ཞོགས་པའི་ཇ་ཡུན་གསར་འགྱུར།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས། བཤེར་འབེབས། རིན་ཆེན་ཚེ་རིང་།

གསར་འགྱུར་གལ་ཆེན།

• ཚེས5ཉིན་གྱི་ཆུ་ཚོད9པར། རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་མགོ་ཚུགས་ཚོགས་འདུ་པེ་ཅིང་མི་དམངས་ཚོགས་ཁང་ཆེན་མོར་འཚོགས་པ་དང་། ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་མགོ་ཁྲིད་ཚོགས་ཆེན་ལ་ཞུགས།

• ཚེས5ཉིན་གྱི་ཕྱི་དྲོར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་བཅས་ཡིན་པའི་ཞི་ཅིན་ཕིང་ཁོང་གནས་སའི་རྒྱལ་ཡོངས་དམངས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པའི་ཅང་སུའུ་འཐུས་མི་ཚོགས་པའི་གྲོས་ཞིབ་ནང་ཞུགས།
  

• སྲིད་གཞུང་ལས་དོན་སྙན་ཞུའི་ནང2026ལོའི་འཕེལ་རྒྱས་སྔོན་དཔག་དམིགས་ཚད་གཙོ་བོ་གླེང་སྐབས། དཔལ་འབྱོར་འཕར་ཚད4.5%-5%ཟིན་པ་དང་། ལས་དོན་དངོས་ནང་གྲུབ་འབྲས་དེ་བས་ལེགས་པ་ཐོབ་རྒྱུར་འབད་བརྩོན་བྱེད་རྒྱུ་ཡིན་ཞེས་བརྗོད་ཡོད།
  

• ཚན་རྩལ་པུས་གནས་ཚུལ་སྤེལ་བར་གཞིགས་ན། རང་རྒྱལ་གྱི་ཚན་རྩལ་བྱ་གཞག་མགྱོགས་མྱུར་འཕེལ་རྒྱས་ཕྱིན་པ་དང་ཚན་རྩལ་སྟོབས་ཤུགས་སྐས་རིམ་གསར་པ་ཞིག་ཏུ་སླེབས་ནས་གསར་གཏོད་སྟོན་གྲངས་ཀྱི་ཨང་རིམ་གོ་ལ་ཧྲིལ་པོའི་ཨང10པར་འཕར་ཡོད།
  

• བཟོ་འཕྲིན་པུས་གནས་ཚུལ་སྤེལ་བར་གཞིགས་ན། 2025ལོར་རང་རྒྱལ་གྱི་བཟོ་ལས་ཀྱི་རིན་ཐང་འཕར་མ་སྒོར་དུང་ཕྱུར་ཁྲི41.7ཟིན་པ་དང་། དཔལ་འབྱོར་འཕར་རྒྱུར་ལེགས་སྐྱེས་འབུལ་ཚད་ཀྱིས35%ཟིན་ཡོད།
  

• “ལོ་ལྔའི་འཆར་གཞི་བཅུ་བཞི་པའི”དུས་སྐབས་སུ། ཀྲུང་དབྱང་ཁེ་ལས་ཀྱི་རྒྱུ་ནོར་སྡོམ་འབོར་བསྟུད་མར་སྒོར་དུང་ཕྱུར་ཁྲི70དང་། སྒོར་དུང་ཕྱུར་ཁྲི80དང་། སྒོར་དུང་ཕྱུར་ཁྲི90བཅས་ཀྱི་སྐས་རིམ་གསུམ་དུ་སླེབས་པ་དང་། ཁེ་སྤོགས་སྡོམ་འབོར་ལོ་ལྔའི་འཆར་གཞི་གོང་མ་ལས56.2%འཕར་ཡོད།

• ཚེས5ཉིན། ཀྲུང་གོའི་ལུས་རྩལ་འཐུས་མི་ཚོགས་པས་བུད་མེད་ཀྱི་རི་མཐོའི་གངས་ཤུད་ལུས་རྩལ་པ་ལིའུ་སི་ཐུང་དང་སྐྱེས་པའི་པང་ལེབ་རྐྱང་པའི་གངས་ཤུད་ལུས་རྩལ་པ་ཅི་ལི་ཅ་གཉིས་ཀྱིས2026ལོའི་སྨི་ལན-ཁོར་ཏུང་ཏི་ན་དགུན་དུས་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་མགོ་ཚུགས་མཛད་སྒོའི་ཀྲུང་གོའི་ལུས་རྩལ་འཐུས་མི་ཚོགས་པའི་དར་ཆ་སྒྲེང་མཁན་གྱི་འགན་འཁུར་རྒྱུ་ཡིན་ཞེས་ཁྱབ་བསྒྲགས་བྱས།
  

• ཕྱི་འབྲེལ་པུའི་མགྲིན་ཚབ་པས། ཀྲུང་གོ་ཕྱོགས་ཀྱིས་མིག་སྔའི་དབུས་ཤར་ས་ཁུལ་གྱི་ཛ་དྲག་དུས་བབ་ལ་དོ་ཁུར་ཆེན་པོ་བྱེད་ཀྱི་ཡོད། ཉེ་ཆར་ཀྲུང་གོ་ཕྱོགས་ཀྱིས་འདུམ་འགྲིག་གི་ལས་དོན་མང་པོ་སྤེལ་ཡོད་ཅེས་བཤད།
  

• སི་ཕེན་གྱི་དབུ་བཞུགས་བློན་ཆེན་སང་ཆེ་སིས་ཚེས4ཉིན་གསལ་བསྒྲགས་སྤེལ་ནས་སི་ཕེན་གྱིས་ཨ་རི་དང་དབྱི་སི་རལ་གྱིས་དབྱི་རན་སྟེང་སྤྱད་པའི་དམག་དོན་བྱ་སྤྱོད་ལ་ངོ་རྒོལ་བྱ་རྒྱུ་བསྐྱར་བསྒྲགས་བྱས།
  

  སྤྱི་ཚོགས།

• ཀྲུང་དབྱང་གནམ་གཤིས་ལས་ཁུངས་ཀྱིས་སྨུག་པའི་ཉེན་བརྡ་སེར་པོ་བཏང་བ་སྟེ། དེ་རིང་སྔ་དྲོར། ཧོ་པེ་དང་། ཧོ་ནན། ཧྲན་ཏུང་། ཅང་སུའུ། ཨན་ཧུའེ། ཧུའུ་པེ་སོགས་ཀྱི་ས་ཁུལ་ཁག་གཅིག་ཏུ་སྨུག་པ་ཆེན་པོ་ཡོད་པ་དང་། དེའི་ནང་ཧོ་པེ་དང་། ཧོ་ནན། ཅང་སུའུ་སོགས་ཀྱི་ས་ཁུལ་ཁག་གཅིག་ཏུ་སྨུག་པ་སྟུག་པོ་ཡོད་པ་དང་ས་ཁུལ་ལ་ལར་སྨུག་པ་དྲག་པོ་ཡོད།
  

• རྒྱལ་ཁབ་རིག་དངོས་ཅུས་སྡོམ་རྩིས་བྱས་པར་གཞིགས་ན། 2026ལོའི་དཔྱིད་གསར་དུས་ཆེན་རིང་རྒྱལ་ཡོངས་རྟེན་མཛོད་ཁང་གིས་ལྟད་མོ་བ་མི་ཐེངས་ཁྲི་8951.12ལ་སྣེ་ལེན་བྱས་པ་དེ་དུས་མཚུངས་ལས27.6%འཕར་ཡོད་པ་དང་། ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད།
  

• བདེ་འཇགས་དཔྱད་དཔོག་གི་རྨང་གཞིའི་ཐོག་རང་རྒྱལ་མཁའ་འགྲུལ་སྤྱི་གཉེར་གྱིས་མིག་སྔར་རང་རྒྱལ་ནས་དབུས་ཤར་ས་ཁུལ་བར་གྱི་དུས་གཏན་གནམ་གྲུ་ཁག་གཅིག་སླར་གསོ་བྱས་ཡོད།
  

• ཚེས5ཉིན་ཧྲན་ཞི་རུ་གནས་པའི་རང་རྒྱལ་གྱི་རྡོ་སོལ་བྲག་རྡོའི་རླངས་ཞིང་ཆེ་ཤོས་ཏེ། ཏ་ཅི་རླངས་ཞིང་གི་ལོའི་ཐོན་ནུས་སྨི་རྒྱ་དཔངས་གྲུ་བཞི་དུང་ཕྱུར40ལས་བརྒལ་ནས་རང་རྒྱལ་གྱི་རང་བྱུང་སོལ་རླངས་ཐོན་ཚད་འཕར་བའི་ཚབ་བྱེད་ཐོན་ཁུངས་གལ་ཆེན་ཞིག་ཏུ་གྱུར་ཡོད།

• རང་རྒྱལ་གྱི“ཉ་ནས་མིའི་བར”གྱི་འབྱུང་ཁུངས་འཚོལ་ཞིབ་ཞིབ་འཇུག་ཁྱབ་ཁོངས་སུ་ཐོད་བརྒལ་ཆེན་པོ་བྱུང་བ་དང་། ཞིབ་འཇུག་ལས་རང་རྒྱལ་ནི་སྔ་དུས་ཀྱི་སྒལ་ཚིགས་སྲོག་ཆགས་རིམ་འགྱུར་བྱུང་བའི“ཤར་ཕྱོགས་ཀྱི་འབྱུང་གནས”ཡིན་པ་མངོན་ཡོད།
  

• ས་གནས་དེ་གའི་ཚེས3ཉིན། ཏེན་མག་གི་ཁོ་ཕེན་ཧ་ཀེན་དུ་གཉེར་བའི2025ལོ་ནས2026ལོ་བར་གྱི་འཛམ་གླིང་གཞོན་ནུའི་འཁྱགས་ལྟིར་ལེགས་སྐྱེས་འགྲན་བསྡུར་གྱི་ཚོགས་ཆུངAཡི་འགྲན་བསྡུར་ནང་། ཀྲུང་གོའི་བུད་མེད་རྒྱལ་ཁབ་གཞོན་ནུ་རུ་ཁག་སྐར་གྲངས11：4ཡི་ཐོག་ནས་ཨ་རིའི་རུ་ཁག་ལས་རྣམ་པར་རྒྱལ་ཏེ་ཟངས་ཀྱི་རྟགས་མ་ཐོབ།

• ཉེ་ཆར། ཀོང་ཏུང་ཆིང་ཡོན་གྱི་ལོ12ལ་སླེབས་པའི་བུ་ཞིག་སེམས་ཆུང་མ་བྱས་པར་ཆུ་ནང་དུ་ལྷུང་བ་དང་། ལོ73ལ་སླེབས་པའི་རུ་འཁྱུར་དམག་མི་ལའེ་ཧྲེན་ཀྲི་གཏིང་ཟབ་ཚད་སྨི4ཡོད་པའི་ཆུའི་ནང་དུ་མཆོངས་ནས་ཆུ་ནང་དུ་ལྷུང་བའི་བུ་ཆུང་བསྐྱབས།
  

  སྲིད་ཇུས།
  

• ཉིང་ཞ་ཡིས་གསོ་སྦྱོང་གདན་ཞུའི་མཉམ་འགུལ་ལམ་སྲོལ་བཏོན་ནས་རྩལ་ནུས་མཚན་མོའི་སློབ་གྲྭའི་གསོ་སྦྱོང་ས་ཚིགས30ཙམ་དང་། གསོ་སྦྱོང་འཛིན་གྲྭ་ཐེངས100ཡན་འཛུགས་རྩིས་ཡོད་པ་དང་། ལོ་ཧྲིལ་པོར་གསོ་སྦྱོང་གཞི་ཁྱོན་མི་ཐེངས5000ལས་བརྒལ་རྒྱུ་རེད།
  

• མཚོ་སྔོན་གྱིས་བརྡ་ཐོ་བཀྲམ་ནས2030ལོར་སླེབས་སྐབས་ཐོག་བརྩེགས་མང་བའི་འཛུགས་སྐྲུན་ལ་གློག་སྐས500སྒྲིག་སྦྱོར་དང་། སྡོད་ཁང་རྙིང་པའི་གློག་སྐས600ཡན་གསར་བརྗེས་བྱེད་དགོས་པ་ཁ་གསལ་བཏོན།
  

• ཀོང་ཏུང་གིས་འཛུགས་སྐྲུན་གྱི་མཐོ་ཚད་ལ་སྨི250ལས་བརྒལ་བའི་ཐོག་བརྩེགས་མཐོ་བའི་འཛུགས་སྐྲུན་ལ་རྒྱལ་ཁབ་ཀྱི་ཚད་གཞི་ལྟར་ཐད་འཕུར་གནམ་གྲུ་འཇོག་སའི་ཐང་འཛུགས་དགོས་པ་གཏན་འབེབས་བྱས།
  

  དེ་རིང་གི་གནམ་གཤིས།

• ཧེ་ལུང་ཅང་གི་ཤར་ལྷོའི་རྒྱུད་དང་། ཅི་ལིན་གྱི་ཤར་རྒྱུད། ལིའོ་ཉིང་གི་ཤར་རྒྱུད། ཞིན་ཅང་དབྱི་ལི་ལུང་གཞུང་། ཞིན་ཅང་ལྷོ་རྒྱུད་ཀྱི་ནུབ་རྒྱུད་རི་ཁུལ། མཚོ་སྔོན་གྱི་ནུབ་རྒྱུད། ཧྲའན་ཞིའི་བྱང་རྒྱུད། ཧྲན་ཞིའི་དབུས་རྒྱུད། ཧྲན་ཏུང་གི་བྱང་རྒྱུད་སོགས་ཀྱི་ས་ཁུལ་ཁ་ཤས་སུ་ཁངས་ཆུང་ནས་ཁངས་འབྲིང་ངམ་ཁངས་ཆར་འདྲེས་མ་འབབ་རྒྱུ་དང་། ཧྲའན་ཞིའི་དབུས་ལྷོ་རྒྱུད་དང་། ཧོང་ཧོའེ་ཡི་ནུབ་རྒྱུད། འབྲི་ཆུའི་ལྷོ་རྒྱུད་ཀྱི་བྱང་ཤར་རྒྱུད། ལྷོ་ནུབ་ས་ཁུལ་གྱི་ཤར་ལྷོའི་རྒྱུད། ཐའེ་ཝན་གླིང་ཕྲན་སོགས་ཀྱི་ས་ཁུལ་ཁ་ཤས་སུ་ཆར་ཆུང་ནས་ཆར་འབྲིང་འབབ་རྒྱུ་རེད།