མཇུག་བྱང་ལས་གནའ་དཔེ་བརྟག་ཐབས།

རྩོམ་སྒྲིག སངས་རྒྱས་སྐྱིད། ཡོང་ཁུངས། སི་ཁྲོན་བོད་ཡིག་གནའ་དཔེ་ལེགས་སྒྲིག་ཁང་། བཤེར་འབེབས། རིན་ཆེན་ཚེ་རིང་།

བོད་ཡིག་གནའ་དཔེར་མཇུག་བྱང་མང་ཉུང་ལ་མ་ལྟོས་པའི་གཞུང་དེའི་རྫོགས་མཚམས་སུ་མཇུག་བྱང་ཞིག་སྦྱར་ཡོད་ངེས་ལགས། དེས་ན་མཇུག་བྱང་ལས་གནའ་དཔེའི་དུས་རབས་ཤེས་པ་སྟེ། དེ་ཡང་དུས་རབས9པའི་སྐབས་སུ་སྦྱར་བའི་མཇུག་བྱང་ཞིག་ཡིན་ཕྱིན། དེ་དག་ལ་ཚིག་གི་རྒྱས་སྤྲོས་མེད་པར་ཏུན་ཧོང་གི་ཡིག་རྙིང་ཁྲོད་དུ་བཞུགས་པའིp.t.1286ནང་དུ་བྱུང་བའི་ཚིག་ཉམས་ཏེ། རི་མཐོ་ས་གཙང་སྤུ་རྒྱལ་བོད་ཀྱི་ཡུལ། ཞེས་པ་དང་། གནམ་གྱྀ་དབུས། ས་འྀ་ནི་དཀྱིལ། གླྀང་གི་ནི་སྙིང་། གངས་གི་ནྀ་ར་བ། ཆུ་བོ་ཀུན་གྱི་ནི་མགོ་བོ། ཞེས་པ་ལྟ་བུ་དང་ཤེར་ཕྱིན་ཡུམ་བྲིས་མའི་ལེའུ་མཚམས་སུ་ཡིག་མཁན་གྱི་མཚན་དང་། ཞུས་དང་ཞུས་གཉིས་ཞུས་སུམ་ཞུས་ཀྱི་མཚན་སྟེ་ཇེའུ་སྟག་ལེགས་བྲིས། དཔལ་དབྱངས་ཞུས། ཕབ་ཏང་ཡང་ཞུས། དེའུ་ཨྀང་སུཾ་ཞུས།། ཞེས་དང་གཞན་པའི་རྗེའི་སྐུ་ཡོན་དུ་ཞེས་པ་སོགས་ལས་མི་བྱུང་།

གནའ་དཔེ་བྲིས་མའི་མཛད་བྱང་།

དེ་ལྟར་མཇུག་བྱང་ཚིག་སྣ་བསྡུས་ཤིང་རྗེའི་ཡོན་དུ་ཞེས་པ་ལས་མི་བྱུང་བའི་རྒྱུ་མཚན་ནི། དུས་རབས9ཡར་སྔོན་དུ་རྗེས་མ་གཏོགས་འབངས་ཀྱིས་འབུམ་འབྲི་བཞེངས་མི་ཐུབ་པའི་རྐྱེན་གྱིས་ཡིན་པ་ནི་ཤེར་ཕྱིན་གྱི་ཚེག་དང་ཤད། ལེའུ་བམ་པོ་སོགས་ཀྱི་ཚད་བསྟན་པ་ཞེས་པ་སོགས་ལས་ཤེས། དུས་རབས10-12ཀྱི་གནའ་དཔེའི་མཇུག་བྱང་དུ་སྔོན་གྱི་ཚིག་ཉམས་ཐོན་པའི་ཐོག་ལ། ཀྱེ་ཞེས་པའི་ངོ་མཚར་གྱི་འབོད་སྒྲས་སྔོན་བསུས་ཏེ་རྒྱ་གར་འཕགས་པའི་ཡུལ་དང་སྟོན་པའི་མཛད་པ་ཚིག་སྣ་ཐུང་ངུས་བརྗོད་པ་དང་རི་མཐོ་ས་གཙང་སྤུ་རྒྱལ་བོད་ཀྱི་ཡུལ་ཞེས་པ་སོགས་ཡུལ་གྱི་བསྟོད་པ་དང་གནའ་དཔེ་བཞེངས་པའི་སྐབས་ཀྱི་མཆོད་ཡོན་སྦྱིན་བདག་དང་བཞེངས་པའི་གནས་སོགས་བརྗོད་པ་དང་སྦྲགས་འབྲི་ཤོག་དང་འཕྲུལ་ཡིག་སོགས་ཀྱི་ཁྱད་ཚིག་ཏུ་ངོ་མཚར་ཆེ་ཞེས་པས་བརྒྱན་ཏེ་བྱང་ཆུབ་ཀྱི་ལམ་ཐོབ་པར་ཤོག་ཅེས་པའི་སྨོན་ཚིག་ཀྱིས་མཇུག་བསྡུས་པ་ཤ་སྟག་ཡིན།

གནའ་དཔེ་བྲིས་མའི་མཛད་བྱང་།

 དུས་རབས12-13བར་གྱི་མཇུག་བྱང་དུ་ཀྱེ་དང་ཨེ་མཱ་ཧོ་ཞེས་པས་སྔོན་བསུས་ཏེ། གོང་གི་ནང་དོན་ཇི་བཞིན་བརྗོད་པ་དང་སྦྲགས་སྣག་ཤོག་གི་སྤུས་ཀ་ཅི་ཞིག་བཏང་ཡོད་པའི་གསལ་བཤད་ཡང་མཇུག་བྱང་གི་ནང་དུ་བསྣན་ནས་འདུག་ལ། མཇུག་གི་སྨོན་ཚིག་ཏུ་སངས་རྒྱས་ཀྱི་གོ་འཕང་འཐོབ་པར་ཤོག་ཅེས་ཡོང་གི་འདུག། ལྷག་དོན་དུ་མཇུག་བྱང་དེ་དག་གི་ཁྲོད་དུ་དགོངས་དང་བསམ་ཞེས་པའི་ཚིག་དེའི་དོད་དུ་ར་ག་བཏགས་ག་ན་རོ་རྒོངས་ཞེས་དབུས་གཙང་མངའ་རིས་དང་བཅས་པར་བཞུགས་པའི་གནའ་དཔེ་དག་གི་ཁྲོད་དུ་སྤྱི་མཐུན་དུ་ཐོན་པ་དེའང་དུས་རབས་དེའི་ཁྱད་ཆོས་སུ་སེམས།

དུས་རབས་བཅུ་གསུམ་པའི་མཛད་བྱང་།

 དུས་རབས13-14གནའ་དཔེའི་མཇུག་བྱང་དུ་ཨྃ་སཱ་སྟི་ཞེས་པས་སྔོན་གྱི་ངོ་མཚར་གྱི་འབོད་སྒྲ་ཀྱེ་དང་ཨེ་མཱ་ཧོ་ཞེས་པའི་དོད་བྱས་ནས་སྔོན་གྱི་མཇུག་བྱང་གི་ནང་དོན་བཞིན་བྲིས་པ་དང་རྗེས་ཀྱི་སྨོན་ཚིག་ཏུ་རྒྱ་སྐད་ཀྱིས་མངྒ་ལམ་དང་སརྦ་མངྒ་ལམ་ཞེས་པའི་སྨོན་ཚིག་གིས་མཇུག་བསྡུས་ཡོང་གི་འདུག

དུས་རབས13-14བར་གྱི་མཛད་བྱང་།

དེ་རྗེས་དུས་རབས15-16བར་སྔོན་གྱི་མཇུག་བྱང་གི་ནང་དོན་སྔོན་ལྟར་ཇི་བཞིན་བཀོད་པ་དང་སྦྲགས་མཇུག་བྱང་སྨོན་ཚིག་དེའི་ནང་དོན་རྒྱ་སྐད་ཡང་མཉམ་དུ་སྦྱར་ཡོང་གི་འདུག་ལ་དེས་མ་ཟད་མཇུག་བྱང་གི་དུས་ཚོད་དེ་བོད་ཀྱི་རབ་བྱུང་དང་སྟོན་པའི་འདས་ལོ་སོགས་ལ་སྦྱར་ནས་མཇུག་བྱང་བཀོད་གནང་བ་ཤ་སྟག་ཡིན། བོད་དཔེ་རྒྱ་ནག་དཔར་མའི་མཛད་བྱང་ནི་ཡོན་རྒྱལ་རབས་སྐབས་སུ་དཔར་དུ་བཏབ་པའི་དཔར་བྱང་ནི་བོད་ཡིག་ཁོ་ན་དང་ཡུང་ལོའི་སྐབས་སུ་དཔར་དུ་བཏབ་པའི་དཔར་བྱང་ནི་བོད་རྒྱ་ཤན་སྦྱར་གྱི་ཐོག་ནས་སྦྱར་བ་དང་། གོང་མ་ལྷ་སྐྱོང་སྐབས་སུ་བོད་དཔེ་དཔར་དུ་བཏབ་པ་དག་གི་དཔར་བྱང་ནི་སུམ་འབྀད་དེ་བོད་རྒྱ་ཧོར་བཅས་ཡིག་རིགས་གསུམ་གྱི་སྟེང་ནས་སྦྱར་བ་ཞིག་ཡིན། དེ་མིན་པའི་ཧོར་དཔར་ཡིན་པའི་གཞུང་དེ་དག་གི་དཔར་བྱང་དུ་དཔར་ལ་པོད་ཇི་ཙམ་ཞིག་བཏབ་ཡོད་པ་གསལ་བ་སྟེ། ཚད་མ་རིགས་གཏེར་པོད་ཉིས་བརྒྱ། ཚད་མ་རྣམ་པར་ངེས་པ་པོ་ལྔ་བརྒྱ། ཐེག་པོ་ཆེན་པོ་མདོ་སྡེའི་རྒྱན་པོད་ལྔ་བརྒྱ་བཏབ་ཅེས་པ་སོགས་ནི་ཡོན་གྱི་དཔར་མའི་དཔར་བྱང་ཁྱད་ཆོས་ཤིག་ཡིན་སྟབས་དེ་དག་ལས་གནའ་དཔེའི་དུས་རབས་གཏན་ལ་འབེབ་ཐུབ།

གསེར་དངུལ་སྤེལ་མའི་མཛད་བྱང་།