མཚོ་བྱང་ཁུལ་མི་དམངས་སྲིད་གཞུང་གཞུང་ལས་ཁང་གི་མཚོ་བྱང་ཁུལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གྱི་ལག་བསྟར་བྱེད་ཐབས།

རྩོམ་སྒྲིག ཀླུ་མོ་མཚོ།  ཡོང་ཁུངས། མཚོ་བྱང་སྲིད་དོན་སྤྱི་བསྒྲགས།  བཤེར་འབེབས། རིན་ཆེན་ཚེ་རིང་།

༄༅། །མཚོ་བྱང་ཁུལ་མི་དམངས་སྲིད་གཞུང་གཞུང་ལས་ཁང་གི་མཚོ་བྱང་ཁུལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གྱི་ལག་བསྟར་བྱེད་ཐབས་དཔར་འགྲེམ་སྐོར་གྱི་བརྡ་སྦྱོར།

བྱང་སྲིད་གཞུང〔2025〕ཨང14པ།

རྫོང་སོ་སོའི་དམངས་སྲིད་གཞུང་དང་། མཚོ་སྔོན་པོ་ཞིང་ར། ཁུལ་སྲིད་གཞུང་གི་སྡེ་ཁག་སོ་སོ་བཅས་ལ།

《མཚོ་བྱང་ཁུལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གྱི་ལག་བསྟར་བྱེད་ཐབས》ཁུལ་སྲིད་གཞུང་གི་རྒྱུན་ལས་ཚོགས་འདུ་ཐེངས62པར་ཞིབ་འཇུག་བྱས་ནས་གྲོས་འཆམ་བྱུང་བས། ད་ལྟ་དཔར་འགྲེམས་བྱས་པ་ཡིན་ལ་ལག་བསྟར་བྱེད་རོགས།

མཚོ་བྱང་ཁུལ་མི་དམངས་སྲིད་གཞུང་གཞུང་ལས་ཁང་གིས།

2025ལོའི་ཟླ6ཚེས17ཉིན།

（ཡིག་ཆ་འདི་ཡོངས་བསྒྲགས་བྱས་ཡོད།）

༄༅། །མཚོ་བྱང་ཁུལ་མི་དམངས་སྲིད་གཞུང་གཞུང་ལས་ཁང་གི་མཚོ་བྱང་ཁུལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གྱི་ལག་བསྟར་བྱེད་ཐབས།

ལེའུ་དང་པོ། སྤྱིའི་དོན་ཚན།

དོན་ཚན་དང་པོ། མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་རིན་ཐང་བརྟན་སྲུང་དང་འཕར་སྣོན་བྱ་བའི་ལས་དོན་སྔར་བས་ལེགས་པོར་བསྒྲུབ་རྒྱུ་དང་། ཚོང་ལས་དངུལ་ཁང་སོ་སོའི་འགྲན་རྩོད་འདུ་ཤེས་དང་ཞབས་ཞུའི་འདུ་ཤེས་ཇེ་མཐོར་གཏོང་བ། ས་གནས་ཀྱི་དངུལ་རྩའི་ཁྲོམ་རའི་གསོན་ཤུགས་ཆེ་རུ་གཏོང་བ་བཅས་ཀྱི་ཆེད་དུ། མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་བདེ་འཇགས་འགན་ལེན་དང་སྐབས་དེའི་ཐོབ་ཆ་སྤྲོད་པར་འགན་ལེན་བྱ་བའི་སྔོན་འགྲོའི་ཆ་རྐྱེན་འོག ཐེབས་རྩའི་མ་དངུལ་ཁག་གཅིག་དུས་བཀག་བཅོལ་དངུལ་གྱི་བྱ་ཐབས་སྤྱད་དེ་ཚོང་ལས་དངུལ་ཁང་དུ་བཞག་ནས། སྐྱེད་ཀའི་ཡོང་འབབ་ཐོབ་པ་མ་ཟད་གནས་ཐང་འཕར་བ་ཐུབ་པ་བྱས་ཏེ། མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་ཐོབ་ཆ་མཐོ་རུ་གཏོང་ཆེད། 《སྤྱི་ཚོགས་གུན་སྐྱོབ་བཅའ་ཁྲིམས》ཀྱི་དོན་ཚན69པ་དང་། 《སྨན་བཅོས་འགན་སྲུང་ཐེབས་རྩ་བེད་སྤྱོད་ལྟ་སྐུལ་དོ་དམ་སྲོལ་ཡིག》གི་དོན་ཚན6པ།《མཚོ་སྔོན་ཞིང་ཆེན་ནོར་སྲིད་ཐིང་གི་རིམ་པ་སོ་སོའི་ནོར་སྲིད་སྡེ་ཁག་དང་སྔོན་རྩིས་ལས་ཁུངས་ཀྱི་མ་དངུལ་གསོག་འཇོག་དོ་དམ་ལ་ཤུགས་སྣོན་བྱེད་པའི་ཐད་ཀྱི་ལག་བསྟར་བསམ་འཆར》（མཚོ་ནོར་མཛོད་ཡིག〔2018〕ཨང2103）གྱི་ལེའུ་བཞི་པའི་དོན་ཚན3པ། 《མཚོ་སྔོན་ཞིང་ཆེན་ནོར་སྲིད་ཐིང་དང་མཚོ་སྔོན་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་གིས་ནོར་སྲིད་པུ་སོགས་སྡེ་ཁག་གསུམ་གྱི་པུ་ཨུའི་མཁར་གྲོང་གི་སྨན་བཅོས་འགན་སྲུང་ཐེབས་རྩ་འགན་སྲུང་བྱ་བའི་ནོར་དོན་ལམ་ལུགས་བརྒྱུད་འགྲེམས་བྱེད་པའི་སྐོར་གྱི་བརྡ་སྦྱོར》（མཚོ་ནོར་སྤྱི་ཡིག〔2018〕ཨང42）གྱི་དོན་ཚན36པ་དང་། དོན་ཚན37པ། དོན་ཚན49པ་བཅས་ཀྱི་འབྲེལ་ཡོད་གཏན་ཁེལ་གཞིར་བཟུང་བ་དང་། མཚོ་བྱང་ས་གནས་ཀྱི་དོན་དངོས་ལ་ཟུང་འབྲེལ་བྱས་ཏེ། བྱེད་ཐབས་འདི་གཏན་འབེབས་བྱས་པ་ཡིན།

དོན་ཚན་གཉིས་པ། བྱེད་ཐབས་འདིའི་ནང་བརྗོད་པའི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་གི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གཏོང་བ་ཞེས་པ་ནི། ཐེབས་རྩའི་བདེ་འཇགས་འགན་ལེན་དང་སྐབས་དེའི་ཐོབ་ཆ་སྤྲོད་པའི་སྔོན་འགྲོའི་ཆ་རྐྱེན་འོག མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩ་དེ་དངུལ་ཁང་ལས་རིགས་ཀྱི་དངུལ་རྩའི་སྒྲིག་གཞིར་དུས་བཀག་བཅོལ་དངུལ་བྱས་ཏེ་སྐྱེད་ཀའི་ཡོང་འབབ་ཐོབ་པའི་བྱ་སྤྱོད་ལ་ཟེར། གཤམ་གྱི་ནང་དོན་ཁ་ཤས་ནང་གི་“མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་གི་དུས་བཀག་བཅོལ་དངུལ”ལ་ “དུས་བཀག་བཅོལ་དངུལ”ཞེས་བསྡུས་མིང་ལྟར་བཀོད་ཡོད།

དོན་ཚན་གསུམ་པ། མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་གི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་བྱེད་པར་ཁྲིམས་མཐུན་ལུགས་མཐུན་དང་། དྲང་གཞག་ཡོངས་བསྒྲགས། བདེ་འཇགས་གཙོ་བོ། ཚན་རིག་དཔྱད་དཔག དབང་འགན་གཅིག་གྱུར་བཅས་ཀྱི་རྩ་དོན་ལྟར། ཚན་རིག་ཚད་ལྡན་དང་། དྲང་གཞག་གསལ་སྒྲོག་གི་མ་དངུལ་གསོག་འཇོག་དོ་དམ་རྐྱེན་སྲོལ་སྤྱད་དེ། མ་དངུལ་གསོག་འཇོག་གི་བདེ་འཇགས་ཉེན་ཁ་དང་སྲིད་གཙང་ཉེན་ཁར་ཟོན་འགོག་བྱ་རྒྱུ།

ལེའུ་གཉིས་པ། སྐྱེད་ཕྱོད་གྲོས་མོལ།

དོན་ཚན་བཞི་པ། མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་དངུལ་ཁང་གི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་ཡོང་བར་སྐྱེད་ཀ་གྲོས་མོལ་དང་འགྲན་རྩོད་གདམ་གསེས་སོགས་ཀྱི་བྱེད་ཐབས་སྤྱད་དེ། དངུལ་རྩའི་ལས་ཁུངས་ཀྱིས་དངུལ་རྩའི་ཞབས་ཞུ་ལེགས་བཅོས་བྱེད་པར་སྐུལ་མ་གཏོང་བ་དང་ཁྲིད་སྟོན་བྱས་ཏེ་ས་གནས་ཀྱི་སྤྱི་ཚོགས་དཔལ་འབྱོར་གོང་དུ་སྤེལ་བར་རམ་འདེགས་བྱས་ནས་དུས་བཀག་བཅོལ་དངུལ་གྱི་ཁེ་འབབ་ཆེ་རུ་གཏོང་དགོས།

（གཅིག）སྐྱེད་ཀ་གཏན་འབེབས། སྐྱེད་ཕྱོད་གྲོས་མོལ་ཞེས་པ་ནི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩས《རྒྱལ་སྲིད་སྤྱི་ཁྱབ་ཁང་གི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་ནོར་དོན་ལམ་ལུགས་འཛུགས་རྒྱུའི་སྐོར་གྱི་ཆོད་དོན》（རྒྱལ་སྤེལ〔1998〕ཨང44པ）དང《སྤྱི་ཚོགས་འགན་བཅོལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་ནོར་དོན་ལམ་ལུགས》སོགས་གཏན་འབེབས་བྱས་པའི་གཟིགས་སྐྱོང་སྐྱེད་ཀའི་རྨང་གཞིའི་ཐོག དངུལ་ཁང་ལས་རིགས་དང་འབྲེལ་བའི་“ཚོང་མགྲོན་ཆེན་མོའི་སྐྱེད་ཕྱོད”ཀྱི་གཏན་ཁེལ་ལྟར། འདེམས་ཞུགས་དངུལ་ཁང་ལ་སྐྱེད་ཕྱོད་གྲོས་མོལ་བྱེད་པ་མ་ཟད། འདྲ་མཉམ་འགྲན་རྩོད་རང་བཞིན་གྱི་བྱེད་ཐབས་ཀྱིས་དུས་བཀག་དངུལ་བཅོལ་བྱས་ཏེ། སྐྱེད་ཕྱོད་ཀྱི་ཆུ་ཚད་མཐོ་རུ་བཏང་ནས་སྐྱེད་ཀའི་ཡོང་འབབ་ཆེ་ཤོས་བརྩོན་ལེན་བྱེད་པར་ཟེར།

（གཉིས）འགྲན་རྩོད་གདམ་གསེས། འགྲན་རྩོད་ཀྱི་བྱེད་ཐབས་བརྒྱུད་ནས་དངུལ་ཁང་ཞིག་དུས་བཅད་བཅོལ་དངུལ་དངུལ་ཁང་དུ་བདམས་ནས་དུས་ཡུན་ལོངས་རྗེས་སྐྱེད་ཀའི་ཡོང་འབབ་ལེན་པ།

དོན་ཚན་ལྔ་པ། དུས་བཀག་བཅོལ་དངུལ་དངུལ་ཁང་ལ་ཉེན་ཁའི་དོན་རྐྱེན་ཚབས་ཆེན་ཐོན་པའམ་ཡང་ན་གཉེར་སྐྱོང་གནས་ཚུལ་ཇེ་སྡུག་ཏུ་སོང་ནས་མ་དངུལ་གསོག་འཇོག་བདེ་འཇགས་ལ་ཤུགས་རྐྱེན་ཐེབས་པའམ་ཡང་ན་ཤུགས་རྐྱེན་ཐེབས་སྲིད་པའི་དཔང་རྟགས་མངོན་གསལ་ཡོད་ཚེ། ཁུལ་ནོར་སྲིད་ཅུ་ཡིས་ཁུལ་སྨན་བཅོས་འགན་སྲུང་ཅུ་དང་མཉམ་དུ་དུས་བཀག་བཅོལ་དངུལ་གཏོང་ལེན་གྱི་འགྲོ་ལུགས་སྒྲུབ་པའམ་ཡང་ན་བྱ་ཐབས་སྤྱད་དེ་མཁར་གྲོང་གི་ལས་བཟོ་པའི་སྨན་བཅོས་འགན་སྲུང་ཐེབས་རྩའི་རྒྱུ་ནོར་བདེ་འཇགས་འགན་ལེན་བྱས་ཆོག

དོན་ཚན་དྲུག་པ། སྲིད་ཇུས་གལ་ཆེན་ལ་འགྱུར་ལྡོག་བྱུང་བའམ་ཡང་ན་ཐོབ་ཐང་གཏོང་སྤྲོད་ཀྱི་དགོས་མཁོ་སོགས་ཀྱི་གནས་ཚུལ་གྱིས་དབང་གིས་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་སྔ་སྣུར་དུ་སྤྲོད་དགོས་པའི་རིགས་ལ་དུས་བཀག་བཅོལ་དངུལ་དངུལ་ཁང་གིས《བཅོལ་དངུལ་དོ་དམ་སྲོལ་ཡིག》དང《སྤྱི་ཚོགས་འགན་བཅོལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་ནོར་དོན་ལམ་ལུགས》གཞིར་བཟུང་ནས་སྐྱེད་ཀ་རྩིས་རྒྱག་དགོས།

དོན་ཚན་བདུན་པ། མཚོ་བྱང་ཁུལ་མི་དམངས་སྲིད་གཞུང་གཞུང་ལས་ཁང་གི《མཚོ་བྱང་ཁུལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་གྱི་འབྲེལ་ཡོད་སྲིད་ཇུས་ལ་བཟོ་བཅོས་དང་འཐུས་ཚང་དུ་གཏོང་རྒྱུའི་སྐོར་གྱི་བརྡ་སྦྱོར》(བྱང་སྲིད་གཞུང་ལས་ཁང་གི〔2025〕ཨང1པོ)ཡིག་ཆའི་དོན་ཚན་བཞི་པའི་ནང་གི་གྲངས་འབོར་ཆེ་བའི་བཅོལ་འཛིན་གྱི་སྐྱེད་ཀའི་འབྲེལ་ཡོད་དོན་ཚན་ནང་གི“གྲངས་འབོར་ཆེ་བའི་བཅོལ་འཛིན་གྱི་གནས་ཐང་འཕར་བའི་སྐྱེད་ཀ་དེ་ལས་བཟོ་པའི་སྨན་བཅོས་འགན་བཅོལ་གྱི་ཐེབས་རྩ་ཁག་གི་འགྲོ་སོང་ཚད་ལས་བརྒལ་བར་ཁ་གསབ་བྱེད་པའི”གཏན་འབེབས་གཞིར་བཟུང་། སྐྱེད་ཀ་རྩིས་རྒྱག་པའི་ཐབས་ནི། ཆེད་དོན་རྩིས་ཐོའི་གཏན་ཁེལ་སྐྱེད་ཀའི་གཞི་རྩའི་རྣམ་གྲངས་ལྟར་སོ་སོར་བརྩི་བ་དང་། རིན་ཐང་བརྟན་སྲུང་དང་འཕར་སྣོན་གྱི་སྐྱེད་ཀ་ཚང་མ་མཁར་གྲོང་གི་ལས་བཟོ་པའི་གྲངས་འབོར་ཆེ་བའི་སྨན་བཅོས་འགན་སྲུང་གི་ཐེབས་རྩའི་ནང་བརྩི་དགོས།

ལེའུ་གསུམ་པ། འགྲན་རྩོད་གདམ་གསེས།

དོན་ཚན་བརྒྱད་པ། ཁུལ་སྨན་བཅོས་འགན་སྲུང་ཅུ་ཡིས་འབྲེལ་ཡོད་སྡེ་ཁག་དང་གྲོས་མོལ་བྱས་ཏེ་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་གྱི་གཞི་ཁྱོན་དང་། དངུལ་ཁང་དངུལ་རྩའི་སྒྲིག་གཞི་འདེམ་པ་དང་བཅོལ་དངུལ་གྱི་དུས་ཚད་བཅས་གཏན་འཁེལ་བྱེད་དགོས། ཁུལ་སྨན་བཅོས་འགན་སྲུང་ཅུ་ཡིས་སྣེ་ཁྲིད་དེ་ཁུལ་ནོར་སྲིད་ཅུ་དང་། མི་དམངས་དངུལ་ཁང་མཚོ་བྱང་ཡན་ལག་དངུལ་ཁང་། རྒྱལ་ཁབ་དངུལ་རྩ་ལྟ་སྐུལ་དོ་དམ་ཅུའི་མཚོ་བྱང་ལྟ་སྐུལ་དོ་དམ་ཡན་ལག་ཅུ། ཁུལ་ཁྲལ་དོན་ཅུ་སོགས་སྡེ་ཁག་གི་འབྲེལ་ཡོད་མི་སྣ་དང་མཉམ་དུ་དཔྱད་འདེམས་ཨུ་ལྷན་བཙུགས་ནས། ཁུལ་སྒྲིག་ཨུ་ལྟ་ཞིབ་ཨུ་ལྷན་གྱི་ལྟ་སྐུལ་མཛུབ་ཁྲིད་འོག་ཕྱོགས་བསྡུས་སྐར་གྲངས་དཔྱད་བསྡུར་གྱི་བྱེད་ཐབས་སྤྱད་དེ། དུས་བཀག་བཅོལ་དངུལ་གྲངས་འབོར་དང་། མ་དངུལ་བཅོལ་བའི་དངུལ་ཁང་སོ་སོར་གཏན་འཁེལ་བྱེད་དགོས།

དོན་ཚན་དགུ་པ། ཁུལ་སྨན་བཅོས་འགན་སྲུང་ཅུ་ཡིས་མ་དངུལ་གྱི་ངོ་བོར་གཞིགས་ནས་དུས་བཀག་བཅོལ་དངུལ་དངུལ་ཁང་གདམ་པའི་དོན་དག་ལ་ཁུལ་ནོར་སྲིད་ཅུ་དང་མཉམ་དུ་འགྲན་རྩོད་གདམ་ག་བྱེད་པའི་སྤྱི་བསྒྲགས་བཟོས་ནས། ཁུལ་མི་དམངས་སྲིད་གཞུང་གི་གཞུང་ཕྱོགས་དྲ་ཚིགས་ཐོག་ནས་ཁྱབ་བསྒྲགས་བྱེད་དགོས། སྤྱི་བསྒྲགས་ནང་མ་དངུལ་ཉར་ཚགས་བྱེད་པའི་དོན་དག་དང་། དངུལ་ཁང་གི་གཞི་རྩའི་ཐོབ་ཐང་གི་བླང་བྱ། མིང་ཐོ་འགོད་སྟངས། མིང་ཐོ་འགོད་པའི་དུས་ཚོད། སྲིད་དོན་གཙང་སྐྱོང་གི་ཁས་ལེན་བླང་བྱ། དཔྱད་ཡིག་འབུལ་དགོས་པ་སོགས་ཀྱི་དོན་ཚན་གསལ་བོར་འགོད་དགོས།

(གཅིག)  དངུལ་ཁང་ཐོབ་ཐང་སྐོར་གྱི་བླང་བྱ།

མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་འགྲན་རྩོད་ནང་ཞུགས་པའི་དངུལ་ཁང་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་ནང་ཁྲིམས་ལྟར་བཙུགས་པའི་དངུལ་ཁང་ལས་རིགས་ཀྱི་དངུལ་རྩའི་སྒྲིག་གཞི་ཡིན་དགོས་པ་མ་ཟད་གཤམ་གསལ་གྱི་ཆ་རྐྱེན་འཛོམས་དགོས།

1.ཁུལ་སྲིད་གཞུང་གནས་སའི་ཁོངས་གཏོགས་ཁུལ་དུ་ཡན་ལག་སྒྲིག་གཞི་བཙུགས་ཡོད་པ་མ་ཟད། ཡུལ་དངོས་ནས“དངུལ་རྩ་དང་སྨན་བཅོས་འགན་བཅོལ”གྱི་ཞབས་ཞུ་མཁོ་འདོན་བྱེད་ཆོག་པའི་ཚོང་ལས་དངུལ་ཁང་ཡིན་དགོས།

2.མཚོ་བྱང་ཁུལ་ནང་ཁུལ་དུ་ཁྲིམས་ལྟར་གཉེར་སྐྱོང་བྱེད་སྒོ་སྤེལ་ནས་ལོ་གསུམ་ཡན་འགོར་ཡོད་པ་དང་། ནང་ཁུལ་གྱི་དོ་དམ་ལམ་སྲོལ་འཐུས་སྒོ་ཚང་བ། ནོར་དོན་གནས་ཚུལ་བརྟན་པོ་བཅས་ཡིན་པ། ཉེན་ཁ་ཚོད་འཛིན་ཐུབ་པའི་ནུས་པ་ཅུང་ཆེ་བ། ཉེ་བའི་ལོ་གསུམ་ནང་དངུལ་རྩ་དང་ནོར་སྲིད་དཔལ་འབྱོར་ཐད་ཀྱི་ཁྲིམས་འགལ་བྱ་སྤྱོད་ཆེན་པོ་མེད་པ་དང་། དངུལ་རྩའི་ཉེན་ཁ་དང་གན་རྒྱ་དང་འགལ་བའི་དོན་རྐྱེན་ཚབས་ཆེན་བྱུང་མ་མྱོང་བ།

3.མ་རྩའི་འདང་ཚད་དང་། ཚུལ་མིན་དངུལ་བུན་གཏོང་ཚད། གཏོང་སྤྲོད་ཁེབས་ཚད། འཁོར་རྒྱུག་རང་བཞིན་གྱི་ཁེབས་ཚད། འཁོར་རྒྱུག་རང་བཞིན་གྱི་བསྡུར་ཚད་སོགས་ཀྱི་དམིགས་ཚད་ལྟ་སྐུལ་དོ་དམ་གྱི་ཚད་གཞིར་སླེབས་ཡོད་པ།

4.ལོ་འཁོར་སྔོན་མའི་ཀྲུང་གོ་མི་དམངས་དངུལ་ཁང་མཚོ་བྱང་ཡན་ལག་དངུལ་ཁང་གི“དངུལ་ཁང་སྒྲིག་གཞིའི་ཕྱོགས་བསྡུས་གདེང་འཇོག”གི་དམིགས་ཚད་རིམ་པ་དཔྱད་བསྡུར་བྱས་འབྲས་རིམ་པB（རིམ་པBཚུད་པ）ཡན་ཡིན་པ།

དངུལ་ཁང་ཁག་གི་བྱེད་པོ་ནི་ཁུལ་དུ་བཅའ་སྡོད་དངུལ་ཁང་ལས་རིགས་ཀྱི་དངུལ་རྩའི་སྒྲིག་གཞིས་འགྲན་རྩོད་ནང་ཞུགས་ནས་འདེམ་དགོས། དུས་བཀག་བཅོལ་དངུལ་དངུལ་ཁང་ནི་མཚོ་བྱང་ཁུལ་ཁོངས་གཏོགས་ཀྱི་ཡན་ལག་དངུལ་ཁང་ཞིག་ལས་སྒོའི་གཙོ་གཉེར་དངུལ་ཁང་དུ་གཏན་འཁེལ་བྱེད་དགོས།

(གཉིས) དུས་བཀག་བཅོལ་དངུལ་དངུལ་ཁང་གི་ཁྱབ་ཁོངས་གཏན་འཁེལ་བྱེད་པ།

དངུལ་ཁང་གི་ཁྱབ་ཁོངས་ནི་ཕྱོགས་བསྡུས་སྐར་གྲངས་དཔྱད་བསྡུར་བྱེད་ཐབས་སྤྱད་དེ། གཉེར་སྐྱོང་གནས་ཚུལ་དང་ས་གནས་ཀྱི་དཔལ་འབྱོར་ལ་བྱས་རྗེས་བཞག་པའི་གནས་ཚུལ་ཕྱོགས་གཉིས་ནས་སྐར་གྲངས་དཔྱད་བསྡུར་བྱེད་དགོས། གཉེར་སྐྱོང་གནས་ཚུལ་གྱི་དམིགས་ཚད་ཀྱི་ཟིན་ཚད60%ཡིན་པ་དང་། དངུལ་ཁང་གི་གཉེར་སྐྱོང་དོ་དམ་གནས་ཚུལ་ལ་དཔྱད་ཞིབ་བྱེད་པ། དེའི་ནང་མ་རྩ་འདང་ཚད་དང་། ཚུལ་མིན་དངུལ་བུན་གཏོང་ཚད། ཁ་གསབ་ཁེབས་ཚད། འཁོར་རྒྱུག་རང་བཞིན་གྱི་བསྡུར་ཚད་བཅས་རིམ་པ་གཉིས་པའི་དམིགས་ཚད་4ཚུད་ཡོད། ས་གནས་དཔལ་འབྱོར་ལ་ནུས་པ་ཐོན་ཚད་ཀྱི་ཟིན་ཚད40%ཡིན་པ་དང་། དཔྱད་ཞིབ་དངུལ་ཁང་གིས་མཚོ་བྱང་ས་གནས་ལ་དངུལ་བུན་གཏོང་བར་རྒྱབ་སྐྱོར་བྱས་ཚུལ། དེའི་ནང་དངུལ་ཁང་གིས་མཚོ་བྱང་ཁུལ་ནང་ཁུལ་གྱི་དངུལ་བུན་སྤྱི་ལ་རྒྱབ་སྐྱོར་བྱས་ཚུལ་དང་། དངུལ་ཁང་གིས་ཁེ་ལས་ཕྲན་ཆུང་ལ་དངུལ་བུན་བཏང་བ་དང་། ཞིང་འབྲེལ་དངུལ་བུན། ལྗང་མདོག་དངུལ་བུན་སོགས་ཁྱབ་ཁོངས་ལ་རྒྱབ་སྐྱོར་བྱས་ཚུལ་ཚུད་ཡོད།

གདེང་འཇོག་ནང་དངུལ་ཁང་གི་སྐར་གྲངས།＝“གཉེར་སྐྱོང་གནས་ཚུལ”གྱི་དམིགས་ཚད་སྐར་གྲངས×60% “ས་གནས་དཔལ་འབྱོར་ལ་ནུས་པ་ཐོན་ཚད་ཀྱི་དམིགས་ཚད་སྐར་གྲངས×40%

སྐར་གྲངས་དཔྱད་བསྡུར་ཚོགས་ཆུང་གི་སྐར་གྲངས་ལ་གཞིགས་ནས། སྐར་གྲངས་ཀྱི་གྲངས་ཚད་དེ་མཐོ་བ་ནས་དམའ་བའི་བར་གྱི་ཨང་རིམ་གཏན་འཁེལ་བྱས་ཏེ། སྐར་གྲངས་ཀྱི་དོན་དངོས་གནས་ཚུལ་ལ་གཞིགས་ནས་མ་དངུལ་བགོ་བཤའ་རྒྱག་དགོས་ལ། ཁུལ་མི་དམངས་སྲིད་གཞུང་གི་གཞུང་ཕྱོགས་དྲ་ཚིགས་ནས་སྤྱི་བསྒྲགས་བྱེད་དགོས། མ་དངུལ་བདེ་འཇགས་ཡོང་བར་ཁག་ཐེག་བྱེད་ཆེད། དུས་བཀག་བཅོལ་དངུལ་དངུལ་ཁང་ཁག་གི་སྐབས་དེའི་བགོ་སྐལ་གྲངས་འབོར་དེ་དུས་སྐབས་དེའི་དུས་བཀག་བཅོལ་དངུལ་སྡོམ་འབོར་གྱི30%ལས་བརྒལ་མི་རུང་།

（གསུམ） དུས་བཀག་བཅོལ་དངུལ་གཏོང་སྤྲོད།

ཁུལ་སྨན་བཅོས་འགན་སྲུང་ཅུ་དང་ཁུལ་ནོར་སྲིད་ཅུ་ཡིས་འདེམ་ཡོད་པའི་དུས་བཀག་བཅོལ་དངུལ་དངུལ་ཁང་དང་དུས་བཀག་བཅོལ་དངུལ་གྱི་གྲོས་མཐུན་བཞག་རྗེས། དུས་བཀག་བཅོལ་དངུལ་དངུལ་ཁང་ལ་མ་དངུལ་གཏོང་སྤྲོད་བྱེད་པ། གཏོང་སྤྲོད་མ་དངུལ་འབྱོར་རྗེས་དུས་བཀག་བཅོལ་དངུལ་དངུལ་ཁང་གིས་ཁུལ་ནོར་སྲིད་ཅུ་ལ་དུས་བཀག་ལྟར་དངུལ་བཅོལ་འཛིན་ཡིག་འབྲི་དགོས་ལ། དངུལ་ཁང་གི་མིང་དང་། བཅོལ་དངུལ་གྱི་དངུལ་གྲངས། སྐྱེད་ཕྱོད་དང་དུས་ཡུན་སོགས་ཀྱི་རྒྱུ་རྐྱེན་གཙོ་བོ་གསལ་བོར་འགོད་དགོས་པ་མ་ཟད། ཁུལ་སྨན་བཅོས་འགན་སྲུང་ཅུ་ལ་ཐོ་འགོད་སྙན་སེང་ཞུ་དགོས།

དོན་ཚན་བཅུ་པ། དུས་བཀག་བཅོལ་དངུལ་དངུལ་ཁང་གིས་མ་དངུལ་བཅོལ་བར་ཁ་གཡར་ནས་ནོར་སྲིད་ཆེད་སྤྱོད་རྩིས་ཁྲ་གསར་དུ་བཙུགས་མི་ཆོག དུས་བཀག་བཅོལ་དངུལ་དུས་ཡུན་ཐོན་ན། ཁུལ་ནོར་སྲིད་ཅུ་ཡིས་ཁུལ་སྨན་བཅོས་འགན་སྲུང་ཅུ་དང་མཉམ་དུ་དུས་བཀག་བཅོལ་དངུལ་དངུལ་ཁང་ལ་དུས་ཡུན་ཐོན་པའི་མ་དངུལ་དང་སྐྱེད་ཀའི་དངུལ་སྤྲོད་ཀྱི་རྒྱུ་རྐྱེན་གཙོ་བོའི་ཆ་འཕྲིན་མཁོ་འདོན་བྱེད་རྒྱུ་དང་། དུས་བཀག་བཅོལ་དངུལ་དངུལ་ཁང་གིས་བཀའ་རྒྱ་གཞིར་བཟུང་དུས་བཀག་བཅོལ་དངུལ་གྱི་མ་དངུལ་དང་སྐྱེད་ཀ་སོ་སོར་གཏན་ཁེལ་བྱས་པའི་ནོར་སྲིད་ཀྱི་ཆེད་སྤྱོད་རྩིས་ཁྲའི་ནང་འཇོག་དགོས་པ་མ་ཟད། རྒྱལ་ཁབ་ཀྱི་འབྲེལ་ཡོད་གཏན་འབེབས་གཞིར་བཟུང་ཞིབ་རྩིས་ཀྱང་བཟོ་དགོས། གལ་ཏེ་དུས་བཀག་བཅོལ་དངུལ་དངུལ་ཁང་གིས་དུས་ཐོག་ཏུ་མ་དངུལ་དང་སྐྱེད་ཀ་འདང་ངེས་མ་སྤྲད་པའི་དོན་དག་ཐེངས་གཅིག་བྱུང་ན། དུས་ཐེངས་རྗེས་མའི་དུས་བཀག་བཅོལ་དངུལ་འགྲན་རྩོད་ནང་མ་དངུལ་བགོ་བཤའ་རྒྱག་སྐབས་དངུལ་ཁང་གི་ཞབས་ཞུའི་ཆུ་ཚད་སྐར་མ་ཀླད་གོར་ལྟར་རྩིས་རྒྱག་པ་ཡིན་ལ། ཐེངས་གཉིས་བར་བྱུང་ན་དུས་བཀག་བཅོལ་དངུལ་དངུལ་ཁང་གི་ལོ་གཉིས་ནང་ཞུགས་པའི་ཐོབ་ཐང་མེད་པར་བཟོས་ངེས་ཡིན།

དོན་ཚན་བཅུ་གཅིག དུས་བཀག་བཅོལ་དངུལ་དངུལ་ཁང་ལ་གཤམ་གསལ་གྱི་བྱ་སྤྱོད་ཡོད་པ་དང་གནས་ཚུལ་ཚབས་ཆེ་ན། ཁུལ་སྨན་བཅོས་འགན་སྲུང་ཅུ་ཡིས་ཁུལ་ནོར་སྲིད་ཅུ་ལ་གྲོས་མོལ་བྱས་ཏེ། དུས་བཀག་བཅོལ་དངུལ་དངུལ་ཁང་གི་ཐོབ་ཐང་མེད་པར་བཟོ་རྒྱུ་དང་། ལོ་གསུམ་ནང་སྤྱི་ཚོགས་འགན་བཅོལ་གྱི་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་འགྲན་རྩོད་ནང་ཞུགས་མི་ཆོག

（གཅིག）འགྲན་རྩོད་གདམ་ག་བྱེད་རིང་རྫུན་མ་སྒྲིག་བཟོ་དང་དོན་དངོས་སྦ་གསང་སོགས་ཀྱི་བྱ་སྤྱོད་ཡོད་པ།

（གཉིས）སྲིད་གཙང་ཁས་ལེན་བརྩི་སྲུང་མ་བྱས་པའམ་ཡང་ན་འགྲན་རྩོད་གདམ་གསེས་ནང་ཞུགས་པའི་བརྒྱུད་རིམ་ཁྲོད་ཕན་ཚུན་གྱི་ཁེ་ཕན་ལ་འབྲེལ་བ་ཡོད་པའི་བྱ་སྤྱོད་ཡོད་པ།

（གསུམ）མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་གྱི་གྲོས་མཐུན་ལྟར་བབ་མཚུངས་ཀྱི་འོས་འགན་མ་བསྒྲུབས་པ།

（བཞི）འགྲན་རྩོད་ཀྱི་ཁས་ལེན་ལྟར་དུས་བཀག་བཅོལ་དངུལ་གྱི་རིན་གོང་ཁྱབ་བསྒྲགས་བྱེད་པའི་སྐྱེད་ཕྱོད་དུས་བཀག་བཅོལ་དངུལ་མ་བྱས་པ་མ་ཟད་ཡོ་བསྲང་མི་བྱེད་པའི་རིགས།

（ལྔ）མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་རིན་ཐང་བརྟན་སྲུང་དང་འཕར་བར་ཤུགས་རྐྱེན་ངན་པ་ཐེབས་པའི་བྱ་སྤྱོད་གཞན་དག་ཡོད་པ་བཅས།

ལེའུ་བཞི་པ། དོ་དམ་འགན་འཁྲི།

དོན་ཚན་བཅུ་གཉིས། མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩ་དངུལ་ཁང་གི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་དོ་དམ་ཁྲོད་ཀྱི་ཁུལ་སྨན་བཅོས་འགན་སྲུང་ཅུའི་འགན་འཁྲི་གཙོ་བོ་ནི།

（གཅིག）མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གྱི་ལས་དོན་ཁག་ལ་སྣེ་ཁྲིད་དང་སྒྲིག་འཛུགས་བྱས་ཏེ། རང་རྟོགས་ངང་རྩིས་བཤེར་སོགས་ལྟ་སྐུལ་སྡེ་ཁག་གི་ལྟ་སྐུལ་དོ་དམ་དང་ལེན་བྱེད་པ།

（གཉིས）མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་དོ་དམ་སྐོར་གྱི་འབྲེལ་ཡོད་གཏན་འབེབས་བཟོ་བ།

（གསུམ）འབྲེལ་ཡོད་གཏན་འབེབས་གཞིར་བཟུང་མཁར་གྲོང་གི་ལས་བཟོའི་དུས་བཀག་བཅོལ་དངུལ་གྱི་གཞི་ཁྱོན་དང་བཅོལ་ཡུན་གྱི་བསམ་འཆར་འདོན་པ།

（བཞི）དུས་བཀག་བཅོལ་དངུལ་དངུལ་ཁང་ལ་ལྟ་སྐུལ་དང་དོ་དམ་བྱེད་པར་སྣེ་ཁྲིད་དང་། དུས་བཀག་བཅོལ་དངུལ་གྱི་དུས་མཇུག་ཏུ་ཁུལ་ནོར་སྲིད་ཅུ་དང་དེ་བཞིན་འབྲེལ་ཡོད་སྡེ་ཁག་སྒྲིག་འཛུགས་བྱས་ནས། དུས་བཀག་བཅོལ་དངུལ་དངུལ་ཁང་གི་ཕྱོགས་བསྡུས་རང་བཞིན་གྱི་དཔྱད་དཔོག་ལས་དོན་སྤེལ་རྒྱུ་དང་། སྐབས་དེར་རེས་སྐོར་གསར་པའི་འགྲན་རྩོད་རང་བཞིན་གྱི་གདམ་ག་བྱེད་པའམ་ཡང་ན་གྲོས་མཐུན་མུ་མཐུད་ཉར་ཚགས་བྱེད་མིན་གཏན་འཁེལ་བྱ་རྒྱུ།

（ལྔ）མཁར་གྲོང་གི་ལས་བཟོ་པའི་དུས་བཀག་བཅོལ་དངུལ་དངུལ་ཁང་ལ་བཅོལ་དངུལ་གྲོས་མཐུན་འཇོག་རྒྱུ།

（དྲུག）དངུལ་ཁང་གི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་གྱི་དོ་དམ་ལས་ཀ་གཞན་དག་ལ་ཞུགས་རྒྱུ་བཅས་ཡིན།

དོན་ཚན་བཅུ་གསུམ། མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩ་དངུལ་ཁང་གི་དུས་བཀག་བཅོལ་དངུལ་གྱི་རིན་ཐང་བརྟན་སྲུང་དང་འཕར་སྣོན་དོ་དམ་ཁྲོད་ཀྱི་ཁུལ་ནོར་སྲིད་ཅུའི་འགན་འཁྲི་གཙོ་བོ་ནི།

（གཅིག）ཁུལ་སྨན་བཅོས་འགན་སྲུང་ཅུ་ལ་རིན་ཐང་བརྟན་སྲུང་དང་འཕར་སྣོན་དོ་དམ་གྱི་འབྲེལ་ཡོད་གཏན་འབེབས་བཟོ་རོགས་བྱ་རྒྱུ།

（གཉིས）ཁུལ་སྨན་བཅོས་འགན་སྲུང་ཅུ་དང་མཉམ་དུ་རིན་ཐང་བརྟན་སྲུང་དང་འཕར་སྣོན་ཡོང་བའི་བྱེད་ཐབས་དང་བཀོལ་སྤྱོད་ཇུས་གཞིར་ཞིབ་འཇུག་བྱ་རྒྱུ།

(གསུམ)ལས་སྒོའི་གཏན་འབེབས་ལྟར་དུས་བཀག་བཅོལ་དངུལ་དངུལ་ཁང་དང་དུས་བཀག་བཅོལ་དངུལ་གྱི་གྲོས་མཐུན་བཞག་ནས་གྲོས་མཐུན་གྱི་ནང་དོན་བསྒྲུབ་རྒྱུ།

（བཞི）ཁུལ་སྨན་བཅོས་འགན་སྲུང་ཅུར་དུས་བཀག་བཅོལ་དངུལ་དངུལ་ཁང་ལ་ལྟ་སྐུལ་དང་དོ་དམ་བྱེད་རོགས་བྱས་ནས། རྩིས་བཤེར་སོགས་ལྟ་སྐུལ་སྡེ་ཁག་གི་ལྟ་སྐུལ་དོ་དམ་རང་རྟོགས་ངང་དང་ལེན་བྱེད་པ།

དོན་ཚན་བཅུ་བཞི། མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་དུས་བཀག་བཅོལ་དངུལ་དངུལ་ཁང་གི་འགན་འཁྲི་གཙོ་བོ་ནི།

（གཅིག）མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་གསོག་ཉར་བདེ་འཇགས་དང་ཆ་ཚང་ཡོང་བར་འགན་ལེན་བྱེད་དགོས།

（གཉིས）འབྲེལ་ཡོད་སྡེ་ཁག་གི་ལྟ་སྐུལ་དོ་དམ་རང་རྟོགས་ཀྱིས་དང་ལེན་བྱེད་པ།

（གསུམ）བཅོལ་ཡུན་དང་སྐྱེད་ཕྱོད་སོགས་ཀྱི་འབྲེལ་ཡོད་ཁ་ཆད་ལག་བསྟར་ནན་མོ་བྱེད་པ།

（བཞི）མ་དངུལ་གཞན་སྒྱུར་གྱི་ལས་ཀ་དུས་ཐོག་ཏུ་སྒྲུབ་པ།

（ལྔ）ཟླ་རེར་དུས་བཀག་བཅོལ་དངུལ་གྱི་རྩིས་ཁྲའི་རེའུ་མིག་འབུལ་རྒྱུ།

（དྲུག）མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་གསོག་འཇོག་ཉེན་ཁ་དུས་ཐོག་ཏུ་དྲན་སྐུལ་བྱེད་དགོས་པ་མ་ཟད། བྱ་ཐབས་སྤྱད་དེ་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་གསོག་འཇོག་བདེ་འཇགས་འགན་སྲུང་བྱེད་དགོས།

（བདུན）སྨན་བཅོས་འགན་སྲུང་སྒྲིག་སྲོལ་སྒྱུར་བཅོས་ཀྱི་དོན་དག་ཁྲོད་ཀྱི་དངུལ་ཁང་གིས་འགན་བཅོལ་ནང་ཞུགས་མཁན་མང་ཚོགས་ལ་ཞབས་འདེགས་ཞུ་བའི་ལས་དོན་ཁག་རང་འགུལ་ངང་ཡག་པོ་སྒྲུབ་དགོས།

ལེའུ་ལྔ་པ། ཞར་བྱུང་དོན་ཚན།

དོན་ཚན་བཅོ་ལྔ། གལ་ཏེ་རྒྱལ་ཁབ་ལ་མཁར་གྲོང་གི་ལས་བཟོ་པའི་སྨན་བཅོས་འགན་བཅོལ་ཐེབས་རྩའི་རིན་ཐང་བརྟན་སྲུང་དང་འཕར་སྣོན་ཐད་གཏན་འབེབས་གསར་པ་ཡོད་ཚེ། ཁུལ་ནོར་སྲིད་ཅུ་དང་ཁུལ་སྨན་བཅོས་འགན་སྲུང་ཅུ་ཡིས་བྱ་ཐབས་འདི་བཟོ་བཅོས་བྱེད་དགོས།

དོན་ཚན་བཅུ་དྲུག བྱེད་ཐབས་འདི་མཚོ་བྱང་ཁུལ་སྨན་བཅོས་འགན་སྲུང་ཅུ་ཡིས་འགྲེལ་བཤད་རྒྱག་དགོས།

དོན་ཚན་བཅུ་བདུན། བྱེད་ཐབས་འདི་པར་འགྲེམས་བྱས་པའི་ཉིན་ནས་བཟུང་ལག་བསྟར་བྱེད་རྒྱུ།

ཁོན་ཐར་ཚེ་རིང་གིས་བསྒྱུར།