དེ་རིང་ནི2025ལོའི་ཟླ04པའི་ཚེས05ཡིན།
མདུན་ངོས། མགོ་ཁྲིད། གསར་འགྱུར། སྲིད་དོན། ཕ་ཡུལ། རིག་གནས། ལོ་ཙཱ། རྒྱུན་ཤེས། བརྙན་ཟློས།

ང་ཚོས་མཉམ་དུ《དམངས་དོན་ཁྲིམས་གཞུང》སློབ།

2024-11-04 15:11:02   |   756

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། མཚོ་སྔོན་བོད་ཡིག་གསར་འགྱུར། བཤེར་འབེབས། རིན་ཆེན་ཚེ་རིང་།


1.png

དོན་ཚན་བརྒྱ་དང་སོ་བརྒྱད་པ། བལྟོས་བཅས་མི་མེད་པའི་འདོད་བློ་སྟོན་པ་ཡིན་ན། བསྟན་ཚར་དུས་སུ་ནུས་པ་ཐོན་པ་ཡིན། བཅའ་ཁྲིམས་ནང་ལོགས་སུ་གཏན་འབེབས་བྱས་ཡོད་པ་ཡིན་ན། གཏན་འབེབས་དེ་ག་གཞིར་འཛིན་དགོས།

དོན་ཚན་བརྒྱ་དང་སོ་དགུ་པ། སྤྱི་བསྒྲགས་ཀྱི་རྣམ་པའི་ཐོག་ནས་འདོད་བློ་སྟོན་པ་ནི། སྤྱི་བསྒྲགས་སྤེལ་བའི་དུས་སུ་ནུས་པ་ཐོན་པ་ཡིན།

དོན་ཚན་བརྒྱ་དང་བཞི་བཅུ་པ། བྱ་སྤྱོད་སྤེལ་མཁན་གྱིས་གསལ་བརྡའམ་ཤུགས་བརྡའི་ཐོག་ནས་འདོད་བློ་བསྟན་ཆོག

ཁ་རོག་སྡོད་པ་དེ་བཅའ་ཁྲིམས་ཀྱིས་གཏན་འབེབས་བྱས་པ་དང་དོ་བདག་བར་གྲོས་དན་བཞག་པའམ་དོ་བདག་བར་ཉོ་འཚོང་གོམས་སྲོལ་དང་མཐུན་པའི་དུས་སུ། ད་གཟོད་འདོད་བློ་སྟོན་པར་བརྩིས་ཆོག །

དོན་ཚན་བརྒྱ་དང་ཞེ་གཅིག་པ། བྱ་སྤྱོད་སྤེལ་མཁན་གྱིས་འདོད་བློ་སྟོན་པ་ཕྱིར་འཐེན་བྱས་ཆོག འདོད་བློ་སྟོན་པ་ཕྱིར་འཐེན་བྱས་པའི་བརྡ་སྦྱོར་ནི། འདོད་བློ་སྟོན་པ་བལྟོས་བཅས་མི་ལ་མ་འབྱོར་གོང་ངམ། འདོད་བློ་སྟོན་པ་དང་དུས་གཅིག་ཏུ་བལྟོས་བཅས་མི་ལ་འབྱོར་དགོས།

དོན་ཚན་བརྒྱ་དང་ཞེ་གཉིས་པ། བལྟོས་བཅས་མིའི་འདོད་བློ་སྟོན་པར་འགྲེལ་བཤད་ཡོད་ཚེ། བེད་སྤྱོད་བྱས་པའི་ཚིག་སྦྱོར་གཞིར་བཞག་འབྲེལ་ཡོད་ཀྱི་དོན་ཚན་དང་། བྱ་སྤྱོད་ཀྱི་ངོ་བོ་དང་དམིགས་ཡུལ། གོམས་སྲོལ་བཅས་དང་དེ་བཞིན་ཁ་དན་ཚིག་གནས་ཀྱི་རྩ་དོན་དང་ཟུང་འབྲེལ་བྱས་ནས་འདོད་བློ་སྟོན་པའི་གོ་དོན་གཏན་འཁེལ་བྱེད་དགོས།

བལྟོས་བཅས་མིའི་འདོད་བློ་སྟོན་པར་འགྲེལ་བཤད་མེད་ཚེ། བེད་སྤྱོད་བྱས་པའི་ཚིག་སྦྱོར་ཁོ་ནར་མི་བལྟ་བར། འབྲེལ་ཡོད་ཀྱི་དོན་ཚན་དང་། བྱ་སྤྱོད་ཀྱི་ངོ་བོ་དང་དམིགས་ཡུལ། གོམས་སྲོལ་བཅས་དང་དེ་བཞིན་ཁ་དན་ཚིག་གནས་ཀྱི་རྩ་དོན་དང་ཟུང་འབྲེལ་བྱས་ནས། བྱ་སྤྱོད་སྤེལ་མཁན་གྱི་འདོད་བློ་ངོ་མ་གཏན་འཁེལ་བྱེད་དགོས།


ས་བཅད་གསུམ་པ། དམངས་དོན་བཅའ་ཁྲིམས་བྱ་སྤྱོད་ཀྱི་ནུས་པ།

དོན་ཚན་བརྒྱ་དང་ཞེ་གསུམ་པ། གཤམ་གསལ་ཆ་རྐྱེན་འཛོམས་པའི་དམངས་དོན་བཅའ་ཁྲིམས་བྱ་སྤྱོད་ལ་ནུས་པ་ལྡན་པ་ཡིན།

(གཅིག) བྱ་སྤྱོད་སྤེལ་མཁན་ལ་གང་ལ་གང་མཐུན་གྱི་དམངས་དོན་བྱ་སྤྱོད་སྤེལ་ནུས་ཡོད་པ།

(གཉིས) འདོད་བློ་སྟོན་པ་བདེན་ཐུབ་ཡིན་པ།

(གསུམ) བཅའ་ཁྲིམས་དང་སྲིད་འཛིན་ཁྲིམས་སྲོལ་ནང་གཏན་འབེབས་བྱས་པའི་བཙན་ཤེད་རང་བཞིན་གྱི་གཏན་འབེབས་དང་མི་འགལ་བ་དང་། སྤྱི་སྒྲིག་སྲོལ་བཟང་དང་མི་འགལ་བ།

དོན་ཚན་བརྒྱ་དང་ཞེ་བཞི་པ། དམངས་དོན་བྱ་སྤྱོད་སྤེལ་ནུས་མེད་མཁན་གྱིས་སྤེལ་བའི་དམངས་དོན་བཅའ་ཁྲིམས་བྱ་སྤྱོད་ལ་ནུས་པ་མི་ལྡན་པ་ཡིན།

དོན་ཚན་བརྒྱ་དང་ཞེ་ལྔ་པ། དམངས་དོན་བྱ་སྤྱོད་སྤེལ་ནུས་ལ་ཚོད་འཛིན་བྱེད་མཁན་གྱིས་སྤེལ་བའི་ཁེ་ཕན་འཐོབ་རྒྱུ་ཁོ་ནར་དམིགས་པའི་དམངས་དོན་བཅའ་ཁྲིམས་བྱ་སྤྱོད་དང་ཡང་ན་དེའི་ལོ་ཚོད་དང་རིག་སྟོབས། སེམས་ཁམས་བདེ་ཐང་བཅས་ཀྱི་གནས་ཚུལ་དང་འཚམ་པའི་དམངས་དོན་བཅའ་ཁྲིམས་བྱ་སྤྱོད་ལ་ནུས་པ་ལྡན་པ་ཡིན་ཞིང་། དམངས་དོན་བཅའ་ཁྲིམས་བྱ་སྤྱོད་གཞན་དག་ནི་ཁྲིམས་བཀོད་ལས་ཚབ་པས་མོས་མཐུན་བྱས་པའམ་རྗེས་བྱུང་ཁས་ལེན་བྱས་པ་བརྒྱུད་རྗེས་ནུས་པ་ལྡན་པ་ཡིན།

བལྟོས་བཅས་མིས་ཁྲིམས་བཀོད་ལས་ཚབ་པར་བརྡ་སྦྱོར་འབྱོར་ཉིན་ནས་ཉིན་སུམ་ཅུའི་ནང་ཚུན་དུ་རྗེས་བྱུང་ཁས་ལེན་བྱེད་དགོས་པའི་སྐུལ་བརྡ་བཏང་ཆོག ཁྲིམས་བཀོད་ལས་ཚབ་པས་འདོད་བློ་མ་བསྟན་པ་ཡིན་ན་རྗེས་བྱུང་ཁས་ལེན་ངོ་ཟློག་བྱས་པར་བརྩི་དགོས། དམངས་དོན་བཅའ་ཁྲིམས་བྱ་སྤྱོད་ལ་རྗེས་བྱུང་ཁས་ལེན་མ་བྱས་གོང་དུ། སེམས་བཟང་བལྟོས་བཅས་མིར་ཕྱིར་འཐེན་བྱེད་པའི་ཁེ་དབང་ཡོད། ཕྱིར་འཐེན་བྱ་རྒྱུ་དེ་བརྡ་སྦྱོར་གཏོང་བའི་རྣམ་པའི་ཐོག་ནས་བསྒྲུབ་དགོས།   


མཉམ་སྤྱོད།