ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གཉེར་བ་དང་ཀྲུང་གོ་གསར་པའི་མི་རིགས་རླུང་འཕྲིན་བྱ་གཞག་དབུ་བརྙེས་ནས་ལོ75འཁོར་བའི་བཞུགས་མོལ་ཚོགས་འདུ་པེ་ཅིང་དུ་འཚོགས་པ།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། ཀྲུང་དབྱང་བརྙན་འཕྲིན་ཁང་གི་གསར་འགྱུར། བཤེར་འབེབས། རིན་ཆེན་ཚེ་རིང་།

ཟླ5པའི་ཚེས22ཉིན། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གཉེར་བ་དང་ཀྲུང་གོ་གསར་པའི་མི་རིགས་རླུང་འཕྲིན་བྱ་གཞག་དབུ་བརྙེས་ནས་ལོ75འཁོར་བའི་བཞུགས་མོལ་ཚོགས་འདུ་པེ་ཅིང་དུ་འཚོགས། ཀྲུང་དབྱང་དྲིལ་སྒྲོག་པུའི་པུ་ཀྲང་གཞོན་པའམ་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་མགོ་འཛིན་ཧྲེན་ཧའེ་ཞུང་གིས་ཀྲུང་དབྱང་མགོ་ཁྲིད་བློ་མཐུན་གྱི་མཆན་བཀོད་མཛུབ་སྟོན་བརྒྱུད་བསྒྲགས་གནང་བ་དང་འབྲེལ་གསུང་བཤད་ཀྱང་གནང་།

ཧྲན་ཧའེ་ཞུང་གིས་བསྟན་དོན། ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་མགོ་ཁྲིད་འོག མི་རིགས་སྐད་ཡིག་དྲིལ་སྒྲོག་ལས་དོན་པ་རྣམས་ཀྱིས་མི་རབས་ནས་མི་རབས་བར་མི་རིགས་མཐུན་སྒྲིལ་དང་རིག་གནས་རྒྱུན་འཛིན་གྱི་བླ་ན་མེད་པའི་འགན་འཁྲི་མཐའ་འཁྱོངས་བྱས་ནས། ལོ་རྒྱུས་ཀྱི་དུས་སྐབས་མི་འདྲ་བར་མི་རིགས་དྲིལ་སྒྲོག་ཁྱབ་ཁོངས་སུ་ནུས་པ་གལ་ཆེན་འདོན་སྤེལ་བྱས་ཡོད། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བཙུགས་ནས་ལོ་བདུན་སོང་རིང་མི་རིགས་སྐད་ཡིག་ལེ་ཚན་གྱིས་སྤུས་ཚད་མཐོ་བའི་འཕེལ་རྒྱས་ཀྱི་གོ་སྐབས་གསར་པ་བསུས་པ་དང་། གཙོ་རྒྱུན་སྨྱན་སྦྱོར་གྱི་མ་ལག་རང་བཞིན་གྱི་འཕོ་འགྱུར་ལ་སྐུལ་འདེད་ཏན་ཏིག་བཏང་བ་དང་། རླུང་འཕྲིན་ལེགས་པོ་སྒྲུབ་པ། རླུང་འཕྲིན་ཁོ་ནར་མི་བརྟེན་པ། མི་རིགས་སྐད་ཡིག་ལེ་ཚན་མཉམ་འདྲེས་བརྒྱུད་སྤེལ་རྒྱུན་མཐུད་གཏིང་ཟབ་ཏུ་གཏོང་བ། མི་རིགས56སེ་འབྲུ་ལྟར་དམ་པོར་འཐམ་རྒྱུར་སྐུལ་འདེད་གཏོང་བ་བཅས་བྱས་ནས་ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ་བ་དང་། བློ་སེམས་གཅིག་གིས་ཀྲུང་གོའི་ཕུགས་འདུན་མཉམ་དུ་བསྐྲུན་པའི་འདུ་ཤེས་སྔར་ལས་བརྟན་པོར་བཙུགས། ལོ་ངོ75ནི་ལམ་ཚད་རྡོ་རིང་ཞིག་ཡིན་ལ་མགོ་འཛུགས་ས་གསར་པ་ཞིག་ཀྱང་ཡིན། སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གྱིས་མི་རིགས་ལས་དོན་ལེགས་སུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་ལ་གོ་བ་གཏིང་ཟབ་ལེན་པ་དང་ལག་བསྟར་ཏན་ཏིག་བྱེད་དགོས་ལ། ཞི་ཅིན་ཕིང་གི་རིག་གནས་དགོངས་པར་སློབ་སྦྱོང་དང་ལག་ལེན་གཏིང་ཟབ་བྱེད་དགོས་པ་དང་། “དབུ་གཙོའི་འདུ་འགོད”སྔར་བས་གཏིང་ཟབ་ཏུ་བཏང་སྟེ། གཙོ་འཛིན་གྱི་དགོངས་པ་མི་རིགས་ས་ཁུལ་དུ་སྔར་བས་མི་སེམས་སུ་ཟུག་པར་སྐུལ་འདེད་གཏོང་དགོས། “བསམ་བློ་དང་སྒྱུ་རྩལ། ལག་རྩལ་བཅས་ཟུང་དུ་འབྲེལ་བའི”མཉམ་འདྲེས་བརྒྱུད་སྤེལ་སྔར་བས་གཏིང་ཟབ་ཏུ་བཏང་ནས་ཀྲུང་ཧྭ་མི་རིགས་མཐུན་སྒྲིལ་ཆེན་མོ་སྲ་བརྟན་དང་འཕེལ་རྒྱས་གཏོང་ཆེད་གླེང་ཕྱོགས་ཀྱི་རྒྱབ་སྐྱོར་ནུས་ལྡན་བྱེད་དགོས། འཐབ་རྩོད་ཀྱི་སྙིང་སྟོབས་སྔར་བས་དར་སྤེལ་དང་འཐབ་རྩོད་ཀྱི་འཇོན་ཐང་སྦྱོང་བརྡར་བྱེད་པ། རྒྱལ་སྤྱིའི་ཁྱབ་སྤེལ་ཆོས་ཉིད་ལ་བརྩི་སྲུང་ཞུ་བ། ཀྲུང་ཧྭ་མི་རིགས་གཅིག་མཐུན་ཚོགས་པའི་གཏམ་རྒྱུད་ཡག་པོ་ཤོད་པ་བཅས་བྱས་ཏེ་མི་རིགས་དྲིལ་སྒྲོག་དང་གནས་འཕྲིན་སྤེལ་བའི་ལས་དོན་སྔར་བས་གཏིང་ཟབ་དང་ཏན་ཏིག་བསྒྲུབ་སྟེ། “བརྙན་ངོས་ཡོངས་སྤུས་ལེགས་ཡིན་པའི”གསར་གཏོད་གྲུབ་འབྲས་ལ་བརྟེན་ནས་ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་ཟམ་མི་ཆད་པར་བསྐྲུན་དགོས།

ཀྲུང་དབྱང་དྲིལ་སྒྲོག་པུའི་པུ་ཀྲང་གཞོན་པའམ་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་མགོ་འཛིན་ཧྲེན་ཧའེ་ཞུང་།

1950ལོའི་ཟླ5པའི་ཚེས22ཉིན། དེ་སྔའི་ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་བོད་སྐད་རླུང་འཕྲིན་གཏོང་མགོ་ཚུགས་པ་དང་། ཀྲུང་གོ་གསར་པའི་མི་རིགས་རླུང་འཕྲིན་བྱ་གཞག་དེ་ནས་བཟུང་དབུ་བརྙེས། ཀྲུང་དབྱང་སྨྱན་སྦྱོར་ཁྲོད་ཀྱི་མི་རིགས་སྐད་ཡིག་རིགས་ཀྱི་སྒྲིག་གཞི་ཁོ་ན་ཡིན་པའི་ཆ་ནས་སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་རླུང་འཕྲིན་གྱིས་རླུང་འཕྲིན་ལེ་ཚན་ཆ་ཚང4དང་མི་རིགས་སྐད་ཡིག་དྲ་ཚིགས5སྤུས་ཚད་མཐོ་བའི་ངང་བཟོ་བཅོས་རིམ་སྤོར་བྱེད་པར་སྐུལ་འདེད་ཏན་ཏིག་བཏང་ནས། ལས་སྟེགས་མང་པོའི་སྨྱན་སྦྱོར་གསར་པའི་ཐོ་ཨང་བཏོད་དེ་མི་རིགས་སྐད་ཡིག་ལེ་ཚན་བརྒྱུད་སྤེལ་ཚོགས་པ་ཞིག་ཆགས་པར་བྱས་ཡོད།《གངས་ལྗོངས་ས་མཐོ། གཙོ་འཛིན་གྱི་བརྩེ་སེམས་ཟབ་མོ》སོགས་གཙོ་གནད་ལེ་ཚན་བཏོན་པ་དང་།《སེ་འབྲུའི་བརྩེ་སེམས་》དང《ང་ཚོ》སོགས་རྩེར་སོན་ལེ་ཚན་དང་ཆེད་དོན་འཕྲིན་སྤེལ་བཏོད་དེ་བརྩེ་སེམས་ཟབ་མོའི་སྒོ་ནས་མི་རིགས་ཁག་གི་མི་དམངས་ཀྱི་མཐུན་སྒྲིལ་འབད་འཐབ་དང་མཛེས་སྡུག་ལྡན་པའི་འཚོ་བ་གཏོད་པའི་གཏམ་རྒྱུད་ཡག་པོར་བཤད་དེ་ཀྲུང་ཧྭ་མི་རིགས་ཀྱི་མཐུན་སྒྲིལ་ཆེན་མོ་སྲ་བརྟན་དང་འཕེལ་རྒྱས་གཏོང་ཆེད་རྣམ་པ་བཟང་པོ་ཞིག་བཏོད་ཡོད།

རྒྱལ་ཁབ་མི་རིགས་ལས་དོན་ཨུ་ལྷན་གྱི་ཆེད་འགན་འཁུར་མཁན་ཨུ་ཡོན་ཆིན་དབྱི་ཀྲི་དང་བོད་རང་སྐྱོང་ལྗོངས་ཏང་ཨུའི་རྒྱུན་ཨུའམ་དྲིལ་སྒྲོག་པུའི་པུ་ཀྲང་ཝང་ཧའེ་ཀྲོའུ་ཡིས་ཤིས་ཚིག་ཕུལ།

ཆིན་དབྱི་ཀྲི་ཡིས་བསྟན་དོན། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གྱིས་མི་རིགས་དང་འབྲེལ་བ་ཡོད་པའི་དྲིལ་སྒྲོག་ཁྱབ་ཁོངས་སུ་ནུས་པ་ཆེན་པོ་འདོན་སྤེལ་བྱས་ཏེ། མི་རིགས་མཐུན་སྒྲིལ་ཡར་ཐོན་བྱ་གཞག་ལ་ལེགས་སྐྱེས་གལ་ཆེན་ཕུལ་ཡོད། དེ་ནི་དུས་རབས་གསར་པར་གཙོ་འཛིན་གྱི་བསམ་བློ་བརྒྱུད་སྤེལ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བ་བཅས་ཀྱི་སྟོབས་ཤུགས་གལ་ཆེན་ཞིག་རེད། རྒྱལ་ཁབ་མི་རིགས་ལས་དོན་ཨུ་ལྷན་གྱིས་སྤྱི་ཁྱབ་ལས་ཁུངས་དང་མཉམ་ལས་བྱེད་པར་སྔར་བས་ཤུགས་སྣོན་བརྒྱབ་ནས་མི་རིགས་ལས་དོན་ལ་ཤུགས་སྣོན་དང་ལེགས་སུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་དྲིལ་སྒྲོག་དང་འགྲེལ་བཤད་བྱེད་པར་ཐུན་མོང་ཐོག་འབད་པ་བྱེད་རྒྱུ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་དྲིལ་སྒྲོག་ལས་དོན་གྱི་རྣམ་པ་ཆེན་པོ་གཏོད་རྒྱུར་ཐུན་མོང་ཐོག་སྐུལ་འདེད་གཏོང་བ་དང་། ཕྱོགས་གཉིས་པོའི་འཐབ་ཇུས་མཉམ་ལས་འབྲེལ་བ་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་བཏང་སྟེ། ཕྱོགས་མང་པོའི་མཉམ་ལས་ལག་བསྟར་དང་། སྤུས་ལེགས་བརྩམས་ཆོས་གསར་སྐྲུན་བྱས་ཏེ། མི་རིགས་མཐུན་སྒྲིལ་ཡར་ཐོན་བྱ་བཞག་ལ་སྟོབས་ཤུགས་གསར་པ་འབུལ་རྒྱུ་ཡིན་ཞེས་བཤད།

ཝང་ཧའེ་ཀྲོའུ་ཡིས་བོད་སྐད་རླུང་འཕྲིན་དེ་གྲངས་ཉུང་མི་རིགས་སྐད་གི་རླུང་འཕྲིན་ལེ་ཚན་ཐོག་མ་ཡིན་པའི་ངོས་ནས་དེའི་འཕེལ་རྒྱས་བརྒྱུད་རིམ་ལ་ཕྱིར་དྲན་བྱས་པ་དང་། སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གྱིས་ལོ75ཡི་རིང་ཏང་གི་སྐད་སྒྲ་བརྒྱུད་བསྒྲགས་དང་བོད་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བའི་ཐད་ནུས་པ་གལ་ཆེན་འདོན་སྤེལ་བྱས་ཡོད་ཅེས་བཤད་པ་དང་འབྲེལ་བོད་སྐད་ལེ་ཚན་མཐུན་སྦྱོར་མཉམ་འགུལ་ལམ་སྲོལ་འཛུགས་པ་དང་ལེ་ཚན་མཉམ་ལས་ལ་ཤུགས་སྣོན་པའི་གྲོས་མགོ་བཏོན། ཕྱོགས་གཉིས་པོས་མི་རིགས་སྐད་ཡིག་ལེ་ཚན་མཁོ་འདོན་དང་ཞབས་ཞུའི་ཆུ་ཚད་མཐོར་འདེགས་བཏང་སྟེ། ཁྱད་ཆོས་ལྡན་པའི་མི་རིགས་སྐད་ཡིག་རླུང་འཕྲིན་བརྙན་འཕྲིན་ལེ་ཚན་གྱི་སྤུས་རྟགས་གཏོད་པ་དང་། དུས་རབས་གསར་པའི་མི་རིགས་སྐད་ཡིག་ཁྱབ་བསྒྲགས་ལས་དོན་ལེགས་པར་བསྒྲུབ་སྟེ། ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་བསྐྲུན་དགོས་པའི་རེ་བ་བཏོན།

རྒྱལ་ཁབ་མི་རིགས་ལས་དོན་ཨུ་ལྷན་གྱི་ཆེད་འགན་འཁུར་མཁན་ཨུ་ཡོན་ཆིན་དབྱི་ཀྲི་དང་བོད་རང་སྐྱོང་ལྗོངས་ཏང་ཨུའི་རྒྱུན་ཨུའམ་དྲིལ་སྒྲོག་པུའི་པུ་ཀྲང་ཝང་ཧའེ་ཀྲོའུ་ཡིས་ཤིས་ཚིག་ཕུལ།

རིགས་གཅིག་མཁས་ཅན་དང་མཁས་དབང་། ཉན་མཁན་གྱི་འཐུས་མི། དེ་བཞིན་མི་རིགས་སྐད་ཡིག་ལེ་ཚན་གྱི་ལས་མིའི་འཐུས་མི་སོགས་ཀྱིས་ཏང་གི་སྐད་སྒྲ་བརྒྱུད་སྤྲོད་དང་། མི་རིགས་རིག་གནས་དར་སྤེལ། མཐུན་སྒྲིལ་སྟོབས་ཤུགས་གཅིག་སྒྲིལ་སོགས་ལ་དམིགས་ནས་སྤེལ་རེས་གཏིང་ཟབ་བྱས་ཤིང་། དུས་རབས་གསར་པའི་ཏང་གི་མི་རིགས་ལས་དོན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ཐབས་འདོན་ཇུས་འདོན་བྱས།

རིགས་གཅིག་མཁས་ཅན་དང་མཁས་དབང་གི་འཐུས་མི་སྟེ། ཀྲུང་དབྱང་མི་རིགས་སློབ་ཆེན་ལོ་རྒྱུས་རིག་གནས་སློབ་གླིང་གི་དགེ་རྒན་ཆེ་མོ་བ་མོང་མན་གྱིས་བསྟན་དོན། སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གྱིས་ཏང་གི་སྐད་སྒྲ་དང་ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ་བའི་འདུ་ཤེས་མཐའ་མཚམས་མི་རིགས་སྤུན་ཟླར་བརྒྱུད་སྤྲོད་བྱས་པ་དེ་ཡིས་ཏང་དང་རྒྱལ་ཁབ་ཀྱིས་གྲངས་ཉུང་མི་རིགས་ལ་མཐོང་ཆེན་དང་ཐུགས་ཁུར་གནང་བ་མཚོན་ཡོད། ལོ75ཡི་རིང་ལེ་ཚན་ནང་སྲིད་ཇུས་སྒྲོག་འགྲེལ་བྱས་པ་མ་ཟད། མི་སེམས་འགུལ་བའི་གཏམ་རྒྱུད་མང་པོ་སྔོག་འདོན་བྱས་ཡོད། མི་རིགས་སྐད་ཡིག་ལེ་ཚན་སྨྱན་སྦྱོར་དུས་རབས་སུ་མུ་མཐུད་གསར་གཏོད་བྱས་ཏེ་དུས་རབས་ཀྱི་དགོས་མཁོ་དང་འཚམ་པའི་སྨྱན་སྦྱོར་ལེ་ཚན་དེ་བས་མང་བ་གསར་སྤེལ་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་མི་སེམས་ལ་ཟུག་རྒྱུར་རྒྱུན་ཆད་མེད་པར་སྐུལ་འདེད་གཏོང་རྒྱུའི་རེ་སྒུག་བྱེད་བཞིན་ཡོད་ཅེས་བཤད།

ཧ་སག་སྐད་ཀྱི་ལེ་ཚན་གྱི་ཉན་མཁན་གྱི་འཐུས་མིའམ་རྩོམ་པ་པོ་གྲགས་ཅན་ཡེ་ཁེ་ཤི·ཧུའུ་མན་པེ་ཁེས་མི་རིགས་སྐད་ཡིག་རླུང་འཕྲིན་དང་མཉམ་དུ་འཚར་ལོངས་བྱུང་བའི་ཁོའི་དྲོ་སྐྱིད་ལྡན་པའི་གཏམ་རྒྱུད་མཉམ་སྤྱོད་བྱས་པ་དང་། ཉེ་བའི་ལོ་ཤས་རིང་། སྤྱི་ཁྱབ་ལས་ཁུངས་ཀྱི་མི་རིགས་སྐད་ཡིག་ལེ་ཚན་གྱི་ནང་དོན་ཕུན་སུམ་ཚོགས་པ་དང་རྣམ་པ་འཁྲུག་ཆ་དོད་པ་དང་ཉན་མཁན་ལ་ཞབས་འདེགས་ཞུ་བའི་ནུས་པའང་ཟམ་མི་ཆད་པར་ཆེ་རུ་ཕྱིན་ཡོད་པར་འདོད་པ་དང་། ཁོང་གིས་ལེ་ཚན་ཇེ་ལེགས་སུ་འགྲོ་བའི་སྨོན་འདུན་ཞུས།

བཞུགས་མོལ་ཚོགས་འདུའི་ཐོག མི་རིགས་སྐད་ཡིག་ལེ་ཚན་གྱི་ལས་འཁྱུར་ངལ་གསོ་བྱས་པའི་བློ་མཐུན་རྒན་གྲས་ཀྱི་ཚབ་བྱས་ནས་ཀུའུ་ལི་པ་ཧས་ལོ་ངོ40ལྷག་ཙམ་ལ་ལས་ཀ་གཉེར་བའི་རིང་མི་རིགས་སྐད་ཡིག་ལེ་ཚན་ལྔའི་འཕེལ་རྒྱས་བརྒྱུད་རིམ་གྱི་མྱོང་ཚོར་མཉམ་སྤྱོད་བྱས། ཆི་ལེ་ཀེར་གྱིས་གཞོན་ནུ་ལས་བཟོའི་ཚབ་བྱས་ཏེ་མི་རིགས་རླུང་འཕྲིན་པ་རྒན་རབས་ཚོའི་གསར་གཏོད་ཡར་བརྩོན་གྱི་སྙིང་སྟོབས་རྒྱུན་འཛིན་དང་། གསར་འགྱུར་གྱི་ཕུགས་བསམ་བརྟན་སྲུང་། ཆེད་ལས་ཀྱི་འཇོན་ཐང་སྦྱོང་བརྡར་བཅས་བྱེད་པའི་ཆོད་སེམས་མཚོན་པར་བྱས་ནས་དུས་རབས་གསར་པར་མི་རིགས་སྐད་ཡིག་ལེ་ཚན་ལ་སྔར་བས་མཛེས་སྡུག་ལྡན་པའི་གཟི་བརྗིད་མངོན་པའི་སེམས་འདུན་མཚོན།

ཀྲུང་དབྱང་མི་རིགས་སློབ་ཆེན་ལོ་རྒྱུས་རིག་གནས་སློབ་གླིང་གི་དགེ་རྒན་ཆེ་མོ་བ་མོང་མན་དང་། ཧ་སག་སྐད་ཀྱི་ལེ་ཚན་གྱི་ཉན་མཁན་གྱི་འཐུས་མིའམ་རྩོམ་པ་པོ་གྲགས་ཅན་ཡེ་ཁེ་ཤིས·ཧུའུ་མན་པེ་ཁེ། མི་རིགས་སྐད་ཡིག་ལེ་ཚན་གྱི་ལས་འཁྱུར་ངལ་གསོ་བྱས་པའི་བློ་མཐུན་རྒན་གྲས་ཀུའུ་ལི་པ་ཧ། གཞོན་ནུ་ལས་བཟོའི་འཐུས་མི་ཆི་ལེ་ཀེར་བཅས་ཀྱིས་ཚོགས་འདུའི་ཐོག་བཞུགས་མོལ་སྤེལ་རེས་གནང་།

ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་རྩོམ་སྒྲིག་ལས་དོན་གྲོས་ཚོགས་ཀྱི་ཁོངས་མི་ལི་ཐིང་དང་ཀྲོའུ་ཀྲེན་ཧུང་བཞུགས་མོལ་ཚོགས་འདུར་ཞུགས། རྒྱལ་ཁབ་མི་རིགས་ལས་དོན་ཨུ་ལྷན་རིག་གནས་དྲིལ་སྒྲོག་སིའི་སི་ཀྲང་ཀྲང་མོའུ་དང་། ཀྲུང་དབྱང་དྲིལ་སྒྲོག་པུའི་འགྲོ་བ་མིའི་ཐོབ་ཐང་ལས་དོན་ཅུའི་རིམ་པ་དང་པོའི་སྐོར་གཟིགས་པ་ཀྲུའུ་ཧུང་ལི། གསར་འགྱུར་ཅུའི་ཅུ་ཀྲང་གཞོན་པ་ཀྲའོ་ཝུའེ། སློབ་གསོ་པུའི་མི་རིགས་སློབ་གསོ་འཕེལ་རྒྱས་ལྟེ་གནས་ཀྱི་ཀྲུའུ་རེན་ཀྲའོ་ཅན་ཝུའུ། ཀྲུང་གོ་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་དཔོན་གཞོན་པ་དང་ཞིབ་འཇུག་པ་བཀྲ་ལོ། ཀྲུང་དབྱང་མི་རིགས་སློབ་ཆེན་གྱི་སློབ་སྤྱི་གཞོན་པ་ཝང་ཀྲི་བཅས་ཚོགས་འདུར་ཞུགས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ཀྱི་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་དང་། ཀྲུང་དབྱང་འཐབ་ཕྱོགས་གཅིག་གྱུར་པུ་དང་། ཀྲུང་གོ་སྤྱི་ཚོགས་ཚན་རིག་ཁང་། ཀྲུང་གོ་མི་དམངས་སློབ་ཆེན་གྱི་འབྲེལ་ཡོད་པུ་དང་ཁྲུའུ་ཡི་འགན་འཁུར་བ། དེ་བཞིན་སྤྱི་ཁྱབ་ལས་ཁུངས་མི་རིགས་སྐད་ཡིག་ལྟེ་གནས་ཀྱི་ལས་འཁྱུར་ངལ་གསོ་བྱས་པའི་བློ་མཐུན་རྒན་གྲས་ཀྱི་འཐུས་མི། འཐབ་ས་དང་པོའི་ལས་བཟོའི་འཐུས་མི་སོགས་མི་བརྒྱ་ཙམ་བཞུགས་མོལ་ཚོགས་འདུར་ཞུགས།