོར་བརྩོན་ལེན་བྱས་ཏེ། གསར་བརྗེ་ཞིབ་སློབ་ཟོང་རྟགས་ལམ་ཐིག་དྲིལ་སྒྲོག་ངོ་སྤྲོད་བྱས་ནས་མཉམ་འགུལ་རྐྱེན་སྲོལ་བཙུགས་པ་དང་། རྒྱལ་ཡོངས་ཀྱི་ཤུགས་རྐྱེན་ལྡན་པའི་ཚན་རྩལ་རིག་གནས་གསར་བརྗེ་ཟོང་རྟགས་བཏོད་ཡོད།

མཚོ་སྔོན་ཞིང་ཆེན་གཙང་གསུམ་འགོ་ཁུངས་མི་རིགས་སློབ་འབྲིང་གི་དགེ་རྒན་ཧྲིན་ཝན་ཆིན་གྱིས་བཤད་རྒྱུར། “དེ་རིང་སློབ་མ་ཁྲིད་ནས་མ་རྡུལ་མཁར་དུ་ཡོང་དོན་ནི་སློབ་བུ་དག་སློབ་དེབ་ཀྱི་ཤེས་བྱ་ལས་བརྒལ་ཏེ་དངོས་བྱུང་གསར་བརྗེ་ལོ་རྒྱུས་ལ་རྒྱུས་ལོན་བྱེད་དུ་འཇུག་ཆེད་ཡིན། ཐེངས་འདིའི་དམིགས་བསལ་གྱི“སློབ་མགོ་རྩོམ་པའི་སློབ་ཚན་དང་པོ”བརྒྱུད་བྱིས་པ་ཚོར་རྒྱལ་ཁབ་ལ་དགའ་ཞེན་དང་རྒྱལ་ཁབ་སྟོབས་ཤུགས་ཆེ་རུ་གཏོང་བའི་འདུ་ཤེས་བསྐྱེད་པའི་རེ་བ་ཡོད”ཅེས་བཤད། 

ཀྲུང་གུང་མཚོ་བྱང་ཁུལ་ཨུའི་ཧྲུའུ་ཅི་ཀྲང་ཧྥེང་གིས་ད་ལོ་མུ་མཐུད་དུ“མདེལ་གཉིས་སྐར་གཅིག”གི་སྙིང་སྟོབས་སྔོག་འདོན་གཏིང་ཟབ་བྱས་ཏེ། ལུས་རྩལ་ཁང་མཐོར་འདེགས་དང་སློབ་ཁྲིད་བྱ་ཡུལ་འཛུགས་སྐྲུན། ཞིབ་འཇུག་སློབ་སྦྱོང་སློབ་ཚན་འཐུས་ཚང་སོགས་གཙོ་གནད་ལ་དམིགས་ནས། གཅིག་གྱུར་འཆར་འགོད་དང་བཀོད་སྒྲིག་བྱེད་ཤུགས་ཆེ་རུ་གཏོང་བ་དང་འགན་སྲུང་བྱེད་ཐབས་ཞིབ་ཕྲ་བྱས་ཏེ། བདེ་འཇགས་འགོག་སྲུང་བརྟན་པོ་འཛུགས་པ་དང་ཞབས་ཞུའི་སྤུས་ཚད་དང་ཕན་འབྲས་ཆེ་རུ་གཏོང་བ། ནུས་ཤུགས་ཡོད་རྒུས་བདེ་འཇགས་དང་གོ་རིམ་ལྡན་པ། ཞིབ་འཇུག་སློབ་སྦྱོང་གི་ཁོར་ཡུག་སྐྲུན་དགོས་ཞེས་ནན་གྱིས་བསྟན།