ཞོགས་པའི་ཇ་ཡུན་གསར་འགྱུར།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས། བཤེར་འབེབས། རིན་ཆེན་ཚེ་རིང་།

གསར་འགྱུར་གལ་ཆེན།

• ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུའི་རྒྱལ་ཡོངས་ཨུ་ཡོན་ལྷན་ཁང་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་ཟླ3པའི་ཚེས4ཉིན་པེ་ཅིན་དུ་འཚོག་རྒྱུ་རེད།
  

• རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་བཞི་པའི་གསར་འགྱུར་ཡོངས་བསྒྲགས་ཚོགས་འདུ་ཟླ3པའི་ཚེས3ཉིན（གཟའ་མིག་དམར）གྱི་ཆུ་ཚོད15：00སྟེང་མི་དམངས་ཚོགས་ཁང་ཆེ་མོའི་ཐོག་སོ་དང་པོའི་གསར་འགྱུར་ཡོངས་བསྒྲགས་ཚོམས་ཆེན་དུ་འཚོག་རྒྱུ་གཏན་འཁེལ་བྱས།
  

• ཉེ་ཆར། ཀྲུང་གུང་ཀྲུང་དབྱང་གཞུང་དོན་ཐིང་གིས《“བདུན་གཅིག་བྱས་རྗེས་གཟེངས་རྟགས”མིང་འདོན་དང་རྒྱལ་ཡོངས་ཀྱི“ཕུལ་བྱུང་གཉིས་དང་སྔོན་ཐོན་གཅིག”གི་འོས་སྦྱོར་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ》པར་འགྲེམ་བྱས།

• ཀྲུང་དབྱང་དམག་ཨུའི་ཆོག་མཆན་ཐོབ་པ་བརྒྱུད། དམག་ཡོངས་ཀྱིས་ཟླ3པའི་ཚེས1ཉིན་ནས་བཟུང་།《ཀྲུང་གོའི་མི་དམངས་བཅིངས་འགྲོལ་དམག་གི་གྲ་སྒྲིག་དམག་ཞབས་མི་སྣའི་ལག་ཁྱེར》བཟོས་ནས་བཀོལ་སྤྱོད་བྱས།
  

• 2026ལོའི་དཔྱིད་རླུང་བྱ་སྤྱོད་དང་ལས་ཞུགས་རོགས་སྐྱོར་དུས་ཚིགས་ཀྱི་བྱེད་སྒོ་སྤེལ་ཚུན། ཟླ2པའི་ཚེས26ཉིན་བར་རྒྱལ་ཡོངས་སུ་གདན་ཞུའི་བྱེད་སྒོ་སྣ་ཚོགས་ཐེངས་ཁྲི2.2སྤེལ་བ་དང་ལས་གནས་ཁྲི1300ལྷག་ཙམ་ཡོངས་བསྒྲགས་བྱས།
  

• ཀྲུའུ་ཅང་གཙང་པོ་དང་ཧོའེ་ཧོ་ཆུ་བོ། ཆན་ཐང་ཅང་གཙང་པོ། མིང་ཅང་གཙང་པོ་བཅས་དང་དེ་བཞིན་ཧའེ་ནན་ཞིང་ཆེན་གྱི་སྐམ་སའི་ཆུ་ཁོངས་སུ་ཟླ3པའི་ཚེས1ཉིན་གྱི་ཆུ་ཚོད0པ་ནས་ཟླ6པའི་ཚེས30ཉིན་གྱི་ཆུ་ཚོད24བར་དཔྱིད་ཀའི་ཉ་འཛིན་བཀག་སྡོམ་ལམ་ལུགས་ལག་བསྟར་བྱ་རྒྱུ་དང་། ཉ་འཛིན་བཀག་སྡོམ་བྱེད་རིང་རོལ་རྩེད་རང་བཞིན་གྱི་ཉ་འཛིན་དང་སྤྲོ་གསེང་ཉ་ལས་ཕུད་པའི་ཉ་འཛིན་བྱེད་སྒོ་ཚང་མ་གཏན་འགོག་བྱ་རྒྱུ།
  

• ཕྱི་འབྲེལ་པུ་དང་དབྱི་རན་དུ་བཅའ་སྡོད་བྱས་པའི་ཀྲུང་གོའི་གཞུང་ཚབ་ཁང་ཆེ་མོས་དབྱི་རན་དུ་ཡོད་པའི་ཀྲུང་གོའི་སྤྱི་དམངས་ལ་དུས་བབ་ཀྱི་འགྱུར་ལྡོག་ལ་དོ་ཁུར་ཆེན་པོ་བྱེད་པ་དང་རང་ངོས་ཀྱི་བདེ་འཇགས་དོགས་ཟོན་ལ་ཤུགས་སྣོན་བརྒྱབ་ནས་བྱེད་ཐབས་འོས་འཚམ་བརྒྱུད་བདེ་འཇགས་ས་ཁུལ་དུ་གང་མགྱོགས་ཕྱིར་འཐེན་བྱེད་དགོས་པའི་དྲན་སྐུལ་བྱས།
  

• གནས་ཚུལ་སྤེལ་བར་གཞིགས་ན། དབྱི་རན་གྱི་ཆེས་མཐོའི་གཙོ་འཛིན་ཧ་མེ་ནེ་དབྱི་དང་དབྱི་རན་གྱི་ཙུང་ཐུང་ཟུར་པ་ནེ་ཅ་ཏེར་འཇབ་རྒོལ་ཕོག་ནས་གྲོངས།
  

• མཉམ་འབྲེལ་རྒྱལ་ཚོགས་སོགས་རྒྱལ་སྤྱིའི་རྩ་འཛུགས་དང་། རྒྱལ་ཁབ་མང་པོའི་མགོ་ཁྲིད། སྲིད་གཞུང་བཅས་ཀྱིས་ཨ་རི་དང་དབྱི་སི་རལ་གྱི་དམག་དོན་བྱ་སྤྱོད་ལ་རྒོལ་གཏམ་བཏང་བ་དང་ཕྱོགས་ཁག་གིས་གླེང་མོལ་སླར་གསོ་བྱས་ནས་གནས་བབ་སྔར་བས་ཇེ་སྡུག་ཏུ་མི་འགྲོ་བར་བྱེད་དགོས་པའི་རེ་འབོད་བྱས།
  

  སྤྱི་ཚོགས།
  

• ཟླ3པའི་ཚེས1ཉིན་ནས་བཟུང2025ལོ་འཁོར་གྱི་ཕྱོགས་བསྡུས་ཐོབ་ཁྲལ་སྡོམ་རྩིས་གཉེར་མགོ་ཚུགས་ཡོད།
  

• དྲ་རྒྱའི་ལས་སྟེགས་ཀྱི་གྲངས་གཞིར་གཞིགས་ན། ཟླ3པའི་ཚེས1ཉིན་གྱི་ཆུ་ཚོད18:54བར། 2026ལོའི་ལོ་འཁོར་གྱི་གློག་བརྙན་སྤ་སེ་བཙོངས་ཚད་ཀྱི་སྡོམ་འབོར་སྒོར་དུང་ཕྱུར100ལས་བརྒལ་ཡོད།

• ཟླ3པའི་ཚེས1ཉིན་གྱི་དགོང་མོར། 2026ལོའིWTTའཛམ་གླིང་ཕིང་ཕང་སྤོ་ལོ་མཉམ་འབྲེལ་ལྷན་ཚོགས་ཀྱི་སིང་ཀ་ཕོར་ཏ་མན་ཀོན་བུད་མེད་རྐྱང་བའི་རྟིང་རྩོད་འགྲན་བསྡུར་ནང་ཀྲུང་གོའི་རུ་ཁག་གི་བདམས་ཐོན་པ་སུན་དབྱིང་ཧྲ་ཡིས་སྤྱིའི་བསྡུར་གྲངས4：2ཀྱི་ཐོག་ནས་རུ་མི་ཝང་མན་ཡུས་ལས་རྣམ་པར་རྒྱལ་ཏེ་ཨང་དང་པོ་བླངས། ཝང་མན་ཡུས་ལ་ཨང་གཉིས་པ་ཐོབ།

• ཟླ3པའི་ཚེས1ཉིན་གྱི་དགོང་མོར། 2026ལོའིWTTའཛམ་གླིང་ཕིང་ཕང་སྤོ་ལོ་མཉམ་འབྲེལ་ལྷན་ཚོགས་ཀྱི་སིང་ཀ་ཕོར་ཏ་མན་ཀོན་གྱི་སྐྱེས་པ་རྐྱང་བའི་འགྲན་བསྡུར་ཁྲོད། ཀྲུང་གོའི་རུ་ཁག་གི་བདམས་ཐོན་པ་ཝང་ཁྲུའུ་ཆིན་གྱིས་ཀྲུང་གོ་ཐའེ་པེ་རུ་ཁག་གི་བདམས་ཐོན་པ་ལིན་ཡུན་རུའུ་ཕམ་པར་བརྒྱབ་ནས་ཨང་དང་པོ་བླངས།

• 2026ལོའི་ཏུང་ཅིང་མ་ལ་སུང་རྒྱང་རྒྱུག་འགྲན་བསྡུར་ཐོག་ཀྲུང་གོའི་ལུས་རྩལ་པས་ཆུ་ཚོད2དང་སྐར་མ5དང་། སྐར་ཆ58ཀྱིས་སྐྱེས་པའི་མ་ལ་སུང་རྒྱང་རྒྱུག་གི་རྒྱལ་ཁབ་ཀྱི་ཟིན་ཐོ་བཏོད།
  

• དབུས་ཤར་ས་ཁུལ་གྱི་དུས་བབ་ཀྱི་ཤུགས་རྐྱེན་ཕོག་པའི་དབང་གིས་རྒྱལ་སྤྱིའི་མཁའ་འགྲུལ་སྤྱི་གཉེར་དང་། ཤར་ཕྱོགས་མཁའ་འགྲུལ་སྤྱི་གཉེར། ལྷོ་ཕྱོགས་མཁའ་འགྲུལ་སྤྱི་གཉེར་སོགས་རྒྱལ་ནང་གི་མཁའ་འགྲུལ་སྤྱི་གཉེར་མང་པོས་དབུས་ཤར་ས་ཁུལ་དང་འབྲེལ་བ་ཡོད་པའི་དུས་གཏན་གནམ་གྲུའི་སྤ་སེའི་དམིགས་བསལ་ཐག་གཅོད་ཇུས་གཞི་སྔ་རྗེས་སུ་ཁྱབ་བསྒྲགས་བྱས།

• ཉེ་ཆར་ཧྥུ་ཅན་ལུང་ཡན་གྱི་ལམ་འགྲོ་བ་ཞིག་གློ་བུར་དུ་འགྱེལ་བ་ན། ལམ་བར་དུ་སྐྱོད་མཁན་གྱི་སྨན་དོན་མི་སྣ་ཁྲེན་ཤིན་ཧུའེ་དང་ལུའོ་ཡུས་ཅུན་བཟའ་ཚོ་གཉིས་ཀྱིས་ནད་པ་ཉེ་འགྲམ་གྱི་མང་ཚོགས་ཀྱི་ཁྱིམ་དུ་སྤོས་ནས་མྱུར་སྐྱོབ་བྱས་ཏེ་ནད་པའི་ཚེ་སྲོག་བདེ་བླག་ངང་སྐྱོབ་ཐུབ་པ་བྱུང་།
  

  སྲིད་ཇུས།
  

• ཅི་ལིན་གྱིས་ཇུས་གཞི་པར་འགྲེམ་བྱས་ནས་སྡོད་ཁང་ལ་གློག་སྐས་སྣོན་རྒྱུར་སྐུལ་འདེད་བཏང་བ་དང་། ཞིང་ཆེན་དང་གྲོང་ཁྱེར（རྫོང）རིམ་པ་གཉིས་ཀྱི་ནོར་སྲིད་ཀྱིས་གློག་སྐས་རེར་ཁ་གསབ་སྒོར་ཁྲི7.5སྤྲད།
  

• ཀོང་ཏུང་གིས་ཐོག་མར་གསར་གཏོད་བྱས་པའི་ཁེ་ལས་དང་ཁེ་ལས་ཆུང་འབྲིང་ལ་མ་དངུལ་བསྡུ་སྒྲིལ་གྱི་རྒྱབ་སྐྱོར་བྱེད་ཤུགས་ཆེ་རུ་བཏང་སྟེ། ཆ་རྐྱེན་དང་མཐུན་པའི་ལས་གཏོད་ཁག་ཐེག་དངུལ་བུན་ལ་དངུལ་བུན་གྱི་དངོས་ཡོད་སྐྱེད་ཀའི་ཚད་ཀྱི་ནོར་སྲིད་སྐྱེད་ཀའི་ཁ་གསབ50%སྤྲོད་རྒྱུ་རེད།
  

• ཡུན་ནན་གྱིས་གསར་དུ་བསྐྲུན་པའི་བཅའ་སྡོད་ཁུལ་གྱི་གཏན་འཇགས་རླངས་འཁོར་འཇོག་ས་བཀོད་སྒྲིག་བྱེད་ཚད100%ལ་སླེབས་པའམ་ཡང་ན་གློག་གསོག་སྒྲིག་ཆས་སྒྲིག་སྦྱོར་ཆ་རྐྱེན་སྔོན་འཇོག་བྱས་ཏེ་གློག་གསོག་སྒྲིག་བཀོད་དེ་ཁུལ་ཆུང་སྒྱུར་བཀོད་ཁྱབ་ཁོངས་ནང་འཇུག་རྒྱུ་ཡིན་པ་ཁ་གསལ་བཏོན་ཡོད།
  

  དེ་རིང་གི་གནམ་གཤིས།

• ཞིན་ཅང་ཐེན་ཧྲན་རྒྱུད་ཀྱི་ས་ཁུལ་དང་། བོད་ལྗོངས་ཀྱི་ཤར་རྒྱུད། ནང་སོག་གི་དབུས་ཤར་རྒྱུད། ཧྲའན་ཞིའི་བྱང་རྒྱུད། ཧྭ་བྱང་གི་ས་ཆ་མང་ཆེ་བ། ཧོང་ཧོའེ་ཡི་ནུབ་རྒྱུད། ཁྲོན་ནུབ་ས་མཐོ་སོགས་ཀྱི་ས་ཁུལ་ཁ་ཤས་སུ་ཁངས་ཆུང་བ་ནས་འབྲིང་བའམ་ཡང་ན་ཁངས་ཆར་འདྲེས་མ་འབབ་རྒྱུ་རེད། དེའི་ཁྲོད་ཧོ་པེ་དང་། ཧྲན་ཏུང་། ཧོ་ནན་སོགས་ཀྱི་ས་ཁུལ་ཁ་ཤས་སུ་ཁངས་ཆེན་ནས་ཁངས་ཆག་ལྷུང་རྒྱུ་རེད། ཧྲན་ཏུང་ཕྱེད་གླིང་དང་། ཅང་ཧོའེ་ཡི་ཤར་རྒྱུད། ཅང་ཞིའི་ལྷོ་ནུབ་རྒྱུད། ཧྥུ་ཅན་གྱི་ལྷོ་ནུབ་རྒྱུད། ཀོང་ཏུང་གི་ས་ཆ་མང་ཆེ་བ། ཀོང་ཞིའི་ཤར་རྒྱུད། སི་ཁྲོན་གཤོང་སའི་ལྷོ་ནུབ་རྒྱུད་སོགས་ཀྱི་ས་ཁུལ་ཁ་ཤས་སུ་ཆར་འབྲིང་ནས་ཆར་ཆེན་འབབ་རྒྱུ་ཡིན་པ་དང་། དེའི་ནང་ཀོང་ཞི་དང་ཀོང་ཏུང་སོགས་ཀྱི་ས་ཁུལ་ཁ་ཤས་སུ་དྲག་ཆར་འབབ་རྒྱུ་རེད།