མདོ་དབུས་མཐོ་སྒང་སྟེ། ཀྲུང་གོའི་འཁྱགས་ཀླུང་ཆེས་མང་བའི་ས་ཆ།

རྩོམ་སྒྲིག དོན་འགྲུབ་མཚོ། ཡོང་ཁུངས། འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས། བཤེར་འབེབས། རིན་ཆེན་ཚེ་རིང་།

མདོ་དབུས་མཐོ་སྒང་ཞེས་པའི་མཐའ་ཡས་པའི་ཡུལ་གྲུ་འདི་རུ། འཁྱགས་ཀླུང་གིས་ཁུ་སིམ་མེར་ལོ་ངོ་དུང་ཕྱུར་རིང་གི་ས་གཤིས་ལོ་རྒྱུས་ཀྱི་རྒྱུན་བསྐྱངས་ཏེ། རང་བྱུང་ཁམས་ཆེན་མོའི་ཆེས་བརྗིད་ཆགས་ཤིང་ཁྱད་མཚར་བའི་ཡུལ་ལྗོངས་ཤིག་ཏུ་གྱུར་ཡོད། འཁྱགས་ཀླུང་སྟེ། དངུལ་དཀར་གྱིས་བརྒྱན་པ་ལྟ་བུའི་འཁྱགས་དར་གྱི་ངོ་མཚར་དེ་ནི་རང་བྱུང་ཁམས་ཆེན་མོའི་བརྐོ་བཟོ་མཁན་ཞིག་དང་འདྲ་བར། དམིགས་བསལ་གྱི་ས་བྱད་བསྐྲུན་ཅིང་གྲངས་མེད་ཀྱི་ཚེ་སྲོག་སྐྱོང་བཞིན་ཡོད་ལ། དུས་ཚོད་ཀྱི་དཔང་བོ་ཞིག་དང་འདྲ་བར་སའི་གོ་ལའི་གནའ་བོའི་ངག་རྒྱུན་དང་ནམ་ཟླའི་འགྱུར་ལྡོག་གི་གཏམ་རྒྱུད་བརྗོད་པ་དང་། སའི་གོ་ལའི་རིམ་འགྱུར་མཚོན་པའི་དེབ་ཐེར་ཅིག་དང་འདྲ་བར་བགྲང་གིས་མི་ལངས་པའི་གསང་བ་དང་ངོ་མཚར་བསྣམས་ཡོད། ང་ཚོ་ལས་དབང་གི་བགོ་སྐལ་ལྟ་བུའི་འཁྱགས་དར་གྱི་འགྲུལ་བཞུད་འདི་ལ་ཞུགས་ཏེ། མདོ་དབུས་མཐོ་སྒང་གི་འཁྱགས་ཀླུང་གི་ངོ་མཚར་འཇིག་རྟེན་ལ་འཚོལ་ཞིབ་ཐེངས་ཤིག་བྱེད། 

མདོ་དབུས་མཐོ་སྒང་ནི་སའི་གོ་ལའི་ཐོག་ལྷོ་སྣེ་དང་བྱང་སྣེ་གཉིས་ཕུད་པའི་འཁྱགས་ཀླུང་ཆེས་མང་བའི་ས་ཆ་དེ་ཡིན་ལ། ཀྲུང་གོའི་རྒྱལ་ཁོངས་སུ་འཁྱགས་ཀླུང46298ཡོད་པ་ལས80％ལྷག་མདོ་དབུས་མཐོ་སྒང་དུ་ཡོད།  གནས་འདིར་གངས་འཁྱགས་ཀྱི་གསོག་འབོར་ཧ་ཅང་མང་བར་མ་ཟད། ད་དུང་རང་རྒྱལ་དང་ཡ་གླིང་ཤར་མའི་ས་ཁུལ་གྱི་ཆུ་བོ་ཆེན་པོ་མང་པོའི་འབྱུང་ཡུལ་གྱི་རྨང་གཞི་དང་ཆུ་ལག་གི་གསབ་ཁུངས་གལ་ཆེན་ཞིག་ཀྱང་ཡིན་པས། ཡ་གླིང་གི་ཆུ་ལྕོག་ཅེས་པའི་མཚན་སྙན་ཐོབ་ཡོད། 

འཁྱགས་ཀླུང་གི་གྲུབ་ཚུལ། 

འཁྱགས་ཀླུང་གྲུབ་པ་ལ་རྒྱུན་རིང་ཞིང་རྙོག་འཛིང་ལྡན་པའི་གོ་རིམ་ཞིག་བརྒྱུད་དགོས་ཤིང་། དམིགས་བསལ་གྱི་ནམ་ཟླའི་ཆ་རྐྱེན་ཡང་དགོས་ཏེ། ལོ་རེའི་ཆ་སྙོམས་ཀྱི་དྲོད་ཚད་ངེས་པར་དུ་ཀླད་ཀོར་མན་ཡིན་དགོས། ཁ་བ་བབས་རྗེས་དུས་ཡུན་རིང་བོར་གངས་གསོག་བརྒྱབ་སྟེ་ཞུ་མི་ཐུབ་པ་དང་། དུས་ཀྱི་འཕོ་འགྱུར་དང་འགྲོགས་ནས་གངས་གསོག་དེ་ལ་རང་ངོས་ཀྱི་ལྗིད་ཤུགས་བྱེད་ནུས་འོག་རིམ་བཞིན་བཙུར་གནོན་ཐེབས་ཏེ་ཕལ་ཆེར་མཁའ་དབུགས་ཡོད་ཚད་ཕྱི་རུ་བཏོན་པ་ལས་གྲུབ་པའི་འཁྱགས་དར་ལ་འཁྱགས་ཀླུང་ཟེར། འཁྱགས་ཀླུང་ནི་ནམ་ཡང་འགུལ་མེད་སོར་གནས་ཤིག་མིན་པར། འགྲོས་ཚད་ཧ་ཅང་དལ་བའི་ངང་དམའ་སར་འགུལ་བཞིན་ཡོད། སྤྱིར་བཏང་གི་གནས་ཚུལ་འོག ལོ་རེར་སྨི་འགའ་ནས་བཅུ་ཕྲག་ཙམ་འགུལ་བཞིན་ཡོད་ཅིང་། མདོ་དབུས་མཐོ་སྒང་གི་མཚོ་འཕགས་མཐོ་ལ་དམིགས་བསལ་གྱི་ནམ་ཟླའི་ཆ་རྐྱེན་ལྡན་པས། འཁྱགས་ཀླུང་གྲུབ་པར་ཧ་ཅང་འཚམ་པ་ཡིན། 

འཁྱགས་ཀླུང་གི་ས་གཤིས་བྱེད་ནུས།

འཁྱགས་ཀླུང་ནི་ས་གཤིས་འགྱུར་ལྡོག་གི་བརྐོ་བཟོ་མཁན་དང་སྐྱེ་ཁམས་མ་ལག་གི་སྙོམ་སྒྲིག་ཆས་ཤིག་ཏུ་བལྟས་ཆོག་པ་སྟེ། དེ་ནི་སྲ་གཟུགས་ཆུའི་གསོག་མཛོད་ཅིག་ཡིན་པར་མ་ཟད། ད་དུང་ཟམ་མ་ཆད་པར་བཞུར་སྐྱོད་དང་ས་ངོས་ལ་སླད་སྐྱོན་བཏང་སྟེ། ཐུན་མོང་མ་ཡིན་པའི་ས་བྱད་སྐྲུན་མཁན་ཞིག་ཀྱང་ཡིན། འཁྱགས་ཀླུང་གིས་འཁྱགས་དར་བརྐོ་བ་དང་འཁྱགས་དར་སྤུང་བ་སོགས་ཀྱི་བྱེད་ནུས་ལ་བརྟེན་ནས་འཁྱགས་ཀོང་དང་གངས་རྩེ་རྣོན་པོ། འཁྱགས་ཀླུང་གྲོག་རོང་། གྲོག་རོང་ཟབ་མོ་སོགས་ཀྱི་ས་གཤིས་རྣམ་པ་སྐྲུན་བཞིན་ཡོད་ལ། འཁྱགས་ཀླུང་གི་སླད་སྐྱོན་གཏོང་ཤུགས་ཆེ་ཞིང་བྲག་རྡོ་འབོར་ཆེན་སྤོར་འདྲེན་བྱེད་ཐུབ་པ་དང་། འཁྱགས་ཀླུང་ཞུ་སྐབས་འཁྱགས་ཤུར་དང་འཁྱགས་མཚེའུ་སོགས་འཁྱགས་ཀླུང་སྤུངས་གསོག་དངོས་པོ་གྲུབ་ཐུབ།

མདོ་དབུས་མཐོ་སྒང་དུ་འཁྱགས་དར་གྱི་ཁ་གྲངས་མང་བར་མ་ཟད། གཞི་རྒྱའང་ཆེན་པོ་ཡོད། ས་གཤིས་བརྟག་དཔྱད་དང་རྒྱང་ཚོར་གཞི་གྲངས་གཞིར་བཟུང་སྟེ་དཔྱད་ན། མདོ་དབུས་མཐོ་སྒང་དང་ཉེ་འཁོར་ས་ཁུལ་གྱི་འཁྱགས་ཀླུང་གི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི10ལྷག་ཡོད་ལ། འཛམ་གླིང་ཡོངས་ཀྱི་འཁྱགས་ཀླུང་རྒྱ་ཁྱོན་གྱི15%ཡན་ཟིན། འཁྱགས་ཀླུང་འདི་དག་གིས་སྤྱི་ལེ་ལྷམ་པ7000གི་འཁྱགས་ཆུའི་ཐོན་ཁུངས་ཉར་ཚགས་བྱས་ཡོད་པས། ཡ་གླིང་གི་ཆུ་བོ་ཆེན་པོ་མང་པོའི་མགོ་ཁུངས་ཡིན་ཏེ། དཔེར་ན་རྨ་ཆུ་དང་འབྲི་ཆུ། ཆུ་བོ་གང་གཱ། ཡར་ཀླུང་གཙང་བོ་སོགས་ལྟ་བུའོ། འཁྱགས་ཀླུང་ཐོན་ཁུངས་འདི་དག་ནི་སྐྱེ་ཁམས་མ་ལག་གི་དོ་མཉམ་སྲུང་བའི་གནད་འགག་ཡིན་ལ། དེའི་འགྱུར་ལྡོག་གིས་ཐད་ཀར་སྐྱེ་ཁམས་མ་ལག་གི་གཏན་འཇགས་དང་སྐྱེ་དངོས་སྣ་མང་རང་བཞིན་མུ་མཐུད་དུ་གནས་པ་ལ་ཤུགས་རྐྱེན་ཐེབས་པ་ཡིན། 

ནམ་ཟླའི་འགྱུར་ལྡོག་དང་འཁྱགས་ཀླུང་ཇེ་ཆུང་དུ་འགྲོ་བ།

འཛམ་གླིང་ཧྲིལ་བོའི་ནམ་ཟླ་ཇེ་དྲོར་སོང་བ་ཡིས་མདོ་དབུས་མཐོ་སྒང་གི་འཁྱགས་ཀླུང་ལ་གཏིང་ཟབ་ཅིང་ཡུན་རིང་བའི་ཤུགས་རྐྱེན་ཐེབས་ཡོད། ཚན་རིག་པས་འཁོར་སྐར་གྱི་རྒྱང་ཚོར་བརྒྱུད་དེ་ས་ངོས་རྟོག་འཇལ་དང་འཁྱགས་སྙིང་དབྱེ་ཞིབ་སོགས་ཀྱི་བྱེད་ཐབས་བརྒྱུད་ནས། མདོ་དབུས་མཐོ་སྒང་གི་འཁྱགས་ཀླུང་གི་འགྱུར་ལྡོག་ལ་རྟོག་འཇལ་བྱས་དང་བྱེད་བཞིན་ཡོད། མདོ་དབུས་མཐོ་སྒང་གི་འཁྱགས་ཀླུང་ཇེ་ཆུང་དུ་འགྲོ་ཚད་དེ་འདས་པའི་ལོ་ངོ་བཅུ་ཡི་རིང་ལ་མངོན་གསལ་གྱིས་ཚབས་ཇེ་ཆེར་འགྲོ་བཞིན་ཡོད་པ་དང་། འགྱུར་ལྡོག་འདིས་ཁུལ་ཁོངས་ཀྱི་སྐྱེ་ཁམས་མ་ལག་གི་གཏན་འཇགས་རང་བཞིན་ལ་འཇིག་ཉེན་ཐེབས་པར་མ་ཟད། ཆུའི་ཐོན་ཁུངས་ཆད་པ་དང་ས་གཤིས་གནོད་འཚེ་སོགས་ཀྱང་སློང་སྲིད་དེ། དཔེར་ན་འཁྱགས་མཚེའུ་ཡི་རགས་ཁ་ཤོར་བ་དང་འདམ་རུད་བྱུང་བ་སོགས་ལྟ་བུའོ། 

སྲུང་སྐྱོབ་དང་མ་འོངས་སྔོན་དཔག 

འཁྱགས་ཀླུང་ཞུ་བའི་ཛ་དྲག་གི་འགྲན་རྩོད་ལ་ཁ་གཏད་གཞལ་དགོས་ཚེ། མདོ་དབུས་མཐོ་སྒང་གི་འཁྱགས་ཀླུང་ཐོན་ཁུངས་ནི་དེ་བས་ཀྱང་གལ་ཆེ་བ་ཞིག་ཡིན། ནམ་ཟླ་ཇེ་དྲོར་འགྲོ་བའི་ཚབས་ཇེ་ཆུང་དང་དྲོད་ཁང་རླངས་གཟུགས་ཕྱིར་གཏོང་ཚད་ཇེ་ཉུང་དུ་གཏོང་བ། འཁྱགས་ཀླུང་ལ་རྟོག་འཇལ་དང་ཞིབ་འཇུག་བྱེད་པར་ཤུགས་སྣོན་པ། མི་དམངས་ཀྱི་ཁོར་སྲུང་འདུ་ཤེས་ཇེ་མཐོར་གཏོང་བ་སོགས་ནི་འཁྱགས་ཀླུང་ལ་སྲུང་སྐྱོབ་བྱེད་པའི་ཐབས་ཤེས་གཙོ་བོ་ཡིན།