ཨ་མྱེས་སྟོང་སོའི་བསང་མཆོད།

༈ ཡིད་འོང་ས་འཛིན་ཕྲེང་བའི་ཡོངས་བསྐོར་བའི།།  དགེ་མཚན་བཅུད་ལྡན་ས་ཡི་ཐིག་ལེ་མཆོག།  མདུང་རྩེ་ཞེས་གྲགས་ལྷུན་པོ་ལྟར་བརྗིད་པའི།། མཐུ་ལྡན་དྲེགས་པའི་སྡེ་དཔོན་འཁོར་བཅས་ཀྱིས།། གཙང་མ་ཕུད་ཀྱི་བསང་མཆོད་འདི་བཞེས་ལ།། མི་མཐུན་རྒུད་པའི་སྨག་རུམ་ཀུན་ཞི་ཞིང་།། ཁྲིམས་ལྡན་མཆོད་ཡོན་ཆོས་སྲིད་འབྱོར་བའི་ཚོགས།། མ་ལུས་གཡང་དུ་འདུ་བའི་འཕྲིན་ལས་མཛོད།། མདོར་ན་མཆོག་གསུམ་བདེན་པའི་བྱིན་རླབས་དང་།། རྟེན་འབྱུང་བསླུ་བ་མེད་པའི་ཆོས་ཉིད་ཀྱིས།། དཀར་ཕྱོགས་སྐྱོང་བའི་མཐུ་སྟོབས་གཟི་བྱིན་རྒྱས།། འགྲོ་རྣམས་ཕན་བདེའི་དཔལ་ལ་སྤྱོད་གྱུར་ཅིག།  ཅེས་པ་འདི་ནི་དཔའ་རིས་དགེ་བཤེས་བློ་བཟང་རབ་གསལ་གྱིས་ཨ་རིག་དགོན་ཆེན་དགའ་ལྡན་ཆོས་འཕེལ་གླིང་ནས་སྦྱར་བའོ།།