ཞོགས་པའི་ཇ་ཡུན་གསར་འགྱུར།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས། བཤེར་འབེབས། རིན་ཆེན་ཚེ་རིང་།

གསར་འགྱུར་གལ་ཆེན།

• ཞི་ཅིན་ཕིང་གི་དཔལ་འབྱོར་དགོངས་པ་སློབ་སྦྱོང་དང་ལག་བསྟར་བྱེད་པ་ཟམ་མི་ཆད་པར་གཏིང་ཟབ་ཏུ་གཏོང་ཆེད། ཀྲུང་དབྱང་དྲིལ་སྒྲོག་པུ་དང་རྒྱལ་ཁབ་འཕེལ་སྒྱུར་ཨུ་ལྷན་གྱིས《ཞི་ཅིན་ཕིང་གི་དཔལ་འབྱོར་དགོངས་པ་སློབ་སྦྱོང་གི་དྲི་བ་དྲིས་ལན》ཞེས་པའི་དཔེ་དེབ་རྩོམ་སྒྲིག་བྱས་པ་དང་། མི་དམངས་དཔེ་སྐྲུན་ཁང་དང་སློབ་སྦྱོང་དཔེ་སྐྲུན་ཁང་གིས་མཉམ་དུ་དཔེ་སྐྲུན་བྱས་ཏེ་དེ་རིང་ནས་བཟུང་རྒྱལ་ཡོངས་སུ་འགྲེམ་སྤེལ་བྱ་རྒྱུ་རེད།
  

• རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་ཟླ3ཚེས4ཉིན་གྱི་ཕྱི་དྲོའི་ཆུ་ཚོད3པར་མི་དམངས་ཚོགས་ཁང་ཆེ་མོར་འཚོག་རྒྱུ་དང་། ཟླ3ཚེས11ཉིན་གྱི་སྔ་དྲོར་གྲོལ་རྒྱུ་དང་ཚོགས་ཡུན་ཉིན7རེད།
  

• རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་གསར་འགྱུར་ལྟེ་གནས་དང་། རྒྱལ་ཡོངས་སྲིད་གྲོས་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་གསར་འགྱུར་ལྟེ་གནས་ཀྱིས་གནས་ཚུལ་སྤེལ་བར་གཞིགས་ན། ཚོགས་ཆེན་ལ་ཞུགས་མཁན་གྱི་འཐུས་མི་དང་ཨུ་ཡོན་རྣམས་ཀྱིས་འབྱོར་ཐོ་བཀོད་ཟིན་པ་དང་། ཚོགས་ཆེན་གྱི་གྲ་སྒྲིག་ལས་དོན་ཚང་མ་བསྒྲུབས་ནས་ཚགས་ཡོད།

• དཔྱིད་གསར་སྐྱེལ་འདྲེན་མགོ་ཚུགས་པ་ནས་ཟླ3ཚེས2ཉིན་བར། སྤྱི་ཚོགས་ཡོངས་ཀྱི་ས་ཁོངས་ལས་བརྒལ་བའི་མི་སྣ་འགྲོ་འོང་བྱེད་ཚད་མི་ཐེངས་དུང་ཕྱུར73ལས་བརྒལ་ཡོད།
  

• བཟོ་འཕྲིན་པུ་སོགས་སྡེ་ཚན་དྲུག་གིས་ཡིག་ཆ་བཀྲམ་སྟེ་བསྟན་དོན། 2027ལོར་སླེབས་སྐབས་འོད་ཧྥུ་ལྷུ་ལག་ཕྱོགས་བསྡུས་བེད་སྤྱོད་བྱེད་ཚད་རིམ་རྩིས་བྱས་ན་ཏུན་ཁྲི25ཟིན་རྒྱུ་རེད།
  

• མིག་སྔར་རང་རྒྱལ་གྱི་རི་སྐྱེས་སྲོག་ཆགས་དང་རྩི་ཤིང་འཚོ་སྡོད་བྱེད་ཡུལ（དེ་སྔའི་སྐྱེ་ཡུལ）གྱི་སྤུས་ཚད་མངོན་གསལ་དོད་པོས་ལེགས་སུ་ཕྱིན་པ་དང་། རྒྱལ་ཁབ་ཀྱིས་གཙོ་གནད་སྲུང་སྐྱོང་བྱེད་པའི་སྐམ་སའི་རི་སྐྱེས་སྲོག་ཆགས་དང་རྩི་ཤིང་རིགས་ལ་སྲུང་སྐྱོང་བྱེད་ཚད80%ཡན་ཟིན་ཡོད།
  

• ས་གནས་དེ་གའི་ཚེས3ཉིན་ཁ་ཐར་དུ་བཅའ་སྡོད་བྱས་པའི་ཀྲུང་གོའི་གཞུང་ཚབ་ཁང་ཆེ་མོས་བདེ་འཇགས་དྲན་སྐུལ་བཏང་སྟེ། ཁ་ཐར་དུ་ཡོད་པའི་ཀྲུང་གོའི་སྤྱི་དམངས་ཀྱིས་བདེ་འཇགས་དོགས་ཟོན་ལ་སྔར་བས་ཤུགས་སྣོན་རྒྱག་དགོས་པའི་དྲན་སྐུལ་བྱས།
  

• ཚེས2ཉིན་ཨ་རིའི་རྒྱལ་སྲིད་སྤྱི་ཁྱབ་ཁང་གིས་ཨ་རིའི་སྤྱི་དམངས་དབུས་ཤར་ས་ཁུལ་ནས་འཕྲལ་མར་ཁ་བྲལ་དགོས་པའི་སྐུལ་མ་བཏང་། རྒྱུ་མཚན་ནི་ས་ཁུལ་དེར“བདེ་འཇགས་ཀྱི་ཉེན་ཁ་ཚབས་ཆེན་ལྷག་ཡོད”ཅེས་བཤད།
  

• རྒྱལ་སྤྱིའི་རྡུལ་ཕྲན་ནུས་པའི་སྒྲིག་གཞིས་དབྱི་རན་གྱི་ན་ཐན་ཙི་ཉིང་རྡུལ་སྒྲིག་བཀོད་ལ་ཉེ་ཆར་གཏོར་བཤིག་ཕོག་པ་གཏན་འཁེལ་བྱས།
  

  སྤྱི་ཚོགས།

• དེ་རིང་སྔ་དྲོར། ཧོ་པེ་དང་། ཧོ་ནན། ཧྲན་ཏུང་། ཅང་སུའུ། ཨན་ཧུའེ་སོགས་ཀྱི་ས་ཁུལ་ཁ་ཤས་སུ་སྨུག་པ་ཆེ་བའི་གནམ་གཤིས་ཡོད་པ་དང་། ས་ཆ་ཁ་ཤས་སུ་མཐོང་ཐུབ་པའི་བར་ཐག་སྨི200ཡང་མི་ཟིན་པའི་སྨུག་པ་སྟུག་པོ་ཡོད།
  

• ཚེས3ཉིན་ཆེས་མཐོའི་མི་དམངས་ཁྲིམས་ཁང་གིས་དྲ་རྒྱའི་གཏུམ་སྤྱོད་ཀྱི་ཁྲིམས་འགལ་ཉེས་གསོག་ལ་ཁྲིམས་ལྟར་ཆད་པ་བཅད་པའི་དཔེ་མཚོན་གྱོད་གཞི་ཁྱབ་བསྒྲགས་བྱས།

• “བདུན་གཅིག་བྱས་རྗེས་གཟེངས་རྟགས”ཐོབ་མཁན་དང་དམག་འཐབ་ཀྱི་བྱས་རྗེས་ཆེན་པོ་བཞག་པའི་དམག་མི་རྒན་གྲས་བློ་མཐུན་ཝང་ཀྲན་ཧྲན་ཟླ2ཚེས26ཉིན་ནད་གཞིའི་རྐྱེན་པས་སྨན་བཅོས་བྱས་ཀྱང་ཕན་འབྲས་མ་ཐོན་པར་ཧོ་ནན་ཨན་དབྱང་དུ་སྐུ་གཤེགས་པ་དང་། སྐུ་གཤེགས་སྐབས་དགུང་ལོ97ཡིན།
  

• 2025ལོར་རང་རྒྱལ་གྱི་ཐེངས་གཅིག་ནུས་རྒྱུའི་ཐོན་སྐྱེད་སྡོམ་འབོར་ཚད་ལྡན་རྡོ་སོལ་ཏུན་དུང་ཕྱུར51.3ཟིན་ནས་ཏུན་དུང་ཕྱུར50ཡི་འགག་སྒོ་ཆེན་མོ་ལས་ཐོག་མར་བརྒལ།

• ཟླ3པའི་ཚེས3ཉིན་གྱི་དགོང་མོར། ལོ་འཁོར་འདིའི་ཟླ་འཛིན་ཧྲིལ་བོ་གཅིག་པུ་དེ་མཚན་མོའི་མཁའ་དབྱིངས་སུ་མངོན།

• ཅང་ཞི་ཞིང་ཆེན་ཞིན་ཀན་རྫོང་གི་སྐྱེས་པ་ཞིག་ཟམ་ཆེན་ཐོག་ནས་མར་ལྡིང་སྟེ་རང་སྲོག་གཅོད་རྩིས་བྱ་དུས་སུ། རླངས་འཁོར་བཏང་ནས་འགྲོ་བཞིན་པའི་ཀྲོའུ་ཙི་དབྱི་འཕྲལ་མར་རླངས་འཁོར་ནས་བབས་ཏེ་ཟམ་པའི་འགྲམ་དུ་བསྐྱོད་དེ་ལྷུང་གྲབས་ཡོད་པའི་སྐྱེས་པ་དེ་དམ་པོར་བཟུང་བ་དང་འབྲེལ་ཉེན་རྟོག་ཕྱོགས་དང་རོགས་སྐྱོབ་པ་ཡོང་བའི་བར་དུ་སྐྱེས་པ་དེར་ཁ་ཏ་སློབ་གསོ་བཏང་ནས་འདུག་རོགས་བྱས།
  

  སྲིད་ཇུས།
  

• ཚན་རྩལ་པུ་སོགས་སྡེ་ཚན་བཞིས་མཉམ་འབྲེལ་ཐོག་ཡིག་ཆ་བཀྲམ་ནས་ཕྱོགས་དྲུག་ཐད་ནས་བྱེད་ཐབས20བཏོན་ཏེ། ཚན་རྩལ་གསར་གཏོད་དང་འཚམ་པའི་ཚན་རྩལ་འགན་བཅོལ་གྱི་སྒྲིག་སྲོལ་དང་ལམ་སྲོལ་མགྱོགས་མྱུར་བསྐྲུན་རྒྱུ་རེད།
  

• ཅང་སུའུ་ཡིས་ཇུས་གཞི་པར་འགྲེམ་བྱས་ནས2026ལོའི་ལོ་མཇུག་ཏུ་སླེབས་སྐབས་གྲོང་ཁྱེར་དོ་དམ་སྡེ་ཁུལ་དུ་སྤེལ་བའི་ལས་ཀའི་ལམ་སྲོལ་འཛུགས་པ་དང་འཐུས་ཚང་དུ་བཏང་ནས་གྲོང་ཁྱེར་དོ་དམ་སྡེ་ཁུལ་དུ་ཁྱབ་ཚད་བརྒྱ་ཆ60%ཟིན་པ་ཁ་གསལ་བཟོས།
  

• སི་ཁྲོན་གྱིས་ཆོག་མཆན་ཐོབ་པའི་གྲངས་འཛིན་ཅན་གྱི་བཀོལ་སྤྱོད་རྣམ་པའི་ཚོད་ལྟ་ཁང་ལ་གྲངས་འཛིན་ཅན་གྱི་གསར་གཏོད་ནུས་པ་མཐོར་འདེགས་རྣམ་གྲངས་ཀྱི་མ་དངུལ་རོགས་སྐྱོར་མཐོ་ཤོས་སྒོར་ཁྲི1000སྟེར་རྒྱུ་ཡིན་ཞེས་ཁ་གསལ་བཏོན།
  

  དེ་རིང་གི་གནམ་གཤིས།

• ནང་སོག་གི་བྱང་ཤར་རྒྱུད་དང་དབུས་རྒྱུད། བྱང་ཤར་ས་ཁུལ་གྱི་ཤར་རྒྱུད་དང་བྱང་རྒྱུད། ཞིན་ཅང་གི་བྱང་རྒྱུད་དང་ནུབ་རྒྱུད། ཧྭ་བྱང་གི་བྱང་རྒྱུད་སོགས་ཀྱི་ས་ཁུལ་ཁ་ཤས་སུ་ཁངས་ཆུང་ནས་ཁངས་འབྲིང་ངམ་ཡང་ན་ཁངས་ཆར་འདྲེས་མ་འབབ་རྒྱུ་རེད། དེའི་ནང་ཧེ་ལུང་ཅང་གི་ནུབ་བྱང་རྒྱུད་དང་། ཧྲན་ཞིའི་བྱང་རྒྱུད། ཧོ་པེའི་ནུབ་བྱང་རྒྱུད་སོགས་ཀྱི་ས་ཁུལ་ཁ་ཤས་སུ་ཁངས་ཆེན་འབབ་རྒྱུ་རེད། སི་ཁྲོན་གྱི་ལྷོ་རྒྱུད་དང་། ཀོང་ཏུང་གི་ལྷོ་རྒྱུད་མཚོ་རྒྱུད། ཧའེ་ནན་གླིང་ཕྲན་སོགས་ཀྱི་ས་ཁུལ་ཁ་ཤས་སུ་ཆར་འབྲིང་ནས་ཆར་ཆེན་འབབ་རྒྱུ་རེད། དེའི་ནང་ཀོང་ཏུང་གི་ལྷོ་ནུབ་རྒྱུད་ཀྱི་མཚོ་རྒྱུད་དང་ཧའེ་ནན་གླིང་ཕྲན་གྱི་བྱང་ཤར་རྒྱུད་སོགས་ཀྱི་ས་ཁུལ་ཁ་ཤས་སུ་དྲག་ཆར་འབབ་རྒྱུ་རེད།